Gbekɛbii Kɛ Smatfon —Fã 2: Tsɔɔmɔ Gbekɛbii Bɔ Ni Amɛbaafee Amɛkɛ Smatfon Atsu Nii Yɛ Hiɛshikamɔ Mli

Smatfon ji dɛŋdade ko ni he yɔɔ sɛɛnamɔ, shi ebaanyɛ eye awui hu kɛ́ akɛtsuuu nii yɛ hiɛshikamɔ mli. Te obaafee tɛŋŋ otsɔɔ obii lɛ bɔ ni amɛbaafee amɛkɛ smatfon atsu nii yɛ hiɛshikamɔ mli? Akɛ nɔkwɛmɔnɔ lɛ, bei enyiɛ esa akɛ oŋmɛ amɛ gbɛ ni amɛkɛ smatfon lɛ atsu nii?a

• Nɔ ni esa akɛ ole

• Nɔ ni obaanyɛ ofee

• “Fɔlɔ ni yɔɔ suɔmɔ lɛ woɔ mlai”

Nɔ ni esa akɛ ole

• Smatfon baanyɛ ekɛ mɔ ni kɛtsuɔ nii lɛ awo oshãra mli. Taakɛ wɔna yɛ sane ni ji “Gbekɛbii Kɛ Smatfon​—Fã 1: Ani Esa Akɛ Mibi Aná Smatfon” lɛ mli lɛ, smatfon hãa gbekɛbii lɛ náa hegbɛ kɛnaa nɔ fɛɛ nɔ ni yɔɔ intanɛt lɛ nɔ, ekpakpa jio, efɔŋ jio.

  “Ewaaa kwraa akɛ ohiɛ baakpa nɔ akɛ smatfon baahã obii lɛ kɛ mɛi fɔji ashãra ni amɛkase nibii gbohii hu.”​—Brenda.

• Gbɛtsɔɔmɔ he miihia gbekɛbii. Oblahii kɛ oblayei babaoo kɛ kɔmpiuta kɛ amɛhenɔi lɛ bɔi nitsumɔ kɛjɛ amɛgbekɛbiiashi tɔ̃ɔ, shi onukpai babaoo yɛ ni kpaako amɛkɛbɔi nitsumɔ. Kɛ̃lɛ, enɛ etsɔɔɔ akɛ fɔlɔi leee nɔ ko nɔ ko kwraa yɛ kɔmpiuta kɛ amɛhenɔi lɛ ahe, ni no hewɔ lɛ, gbekɛbii ji mɛi ni esa akɛ amɛtsɔɔ bɔ ni amɛkɛ amɛsmatfon lɛ baatsu nii amɛhã kɛ be ni esa akɛ amɛkɛtsu nii.

  Anɔkwa, eeenyɛ efee akɛ obii lɛ le bɔ ni akɛ smatfon lɛ tsuɔ nii moŋ, shi nɔ ko etsɔɔɔ akɛ amɛbaanyɛ amɛkɛtsu nii yɛ hiɛshikamɔ mli. Yɛ gbekɛbii ni le kɔmpiuta kɛ amɛhenɔi lɛ amli waa po agbɛfaŋ lɛ, esa akɛ amɛfɔlɔi atsɔɔ amɛ bɔ ni amɛkɛ smatfon baatsu nii yɛ hiɛshikamɔ mli.

  “Kɛ́ ohã obi smatfon, ni otsɔɔɔ lɛ bɔ ni akɛtsuɔ nii yɛ hiɛshikamɔ mli lɛ, etamɔ nɔ ni okɛ lɛ eyata lɔle steer sɛɛ, ospaki tsɔne lɛ, kɛkɛ ni okɛɛ lɛ akɛ, ‘ofainɛ kwɛmɔ ohe nɔ jogbaŋŋ,’ be mli ni otsɔko lɛ bɔ ni adraiviɔ.”​—Seth.

Nɔ ni obaanyɛ ofee

• Bɔɔ mɔdɛŋ ni ole nibii ni obi lɛ fon lɛ baanyɛ afee. Esa akɛ ole nibii ni yɔɔ obi lɛ fon lɛ nɔ ni baanyɛ aye abua lɛ ni ekɛtsu nii yɛ hiɛshikamɔ mli. Akɛ nɔkwɛmɔnɔ lɛ:

  Mɛɛ nibii yɔɔ fon lɛ nɔ ni hãa fɔlɔ lɛ hegbɛ koni enyɛ ekudɔ bei abɔ ni ebi lɛ baanyɛ aye yɛ fon lɛ nɔ kɛ wɛbsaiti ni ebaanyɛ eya nɔ?

