Okɛ Ohiɛ Afɔ̃ Yehowa, Jeŋ Muu Fɛɛ Nɔyelɔ Lɛ Nɔ

1. Mɛɛ naagbai ni mli wa Hiob kɛkpe?

FEEMƆ nɔ ni ba nuu anɔkwafo Hiob nɔ lɛ he mfoniri okwɛ. Eyɛ nɔŋŋ ni trukaa lɛ, ebii lɛ fɛɛ gboi, hela ko ni naa wa waa bamɔ lɛ, ni ekooloi lɛ fɛɛ je edɛŋ. Anɔkwa, eshihilɛ bafee butuu, ni no hewɔ lɛ, mɛi ebuuu lɛ dɔŋŋ. Mɛi komɛi ni kɛɛ enanemɛi ji amɛ ni amɛmiiba amɛbashɛje emii lɛ fite sane lɛ kwraa; amɛwie ehiɛ nyanyaanya ni amɛkumɔ etsui. Eshɛ he ko ni agbɛnɛ lɛ eŋa po nyɛɛɛ dɔŋŋ. Ekɛɛ Hiob akɛ ‘elomɔ Nyɔŋmɔ ni egbo’ kɛkɛ. (Hiob 2:9; 15:​4, 5; 19:​1-3) Kulɛ, naagbai ni Hiob kɛkpe lɛ baanyɛ ahã enu he akɛ, kɛ́ mɔ ko sumɔɔ Yehowa ni ejáa lɛ po lɛ, enyɛŋ ekɛ ehiɛ afɔ̃ Yehowa nɔ akɛ ebaaye ebua lɛ yɛ fimɔ beiaŋ.

2-3. Kɛ́ wɔkɛ naagbai kpe lɛ, te ekolɛ wɔbaanu he wɔhã tɛŋŋ? Ni mɛni wɔbaakase yɛ Hiob sane lɛ mli?

² Bei komɛi lɛ, wɔ hu wɔkɛ naagbai ni mli wa ni baanyɛ ahã ewa kɛhã wɔ akɛ wɔkɛ wɔhiɛ baafɔ̃ Yehowa nɔ lɛ kpeɔ. Enɛ bɛ naakpɛɛ, ejaakɛ bei ni wɔyɔɔ mli nɛɛ ji “bei krɛdɛi ni mli shihilɛ wa.” (2 Tim. 3:1) Bei komɛi po lɛ, naagbai lɛ eko nyiɛ eko sɛɛ, ni enɛ hãa wɔwerɛ hoɔ wɔhe aahu ni wɔnuɔ he akɛ wɔnyɛɛɛ dɔŋŋ. Mɛi komɛi yɛ ni kɛ́ eba lɛ nakai lɛ, amɛnuɔ he akɛ Yehowa eshi amɛsane ehã amɛ ni ejwɛŋŋ amɛhe dɔŋŋ.

³ Aleenɔ, bo hu onuɔ he akɛ Yehowa eshi osane ehã bo ni ejwɛŋŋ ohe dɔŋŋ? Kɛ́ nakai lɛ, Hiob sane lɛ baanyɛ aye abua bo. Hiob bana faŋŋ akɛ, Yehowa kwaaa mɛi ni yeɔ lɛ anɔkwa lɛ, ni bo hu obaanyɛ ohe oye akɛ, Yehowa, o-Tsɛ ni yɔɔ ŋwɛi lɛ, kwaŋ bo kɔkɔɔkɔ. Yɛ nikasemɔ nɛɛ mli lɛ, wɔbaasusu Hiob sane lɛ he. Esane lɛ hãa wɔnaa akɛ, wɔbaanyɛ wɔkɛ wɔhiɛ afɔ̃ Yehowa nɔ, ejaakɛ: (1) Yehowa ji Jeŋ Muu Fɛɛ Nɔyelɔ; ni (2) Yehowa ji Nyɔŋmɔ Ofe lɛ, ni no hewɔ lɛ, nɔ ko bɛ ni eto eyiŋ akɛ ebaafee ni enyɛŋ efee, ni ebaaye ebua wɔ koni nɔ ko akafite wɔ kɛ lɛ teŋ.

