Miŋmɛ Gbɛ Ni Yehowa Tsɔse Mi

Mina nibii pii yɛ jɛmɛ, shi nɔ ni mɔ mijwɛŋmɔ waa ji, mɛi ni tsuɔ nii lɛ. Mina nyɛmimɛi oblahii kɛ oblayei ni miitsu nitsumɔi ni ewaaa akɛ etsumɔ baaje otsine. Eyɛ mli akɛ anaaa nɔ ni amɛtsuɔ lɛ moŋ, shi fɛɛ sɛɛ lɛ, amɛhiɛ sɔ nitsumɔ ni amɛtsuɔ lɛ ni amɛyɛ miishɛɛ. Amɛnɔkwɛmɔnɔ lɛ hã mina bɔ ni ajɛɔ heshibaa mli asɔmɔɔ Yehowa.

Yɛ afii ni eho nɛɛ amli lɛ, Yehowa etee nɔ etsɔse mi koni manyɛ masɔmɔ lɛ jogbaŋŋ. Shi dani maba no nɔ lɛ, nyɛhãa magbaa nyɛ bɔ ni mishwe akɛ mana anɔkwale lɛ be ni miyɔɔ Buddha jamɔ mli lɛ.

MITAO YEHOWA SƐƐGBƐ BE NI MIDAKO

Afɔ mi yɛ Chicago, Illinois, yɛ U.S.A. Miyɛ nyɛmimɛi etɛ, ni miji onukpa. Kulɛ mifɔlɔi yɛ Japan, shi amɛyasusu akɛ United States baahã amɛná ogbɔjɔ shihilɛ, no hewɔ lɛ, amɛshi kɛtee jɛmɛ. Agbɛnɛ hu, amɛmiisumɔ ni amɛbii lɛ aya skul kpakpai ni amɛye omanye yɛ shihilɛ mli.

Mifɔlɔi kɛ Buddha jamɔ lɛ shwɛɛɛ kwraa. Akɛ nɔkwɛmɔnɔ lɛ, shĩa ni mimami da yɛ mli lɛ, Buddha sɔlemɔtsu yɛ jɛmɛ. Enyɛmimɛi hii enyɔ kɛ epapa sɔmɔ akɛ Buddha osɔfoi. Enɛ hewɔ lɛ, mi hu be ni midaa lɛ, mikɛ Buddha jamɔ lɛ shwɛɛɛ kwraa. Kɛ́ mijɛ skul miba lɛ, nɔ klɛŋklɛŋ ni mifeɔ ji, mishãa tsofa-kɛ-ŋma mihãa wɔ-Buddha amaga lɛ, ni mihãa lɛ omɔ kɛ nu. Kɛ́ eshɛ Hɔgbaa lɛ, wɔyaa Buddha sɔlemɔtsu ko mli ni wɔyajáa amaga ni yɔɔ jɛmɛ lɛ. Amaga nɛɛ da fe wɔnɔ lɛ, ni akɛ shika tsuru eha he fɛɛ.

Mikaiɔ akɛ, be ko be ni miye aaafee afii kpawo lɛ, miyadamɔ Buddha amaga lɛ ni yɔɔ wɔshĩa lɛ hiɛ, ni mibi mihe akɛ, ‘Kɛ́ migbo lɛ, nɛgbɛ maya?’ No mli lɛ mikase akɛ, kɛ́ migbo lɛ matsɔ mumɔ, ni mayahi shi yɛ mumɔi ajeŋ ko mli. Enɛ hã mina akɛ, be ko baashɛ ni miwala akɛ adesa lɛ baaba naagbee, ni kɛ́ mitsɔ mumɔ po lɛ, minyɛŋ mafee nibii ni adesai feɔ lɛ eko dɔŋŋ. Enɛ hã miwerɛ ho mihe waa ni minu he akɛ minyɛŋ nɔ ko mafee yɛ mishihilɛ lɛ he.