  Ani ole akɛ jeee be fɛɛ be nibii ni yɔɔ fon lɛ nɔ ni akɛtsĩɔ nibii ni asumɔɔɔ ni ana lɛ anaa lɛ tsuɔ nii jogbaŋŋ?

  Kɛ́ ole nibii ni yɔɔ obi lɛ smatfon lɛ nɔ jogbaŋŋ lɛ, obaanyɛ oye obua lɛ ni ekɛtsu nii yɛ hiɛshikamɔ mli.

  Biblia mli shishitoo mla: “Nilee hãa gbɔmɔ náa hewalɛ babaoo.”​—Abɛi 24:5.

• Wó mlai. Kpɛɛ oyiŋ yɛ nɔ ni obaaŋmɛ gbɛ kɛ nɔ ni oŋmɛɛɛ gbɛ he. Akɛ nɔkwɛmɔnɔ lɛ:

  Ani obaaŋmɛ obi lɛ gbɛ ni ekɛ fon aba niyeli okpɔlɔ he loo ekɛtsu nii be mli ni nyɛsaraa wekumɛi kɛ nanemɛi?

  Ani esa akɛ obii lɛ kɛ amɛfon lɛ awɔ ni je atsɛre?

  Mɛɛ apps obaaŋmɛ lɛ gbɛ ni ekɛwo nɔ?

  Bei enyiɛ esa akɛ oŋmɛ lɛ gbɛ ni eye yɛ smatfon lɛ nɔ?

  Ani obaato be pɔtɛɛ ko ni ebaanyɛ ekɛ smatfon lɛ atsu nii yɛ gbi lɛ mli?

  Hã ele mlai ni owo lɛ, ni kɛ́ eku mlai lɛ eko mli lɛ, bɔɔ mɔdɛŋ ni okɛ toi gbalamɔ ni sa lɛ ahã lɛ.

  Biblia mli shishitoo mla: “Kaatsĩ oblanyo tsɔsemɔ naa.”​—Abɛi 23:13, shishigbɛ niŋmaa.

• Fɔɔ efon lɛ nɔ kwɛmɔ. Esa akɛ ole obi lɛ paswɛd, ni yɛ be kɛ beiaŋ lɛ ole nibii ni yɔɔ efon lɛ nɔ, tamɔ tɛs mɛseji, apps, mfonirii, kɛ saiti anɔ ni etee.

  “Wɔkɛɛ wɔbiyoo lɛ akɛ yɛ be kɛ beiaŋ lɛ, wɔbaakwɛ efon lɛ nɔ ni wɔtsɔŋ hiɛ wɔhã ele. Kɛ́ wɔna akɛ ekɛ fon lɛ tsuuu nii yɛ hiɛshikamɔ mli lɛ, hegbɛi komɛi ni eyɔɔ yɛ fon lɛ he lɛ baaŋmɛɛ lɛ.”​—Lorraine.

  Akɛ fɔlɔ lɛ, oyɛ hegbɛ ni oleɔ nibii ni obi lɛ kɛ esmatfon lɛ feɔ.

  Biblia mli shishitoo mla: ‘Gbekɛ lɛ, enifeemɔi akɛyoɔ lɛ, akɛ ejeŋba he tse, ni efeɔ nɔ ni ja lo.’​—Abɛi 20:11.

• Tsɔɔmɔ obi lɛ sui kpakpai. Ye obua obi lɛ ni ená shwelɛ akɛ ebaafee nɔ ni ja be fɛɛ be. Mɛni hewɔ enɛ he hiaa? Ejaakɛ kɛ́ gbekɛ ko etswa efai shi akɛ ekɛ nɔ ko baatee efɔlɔi lɛ, ekɔɔɔ he eko mɔdɛŋ ni fɔlɔi lɛ baabɔ lɛ ekɛbaatee amɛ.b

  No hewɔ lɛ, tsɔsemɔ obi lɛ koni ekase sui kpakpai tamɔ anɔkwayeli, henɔyeli, ni agbɛnɛ hu ni enyɛ etere sɔ̃i ni baajɛ enifeemɔi amli kɛba lɛ. Kɛ́ gbekɛ ko baa ejeŋ jogbaŋŋ loo eyɛ sui kpakpai lɛ, ewaaa kɛhãaa lɛ akɛ ekɛ efon lɛ baatsu nii yɛ hiɛshikamɔ mli.

  Biblia mli shishitoo mla: “Mɛi ni edara lɛ . . . etsɔse amɛjwɛŋmɔ lɛ koni ele ekpakpa kɛ efɔŋ mlikpamɔ.”​—Hebribii 5:14.