SATAN FUTU AMƐ KƐTEE

4. Be ko be ni anɔkwa Nyɔŋmɔ lɛ bihii lɛ yabua amɛhe naa yɛ Yehowa hiɛ yɛ ŋwɛi lɛ, namɔ hu futu amɛ?

⁴ Gbi ko lɛ, “anɔkwa Nyɔŋmɔ lɛ bihii lɛ” yabua amɛhe naa yɛ Yehowa hiɛ yɛ ŋwɛi. Ani ole mɔ ko hu ni bajie ehiɛ kpo yɛ jɛmɛ? Hiob 1:6 lɛ wie akɛ: “Satan hu futu amɛ kɛtee.” Kɛ́ ato Biblia lɛ mli woji lɛ yɛ be ni akɛŋmala lɛ naa lɛ, enɛ ji klɛŋklɛŋ be ni akɛ gbɛ́i ni ji “Satan” lɛ tsu nii yɛ Biblia lɛ mli. Gbɛ́i nɛɛ sa ŋwɛibɔfo fɔŋ nɛɛ, ejaakɛ eteɔ shi ewoɔ Yehowa. Anɔkwa, be ni atsɛ kpee nɛɛ, no mli lɛ Satan ebatsɔ Yehowa kɛ eweku ni yɔɔ ŋwɛi kɛ shikpɔŋ lɛ nɔ lɛ ahenyɛlɔ, ni ejeee Nyɔŋmɔ bihii anɔkwafoi lɛ ateŋ mɔ kome dɔŋŋ. Nɔ ni Yehowa wie yɛ 1 Mose 3:15 lɛ ni hãa wɔnaa nakai.a Fɛɛ sɛɛ lɛ, Yehowa ŋmɛ lɛ gbɛ ni eba kpee lɛ eko.

5. Mɛni wɔkaseɔ yɛ nibii ni tee nɔ yɛ kpee ni afee yɛ ŋwɛi lɛ shishi lɛ mli?

⁵ Yehowa miisumɔ ni wɔle nibii ni tee nɔ yɛ nakai kpee lɛ shishi, ni no hewɔ lɛ, ehã abɔ he amaniɛ yɛ Biblia lɛ mli. Mɛni wɔkaseɔ yɛ nibii ni tee nɔ lɛ mli? Nibii ni Satan wie yɛ nakai kpee lɛ shishi lɛ hãa wɔnaa akɛ, eyitsoŋ wa waa ni ehe tsɛ̃ɔ mɛi ni sɔmɔɔ Yehowa lɛ. (Hiob 1:9; okɛto Kpojiemɔ 12:10 lɛ he.) Nɔ kroko ni wɔkaseɔ yɛ nakai kpee lɛ mli ji akɛ, Yehowa kɛ ehewalɛ kpele lɛ tsuɔ nii yɛ gbɛ ni ja nɔ, ni eyeɔ jalɛsane be fɛɛ be. Kɛfata he lɛ, ehãa wɔnaa akɛ, Ofe lɛ pɛ ni yɔɔ hegbɛ akɛ ekɛ husu woɔ nibii ahe, ni kɛ́ efee nakai lɛ, mɔ ko mɔ ko nyɛŋ ateke.

SATAN NYƐŊ NƆ KO NƆ KO EFEE, JA YEHOWA EŊMƐ LƐ GBƐ DÃ

6. Mɛni hãa wɔnaa akɛ Yehowa ni kudɔ bɔ ni nibii tee lɛ yɛ kpee lɛ shishi lɛ? (Hiob 1:​7, 8)

⁶ Kanemɔ Hiob 1:​7, 8. Bɔ ni nibii tee lɛ yɛ kpee lɛ shishi lɛ hãa wɔnaa faŋŋ akɛ, Yehowa ji mɔ ni kudɔ kpee lɛ. Mɛni hewɔ wɔkɛɔ nakai? No mli lɛ, Yehowa le jogbaŋŋ akɛ Satan kɛ ehiɛ eka etsulɔ anɔkwafo Hiob. No hewɔ lɛ, ebi Satan tɛ̃ɛ akɛ: “Ani ogbala ojwɛŋmɔ kɛtee mitsulɔ Hiob nɔ?” Hã wɔkwɛ bɔ ni Yehowa kɛ ehewalɛ kpele lɛ tsu nii kɛfã Hiob he.

