“Hemɔ Yesu Nɔ Oye”—Ani Yesu Nɔ Ni Obaahe Oye Lɛ Pɛ Baahã Ahere Oyiwala?
Hetoo ni Biblia lɛ kɛhãa
Kristofoi heɔ amɛyeɔ akɛ Yesu gbo yɛ adesai ahe eshai ahewɔ. (1 Petro 3:18) Kɛ̃lɛ, kɛ́ mɔ ko yi baaná wala lɛ, ebiɔ babaoo fe ni ebaahe eye kɛkɛ akɛ Yesu ji Yiwalaherelɔ lɛ. Daimonioi lɛ le akɛ Yesu ji “Nyɔŋmɔ Bi lɛ,” shi hiɛkpatamɔ ji nɔ ni miimɛ amɛ, jeee yiwalaheremɔ.—Luka 4:41; Yuda 6.
Mɛni esa akɛ mafee koni ahere miyiwala?
Esa akɛ ohe oye akɛ Yesu kɛ ewala bashã afɔle yɛ wɔhe eshai lɛ ahewɔ. (Bɔfoi 16:30, 31; 1 Yohane 2:2) Agbɛnɛ hu, esa akɛ ohe oye akɛ Yesu ji mɔ ko ni hi shi diɛŋtsɛ, ni saji fɛɛ ni Biblia lɛ wieɔ yɛ ehe lɛ ja.
Kasemɔ nɔ ni Biblia lɛ tsɔɔ diɛŋtsɛ. (2 Timoteo 3:15) Biblia lɛ kɛɛ, bɔfo Paulo kɛ Sila kɛɛ tsuŋwoohe nɔkwɛlɔ ko akɛ: “Hemɔ Nuŋtsɔ Yesu nɔ oye ni abaahere oyiwala.” Kɛkɛ ni, no sɛɛ lɛ, amɛbɔi tsuŋwoohe nɔkwɛlɔ lɛ “Yehowaa wiemɔ lɛ” tsɔɔmɔ. (Bɔfoi 16:31, 32) Enɛ tsɔɔ akɛ, ehe bahia ni tsuŋwoohe nɔkwɛlɔ lɛ anu Nyɔŋmɔ Wiemɔ lɛ mli shishijee anɔkwalei komɛi ashishi dani enyɛ ehe Yesu nɔ eye diɛŋtsɛ. Ehe bahia ni ená anɔkwa nilee ni damɔ Ŋmalɛi lɛ anɔ.—1 Timoteo 2:3, 4.
Tsakemɔ otsui. (Bɔfoi 3:19) Esa akɛ otsake otsui hu, loo oshwa ohe yɛ susumɔi gbohii ni oná, kɛ nibii gbohii ni ofee be ko ni eho lɛ ahe. Kɛ́ okpa nifeemɔi ni okɛtɔ̃ɔ Nyɔŋmɔ nɔ lɛ, ni otsu “nitsumɔi ni sa tsuitsakemɔ” lɛ, mɛi baana akɛ otsake otsui lɛɛlɛŋ.—Bɔfoi 26:20.
Hã abaptisi bo. (Mateo 28:19) Yesu wie akɛ mɛi ni batsɔmɔɔ ekaselɔi lɛ, abaabaptisi amɛ. Abaptisi tsuŋwoohe nɔkwɛlɔ ni wɔwie ehe kɛtsɔ hiɛ lɛ. (Bɔfoi 16:33) Nakai nɔŋŋ be ni bɔfo Petro tsɔɔ mɛi babaoo komɛi anɔkwalei ni kɔɔ Yesu he lɛ, “abaptisi mɛi ni kɛ miishɛɛ mɔ ewiemɔ lɛ mli lɛ.”—Bɔfoi 2:40, 41.
Bó Yesu gbɛtsɔɔmɔi atoi ni okɛtsu nii. (Hebribii 5:9) Mɛi ni ‘yeɔ nibii fɛɛ’ ni Yesu efã akɛ aye nɔ lɛ anɔ lɛ kɛ bɔ ni amɛhiɔ shi amɛhãa lɛ tsɔɔ akɛ esɛɛnyiɛlɔi ji amɛ. (Mateo 28:20) Amɛbatsɔmɔɔ “mɛi ni kɛ wiemɔ lɛ tsuɔ nii, ni jeee enulɔi kɛkɛ.”—Yakobo 1:22.