Be ni miye aaafee afii 15 lɛ, minu he akɛ sɛɛnamɔ bɛ Buddha kusum nifeemɔi ni mikɛ mihe woɔ mli lɛ ahe. Mina akɛ eshwɛ mi nɔ ko. (Mat. 5:3) Mihe miye akɛ Nyɔŋmɔ ko ni yɛ hewalɛ waa yɛ, ni mishwe akɛ male lɛ. Mikɛɛ mihe akɛ, Biblia lɛ baanyɛ ahã sanebimɔi ni miyɔɔ yɛ Nyɔŋmɔ, wala, kɛ gbele he lɛ ahetoo. No hewɔ lɛ, mihé King James Version Biblia momo ko. Ani ole he ni mihé yɛ? Mihé yɛ Buddhabii agbijurɔyeli ko shishi; mibɔleee kwraa akɛ abaahɔ̃ɔ Biblia yɛ he ko ni tamɔ nakai.

Be ni miye afii 17 lɛ, mikaiɔ akɛ, gbi ko lɛ, mikɛ migbee lɛ miishara shi yɛ gbɛ lɛ he kɛkɛ ni nuu ko tsi ebɛŋkɛ mi. Atsɛɔ nuu nɛɛ Wilson Bashou. Ebi mi akɛ, “Ani ole nɔ ni Nyɔŋmɔ ewo shi akɛ wɔsɛɛ lɛ ebaafee?” Sanebimɔ nɛɛ hã wɔsusu ŋmalɛi komɛi ahe. Wilson kane Kpojiemɔ 17:1 lɛ, ni ebi mi akɛ, “Mɛni ‘nui babaoo’ lɛ ni ashawo kpeteŋkpele lɛ ta nɔ lɛ damɔ shi kɛhã?” Shi minyɛɛɛ matsɔɔ lɛ. Kɛkɛ ni ekane kuku 15 lɛ ehã mi. Awie yɛ jɛmɛ akɛ, nui lɛ damɔ shi kɛhã mɛi. Minya bɔ ni kɛ́ Yehowa Odasefoi lɛ kane ŋmalɛ ko ni shishinumɔ wa lɛ, amɛkɛ ŋmalɛi krokomɛi gbálaa mli koni anyɛ anu shishi lɛ he waa. Be ni wɔgba sane lɛ wɔtã lɛ, Wilson hã mi wolo ko, ni ji Anɔkwale Ni Kɛ Mɔ Yaa Naanɔ Wala Mli Lɛ. Nakai wolo bluu bibioo lɛ tsake mishihilɛ kwraa.

Gbii nyɔŋma sɛɛ lɛ, mitee asafoŋ kpee klɛŋklɛŋ kwraa yɛ Maŋtsɛyeli Asa lɛ nɔ. Mihiɛ kpaŋ bɔ ni nyɛmimɛi lɛ here mi hiɛmɛɛ lɛ nɔ kɔkɔɔkɔ. Kɛjɛ nakai gbi lɛ nɔ kɛbaa lɛ mikwɛko misɛɛ dɔŋŋ. Sɛɛ mli lɛ, Wilson kɛ mi bɔi Biblia lɛ kasemɔ. Minya Biblia lɛ ni mikaseɔ lɛ he aahu akɛ, bei komɛi lɛ, wɔkɛ ŋmɛlɛtswai kpaanyɔ sɔŋŋ kaseɔ nii. Enɛ gba mifɔlɔi anaa waa, ni amɛbɔ mɔdɛŋ akɛ amɛbaahã makpa nii lɛ kasemɔ. Shi be ni mitee nɔ mikase nii lɛ, mibahe miye waa akɛ anɔkwale lɛ nɛ. No hewɔ lɛ, yɛ 1983 lɛ, mihã abaptisi mi.

MIKPA YUNIVƐSITI KONI MANYƐ MATSU GBƐGBAMƆ NITSUMƆ LƐ

Be ni abaptisi mi lɛ, no mli lɛ miiya yunivɛsiti ko ni ehe gbɛ́i waa koni mibatsɔ datrɛfonyo. Mifɔlɔi kɛ nibii pii shã afɔle koni manyɛ maya skul nɛɛ. Kulɛ manyɛ maya kɛyashi magbe naa, shi no mli lɛ miitao ni mikɛ minyɛmɔ fɛɛ kɛ mibe fɛɛ asɔmɔ Yehowa.

