Sanebimɔ He
◼ Mɛni esa akɛ wɔha ahi wɔjwɛŋmɔ mli beni wɔkɛ tɛlifoŋ ni kpãa bɛ sɛɛ kɛ ilɛtrɔnik nibii ni gbɛɛɔ tsuɔ nii lɛ?
Tsɔnei ni tamɔ nɛkɛ baanyɛ aye abua wɔ koni wɔkɛ mɛi krokomɛi agba sane yɛ nɔ ni miihe ashɛ he fɛɛ he ni wɔyɔɔ. Yɛ be mli ni enɛ baanyɛ afee nɔ ni sɛɛnamɔ yɔɔ he lɛ, esa akɛ wɔkwɛ wɔhe nɔ jogbaŋŋ koni wɔkaŋmɛ gbɛ ni tɛlifoŋ ni kpãa bɛ sɛɛ kɛ ilɛtrɔnik nibii ni gbɛɛɔ lɛ kɛ nitsumɔ yɛ bei ni esaaa mli lɛ gbalaa jwɛŋmɔ kɛjeɔ wɔsɔɔmɔ nitsumɔ lɛ loo Kristofoi akpeei lɛ nɔ. Mɛɛ gbɛ nɔ enɛ baanyɛ aba yɛ?
Susumɔ nɔ ni baajɛ mli aba kɛji wɔ tɛlifoŋ ni kpãa bɛ sɛɛ lɛ gbɛɛ loo wɔ ilɛtrɔnik nii ni gbɛɛɔ lɛ gbɛɛ be mli ni wɔkɛ wɔhe ewo sɔɔmɔ nitsumɔ lɛ mli ní wɔmiiye odase lɛ he okwɛ. Mɛni shiatsɛ lɛ baasusu? Mɛɛ jwɛŋmɔ wɔbaaha shiatsɛ lɛ aná kɛji wɔkpa wiemɔ lɛ koni wɔkɛ mɔ ni tswa wɔ lɛ agba sane lɛ? Eka shi faŋŋ akɛ wɔsumɔŋ ni wɔfee nɔ ko ni wɔkɛtsĩ mɛi krokomɛi anaa koni amɛkabo Maŋtsɛyeli shɛɛ sane lɛ toi. (2 Kor. 6:3) No hewɔ lɛ, kɛji wɔhiɛ tɛlifoŋ ni kpãa bɛ sɛɛ loo ilɛtrɔnik nibii ni gbɛɛɔ lɛ, esa akɛ wɔto he gbɛjianɔ koni ekagba wɔ loo mɛi krokomɛi anaa yɛ be mli ni wɔkɛ wɔhe ewo sɔɔmɔ nitsumɔ lɛ mli.
Ni kɛji akɛ wɔmiimɛ yɛ be mli ni mɛi krokomɛi miiye odase hu? Kɛji akɛ wɔto be pɔtɛɛ ko wɔfɔ̃ shi kɛha sɔɔmɔ nitsumɔ lɛ, ani esaaa akɛ wɔhaa wɔjwɛŋmɔ hiɔ nakai nitsumɔ lɛ nɔ? Yɛ bulɛ ni wɔyɔɔ kɛha wɔ sɔɔmɔ krɔŋkrɔŋ lɛ hewɔ lɛ, nyɛfainɛ nyɛtsua heloonaa nitsumɔ ni he ehiaaa loo shihilɛ mli nifeemɔi ahe nii yɛ be kroko mli. (Rom. 12:7) Yɛ anɔkwale mli lɛ, tɛlifoŋ ni akɛtsuɔ nii koni akɛya nɔ aye odase loo koni akɛto gbɛjianɔ kɛha nakai feemɔ lɛ fataaa enɛ he.
Akɛni niiamlitaomɔi komɛi tsɔɔ akɛ tɛlifoŋ ni kpãa bɛ sɛɛ ni akɛtsuɔ nii yɛ be mli ni akudɔɔ tsɔne lɛ haa anáa oshara yɛ gbɛ ni waaa nɔ hewɔ lɛ, esa akɛ wɔkwɛ wɔhe nɔ jogbaŋŋ diɛŋtsɛ yɛ enɛ kɛ nitsumɔ mli. Esa akɛ wɔye mlai ni tsĩɔ tɛlifoŋ ni kpãa bɛ sɛɛ ní akɛtsuɔ nii yɛ be mli ni aakudɔ tsɔne lɛ naa lɛ anɔ kɛmɔ shi.
Wɔbaa Kristofoi akpeei, kpeei bibii, kɛ kpeei wuji ashishi koni wɔbajá Yehowa ni etsɔɔ wɔ nii. Ani esaaa akɛ hiɛsɔɔ ni wɔyɔɔ kɛha krɔŋkrɔŋ ni bei ni tamɔ nɛkɛ ji lɛ atsirɛ wɔ koni wɔto tɛlifoŋ fɛɛ ni kpãa bɛ sɛɛ lɛ kɛ ilɛtrɔnik nibii ni gbɛɛɔ lɛ fɛɛ ahe gbɛjianɔ bɔni afee ni amɛkagbala wɔ loo mɛi krokomɛi ajwɛŋmɔ? Kɛji akɛ hiamɔ ko ba trukaa ni ebiɔ ni wɔtsu he nii amrɔ nɔŋŋ lɛ, esa akɛ wɔshi he ni afeɔ kpeei lɛ yɛ lɛ ni wɔyatsu he nii. Kɛ jeee nakai lɛ, esa akɛ wɔto gbɛjianɔ koni wɔtsu wɔ diɛŋtsɛ wɔ nibii kɛ saji ni kɔɔɔ jamɔ he lɛ ahe nii yɛ bei krokomɛi amli shi jeee yɛ be ni ato kɛha jamɔ lɛ mli.—1 Kor. 10:24.
Eba akɛ bɔ ni wɔkɛ tɛlifoŋ ni kpãa bɛ sɛɛ loo ilɛtrɔnik tsɔji krokomɛi tsuɔ nii wɔhaa be fɛɛ be lɛ baatsɔɔ mɛi krokomɛi ahe ni wɔsusuɔ kɛ hiɛsɔɔ ni mli wa ni wɔyɔɔ kɛha mumɔŋ nibii.