Bɔ Ni Obaafee Oná Toiŋjɔlɛ Yɛ Tai Ni Awuɔ Lɛ Fɛɛ Sɛɛ
Gary ni tsutsu ko lɛ eji asraafonyo lɛ wie akɛ, “Dani mabɔi Biblia lɛ kasemɔ lɛ, no mli lɛ mileee nɔ hewɔ ni awuiyeli, efɔŋfeemɔ kɛ naagbai fa babaoo lɛ. Shi amrɔ nɛɛ, mile akɛ Yehowa Nyɔŋmɔ baahã je lɛ afee shweshweeshwe. No hewɔ lɛ, mitoiŋ ejɔ mi.”
Jeee Gary pɛ nuɔ he nakai. Naa saji komɛi ni tsɔɔ bɔ ni Biblia lɛ eye ebua mɛi komɛi.
BIBLIA LƐ KƐƆ AKƐ: “Ejaakɛ bo Yehowa, ohi ni osumɔɔ waa akɛ okɛ esha ake.”—Lala 86:5.
BƆ NI EYE EBUA: “Ŋmalɛ nɛɛ hã mina akɛ Yehowa naa mɔbɔ waa. Mile akɛ eesumɔ ni ekɛ nibii fɛɛ ni mifee be ni miyawu ta lɛ ake mi.”—Wilmar, Colombia.
BIBLIA LƐ KƐƆ AKƐ: “Miibɔ ŋwɛi hee kɛ shikpɔŋ hee; ni akaiŋ tsutsu nii lɛ dɔŋŋ, ni amɛbaŋ tsui mli hu dɔŋŋ.”—Yesaia 65:17.
BƆ NI EYE EBUA: “Shihilɛi ni mikɛkpe be ni miji asraafonyo lɛ hewɔ lɛ, miná jwɛŋmɔ mli naagba ko ni hãa mihaoɔ waa. Shi ŋmalɛ nɛɛ hãa minaa akɛ etsɛŋ Yehowa baahã mihiɛ akpa shihilɛi gbohii fɛɛ ni mikɛkpe be ni miji asraafonyo lɛ nɔ kwraa. Amɛhiŋ mijwɛŋmɔ mli dɔŋŋ. Enɛ ji nikeenii ni nɔ bɛ!”—Zafirah, United States.
BIBLIA LƐ KƐƆ AKƐ: “Jalɔi baafa yɛ egbii lɛ amli, ni toiŋjɔlɛ baahi he fɛɛ he kɛyashi be ni nyɔɔŋtsere bɛ dɔŋŋ.”—Lala 72:7.
BƆ NI EYE EBUA: “Mifɔɔ wiemɔi nɛɛ anɔjwɛŋmɔ. Etsɛŋ, ta kɛ nibii gbohii ni ekɛbaa lɛ asɛɛ baafo, ni ehe ebahiaŋ ni wɔye wɔtsui dɔŋŋ akɛ sane fɔŋ ko baanina mɛi ni wɔsumɔɔ amɛsane lɛ.”—Oleksandra, Ukraine.
BIBLIA LƐ KƐƆ AKƐ: “Omɛi ni egboi lɛ baaba wala mli. . . . Nyɛ mɛi ni nyɛyɔɔ mulu mli, nyɛhiɛ atsɛ̃a ni nyɛláa nyamɔ lala!”—Yesaia 26:19.
BƆ NI EYE EBUA: “Be ni aka akɛ abaabule Tutsibii lɛ ashishi lɛ, agbe miwekumɛi pii. Shi ŋmalɛ nɛɛ hãa minaa akɛ mana amɛ ekoŋŋ. Miikpa be ni abaatee amɛshi ni manu amɛgbee, ni amɛná miishɛɛ lɛ gbɛ waa!”—Marie, Rwanda.
BIBLIA LƐ KƐƆ AKƐ: “Eshwɛ be fioo kɛkɛ, ni onaŋ mɛi fɔji lɛ dɔŋŋ . . . Shi mɛi ni he jɔ lɛ, shikpɔŋ lɛ baatsɔ amɛnɔ, ni amɛmii baashɛ amɛhe waa yɛ toiŋjɔlɛ babaoo mli.”—Lala 37:10, 11.
BƆ NI EYE EBUA: “Eyɛ mli akɛ ta lɛ eba naagbee moŋ, shi loloolo lɛ, mɛi feɔ efɔŋ ni ayeɔ mɛi saji fɔji. Ŋmalɛ nɛɛ eye ebua mi waa. Yehowa naa nɔ fɛɛ nɔ, ni enuɔ shihilɛ ni mitsɔɔ mli lɛ shishi. Ewo shi akɛ etsɛŋ, nɔnai fɛɛ sɛɛ baafo ni akaiŋ dɔŋŋ.”—Daler, Tajikistan.
Mɛi ni atsɛ amɛwiemɔ yisɛɛ yɛ magazin nɛɛ mli lɛ fata Yehowa Odasefoi akpekpe toi abɔ ni Biblia lɛ eye ebua amɛ ni amɛtoiŋ ejɔ amɛ lɛ ahe. Biblia lɛ eye ebua Yehowa Odasefoi lɛ, no hewɔ lɛ, amɛkɛ mɔ fɛɛ mɔ yeɔ jogbaŋŋ ni amɛjieee nii amli. (Efesobii 4:31, 32) Amɛkɛ amɛhe wooo pɔlitis kɛ maŋ saji amli, ni amɛwuuu ta hu.—Yohane 18:36.
Yehowa Odasefoi naa amɛhe akɛ weku kome. No hewɔ lɛ, amɛjɛɔ suɔmɔ mli amɛyeɔ amɛbuaa amɛhe. (Yohane 13:35) Akɛ nɔkwɛmɔnɔ lɛ, ehe bahia ni Oleksandra ni atsɛ ewiemɔ yisɛɛ yɛ magazin nɛɛ mli lɛ kɛ enyɛmi yoo ajo foi kɛya maŋ kroko nɔ yɛ ta hewɔ. Ewie akɛ: “Be ni wɔfo bɔda lɛ nɔŋŋ lɛ, wɔna Odasefoi ni yɔɔ maŋ ni wɔyaa nɔ lɛ nɔ lɛ ni amɛba koni amɛbakpee wɔ. Amɛye amɛbua wɔ koni wɔnyɛ wɔhi maŋ lɛ mli akɛ abobalɔi.”
Wɔkɛ miishɛɛ miifɔ̃ bo nine ni obafata wɔhe yɛ wɔkpeei lɛ ashishi koni obakase toiŋjɔlɛ saji ni Biblia lɛ ewie he lɛ ahe nii, kɛ bɔ ni obaafee okɛtsu nii. Yaa jw.org lɛ nɔ koni ona he ni wɔkpeɔ yɛ yɛ okutso lɛ mli loo koni oyabi ni Yehowa Odasefoi lɛ ateŋ mɔ ko kɛ bo abakase Biblia lɛ kɛtsɔ wolo ni ji Oyi Aná Wala Kɛya Naanɔ! lɛ nɔ.