Be ko lɛ, mipapa kɛɛ mi akɛ, “Kɛ́ okpa yunivɛsiti lɛ yaa lɛ, mashwie bo kɛshi shĩa!” Enɛ hã mihao ni mifee basaa. Misumɔɔ mifɔlɔi waa, ni misumɔɔɔ ni mifeɔ nɔ ko ni baakumɔ amɛtsui. No hewɔ lɛ, bei pii kɛ́ je na lɛ, mijeɔ kpo kɛyaa skul lɛ yale lɛ mli ni miyasɔleɔ mikɛɔ Yehowa akɛ, “Yehowa, ofainɛ, ye obua mi ni mana nɔ ni mafee.” Be ni agbɛnɛ lɛ, mikpɛ miyiŋ akɛ miyaŋ yunivɛsiti lɛ dɔŋŋ lɛ, mipapa shwie mi kɛshi shĩa lɛ. Mitswa Nyɛminuu Bashou ni mikɛɛ lɛ nɔ ni eba lɛ. Ekɛɛ mi akɛ manyɛ mabahi emasɛi. Mito minibii fɛɛ miwo baagi kome mli ni mifo tsɔne kɛtee he ni eyɔɔ lɛ. Minu he tamɔ nɔ ni jatsu wulu ko eje minɔ. Mina akɛ mikpɛ yiŋ kpakpa.

Minu he tamɔ loofɔlɔ ko ni eje akpa ko mli! Agbɛnɛ lɛ, manyɛ mikɛ mibe fɛɛ asɔmɔ Yehowa ni nɔ ko gbalaaa mijwɛŋmɔ. No hewɔ lɛ, yɛ 1984 lɛ, mije gbɛgbamɔ nitsumɔ lɛ shishi.

Be ni misɔmɔɔ akɛ gbɛgbalɔ lɛ, Yehowa ye ebua mi ni miná sui kpakpai pii. Akɛ nɔkwɛmɔnɔ lɛ, eye ebua mi ni minijiaŋ akaje wui oya kɛ́ nibii eyaaa lɛ jogbaŋŋ. Be ko lɛ, mináaa mɔ ko mikɛya shiɛmɔ shwane, no hewɔ lɛ, efee mi akɛ mitao he ko mita, shi mimia mihiɛ mitee. Be ni mikɛ nɔ ni miihe ashɛ ŋmɛlɛtswai enyɔ eshiɛ lɛ, miwie yɛ miyitsoŋ akɛ, maya ŋwɛitsu kome ko mli kɛkɛ lɛ no sɛɛ lɛ, mikpa. No mli lɛ etɔ mi, mihe efee shoo, ni efee tamɔ nɔ ni nugbɔ baanɛ. Mibi mihe akɛ, ‘Aloo mikpa?’ Be ni mikwɔɔ atrakpoi ni yaa ŋwɛitsu lɛ nɔ lɛ, mikɛ oblanyo ko ni jɛ Philippines kpe. Mikɛɛ mihe akɛ, ‘Mikpaaa shi akɛ ebaanya he.’ Shi asomoaŋ, jeee nakai kwraa eji! Mikɛ lɛ bɔi Biblia lɛ kasemɔ, ni sɛɛ mli lɛ, eba anɔkwale lɛ mli.

MIKASE NIBII KOMƐI NI HE HIAA YƐ BROOKLYN BETEL

Be ni mikɛ Wilson ehi shi afii enyɔ sɛɛ lɛ, afɔ̃ mi nine ni mibasɔmɔ yɛ Brooklyn Betel yɛ 1985. Tamɔ bɔ ni miwie kɛje shishi lɛ, ahã miyatsu nii yɛ he ni awoɔ woji asɛɛ yɛ lɛ. Be ko be ni mikɛ tsɔne ko miitsu nii lɛ, mifee nɔ ko ni kulɛ esaaa akɛ mifeɔ. Enɛ hã woji ni akɛwoɔ woji asɛɛ lɛ hai abɔ fite ni ebabi ni ashɛrɛ fɛɛ ashwie. Nyɛmimɛi lɛ kɛɛ miyakɛɛ wɔnɔkwɛlɔ lɛ nɔ ni eba lɛ. Mitee ni miyagbala nɔ ni ba lɛ mli fitsofitso mitsɔɔ lɛ, shi eshwɛ mi nɔ ko ni mafee. No hewɔ lɛ, wɔnɔkwɛlɔ lɛ kɛ naajɔlɛ kai mi akɛ, “Be fɛɛ be lɛ, ehi akɛ kɛ́ otɔ̃ lɛ okpa fai.” No hewɔ lɛ, yɛ nakai ŋmɛlɛtswaa lɛ nɔ nɔŋŋ lɛ, mikase akɛ, kɛ́ mitɔ̃ lɛ, ehe miihia ni makpɛlɛ nɔ ni makpa fai.