7. Yɛ nɔ ni awie yɛ Hiob 1:​10, 11 lɛ naa lɛ, mɛni Satan wie yɛ mɛi ni sɔmɔɔ Yehowa lɛ ahe?

⁷ Kanemɔ Hiob 1:​10, 11. Yehowa ji Jeŋ Muu Fɛɛ Nɔyelɔ. Ebaanyɛ efee nɔ fɛɛ nɔ ni esumɔɔ, ni efeɔ nɔ ni ja be fɛɛ be. (Yer. 32:17; Dan. 4:35) Shi Satan wie akɛ, bɔ ni Yehowa kɛ ehewalɛ lɛ tsuɔ nii lɛ ejaaa. Ewie akɛ, Yehowa ehã adesai, ni Hiob fata he lɛ, nibii kpakpai pii koni amɛsɔmɔ lɛ. No hewɔ lɛ, yɛ gbɛ ko nɔ lɛ, eetao etsɔɔ akɛ, nibii kpakpai ni wɔnáa kɛjɛɔ Yehowa dɛŋ lɛ ahewɔ wɔsɔmɔɔ lɛ lɛ. Mɛni Yehowa fee yɛ sane nɛɛ he?

8-9. Mɛni Yehowa hã Satan hegbɛ ni efee, ni mɛni ehãaa lɛ hegbɛ ni efee? (Hiob 1:12) Ni mɛni hewɔ efee nakai? (Kwɛmɔ mfoniri lɛ hu.)

⁸ Kanemɔ Hiob 1:12. Yehowa hã Abonsam hegbɛ ni eka Hiob koni akwɛ akɛ nɔ ni Abonsam wie lɛ ji anɔkwale lo. Shi Yehowa tsɔɔ Satan nɔ ni ebaanyɛ efee kɛ nɔ ni enyɛŋ efee. Ehã ele faŋŋ akɛ, ebɛ hegbɛ ni ekɛ enine taa Hiob he. Ekɛɛ lɛ akɛ: “Lɛ gbɔmɔ lɛ diɛŋtsɛ kɛkɛ ni okɛ onine akasa ehe!” Yehowa wie enɛ yɛ mɔ fɛɛ mɔ ni eba kpee lɛ shishi lɛ hiɛ. Satan le akɛ, enyɛŋ Hiob nɔ ko nɔ ko efee, akɛ ja nɔ ni Yehowa eŋmɛ lɛ gbɛ akɛ efee lɛ kɛkɛ. No hewɔ lɛ, ebo nɔ ni Yehowa kɛɛ lɛ lɛ toi. Ŋmɛnɛ hu lɛ, Satan nyɛŋ eteke hegbɛ ni Yehowa ehã lɛ lɛ. Yehowa kɛ ehewalɛ lɛ bu Hiob he ni ekɛtsɔɔ akɛ, eji Nyɔŋmɔ ni yɔɔ suɔmɔ ni feɔ nɔ ni ja be fɛɛ be.

⁹ Satan eyayeee omanye. Hiob tee nɔ eye e-Tsɛ ni yɔɔ ŋwɛi lɛ anɔkwa. (Hiob 1:22) Shi asomoaŋ, Satan tsui enyɔko emli; eku esɛɛ eba ekoŋŋ.

