Mɛni Ji Yiwalaheremɔ?
Hetoo ni Biblia lɛ kɛhãa
Biblia ŋmalɔi lɛ kɛ wiemɔi ni ji “kpɔ̃mɔ” kɛ “yiwalaheremɔ” lɛ tsu nii bei komɛi kɛtsɔɔ mɔ ko ni ajie lɛ kɛjɛ oshara loo hiɛkpatamɔ mli. (2 Mose 14:13, 14; Bɔfoi 27:20) Shi bei pii lɛ, wiemɔi nɛɛ kɔɔ kpɔ̃mɔ kɛmiijɛ esha mli lɛ he. (Mateo 1:21) Akɛni esha ji nɔ ni kɛ gbele baa hewɔ lɛ, mɛi ni akpɔ̃ɔ kɛjɛɔ esha mli lɛ yɛ hiɛnɔkamɔ akɛ amɛbaahi shi kɛya naanɔ.—Yohane 3:16, 17.a
Mɛni esa akɛ ofee koni ahere oyiwala?
Bɔ ni afee ni ahere oyiwala lɛ, esa akɛ okɛ onifeemɔi atsɔɔ akɛ oyɛ hemɔkɛyeli yɛ Yesu mli, ni ojie lɛ kpo kɛtsɔ ekitãi lɛ anɔ ni obaaye lɛ nɔ.—Bɔfoi 4:10, 12; Romabii 10:9, 10; Hebribii 5:9.
Biblia lɛ tsɔɔ akɛ, esa akɛ onifeemɔi, loo bɔ ni oyeɔ Nyɔŋmɔ kitãi lɛ anɔ ohãa lɛ atsɔɔ akɛ ohemɔkɛyeli lɛ gboko. (Yakobo 2:24, 26) Kɛ̃lɛ, enɛ etsɔɔɔ akɛ bɔ fɛɛ bɔ ni fee lɛ abaahere oyiwala. Eji “Nyɔŋmɔ nɔkeenɔ” ni damɔ ‘eduromɔ’ lɛ nɔ.—Efesobii 2:8, 9.
Ani yiwalaheremɔ baanyɛ aŋmɛɛ bo?
Hɛɛ. Bɔ ni kɛ́ mɔ ko miishiu ni ajie lɛ lɛ, ebaanyɛ egbee nu lɛ mli loo ebote mli ekoŋŋ lɛ, nakai nɔŋŋ kɛ́ akpɔ̃ mɔ ko kɛjɛ ehe eshai lɛ amli, shi no sɛɛ lɛ efeee nibii ni tsɔɔ akɛ eyɛ hemɔkɛyeli lɛ, ahereŋ eyiwala. Enɛ hewɔ lɛ, Biblia lɛ woɔ Kristofoi ni akpɔ̃ amɛ lɛ hewalɛ akɛ, ‘amɛmia amɛhiɛ waa kɛwu hemɔkɛyeli lɛ he ta lɛ.’ (Yuda 3) Ebɔɔ amɛ kɔkɔ hu akɛ: “Nyɛyaa nɔ nyɛkɛ gbeyeishemɔ kɛ hekpokpomɔ atsua nyɛ diɛŋtsɛ nyɛyiwalaheremɔ he nii.”—Filipibii 2:12.
Namɔ ji Yiwalaherelɔ lɛ—Nyɔŋmɔ loo Yesu?
Biblia lɛ hãa wɔnaa akɛ, mɔ tuuntu ni hereɔ wɔyiwala ji Nyɔŋmɔ, ni bei pii lɛ etsɛɔ Nyɔŋmɔ akɛ “Yiwalaherelɔ.” (1 Samuel 10:19; Yesaia 43:11; Tito 2:10; Yuda 25) Kɛfata he lɛ, Nyɔŋmɔ kɛ gbɔmɛi srɔtoi tsu nii kɛkpɔ̃ blema Israel maŋ lɛ, ni Biblia lɛ tsɛ amɛ akɛ, “yiwalaherelɔi.” (Nehemia 9:27; Kojolɔi 3:9, 15; 2 Maŋtsɛmɛi 13:5)b Nakai nɔŋŋ akɛni Nyɔŋmɔ tsɔɔ Yesu Kristo kpɔ̃mɔ afɔleshaa lɛ nɔ ehereɔ wɔ yiwala kɛjɛɔ esha mli hewɔ lɛ, Biblia lɛ tsɛɔ Yesu hu akɛ “Yiwalaherelɔ.”—Bɔfoi 5:31; Tito 1:4.c
Ani abaahere mɔ fɛɛ mɔ yiwala?
Dabi, ahereŋ mɛi komɛi ayiwala. (2 Tesalonikabii 1:9) Beni abi Yesu akɛ, “Ani mɛi fioo kɛkɛ yiwala abaahere?” lɛ, ehã hetoo akɛ: “Nyɛmiaa nyɛhiɛ waa kɛtsɔa shinaa fintɔŋŋ lɛ mli kɛbotea mli, ejaakɛ miikɛɛ nyɛ akɛ, mɛi babaoo baatao akɛ amɛbote mli shi amɛnyɛŋ.”—Luka 13:23, 24.