Agbɛnɛ hu, bɔ ni nyɛmimɛi ni edara ni etsɛ yɛ Betel lɛ fee amɛnii amɛhã lɛ hã mikase bɔ ni asɔmɔɔ mɛi jogbaŋŋ ahãa. Gbi ko lɛ, Nyɛminuu Milton Henschel, ni eji Gbɛtsɔɔmɔ Kuu lɛ mli nyo lɛ ta wɔkpɔlɔ lɛ he kɛhã shwane niyeli. Nakai gbi lɛ, mɛi babaoo ba niyeli fe bɔ ni nyɛmimɛi lɛ kpa gbɛ, ni no hã mɛi ni jaa niyenii lɛ gbɛ. Wɔ, ni ji oblahii ni tara okpɔlɔ lɛ he lɛ bɔi tɔkemɔ bibiibibii yɛ bɔ ni niyenii lɛ sɛɛ etsɛ lɛ hewɔ. Be ni wɔyaana lɛ, Nyɛminuu Henschel ewo ehe nɔ, ni eyafata mɛi ni jaa niyenii lɛ ahe kɛmiija niyenii lɛ. Mihiɛ kpaaa bɔ ni eba ehe shi ni esɔmɔ lɛ nɔ kɔkɔɔkɔ. Enɛ hã mikai bɔ ni Yesu sɔmɔ ebɔfoi lɛ.—Yoh. 13:​3-5.

“ESA AKƐ OKASE JAPAN WIEMƆ LƐ!”

Yɛ 1987 lɛ, mifã gbɛ kɛtee Japan. Minya bɔ ni nyɛmimɛi lɛ yɔɔ ekãa ni amɛbaa amɛhe shi lɛ he waa. Mishwe akɛ maye mabua amɛ kɛshiɛ, shi naagba lɛ ji, minuuu Japan wiemɔ lɛ. Nyɛmi yoo ko ni yɔɔ Betel, ni atsɛɔ lɛ Michiko Oda lɛ kwɛ mi ni ekɛɛ mi akɛ, “Esa akɛ okase Japan wiemɔ lɛ!” Ni nakai pɛpɛɛpɛ mifee. Shi nyɛle nɔ ko, miyabɔleee akɛ eŋaawoo nɛɛ baaye abua mi wɔsɛɛ.

Yɛ nyɔji fioo komɛi asɛɛ lɛ, mishi kɛtee Japan wiemɔ asafo ko ni yɔɔ New York lɛ mli. Japan wiemɔ lɛ ni mikase lɛ hã minyɛ misɔmɔ Yehowa yɛ gbɛi srɔtoi anɔ. Yɛ 1989 lɛ, mitee kpokpaa nɔ kpee ko ni afee yɛ Japan wiemɔ mli lɛ yɛ Los Angeles, yɛ California. No ji klɛŋklɛŋ kpokpaa nɔ kpee ni mitee ni afee yɛ Japan wiemɔ mli. Mitsui mɔ nyɛmi yoo gbɛgbalɔ ko ni atsɛɔ lɛ Miwako Onami ni fata mɛi ni fee drama lɛ ahe lɛ.

Mikɛ Miwako bote gbãla mli yɛ 1992, ni ahã efata mihe kɛsɔmɔ yɛ Brooklyn Betel. Miwako susuɔ mɔ he waa, enáa mɔ he tsui ni be fɛɛ be lɛ, eŋɔɔ hegbɛ kɛyeɔ ebuaa mɛi. Mikase bɔ ni akɛ mɛi yeɔ jogbaŋŋ ahãa yɛ edɛŋ. Minaa lɛ akɛ nikeenii ni jɛ Yehowa ŋɔɔ, ni ehãa mináa miishɛɛ be fɛɛ be.