10. Mɛni hewɔ Yehowa ŋmɛ Satan gbɛ ni eka Hiob ekoŋŋ lɛ? (Hiob 2:​2-6)

¹⁰ Kanemɔ Hiob 2:​2-6. Jwɛŋmɔ ni Satan hiɛ kɛba sɛɛkpee nɛɛ ehiii fe tsutsu nɔ lɛ po. Ewie akɛ kɛ́ Hiob nu he akɛ eehe egbo lɛ, ebaalomɔ Yehowa ni ebaakpa lɛ sɔɔmɔ. Bɔ ni afee ni ana sane lɛ naa lɛ, Yehowa ŋmɛ Satan gbɛ ni ehã hela ni naa wa waa amɔ Hiob. Shi, shi kome ekoŋŋ lɛ, Yehowa tsɔɔ lɛ he ni hegbɛ ni ekɛhã lɛ lɛ yawaa. Ewie akɛ: “Ewala kɛkɛ okaŋɔ!” Satan nyɛɛɛ eteke hegbɛ ni Yehowa hã lɛ lɛ. Nɔ ni Yehowa ŋmɛ lɛ gbɛ akɛ efee lɛ, no pɛ enyɛ efee. Enɛ hãa wɔnaa lɛɛlɛŋ akɛ, Yehowa ji Ofe lɛ.

YEHOWA HÃ HIOB NAAGBAI LƐ ASƐƐ FO

11. Be ni Hiob hã efee faŋŋ akɛ ebaaya nɔ ehiɛ enɔkwayeli lɛ mli lɛ, mɛɛ gbɛ nɔ Yehowa jɔɔ lɛ? (Hiob 42:​10-13)

¹¹ Kanemɔ Hiob 42:​10-13. Be ni Hiob hã efee faŋŋ akɛ, ebaaya nɔ ehiɛ enɔkwayeli lɛ mli lɛ, Yehowa fo enaagbai lɛ fɛɛ asɛɛ, ni eŋmɛɛɛ Satan gbɛ ni epiŋ Hiob loo eye lɛ awui tamɔ efee lɛ dɔŋŋ. Shi kome ekoŋŋ lɛ, Satan nyɛɛɛ afee nɔ ko nɔ ko yɛ yiŋ ni Yehowa ekpɛ lɛ he.

12. Gbaa niiashikpamɔ ko ni hãa wɔnaa nɔ ni Yehowa fee ehã etsuji komɛi ni kɛ amɛhiɛ fɔ̃ enɔ akɛ ebaahere amɛ lɛ.

¹² Yɛ naagbee gbii nɛɛ amli lɛ, Yehowa kɛ ehewalɛ lɛ ehere etsuji pii. Akɛ nɔkwɛmɔnɔ lɛ, yɛ 1945 lɛ, Nazi asraafoi lɛ nyɛ wɔnyɛmimɛi 230 kɛ gboklɛfoi krokomɛi anɔ ni amɛnyiɛ amɛnane nɔ kɛfã gbɛ kakadaŋŋ kɛjɛ yiwalɛ nsara ko mli kɛya ŋshɔ lɛ naa koni ayagbe amɛ. Mɛi pii gboi yɛ gbɛ lɛ nɔ, shi naakpɛɛ sane ji, wɔnyɛmimɛi lɛ ateŋ mɔ kome folo po gbooo. Be ni amɛŋmaa amɛniiashikpamɔ lɛ, amɛkɛ amɛhe to Hebri oblahii etɛ lɛ ahe ni amɛwie akɛ, bɔ ni Yehowa here oblahii etɛ nɛɛ kɛjɛ la kɛ flɔnɔɔ ni tsoɔ grigri lɛ mli ni anuuu la he fu po yɛ amɛhe lɛ, nakai nɔŋŋ eye ebua amɛ ni amɛje kaa ni yɔɔ gbeyei nɛɛ mli, ni amɛhemɔkɛyeli lɛ mli gbɔjɔko. Yehowa waje amɛ, ni amɛnu he akɛ ehere amɛ tamɔ bɔ ni ehere Daniel kɛje jatai abu lɛ mli lɛ. Amɛtswa amɛfai shi akɛ, kɛjɛ nakai gbi lɛ nɔ kɛyaa lɛ, amɛbaasɔmɔ Yehowa kɛya naanɔ. Amɛwie akɛ, enɛ ji hegbɛ ni fe fɛɛ ni amɛbaanyɛ amɛná.—Okɛto Daniel 3:27; 6:22 lɛ he.

