Nyɛsaa Nyɛteŋ Oya!
ANI nyɛmi ko efee bo nɔ ko ni edɔ bo waa aahu akɛ, amrɔ nɛɛ nyɛteŋ efite? Belɛ, esa akɛ ofee nɔ ko yɛ he oya nɔŋŋ kɛsaa nyɛteŋ, ni esa akɛ ofee nakai kɛ yiŋtoo kpakpa.a
Kɛ́ nanemɛi ateŋ fite lɛ, abaanyɛ akɛto wu ni eku he. Kɛ́ wu ku ni akɛtee helatsamɔhe oya ni atsa lɛ, no baahã fiofio lɛ bɔ ni ewaa mɔ lɛ he lɛ sɛɛ afo. Shi kɛ́ akɛyaaa mra lɛ, ebaaya nɔ ewa mɔ lɛ he. Ni nɔ ni ehiii fe fɛɛ lɛ, ebaanyɛ ehã mɔ lɛ aje kpa.
Tamɔ bɔ ni kɛ́ wu ku lɛ, esa akɛ atsa lɛ oya nɔŋŋ lɛ, nakai nɔŋŋ kɛ́ naagba ba nanemɛi ateŋ lɛ, esa akɛ amɛfee nɔ ko yɛ he oya nɔŋŋ koni amɛteŋ akafite. Kɛjeee nakai lɛ, naagba ni eba lɛ mli baawa, ni nanemɛi lɛ amli baafu amɛhe waa aahu akɛ amɛteŋ baafite. Yesu wie akɛ: “Okɛ mɔ ni kɛ bo yeɔ sane lɛ asaa mra.” (Mat. 5:25) No hewɔ lɛ, okɛ onaanyo lɛ ayagba sane kɛ naajɔlɛ, ni okɛɛ lɛ bɔ ni onuɔ he ohãa. Shi ekolɛ, onáŋ lɛ mlɛo akɛ obaafee nakai. Mɛni hewɔ? Naa yiŋtoi enyɔ komɛi ahewɔ ni onáŋ lɛ mlɛo akɛ obaafee nakai lɛ.
Klɛŋklɛŋ lɛ, ekolɛ ofeŋ nɔ ko yɛ naagba lɛ he, ejaakɛ efeɔ bo ahuntoo akɛ obaawie he.b Nakai eba lɛ yɛ Kristofoi yei enyɔ komɛi ni atsɛɔ amɛ Evodia kɛ Sintika lɛ gbɛfaŋ. Amɛhi shi yɛ Yesu bɔfoi lɛ abeiaŋ. Etamɔ nɔ ni béi ni ba amɛteŋ lɛ sɛɛ tsɛ ejaakɛ bɔfo Paulo ni no mli lɛ eyɛ Roma tɔ̃ɔ lɛ po nu he. No hewɔ lɛ, ewo amɛ hewalɛ ni amɛsaa amɛteŋ. (Fip. 4:2) Mɛni baaye abua amɛ ni amɛsaa amɛteŋ? Kɛ́ amɛba amɛhe shi, amɛwie sane lɛ he kɛ naajɔlɛ, ni amɛkɛ amɛhe ke amɛhe lɛ, amɛbaabɔ naanyo ekoŋŋ.
Nɔ ni ji enyɔ lɛ, ekolɛ onuɔ he akɛ onaanyo lɛ ni efeee ni ahi, ni no hewɔ lɛ, lɛ esa akɛ eba oŋɔɔ ni ebakpa bo fai akɛ etɔ̃ onɔ. Shi kɛ́ naagba ba nanemɛi ateŋ lɛ, jeee mɔ ni sane ja kɛ mɔ ni sane ejaaa ni abaana lɛ ji nɔ ni he hiaa, moŋ lɛ, naanyobɔɔ lɛ ni baaya nɔ ahi shi lɛ ji nɔ ni he hiaa. Kɛ́ mɔ ko wu ku ni akɛ lɛ tee helatsamɔhe lɛ, datrɛfonyo ni kwɛɔ lɛ lɛ taooo akɛ ebaale nɔ ni ba ni ewu lɛ ku lɛ fitsofitso, moŋ lɛ, efeɔ nɔ fɛɛ nɔ ni ebaanyɛ koni etsa wu lɛ. No hewɔ lɛ, kɛ́ naagba ba okɛ onaanyo ko teŋ ni nyɛmiiwie he lɛ, nyɛkɛ nyɛjwɛŋmɔ akayaa mɔ ni hã naagba lɛ ba lɛ nɔ. Moŋ lɛ, nyɛkɛ nyɛjwɛŋmɔ ayaa bɔ ni nyɛshwɛɛɛ nyɛnaanyobɔɔ lɛ he kɛ bɔ ni nyɛbaafee nyɛbɔ naanyo ekoŋŋ lɛ nɔ.
No hewɔ lɛ, kɛ́ naagba yɛ okɛ onaanyo ko teŋ lɛ, onaaa akɛ ebaahi waa akɛ ŋmɛnɛ nɔŋŋ lɛ, obaaya eŋɔɔ ni nyɛyasaa nyɛteŋ? Biblia lɛ wie akɛ: “Nyɛkahãa hulu nyɔa shi be mli ni nyɛmli efu lolo.” (Efe. 4:26) Kɛ́ ofee nakai lɛ, no baatsɔɔ akɛ oobɔ mɔdɛŋ ni ohã “toiŋjɔlɛ ni tamɔ kpãa ni fiɔ nyɛ efeɔ nyɛ ekome lɛ” aya nɔ ahi shi.—Efe. 4:1-3.
a Kɛ́ nyɛmi ko efee bo nɔ ko ni edɔ bo shi nɔ ni efee lɛ bɛ hiɛdɔɔ tsɔ lɛ, esa akɛ okɛ lɛ awie he ni okɛke lɛ. (Mat. 5:23, 24) Shi kɛ́ nɔ ni efee lɛ yɛ hiɛdɔɔ lɛ, no lɛ, obaanyɛ obi asafoŋ onukpai lɛ ni amɛye amɛbua nyɛ. (Mat. 18:17) Shi ja okɛ nɔ ni awie yɛ Mateo 18:15, 16 lɛ etsu nii shi fɛɛ sɛɛ lɛ nyɛnyɛɛɛ nyɛsaa nyɛteŋ dani oyabi asafoŋ onukpai lɛ ni amɛye amɛbua nyɛ.
b Kɛ́ nyɛmi ko efee bo nɔ ko ni edɔ bo shi nyɛteŋ fiteko lɛ, no lɛ, esa akɛ oŋmɛɛ he kɛkɛ.—Abɛi 26:20.