JAPAN NITSUMƆHE NINE LƐ KƐ GBƐGBAMƆ KRƐDƐƐ NITSUMƆ LƐ

Be ko sɛɛ lɛ, helai ni naa wa waa bamɔmɔ Miwako fɔlɔi ni no mli lɛ amɛyɔɔ Japan lɛ. No hewɔ lɛ, ahã wɔyasɔmɔ yɛ Japan nitsumɔhe nine lɛ koni wɔbɛŋkɛ amɛ ni wɔnyɛ wɔkwɛ amɛ. Wɔhiɛ sɔ suɔmɔ ni ajie kpo atsɔɔ wɔ nɛɛ waa. Wɔfã kɛtee jɛmɛ yɛ 1999.

Betel weku lɛ ni yɔɔ Japan lɛ hã wɔhiɛ mɛ, ni fiofio lɛ jɛmɛ shihilɛ baŋɔɔ wɔnaa. Nyɛmimɛi ni yɔɔ Japan lɛ yɛ sui kpakpai pii. Ekomɛi ji, amɛhãa mɔ nɔ waa, ni amɛfeɔ gbɔ hu waa, ni mikase amɛsui nɛɛ. Amɛkɛ nitsumɔ shwɛɛɛ kwraa, ni amɛhãaa nɔ ko agbala amɛjwɛŋmɔ. Agbɛnɛ hu, amɛle bɔ ni afeɔ ekome kɛtsuɔ nii. Nyɛle nɔ hewɔ ni miwieɔ nakai? Japanbii lɛ naa lɛ akɛ, ehi akɛ abaafee ekome kɛtsu nii moŋ fe ni mɔ kome baatsu fɛɛ kɛfee gbɛ́i ehã ehe. Amɛsu kpakpa nɛɛ hã mina akɛ ehi waa akɛ maba mihe shi ni mikɛ mɛi afee ekome kɛtsu nii, ni agbɛnɛ hu, mihiɛ asɔ nɔ ko fioo ni minyɛɔ mifeɔ kɛyeɔ buaa koni Yehowa yiŋtoo aba mli lɛ.

Fɛɛ sɛɛ lɛ, akɛni esoro he ni atsɔse mi yɛ hewɔ lɛ, bei komɛi lɛ, minuuu gbɛ ni amɛtsɔɔ nɔ amɛtsuɔ saji komɛi ahe nii lɛ shishi. Ehe bahia ni mato mitsui shi ni mikahã amɛnifeemɔi komɛi fee mi ahuntoo. Be ni be shwie mli lɛ, mitsake bɔ ni minaa amɛnifeemɔi komɛi mihãa lɛ, ni mibayɔse akɛ, kɛ́ wɔkɛ gbɛtsɔɔmɔi ni Yehowa tsɔɔ esafo lɛ nɔ ekɛhãa wɔ lɛ tsu nii kome too lɛ, ebaahã yiŋ fɛɛ yiŋ ni wɔkpɛɔ lɛ aye omanye. Sane lɛ kɛkɛ ji, Yehowa ji mɔ ni hãa nitsumɔ ni wɔtsuɔ lɛ fɛɛ yeɔ omanye.

Bei pii lɛ, mikɛ tsɔsemɔ ni miná yɛ Betel lɛ toɔ tsɔsemɔ ni Mose ná lɛ he. Mose tsu nii akɛ tookwɛlɔ afii 40, ni Yehowa tsɔ no nɔ eye ebua lɛ koni eba ehe shi. Mi kɛ lɛ fɛɛ lɛ, wɔkase wolo kɛtee hiɛ. Wolo ni mikase kɛtee hiɛ lɛ hewɔ lɛ, miwo mihe nɔ ni mikɛ mihe fɔ̃ mi diɛŋtsɛ mihe nɔ. Shi Betel hã mina akɛ, esa akɛ maba mihe shi ni mikɛ mihe afɔ̃ Yehowa nɔ. Yehowa to etsui shi ni etsɔse Mose, ni nakai nɔŋŋ efee yɛ mi hu migbɛfaŋ yɛ afii ni eho nɛɛ fɛɛ amli.