13. Kɛ́ naagbai miisu otsui lɛ, mɛni obaanyɛ ohe oye akɛ Yehowa baafee ehã bo? (Kwɛmɔ mfonirii lɛ hu.)

¹³ Bei komɛi lɛ, wɔ hu wɔkɛ naagbai ni mli wa kpeɔ, ni wɔnuɔ he oookɛɛ ashɛ wɔ afɔ̃ jatai abu mli. (1 Pet. 5:​8-10) Bei komɛi hu lɛ, wɔnuɔ he akɛ wɔnaagbai lɛ asɛɛ efoŋ kɔkɔɔkɔ, ni enɛ hãa wɔmiishɛɛ fɛɛ tãa. Kɛ́ eba lɛ nakai lɛ, esa akɛ wɔkai Hiob sane lɛ, ni no baaye abua wɔ. Esane lɛ hãa wɔnáa hemɔkɛyeli ni mli wa akɛ, Yehowa baanyɛ afo wɔnaagbai lɛ fɛɛ asɛɛ, ni akɛ, kɛ́ efeee nakai bianɛ po lɛ, ebaafee nakai wɔsɛɛ yɛ jeŋ hee lɛ mli. Eto be ni ekɛbaakpãtã jeŋ fɔŋ nɛɛ hiɛ, ni kɛ́ nakai be lɛ shɛ lɛ, ehãŋ eho he bibioo po!

YEHOWA SUMƆƆ MƐI NI YEƆ LƐ ANƆKWA LƐ WAA

14-15. Mɛni Yehowa miishwe waa ni efee ehã etsuji anɔkwafoi lɛ? (Hiob 14:15) (Kwɛmɔ mfoniri lɛ hu.)

¹⁴ Kanemɔ Hiob 14:15. Wɔ-Tsɛ ni yɔɔ ŋwɛi lɛ sumɔɔ mɛi ni yeɔ lɛ anɔkwa lɛ waa. Amɛsane kã etsui nɔ aahu akɛ, kɛ́ amɛgboi lɛ, ebaatee amɛ shi. Kɛ́ Yehowa tee etsuji ni egboi lɛ shi lɛ, wɔwerɛhoyeli lɛ baatsɔ miishɛɛ sɔŋŋ.—Yes. 65:17.

¹⁵ Eyɛ mli akɛ be ni Hiob naagbai lɛ asɛɛ fo lɛ, ekã he eyɛ jeŋ fɔŋ nɛɛ mli moŋ, shi Biblia lɛ hãa wɔnaa akɛ, Yehowa jɔɔ lɛ waa. Ehã ená gbɔmɔtsoŋ hewalɛ kpakpa, ni ebɔ nibii fɛɛ ni ŋmɛɛ lɛ lɛ he toi enyɔ ehã lɛ. Shi Yehowa ejɔko Hiob egbeko naa; yɛ jeŋ hee lɛ mli lɛ, ekɛ pii baafata he ehã lɛ. Bɔ ni Yehowa kɛ Hiob ye ehã lɛ hãa wɔnaa akɛ, eesumɔ ni etsuji anɔkwafoi fɛɛ aná miishɛɛ ni amɛtsui anyɔ amɛmli waa yɛ shihilɛ mli. Ewo shi po akɛ, ebaahã amɛ fɛɛ hegbɛ ni amɛhi shi kɛya naanɔ yɛ paradeiso mli yɛ shikpɔŋ lɛ nɔ. (Kpo. 21:​3, 4) Nɔ ni Yehowa, Jeŋ Muu Fɛɛ Nɔyelɔ lɛ, miishwe ni efee ehã etsuji nɛ. Kɛ́ wɔhã sane nɛɛ hi wɔjwɛŋmɔ mli lɛ, ebaaye ebua wɔ ni wɔfi shi yɛ naagba fɛɛ naagba ni wɔkɛbaakpe lɛ mli.

