YELIKƐBUAMƆ KƐHÃ WEKU LƐ | BII AKWƐMƆ

Ye Obua Obii Lɛ Koni Amɛye Adafitswai Amli Amaniɛbɔi Ni Woɔ Mɔ He Gbeyei Loo Amɛfãa Mɔ Tsui Lɛ Anɔ

Daa gbi lɛ, wɔnuɔ saji ni fãa mɔ tsui waa ni haoɔ mɔ lɛ ahe amaniɛbɔi, ni bei pii lɛ wɔnaa amɛhe mfonirii kɛ vidioi yɛ TV, foŋ, tablɛt, kɛ kɔmpiutai anɔ.

Ni gbekɛbii kwɛɔ.

Te obaafee tɛŋŋ oye obua obii lɛ koni adafitswai amli amaniɛbɔi ni tamɔ nɛkɛ lɛ akaye amɛ awui lɛ?

Te amaniɛbɔi nɛɛ náa gbekɛbii lɛ anɔ hewalɛ amɛhãa tɛŋŋ?

Gbekɛbii pii yɛ ni saji ni yɔɔ mɔbɔ loo gbeyei ni amɛkwɛɔ yɛ adafitswaa mli lɛ yeɔ amɛ awui waa. Gbekɛbii komɛi yɛ ni amɛjieee amɛhenumɔi akpo yɛ faŋŋ mli, shi amaniɛbɔɔ ni yɔɔ gbeyei loo amɛfãa mɔ tsui lɛ baanyɛ agba amɛnaa waa.a Kɛ́ amɛna akɛ amɛfɔlɔi lɛ atsui efã lɛ, ebaanyɛ ehã amɛtsuifãa lɛ mli awa waa.
Gbekɛbii baanyɛ anu nibii ni amɛnaa yɛ amaniɛbɔi amli lɛ ashishi yɛ gbɛ kroko kwraa nɔ. Akɛ nɔkwɛmɔnɔ lɛ, amɛteaŋ mɛi komɛi muɔ sane naa akɛ nɔ ni amɛnaa lɛ baaba amɛweku lɛ nɔ. Ni gbekɛbii ni kwɛɔ shihilɛ ko ni yɔɔ gbeyei loo efãa mɔ tsui lɛ he amaniɛbɔi vidioi shii abɔ lɛ baanyɛ anu he akɛ nakai sane lɛ miiya nɔ shii abɔ.
Ekolɛ, ebaawa akɛ gbekɛbii baanu amaniɛbɔɔ lɛ shishi jogbaŋŋ. Ekolɛ, gbekɛbii lɛ leee akɛ kɛ́ mɛi babaoo kwɛ amaniɛbɔi ni adafitswaa nitsumɔhei kɛhãa lɛ, nitsumɔhei nɛɛ náa shika babaoo. No hewɔ lɛ, bei komɛi lɛ, nitsumɔhei lɛ woɔ sane lɛ he bɔ ni afee ni mɛi babaoo akwɛ amaniɛbɔi lɛ.

Te obaafee tɛŋŋ oye obua obii lɛ koni amɛkahao yɛ adafitswai amli amaniɛbɔi ahe?

Kaahã obii lɛ fɔ amaniɛbɔi ni woɔ mɔ he gbeyei loo efãa mɔ tsui lɛ atoiboo loo akwɛmɔ. Enɛ etsɔɔɔ akɛ esaaa akɛ obii lɛ leɔ nɔ ni yaa nɔ yɛ je lɛ mli. Shi esaaa akɛ amɛkwɛɔ adafitswai ni woɔ mɔ he gbeyei loo efãa mɔ tsui lɛ shii abɔ, ni esaaa akɛ amɛboɔ toi hu.

“Bei komɛi lɛ, mikɛ miwu gbaa adafitswaa mli amaniɛbɔi lɛ ahe sane fitsofitso ní wɔyɔseee bɔ ni kɛ́ wɔbii lɛ nu lɛ, egbaa amɛnaa ehãa.”—Maria.