Susumɔi ni ejaaa ni mɛi hiɛ akɛ abaahere mɔ fɛɛ mɔ yiwala
Susumɔ ni ejaaa: Abaahere mɔ fɛɛ mɔ yiwala, ejaakɛ 1 Korintobii 15:22 lɛ tsɔɔ akɛ, “Kristo lɛ mli lɛ, abaahã mɛi fɛɛ hiɛ akamɔ.”
Anɔkwa sane: Kɛ́ okwɛ saji ni awie he kɛtsɔ ŋmalɛ nɛɛ hiɛ kɛ nɔ ni awie he yɛ no sɛɛ lɛ, obaana akɛ ekɔɔ gbohiiashitee lɛ he. (1 Korintobii 15:12, 13, 20, 21, 35) No hewɔ lɛ, wiemɔ ni ji “Kristo lɛ mli lɛ, abaahã mɛi fɛɛ hiɛ akamɔ” lɛ tsɔɔ akɛ, mɛi fɛɛ ni abaatee amɛ shi lɛ nine baashɛ jɔɔmɔ nɛɛ nɔ kɛtsɔ Yesu Kristo nɔ.—Yohane 11:25.
Susumɔ ni ejaaa: Akɛni Tito 2:11 lɛ kɛɔ akɛ Nyɔŋmɔ ‘hereɔ gbɔmɛi fɛɛ yiwala’ hewɔ lɛ, abaahere mɔ fɛɛ mɔ yiwala.—International Standard Version.
Anɔkwa sane: Hela wiemɔ ni atsɔɔ shishi akɛ “fɛɛ” yɛ kuku nɛɛ mli lɛ baanyɛ akɔ “gbɔmɛi srɔtoi” hu ahe.d Enɛ hewɔ lɛ, shishinumɔ ni ja ni esa akɛ wɔná yɛ Tito 2:11 lɛ he ji, Nyɔŋmɔ miihã aahere mɛi srɔtoi fɛɛ yiwala, ni mɛi “ní jɛ jeŋmaŋ fɛɛ jeŋmaŋ kɛ weku fɛɛ weku kɛ gbɔmɛi srɔtoi fɛɛ” mli lɛ hu fata he.—Kpojiemɔ 7:9, 10.
Susumɔ ni ejaaa: Mɛi susuɔ akɛ abaahere mɔ fɛɛ mɔ yiwala, ejaakɛ 2 Petro 3:9 lɛ tsɔɔ akɛ Nyɔŋmɔ ‘sumɔɔɔ akɛ akpãtã mɔ ko mɔ ko hiɛ.’
Anɔkwa sane: Nyɔŋmɔ miisumɔ ni ahere mɛi ayiwala, shi ekɛ fĩii amɛ nɔ akɛ amɛkpɛlɛ gbɛjianɔ ni eto kɛhã yiwalaheremɔ lɛ nɔ. Nyɔŋmɔ ‘baakpãtã mɛi ni ebuuu lɛ lɛ ahiɛ’ yɛ ‘ekojomɔ gbi lɛ nɔ’.—2 Petro 3:7.
a Biblia lɛ wieɔ bei komɛi akɛ ahere mɛi ayiwala, tsɛbelɛ kpaako abaajie amɛ kɛjɛ esha kɛ gbele mli.—Efesobii 2:5; Romabii 13:11.
b Biblia shishitsɔɔmɔi komɛi kɛ wiemɔi tamɔ, “kpɔ̃lɔ,” “hiɛnyiɛlɔ,” loo “mɔ ko” tsu nii yɛ ŋmalɛi ni atsɛ yisɛɛ nɛɛ amli, moŋ fe “yiwalaherelɔ.” Shi be ni aŋma Biblia lɛ klɛŋklɛŋ kwraa lɛ, akɛ Hebri wiemɔ “yiwalaherelɔ,” ni akɛtsu nii kɛhã gbɔmɛi lɛ nɔŋŋ tsu nii yɛ Biblia lɛ mli hei komɛi kɛwie Yehowa Nyɔŋmɔ he akɛ Yiwalaherelɔ.—Lala 7:10, Ga Biblia hee.
c Aná gbɛ́i ni ji Yesu lɛ kɛjɛ Hebri gbɛ́i ni ji Yeho·shuʹaʽ, ni shishi ji “Yehowa ji Yiwalaherelɔ” lɛ mli.
d Kwɛmɔ wolo ni ji Vine’s Complete Expository Dictionary of Old and New Testament Words lɛ. Hela wiemɔ nɛɛ nɔŋŋ je kpo yɛ Mateo 5:11 lɛ, he ni Yesu wie yɛ akɛ mɛi baamale amɛwie esɛɛnyiɛlɔi lɛ ahe lɛ