16. Mɛni ji yiŋtoo kroko hewɔ ni wɔbaanyɛ wɔkɛ wɔhiɛ afɔ̃ Yehowa, wɔ-Nyɔŋmɔ Ofe lɛ nɔ?

¹⁶ Yɛ Hiob amanehului lɛ asɛɛ lɛ, ehi shi afii pii, kɛkɛ ni egbo. Shi wɔle akɛ, Yehowa, wɔ-Nyɔŋmɔ Ofe lɛ, kɛ Jeŋ Muu Fɛɛ Nɔyelɔ lɛ, baanyɛ atee lɛ shi, ni ebaafee hu. (5 Mo. 32:39) Yehowa eto be ni ekɛbaatee etsuji anɔkwafoi fɛɛ ni egboi lɛ shi, ni kɛ́ nakai be lɛ shɛ lɛ, mɔ ko mɔ ko nyɛŋ atsĩ enaa.—Rom. 8:​38, 39.

OKƐ OHIƐ AFƆ̃ YEHOWA NƆ KWRAA

17. Mɛni hãa wɔnaa akɛ, Satan nyɛŋ akpãtã Yehowa webii lɛ ahiɛ?

¹⁷ Hiob sane lɛ ehã wɔna yiŋtoi pii ahewɔ ni wɔbaanyɛ wɔkɛ wɔhiɛ afɔ̃ Yehowa nɔ kwraa. Eŋɔɔ wɔnaa waa akɛ, Yehowa eŋmɛko Satan gbɛ ni ekpãtã wɔhiɛ. Ŋmɛnɛ lɛ, mɛi aaafee miliɔn nɛɛhu sɔŋŋ yɛ wala mli yɛ shikpɔŋ lɛ nɔ ni amɛmiisɔmɔ Yehowa, Nyɔŋmɔ Ofe lɛ, ni amɛmiiye lɛ anɔkwa. Mɛi srɔtoisrɔtoi eka shii abɔ akɛ amɛbaahã wɔkpa Yehowa sɔɔmɔ, shi tawuu nii ni amɛsɔ̃ amɛshi wɔ lɛ eko kwraa nyɛko nɔ ko afee. (Yes. 54:17) Nɔyelɔi ni asheɔ amɛ gbeyei waa kɛ jamɔŋ hiɛnyiɛlɔi pii eka akɛ amɛbaabule wɔshishi, shi amɛyeko omanye. Nɔ ko bɛ ni baahã wɔkpa shiɛmɔ. Wɔbaahã jeŋ fɛɛ ale akɛ, Yehowa ji anɔkwa Nyɔŋmɔ lɛ, ni Satan ji amalelɔ kɛ gbɔmɔgbelɔ. Kɛ́ wɔkɛ gbele kpe hiɛ kɛ hiɛ po lɛ, wɔkpaŋ Yehowa sɔɔmɔ, ejaakɛ wɔle akɛ kɛ́ wɔye lɛ anɔkwa lɛ, ebaatee wɔ shi.—Hos. 13:14.

18. Mɛni hewɔ esaaa akɛ wɔsheɔ gbeyei ekɔɔɔ he eko nɔ ni baaba wɔsɛɛ?

¹⁸ Kɛ́ wɔhe be wɔjwɛŋ Hiob sane lɛ nɔ lɛ, ebaahã hemɔkɛyeli ni wɔyɔɔ akɛ Yehowa baahi wɔmasɛi, ekɔɔɔ he eko nɔ ni baaba lɛ mli awa. Yɛ amanehulu kpeteŋkpele lɛ mli lɛ, Satan kɛ ewebii lɛ baanu he akɛ, Yehowa webii lɛ bɛ mɔ ko ni baabu amɛhe, ni no hewɔ lɛ, amɛbaatutua amɛ. Shi tamɔ eba lɛ yɛ Hiob sane lɛ mli lɛ, Yehowa baatsɔɔ akɛ lɛ ji Ofe. Ebaabu ewebii lɛ ahe, ni ehãŋ Satan akpãtã amɛhiɛ. Etsɛŋ kwraa, Yehowa baajie naagbai fɛɛ ni Satan kɛba adesai anɔ lɛ kɛya. Yesu baamɔ Abonsam kɛ edaimonioi lɛ ni ebaashɛrɛ amɛ ewo bu kwɔŋkwɔŋ lɛ mli afii 1,000. (Luka 8:31; Kpo. 20:​1-3) Kɛkɛ lɛ, kɛ́ afii 1,000 lɛ ba naagbee lɛ, Yehowa baakpãtã Satan kɛ mɛi fɛɛ ni nyiɛ esɛɛ lɛ ahiɛ kwraa, tamɔ bɔ ni ewie akɛ ebaafee lɛ pɛpɛɛpɛ. Kɛjɛ no nɔ kɛyaa lɛ, wɔnaŋ Satan dɔŋŋ!—1 Mo. 3:15; Rom. 16:20; Kpo. 20:10.