Biblia mli shishitoo mla: “Tsuiyeli lɛ, eji jatsu ni tsĩi waa.”—Abɛi 12:25, Contemporary English Version.
Too otsui shi ni obo lɛ toi, ni onu he ohã lɛ. Kɛ́ ewa kɛhã obi lɛ akɛ ebaatsɔɔ nɔ ni eba lɛ mli lɛ, kɛɛmɔ lɛ akɛ edrɔ nɔ ni ba lɛ he mfoniri ni okwɛ. Kɛ́ okɛ obi lɛ miisusu nɔ ni eba lɛ he lɛ, okɛ wiemɔi ni ewaaa akɛ ebaanu shishi lɛ atsu nii, shi kaawie nibii ni he ehiaaa ni esaaa akɛ obi lɛ leɔ yɛ sane lɛ mli lɛ ahe.

“Etamɔ nɔ ni kɛ́ wɔkɛ wɔbi lɛ ta shi wɔbo lɛ toi lɛ, etsui nyɔɔ emli. Shi nɔ ni ehiii ji ni wɔbaakɛɛ lɛ akɛ, ‘Nɛkɛ ji bɔ ni nibii yɔɔ bianɛ, no hewɔ lɛ, esa akɛ wɔkɔ lɛ nakai.’”—Sarahi.

Biblia mli shishitoo mla: “Mɔ fɛɛ mɔ he afee oya kɛ sane toiboo, ekaye ehe oyai kɛwie.”—Yakobo 1:19.
Ye obua obi lɛ ni ena nɔ tuuntu ni adafitswaa lɛ mli amaniɛbɔɔ lɛ tsɔɔ diɛŋtsɛ. Akɛ nɔkwɛmɔnɔ lɛ, kɛ́ abɔ amaniɛ akɛ akidnap mɔ ko lɛ, ebaafee tamɔ nɔ ni ewaaa kwraa akɛ efɔŋ tamɔ nɛkɛ lɛ baanyɛ aba ekoŋŋ, shi ekolɛ jeee nakai. Hã obi lɛ ale gbɛjianɔ ni oto ni okɛbaabu ehe. Agbɛnɛ hu, hã ehi ojwɛŋmɔ mli ni ohã amɛle akɛ, bei pii lɛ abɔɔ nibii ni fãa mɔ tsui loo amɛwoɔ mɔ he gbeyei lɛ he amaniɛ akɛni amɛfɔɔɔ kaa lɛ hewɔ, shi jeee ni eeeya nɔ be fɛɛ be lɛ hewɔ.

“Ye obua obii lɛ ni amɛnyɛ amɛye amɛhenumɔi lɛ anɔ. Bei pii lɛ, nibii ni wɔsusuɔ he lɛ, nomɛi ahe henumɔi wɔnáa, no hewɔ lɛ, kɛ́ wɔye wɔbua wɔbii lɛ ni amɛkɛ amɛjwɛŋmɔ ma nibii kpakpai anɔ lɛ, amɛtsui baanyɔ amɛ mli.”—Lourdes.

Biblia mli shishitoo mla: “Hiɛshikalɔ tsui hãa enaabu sɛɛyoomɔ ni ehãa ewiemɔ kɔneɔ mɛi ayiŋ.”—Abɛi 16:23.

a Yɛ gbekɛbii komɛi agbɛfaŋ lɛ, kɛ́ sane lɛ gba amɛnaa waa lɛ, ekolɛ, amɛbaashamɔ amɛwo saa mli, loo amɛbaashe gbeyei akɛ amɛbaaya skul, ni amɛsumɔŋ ni amɛshi amɛfɔlɔi amasɛi.

Kɛ́ obi lɛ na oshara ko ni ba lɛ, mɛni obaanyɛ ofee?

Yɛ May 7, 2019 lɛ, oblahii enyɔ komɛi yatswala tui yɛ skul ko ni yɔɔ Highlands Ranch, ni yɔɔ Colorado, yɛ U.S.A. lɛ, ni amɛgbe skulnyo kome ni amɛpila mɛi kpaanyɔ hu. No mli lɛ Jack, ni eye afii 9 ni yaa nakai skul lɛ yɛ jɛmɛ be ni atswalaa tui lɛ. Efɔlɔi ni ji Ben kɛ Casey tsɔɔ nibii ni amɛfee kɛye amɛbua Jack yɛ nakai shihilɛ lɛ sɛɛ.

