Sanebimɔhe

◼ Mɛɛ Biblia mli shishitoo mlai kɔɔ bɔ ni esa ákɛ akɛ mobail foŋ atsu nii aha kɛ́ atee Kristofoi akpeei loo anyiɛ shiɛmɔ nɔ?

“Nɔ Fɛɛ Nɔ yɛ Ebe ni Ato.” (Jaj. 3:1): Mobail foŋ haa mɛi nyɛɔ amɛkɛ saji tɛstiɔ amɛhe, ni amɛkɛ amɛhe wieɔ be fɛɛ be ní amɛsumɔɔ. Kɛlɛ, bei komɛi yɛ ni esaaa akɛ Kristofoi haa amɛmobail foŋ lɛ gbalaa amɛjwɛŋmɔ. Akɛ nɔkwɛmɔnɔ lɛ, wɔkpeei lɛ ji be ni wɔkɛjáa Yehowa, be ni akɛtsɔɔ wɔ Nyɔŋmɔ he nii, kɛ be ni wɔkɛwowoɔ wɔhe hewalɛ. (5 Mose 31:12; Lala 22:23; Rom. 1:11, 12) Ani wɔbaanyɛ wɔgbe wɔmobail foŋ lɛ kɛ́ wɔtee kpeei, koni kɛ́ akpa kpeei lɛ sɛɛ lɛ wɔkwɛ saji ni akɛtɛsti wɔ lɛ? Kɛ́ oshãra ko ni baanyɛ aba hewɔ ni wɔsumɔŋ akɛ wɔgbe wɔfoŋ lɛ, esa akɛ wɔfee lɛ bɔ ni egbaŋ mɛi krokomɛi anaa.

‘Feemɔ Nɔ Fɛɛ Nɔ yɛ Sanekpakpa lɛ Hewɔ.’ (1 Kor. 9:23): Bei komɛi lɛ, sɛɛnamɔ yɛ he ákɛ akɛ mobail foŋ aaatsu nii yɛ shiɛmɔ nitsumɔ lɛ mli. Akɛ nɔkwɛmɔnɔ lɛ, nyɛmi ni nyiɛɔ nitsumɔ lɛ hiɛ lɛ baanyɛ ekɛtsu nii kɛna kɛ́ nɔ fɛɛ nɔ miiya nɔ jogbaŋŋ kɛha mɛi ni shiɛɔ yɛ hei krokomɛi yɛ shikpɔŋkuku lɛ mli lɛ. Bei komɛi lɛ, shiɛlɔi kɛ amɛ mobail foŋ lɛ tswaa mɛi ni yɔɔ wiemɔ lɛ he miishɛɛ lɛ loo amɛ-Biblia mli nikaselɔi dani amɛyaa amɛ ŋɔɔ, titri lɛ kɛ́ he ni mɔ lɛ yɔɔ lɛ jekɛ. Kɛ́ wɔhiɛ mobail foŋ lɛ, esa akɛ wɔkwɛ jogbaŋŋ ni ekagba wɔnaa beni wɔkɛ shiatsɛ ko gbaa sane lɛ. (2 Kor. 6:3) Beni wɔmɛɔ shiɛlɔi krokomɛi lɛ, yɛ nɔ najiaŋ ni wɔbaatswa wɔnaanyo ko loo wɔbaatɛsti lɛ lɛ, ani efeŋ nɔ ni hi akɛ wɔbaaha wɔjwɛŋmɔ ahi shiɛmɔ nitsumɔ lɛ kɛ mɛi ni wɔkɛshiɛɔ lɛ anɔ?

Susumɔ Mɛi Krokomɛi Ahe. (1 Kor. 10:24; Fil. 2:4): Esaaa akɛ wɔhaa efeɔ wɔsu akɛ wɔbaakpe sɛɛ kɛya kpeei kɛha shiɛmɔyaa kɛ susumɔ lɛ akɛ wɔbaanyɛ wɔtswa mɔ ko loo wɔtɛsti mɔ ko be fɛɛ be kɛbi he ni kuu lɛ shiɛɔ yɛ. Kɛ́ wɔkpe sɛɛ kɛba lɛ, bei pii lɛ, esa akɛ asaa aja ekoŋŋ. Yɛ anɔkwale mli lɛ, bei komɛi lɛ, shihilɛi komɛi ni wɔnyɛɛɛ he nɔ ko wɔfee lɛ baaha wɔkpe sɛɛ. Kɛlɛ, kɛ́ wɔha efee wɔsu akɛ wɔbaashɛ jɛmɛ daa yɛ be naa lɛ, wɔtsɔɔ akɛ wɔsusuɔ Yehowa gbɛjianɔtoo lɛ, nyɛmi nuu ni kwɛɔ nɔ lɛ, kɛ wɔnanemɛi shiɛlɔi lɛ ahe.