Toiŋjɔlɛ Baaba Jeŋ Lɛŋ Fɛɛ

Mɔ fɛɛ mɔ miisumɔ ni ehi jeŋ ko ni toiŋjɔlɛ hiɔ mli lɛ mli. Afii babaoo nɛ ni je lɛŋ hiɛnyiɛlɔi ebɔ mɔdɛŋ akɛ amɛbaahã béi ni yaa nɔ yɛ je lɛŋ hei ni awuɔ ta yɛ lɛ asɛɛ afo, koni toiŋjɔlɛ aba. Bei komɛi lɛ amɛmɔdɛŋbɔɔ lɛ kɛ toiŋjɔlɛ baa be fioo. Shi dɔlɛ sane ji, etsɛɛɛ kɛkɛ lɛ, amɛbɔi nɔmɔ ekoŋŋ. Ani abaaná toiŋjɔlɛ yɛ je lɛŋ gbi ko? Hɛɛ! Kɛhã bɔ ni enɛ baaba lɛ ehã lɛ, susumɔ nibii ni Yesu baafee, kɛ nibii ni etsɔɔ lɛ ekomɛi ahe okwɛ.

Nibii ni Yesu baafee

Biblia lɛ tsɔɔ wɔ nibii ni etsɛŋ Yesu baafee koni toiŋjɔlɛ aba je lɛ mli.

• “Abaatsɛ [Yesu] akɛ . . . Toiŋjɔlɛ Lumɔ. Enɔyeli lɛ dalɛ kɛ toiŋjɔlɛ lɛ baŋ naagbee.” (Yesaia 9:6, 7) Akɛ Nyɔŋmɔ Maŋtsɛyeli lɛ nɔ Maŋtsɛ lɛ, Yesu baahã toiŋjɔlɛ aba je lɛŋ he fɛɛ he kɛya naanɔ.

• “Ebaajie ohiafo ni bolɔɔ kɛhã yelikɛbuamɔ lɛ . . . kɛ mɔ fɛɛ mɔ ni bɛ yelikɛbualɔ lɛ.” (Lala 72:12-14) Yesu kɛ hegbɛ ni eyɔɔ lɛ baatsu nii koni ehã akɛ mɔ fɛɛ mɔ aye jogbaŋŋ, ni kɛtsɔ no nɔ lɛ, tai, yiwalɛ nifeemɔi, kɛ nɔnai fɛɛ asɛɛ baafo.

• “Jeŋmaŋ ko wóŋ klante nɔ yɛ jeŋmaŋ ko nɔ, ni amɛkaseŋ tawuu hu dɔŋŋ.” (Yesaia 2:4) Kɛ́ Yesu bɔi je lɛ nɔ yeli lɛ, adesai fɛɛ baakase bɔ ni akɛ mɛi hiɔ shi yɛ toiŋjɔlɛ mli, jeee bɔ ni akɛ mɛi nɔɔ.

Kɛ́ ootao ole bɔ ni Yesu baafee ekɛ toiŋjɔlɛ aba je lɛ mli, kɛ nɔ ni obaafee koni ohi nakai je lɛ mli lɛ, kwɛmɔ vidio ni sɛɛ kɛɛɛ ni ji, Mɛni Ji Nyɔŋmɔ Maŋtsɛyeli Lɛ?

Nibii ni Yesu tsɔɔ

Yɛ wɔbe nɛɛ amli po lɛ, Yesu tsɔɔmɔi lɛ miiye eebua mɛi akpekpei pii ni amɛkɛ amɛhe miihi shi yɛ toiŋjɔlɛ mli. Yɛ ewiemɔ ko ni ehã ni ehé shi waa lɛ mli lɛ, etsɔɔ anɔkwalei komɛi, ni nakai anɔkwalei lɛ eye ebua mɛi ni amɛkɛ amɛhe hiɔ shi yɛ toiŋjɔlɛ mli be fɛɛ be. Naa fioo komɛi.

• “Mɛi ni sumɔɔ toiŋjɔlɛ lɛ yɛ miishɛɛ.” (Mateo 5:9) Yesu wo esɛɛnyiɛlɔi lɛ ŋaa akɛ amɛkabe, agbɛnɛ hu amɛtiu toiŋjɔlɛ sɛɛ.

• “Klɛŋklɛŋ lɛ, okɛ onyɛmi lɛ ayasaa, ni oku osɛɛ oba, ni okɛ onikeenii lɛ abahã.” (Mateo 5:23, 24) Yesu kɛɛ etoibolɔi lɛ akɛ, kɛ́ bei ba amɛteŋ lɛ, amɛsaa amɛteŋ oya. Etsɔɔ amɛ akɛ ja amɛkɛ mɛi ehi shi yɛ toiŋjɔlɛ mli dani naanyobɔɔ kpakpa baahi amɛ kɛ Nyɔŋmɔ teŋ.

• “Nyɛkpaa mɛi akojomɔ, koni akakojo nyɛ.” (Mateo 7:1) Yesu bɔ kɔkɔ akɛ wɔkakojo mɛi bɔ ni esaaa, ni wɔkakpa mɛi gbɛ akɛ amɛfee nibii ni wɔ diɛŋtsɛ lɛ wɔfeee, ejaakɛ nibii ni tamɔ nakai lɛ baanyɛ ekɛ béi aba. Yesu tsɔɔ esɛɛnyiɛlɔi lɛ akɛ, nɔ najiaŋ ni amɛbaatao mɛi ahe tɔmɔi lɛ, esa akɛ ‘amɛya nɔ amɛkɛ mɛi ahe eshai ake’ amɛ.​—Luka 6:37.

Mɛi ni yɔɔ je lɛ mli hei srɔtoi kɛ Yesu tsɔɔmɔi lɛ miitsu nii yɛ amɛshihilɛ mli. Yɛ hei ni yiwalɛ nifeemɔi kɛ béi yɔɔ po lɛ, amɛbɔɔ mɔdɛŋ ni amɛsaa amɛteŋ béi yɛ toiŋjɔlɛ mli, amɛkɛ mɛi ahe eshai keɔ amɛ, ni amɛjieɔ suɔmɔ kpo kɛ́ mɛi kɛ amɛ yeee jogbaŋŋ po.

Kɛ́ ootao ole bɔ ni Yesu tsɔɔmɔi lɛ eye ebua mɛi ni amɛná toiŋjɔlɛ lɛ, kanemɔ sane ni ji “Bɔ Ni Obaafee Oná Toiŋjɔlɛ Yɛ Tai Ni Awuɔ Lɛ Fɛɛ Sɛɛ.”