Te tui ni atswala lɛ ná nyɛbinuu lɛ nɔ hewalɛ ehã tɛŋŋ?

Casey: Nakai shihilɛ lɛ sɛɛ nyɔji abɔ fɛɛ lɛ, kɛ́ nɔ ko nɔŋŋ kɛkɛ lɛ, Jack ehɛle shi.

Ben: Obaanyɛ ona ni eeshwɛ ni nɔ ko nɔ ko gbaaa enaa, shi kɛ́ nɔ ko hã ekai nɔ ni ba lɛ nɔŋŋ kɛkɛ lɛ, eyakpɛtɛ efɔlɔi ahe. Ehã be fɛɛ be lɛ, Jack miisusu akɛ nɔ ko fɔŋ ko miiba ebaya nɔ, shi kɛ́ okwɛ shihilɛ ni etsɔ mli lɛ, ehãa onuɔ lɛ shishi.

Ani nyɛkwɛ tu tswalamɔ lɛ he amaniɛbɔɔ lɛ?

Casey: Shishijee lɛ, wɔkwɛ. Anɔkwa, wɔyi etɛ lɛ fɛɛ wɔkwɛ amaniɛbɔɔ lɛ shii abɔ aaafee otsi sɔŋŋ. Kɛkɛ ni mikɛ miwu yɔse akɛ, kɛ́ wɔkwɛ nɔ ni tee nɔ lɛ he amaniɛbɔɔ lɛ, ehãa Jack kaiɔ nɔ ni tee nɔ lɛ, no hewɔ lɛ, yɛ nɔ najiaŋ ni esa akɛ wɔyi etɛ lɛ fɛɛ wɔhe ajɔ wɔ lɛ, ehãa wɔhaoɔ be fɛɛ be.

Mɛni ji nɔ ni nyɛna akɛ no ye ebua Jack waa?

Casey: Wɔyɔse akɛ kpɔiaŋgbɔlemɔ hãa bɔ ni Jack ehao lɛ baa shi, no hewɔ lɛ, wɔto gbɛjianɔ wɔfee nakai daa gbi. Shi nɔ ni ye ebua fe fɛɛ ji, be fɛɛ be ni Jack miitao ekɛ wɔ awie nɔ ni tee nɔ lɛ he lɛ, wɔnáa be wɔboɔ lɛ toi. Miyɔse akɛ, be fɛɛ be kɛ́ wɔyaawɔ ni jeŋ ejɔ lɛ Jack gbaa wɔ etsui mli sane fɛɛ. Bei komɛi lɛ wɔwieɔ aaafee ŋmɛlɛtswaa kome, shi no hã ená yelikɛbuamɔ ni he hiaa lɛ lɛ. Jack le akɛ esaaa akɛ lɛ pɛ enaa nɔ yɛ nɔ ni eba lɛ he.

Mɛɛ ŋaa nyɛbaawo fɔlɔi ni amɛbii kɛ shihilɛ ni woɔ mɔ he gbeyei loo efãa mɔ tsui lɛ ekpe?

Ben: Ehe miihia ni gbekɛbii anu he akɛ amɛyɛ shweshweeshwe yɛ weku lɛ mli dani shihilɛ ko ni woɔ mɔ he gbeyei aba. Kɛ́ eba lɛ nakai lɛ, kɛ́ amɛkɛ shihilɛ ko ni fãa mɔ tsui loo ehaoɔ mɔ kpe lɛ, ewaŋ kɛhãŋ bo akɛ obaaye obua amɛ.

Casey: Esoro bɔ ni gbekɛbii lɛ ateŋ mɔ fɛɛ mɔ yɔɔ. Mɔ ko baanu nii ahe waa fe mɔ kroko. Mɛi komɛi baanu he akɛ oofee onii kɛmiiteke nɔ tsɔ yɛ amɛhebuu gbɛfaŋ, shi okɛ hebuu ni he baahia obi lɛ ahã lɛ. Nyɛhãa suɔmɔ ni yɔɔ nyɛweku lɛ mli lɛ mli awaa koni obii lɛ anu he akɛ amɛyɛ shweshweeshwe, kɛ́ etamɔ nɔ ni shihilɛ ni yɔɔ agbo lɛ naa lɛ po bɛ shweshweeshwe.