Wɔkɛ nɔ ni miihe ashɛ afii 24 kwɛ Miwako fɔlɔi kɛyashi amɛgboi. Be ni wɔkwɛɔ amɛ lɛ, wɔfɔɔ amɛ kɛ datrɛfoi ni kwɛɔ amɛ lɛ tswaa. Bei komɛi lɛ, amɛshihilɛ lɛ tsakeɔ, ni no hãa wɔfeɔ yeyeeye. Agbɛnɛ hu, wɔyaa helatsamɔhe lɛ kpitiokpitio. Masako, ni ji Miwako mami hela lɛ mli wo wu aahu akɛ eshɛ he ko ni nyiɛmɔ po bawa kɛhã lɛ. Enɛ hã ebawa waa kɛhã lɛ akɛ ebaaya asafoŋ kpeei kɛ shiɛmɔ. Otsii fioo dani egbo lɛ, ebɔi helatsɛmɛi ashwiili mlitamɔ. Yɛ shihilɛi nɛɛ fɛɛ amli lɛ, suɔmɔ ni eyɔɔ kɛhã Yehowa lɛ nɔ gbɔɔɔ. Be fɛɛ be ni ebaawie anɔkwale lɛ he lɛ, ekɛ miishɛɛ ko wieɔ. Ekɔɔɔ he eko shihilɛ ni Masako baatsɔ mli lɛ, eyeee etsui fe nine ni ehãaa emiishɛɛ atã hu, ni enɛ woɔ mi hewalɛ waa.

Yɛ 2024 lɛ, wɔshihilɛ tsake kwraa. Be ni wɔkɛ nɔ ni fa fe afii 30 esɔmɔ yɛ Betel sɛɛ lɛ, ahã wɔyasɔmɔ akɛ gbɛgbalɔi krɛdɛi. Bianɛ lɛ, wɔmiisɔmɔ akɛ gbɛgbalɔi krɛdɛi yɛ ŋshɔkpɔ ko ni atsɛɔ lɛ Okinawa lɛ nɔ, ni wɔyeɔ wekui ni yɔɔ asraafoi nsara ko ni bɛŋkɛ wɔ lɛ mli lɛ odase. Tsɔsemɔ ni wɔná yɛ Betel lɛ ye ebua wɔ ni wɔnyɛ wɔtsake wɔhe wɔwo shihilɛ hee nɛɛ mli jogbaŋŋ. Wɔto wɔbe he gbɛjianɔ jogbaŋŋ. Ni bɔ ni afee ni wɔkɛ wɔbe atsu nii jogbaŋŋ lɛ, wɔkɛ wɔjwɛŋmɔ yaa shiɛmɔ nitsumɔ lɛ nɔ waa ni wɔtsuɔ lɛ kɛmɔɔ shi. Yehowa edro wɔ Biblia mli nikaselɔi ni ebatsɔmɔ tamɔ wɔwekumɛi. Wɔle akɛ ehe hiaa waa ni wɔsumɔ mɛi. Shi bianɛ lɛ, shihilɛ ni wɔtsɔɔ mli lɛ hãa anɔkwa sane nɛɛ feɔ faŋŋ fe tsutsu lɛ po. Mi kɛ Miwako daa Yehowa shi daa yɛ nitsumɔ ni nɔ bɛ nɛɛ ni ekɛwo wɔdɛŋ lɛ hewɔ.

MITSWA MIFAI SHI AKƐ, MAHÃ YEHOWA AYA NƆ ATSƆSE MI

Miwekumɛi lɛ eteee shi amɛwooo mi dɔŋŋ, shi amɛbatsɔmɔko Yehowa jálɔi hu. Shi Yesu wo shi akɛ, mɛi ni shiɔ amɛwekumɛi ni amɛbatsɔmɔɔ ekaselɔi lɛ, baaná nanemɛi kaselɔi toi 100 ni baabatsɔmɔ tamɔ amɛwekumɛi. (Mar. 10:​29, 30) Enɛ eba mli yɛ migbɛfaŋ. Minyɛŋ makane wekui abɔ fɛɛ ni yɔɔ heihei yɛ jeŋ fɛɛ ni ejie suɔmɔ kpo amɛtsɔɔ mi ni amɛkɛ mi eye tamɔ amɛwekumɛi lɛ.

Miyɛ Anɔkwale wolo lɛ ni Wilson kɛhã mi lɛ yɛ miwoji lɛ amli lolo. Nakai wolo bluu lɛ hãa mikaiɔ bɔ ni Yehowa kɛ mi ye jogbaŋŋ ni ehã mibale lɛ lɛ. (1 Kro. 28:9) Mitswa mifai shi akɛ, mahã Yehowa aya nɔ atsɔse mi. Mitswa mifai shi hu akɛ, maye mabua mɛi ni amɛbakase anɔkwale ni baahã amɛná naanɔ wala lɛ.