Wɔmiikumɔ Mɔji Wuji
1 Satan etsɔ apasa tsɔɔmɔi kɛ shishiumɔi anɔ ekɛ gbɛtsiinii ewo mɛi babaoo atsuii kɛ amɛjwɛŋmɔi amli afii ohai abɔ nɛ. Eha apasa tsɔɔmɔi tamɔ Triniti, susuma ni gbooo, kɛ hel la egbɛ eshwã. Ehaa mɛi ayiŋ feɔ amɛ kɔshikɔshi kɛji akɛ Bɔlɔ ko yɛ, ni ehaaa mɛi ayiŋ atɛ̃ amɛ akɛ Biblia lɛ ja. Hewolonɔ su mlijiemɔ kɛ maŋhedɔɔ hu ji nibii krokomɛi ni tsĩɔ mɛi agbɛ ní amɛkakpɛlɛ anɔkwale lɛ nɔ. (2 Kor. 4:4) Te wɔbaafee tɛŋŋ wɔkumɔ hemɔkɛyelii ni ehe shi waa nɛɛ?—2 Kor. 10:4, 5.
2 Susumɔ Amɛhenumɔi Ahe: Bei pii lɛ, jamɔ mli hemɔkɛyelii ni mɛi ehi shi yɛ naa afii pii lɛ náa amɛhenumɔi anɔ hewalɛ. Mɛi komɛi ehiɛ susumɔi ni ejaaa mli kɛjɛ amɛgbekɛbiiashi tɔ̃ɔ. Bɔni afee ni wɔye wɔbua mɛi ni tamɔ nɛkɛ lɛ, esa akɛ bɔ ni wɔkɛ amɛ wieɔ lɛ atsɔɔ akɛ wɔyɛ bulɛ kɛha amɛsusumɔi lɛ.—1 Pet. 3:15.
3 Wɔbaanyɛ wɔjie bulɛ kpo wɔtsɔɔ amɛ kɛtsɔ gbɛ ni wɔɔŋmɛ amɛ koni amɛgbála nɔ ni amɛheɔ amɛyeɔ, kɛ nɔ hewɔ ni amɛheɔ nakai nibii lɛ amɛyeɔ lɛ mli amɛtsɔɔ wɔ lɛ nɔ. (Yak. 1:19) Ekolɛ akɛni amɛsuɔlɔi komɛi egboi ni amɛmiisumɔ ni amɛna amɛ ekoŋŋ hewɔ lɛ, amɛheɔ amɛyeɔ akɛ susuma lɛ gbooo. Aloo ekolɛ amɛyeɔ gbii juji akɛni amɛnyãa hegbɛ ni enɛ haa amɛnáa koni amɛkɛ amɛwekumɛi aná miishɛɛ lɛ he lɛ hewɔ. Kɛ́ wɔbo amɛtoi lɛ, ebaaha wɔnu nɔ hewɔ ni amɛnuɔ he nakai lɛ shishi, ni ebaaye ebua wɔ ni wɔkɛ yelikɛbuamɔ ni sa lɛ aha amɛ.—Abɛi 16:23.
4 Kasemɔ Yesu: Yesu fee nɔkwɛmɔnɔ ni nɔ bɛ eha wɔ beni eha nuu ko ni le Mla lɛ mli jogbaŋŋ lɛ sanebimɔi ahetoo lɛ. Yesu kɛ hetooi ni yɔɔ tɛ̃ɛ ni ekolɛ nuu lɛ baakpoo yɛ hemɔkɛyelii ni enyãa he waa lɛ hewɔ lɛ haaa lɛ. Yɛ no najiaŋ lɛ, Yesu gbala ejwɛŋmɔ kɛtee Ŋmalɛi lɛ anɔ, ni ebi nuu lɛ ni etsɔɔ ejwɛŋmɔ, ni etsɔ nɔkwɛmɔnii anɔ eye ebua nuu lɛ koni emu sane naa eha lɛ diɛŋtsɛ ehe.—Luka 10:25-37.
5 Anyɛŋ akɛ jamɔ mli apasa hemɔkɛyelii ni ehe shi waa lɛ ato anɔkwalei ni yɔɔ Nyɔŋmɔ Wiemɔ lɛ mli lɛ ahe yɛ gbɛ ko kwraa nɔ. (Heb. 4:12) Kɛ́ wɔŋmɛ wɔtsui shi wɔgbála nibii amli wɔha wɔtoibolɔi lɛ, ekolɛ wɔbaanyɛ wɔye wɔbua amɛ ni amɛkpoo apasa tsɔɔmɔi, ní amɛmɔ anɔkwale ni baanyɛ eha amɛye amɛhe lɛ mli.—Yoh. 8:32.