Fi shi kɛyashi naagbee. (Marko 13:13) Dani abaahere Yesu kaselɔi ayiwala lɛ, ‘ehe miihia ni amɛfi shi.’ (Hebribii 10:36) Akɛ nɔkwɛmɔnɔ lɛ, bɔfo Paulo ye Yesu tsɔɔmɔi lɛ fɛɛ anɔ, ni eye Nyɔŋmɔ anɔkwa be fɛɛ be, etee nɔ efi shi yɛ anɔkwale lɛ mli kɛjɛ be ni ebatsɔ Kristofonyo lɛ, kɛyashi egbo.—1 Korintobii 9:27.
Mɛni ji nɔ ni mɛi tsɛɔ lɛ Eshafeelɔ Sɔlemɔ lɛ?
Yɛ jamɔi komɛi amli lɛ, mɛi komɛi kɛɔ sɔlemɔi tamɔ nɔ ni mɛi tsɛɔ lɛ Eshafeelɔ Sɔlemɔ lɛ kɛ Yiwalaherelɔ Sɔlemɔ lɛ. Bei pii lɛ, yɛ sɔlemɔi nɛɛ amli lɛ, mɛi ni sɔleɔ lɛ kpɛlɛɔ nɔ akɛ eshafeelɔi ji amɛ, ni amɛheɔ amɛyeɔ akɛ Yesu gbo yɛ amɛhe eshai ahewɔ. Agbɛnɛ hu, amɛkɛɔ Yesu koni ebahi amɛtsui mli loo amɛshihilɛ mli. Shi Biblia lɛ etsĩko nɔ ni mɛi tsɛɔ lɛ Eshafeelɔ Sɔlemɔ ko tã, ni ejieko yi hu.
Mɛi komɛi hiɛ susumɔ lɛ akɛ, kɛ́ amɛkɛɛ nɔ ni mɛi tsɛɔ lɛ Eshafeelɔ Sɔlemɔ lɛ, amɛnáa nɔmimaa akɛ amɛbaaná naanɔ wala. Shi sɔlemɔ ko bɛ ni no pɛ hãa ahereɔ mɔ ko yiwala. Akɛ adesai ni yeee emuu lɛ, wɔtɔ̃ɔ yɛ be kɛ beiaŋ. (1 Yohane 1:8) No hewɔ ni Yesu tsɔɔ esɛɛnyiɛlɔi lɛ koni amɛya nɔ amɛsɔle kɛbi eshaifaa lɛ. (Luka 11:2, 4) Kɛfata he lɛ, naanɔ wala ŋmɛɛ Kristofoi komɛi ni kulɛ amɛyɔɔ hiɛnɔkamɔ akɛ amɛbaahi shi kɛya naanɔ lɛ, ejaakɛ amɛshi Nyɔŋmɔ loo amɛje emasɛi.—Hebribii 6:4-6; 2 Petro 2:20, 21.
Nɛgbɛ aná nɔ ni mɛi tsɛɔ lɛ Eshafeelɔ Sɔlemɔ lɛ kɛjɛ?
Yinɔsane he nilelɔi kɛ amɛhe kpãaa gbee yɛ he ni sɔlemɔ ni mɛi tsɛɔ lɛ Eshafeelɔ Sɔlemɔ lɛ jɛ lɛ he. Mɛi komɛi kɛɛ eje shishi yɛ afi 1517, be ni jamɔi komɛi tse amɛhe yɛ Roman Katolik Sɔlemɔ lɛ he yɛ srɔtofeemɔi ni yɔɔ amɛtsɔɔmɔi lɛ kɛ Katolikbii lɛ atsɔɔmɔi amli lɛ hewɔ lɛ. Mɛi komɛi hu kɛɛ, mɛi bɔi nɔ ni mɛi tsɛɔ lɛ Eshafeelɔ Sɔlemɔ lɛ kɛɛmɔ be ni abɔi jamɔi srɔtoi námɔ, yɛ aaafee afii 200 kɛmiimɔ afii 300 ni eho nɛ. Ekɔɔɔ he eko bɔ ni fee ni eje shishi lɛ, sɔlemɔ nɛɛ kɛ Biblia lɛ kpãaa gbee—anɔkwa, eteɔ shi ewoɔ nɔ ni Biblia lɛ tsɔɔ lɛ.
a Yehowa ji Nyɔŋmɔ gbɛ́i taakɛ ejeɔ kpo yɛ Biblia lɛ mli lɛ.