19. Mɛɛ jɔɔmɔi mɛi ni kɛ amɛhiɛ fɔ̃ɔ Yehowa nɔ kwraa lɛ baaná? (Kwɛmɔ mfoniri lɛ hu.)

¹⁹ Wɔmiikpa jeŋ hee lɛ gbɛ waa, ejaakɛ yɛ jeŋ hee lɛ mli lɛ, wɔbaaye emuu ni wɔbaaná miishɛɛ waa. Bɔ ni nibii baaya lɛ ahã lɛ baafe bɔ ni wɔkpaa gbɛ lɛ kwraa. Yehowa kɛɛ: “Naa! Miifee nibii fɛɛ ehee.” (Kpo. 21:5) Mɛni nɔ ni ewie nɛɛ tsɔɔ? Kɛjɛ be ni Satan laka Hawa yɛ Eden abɔɔ lɛ mli afii akpei abɔ ni eho nɛ lɛ, lɛ kɛ edaimonioi lɛ etee nɔ amɛlaka adesai ni amɛye amɛ awui kɛbashi ŋmɛnɛ. Shi yɛ jeŋ hee lɛ mli lɛ, fɛɛ sɛɛ baafo. Kwɛmɔ bɔ ni wɔhe baajɔ wɔ ahã! Ŋmɛnɛ lɛ, naagbai ni wɔkɛkpeɔ yɛ je lɛ mli lɛ suɔ wɔtsui aahu akɛ, kɛ́ wɔyakã shi lɛ, wɔnyɛɛɛ wɔwɔ ni je tsɛreɔ. Shi yɛ jeŋ hee lɛ mli lɛ, fɛɛ sɛɛ baafo. Mɛi ni baafo Harmagedon lɛ baana bɔ ni Yehowa baatsɔ naakpɛɛ gbɛ nɔ etsa helai yɛ shikpɔŋ lɛ nɔ fɛɛ. Agbɛnɛ hu, abaatee wɔnanemɛi kɛ wɔwekumɛi ni egboi lɛ shi. Yɛ nakai beiaŋ lɛ, shihilɛ baaŋɔɔ waa tamɔ bɔ ni Yehowa, wɔ-Tsɛ ni yɔɔ ŋwɛi lɛ, to akɛ efee yɛ shishijee lɛ!

20. Mɛni otswa ofai shi akɛ obaafee?

²⁰ Wɔleee kai ni wɔkɛbaakpe dani naagbee gbii nɛɛ baaba naagbee. Shi wɔle akɛ, ebaabi ni wɔfee ekãa, ejaakɛ ja wɔfee nakai dani wɔbaanyɛ wɔye Yehowa anɔkwa. No hewɔ lɛ, nyɛhãa wɔtswaa wɔfai shi akɛ wɔkɛ wɔhiɛ baafɔ̃ Yehowa, wɔ-Maŋtsɛ lɛ nɔ kwraa, ni wɔbo lɛ toi. Nyɛhãa wɔkɛ wɔwiemɔ kɛ wɔnifeemɔ atsɔa akɛ wɔsumɔɔ Yehowa, wɔ-Tsɛ ni yɔɔ ŋwɛi lɛ, ni wɔle akɛ nibii fɛɛ ni Satan ewie lɛ ji amale. Kɛ́ wɔye Yehowa, Jeŋ Muu Fɛɛ Nɔyelɔ lɛ, anɔkwa lɛ, wɔsɛɛ lɛ, wɔmii baashɛ wɔhe waa, ejaakɛ eeshwe waa ni ejwere etsuji anɔkwafoi fɛɛ yɛ gbɛ krɛdɛɛ nɔ!