Bɔ Ni Baafee Ni Tai Asɛɛ Afo

NYƆŊMƆ BAAJIE ADESAI ANƆYELII KƐYA

Nyɔŋmɔ baatsɔ ta ko ni Biblia lɛ tsɛɔ lɛ akɛ Harmagedon ta lɛ nɔ ekpãtã adesai anɔyelii ahiɛ.a (Kpojiemɔ 16:16) Kɛ́ nakai be lɛ shɛ lɛ, “shikpɔŋ muu lɛ fɛɛ nɔ maŋtsɛmɛi lɛ” baabua amɛhe naa kɛhã “Nyɔŋmɔ Ofe lɛ gbi wulu lɛ nɔ ta lɛ.” (Kpojiemɔ 16:14) Nyɔŋmɔ baatsɔ Harmagedon ta lɛ nɔ efo tai fɛɛ asɛɛ.

Nyɔŋmɔ kɛ e-Maŋtsɛyeli lɛ loo enɔyeli lɛ baaye adesai anɔyelii lɛ najiaŋ, ni ebaaye nɔ kɛjɛ ŋwɛi, ni akpãtãŋ enɔyeli lɛ hiɛ. (Daniel 2:44) Nyɔŋmɔ ehala e-Bi Yesu Kristo akɛ enɔyeli lɛ Maŋtsɛ. (Yesaia 9:​6, 7; Mateo 28:18) Nɔyeli nɛɛ ji Maŋtsɛyelib ni Yesu kɛɛ esɛɛnyiɛlɔi lɛ ni amɛsɔle ni eba lɛ. (Mateo 6:​9, 10) Jeŋ muu fɛɛ nɔyeli kome baaye adesai fɛɛ anɔ, ni Yesu baafee amɛ-Nɔyelɔ.

Yesu foŋ lɛ pɛ enɔ mli tamɔ bɔ ni nɔyelɔi ni ji adesai lɛ feɔ lɛ. Ekɔɔɔ he eko maŋ nɔ ni mɔ ko jɛ loo wiemɔ ni ewieɔ lɛ, Yesu kɛ mɔ fɛɛ mɔ baaye jogbaŋŋ, ni ejieŋ nii amli. (Yesaia 11:​3, 4) Ni ehe ebahiaŋ ni mɛi abi ni akɛ amɛ aye jogbaŋŋ. Mɛni hewɔ? Ejaakɛ Yesu baafo mɔ fɛɛ mɔ nɔ mli. “Ebaajie ohiafo ni bolɔɔ kɛhã yelikɛbuamɔ lɛ, kɛ mɔ ni nii yɔɔ mɔbɔ lɛ, kɛ mɔ fɛɛ mɔ ni bɛ yelikɛbualɔ lɛ. . . . Ebaajie amɛ kɛje nɔnyɛɛ kɛ yiwalɛ mli.”—Lala 72:​12-14.

Nyɔŋmɔ Maŋtsɛyeli lɛ baakpãtã tawuu nii fɛɛ ni yɔɔ shikpɔŋ lɛ nɔ lɛ ahiɛ. (Mika 4:3) Agbɛnɛ hu, ebaajie efɔŋfeelɔi ni kpaaa nɔmɔ ni yeɔ mɛi awui lɛ kɛje jɛmɛ. (Lala 37:​9, 10) Ekɔɔɔ he eko he ni mɔ ko yɔɔ lɛ, mɔ fɛɛ mɔ kwraa, nuu jio, yoo jio, gbekɛ jio baanu he akɛ eyɛ shweshweeshwe.—Ezekiel 34:28.

Mɔ fɛɛ mɔ baaná shihilɛ kpakpa yɛ Nyɔŋmɔ Maŋtsɛyeli lɛ shishi. Ebaajie nibii tamɔ ohia kɛ hɔmɔ kɛya, ni mɔ fɛɛ mɔ baaná shĩa kpakpa hu ewɔ mli. Niyenii baabu, ni mɔ fɛɛ mɔ baaná niyenii kpakpa eye.—Lala 72:16; Yesaia 65:​21-23.

Nyɔŋmɔ Maŋtsɛyeli lɛ baajie nibii gbohii fɛɛ ni tai kɛbaa lɛ kɛya. Ebaatsa mɛi fɛɛ ni eje kpa loo amɛná jwɛŋmɔ mli naagbai yɛ tai ahewɔ lɛ. Ebaatee mɛi ni egboi lɛ po ashi kɛba wala mli ekoŋŋ yɛ shikpɔŋ lɛ nɔ. (Yesaia 25:8; 26:19; 35:​5, 6) Weku mli bii baafee ekome kɛhi shi ekoŋŋ, ni nibii gbohii ni tai kɛbaa lɛ baafee ‘tsutsu nibii ni eho etee.’—Kpojiemɔ 21:4.

NYƆŊMƆ BAAJIE ESHA KƐJE JƐMƐ

Nyɔŋmɔ Maŋtsɛyeli lɛ baahã adesai fɛɛ afee ekome kɛjá Yehowac, ni ji anɔkwa Nyɔŋmɔ lɛ kɛ “suɔmɔ kɛ toiŋjɔlɛ Nyɔŋmɔ lɛ.” (2 Korintobii 13:11) Adesai baakase bɔ ni amɛkɛ amɛhe baahi shi yɛ toiŋjɔlɛ mli. (Yesaia 2:​3, 4; 11:9) Nyɔŋmɔ baajie esha kɛje mɛi fɛɛ ni boɔ lɛ toi lɛ ahe, ni amɛbaaye emuu.—Romabii 8:​20, 21.

NYƆŊMƆ BAAKPÃTÃ SATAN KƐ EDAIMONIOI LƐ AHIƐ

Nyɔŋmɔ Maŋtsɛyeli lɛ baakpãtã Satan kɛ edaimonioi lɛ ni hãa mɛi wuɔ ta lɛ ahiɛ. (Kpojiemɔ 20:​1-3, 10) Enɛ hewɔ lɛ, “toiŋjɔlɛ baahi he fɛɛ he” ejaakɛ mɔ ko bɛ ni baawo mɛi ayiŋ ni amɛfee efɔŋ.—Lala 72:7.

Obaanyɛ ohe oye waa akɛ Nyɔŋmɔ baaye shi ni ewo akɛ ebaafo tai asɛɛ lɛ nɔ. Ebaanyɛ efo tai asɛɛ, ni eesumɔ hu ni efee nakai.

• Nyɔŋmɔ le bɔ ni ebaafee efo tai asɛɛ ejaakɛ ehiɛ kã shi waa ni eyɛ hewalɛ kpele hu. (Hiob 9:4) Nɔ ko nɔ ko bɛ ni ni enyɛŋ efee.—Hiob 42:2.

• Kɛ́ Nyɔŋmɔ na ni mɛi miipiŋ lɛ, eŋɔɔɔ enaa. (Yesaia 63:9) Agbɛnɛ hu, “enyɛɔ mɔ fɛɛ mɔ ni sumɔɔ yiwalɛ nifeemɔ.”—Lala 11:5.

• Nyɔŋmɔ yeɔ eshiwoo nɔ be fɛɛ be; enyɛŋ emale.—Yesaia 55:​10, 11; Tito 1:2.