Wɔbaakase Weku Miishɛɛ Wolo Lɛ

¹ Ebaafee nyɛ miishɛɛ akɛ nyɛaale akɛ kɛjɛ August 4, 2008 otsi lɛ kɛyashi March 16, 2009 lɛ, wɔbaakase Nɔ Diɛŋtsɛ ni Kɛ Weku Miishɛɛ Baa wolo lɛ yɛ Asafo Woloŋ Nikasemɔ lɛ shishi. Mɔ ko sumɔŋ akɛ Ŋmalɛ mli ŋaawoo ni haa anáa weku shihilɛ ni yɔɔ miishɛɛ ni abaakase yɛ woloŋ nikasemɔ lɛ shishi lɛ aŋmɛɛ lɛ. Bɔ ni ato wolo lɛ kasemɔ he gbɛjianɔ aha lɛ baaha aná be kɛsusu kuku fɛɛ kuku kɛ Ŋmalɛi ni yɔɔ wolo lɛ mli lɛ ahe jogbaŋŋ.

² Abaakase klɛŋklɛŋ yitso lɛ fɛɛ yɛ klɛŋklɛŋ otsi ni akɛbaakase wolo lɛ mli akɛni ŋmalɛi ni atsɛ yisɛɛ shi aŋmalako amɛmli wiemɔi ni yɔɔ mli lɛ faaa lɛ hewɔ. Shi abaajara yitsei krokomɛi lɛ fɛɛ amli awo fãi enyɔ loo mli. Enɛ baaha aná be ni fa bɔ ni sa ni akɛkane ŋmalɛi ni atsɛ yisɛɛ shi aŋmalako amɛmli wiemɔi lɛ fɛɛ ní asusu he, ní agbɛnɛ hu asusu bɔ ni abaanyɛ akɛ ŋmalɛi ni aŋmala amɛmli wiemɔi lɛ baatsu nii aha lɛ ahe jogbaŋŋ. Aawo mɛi fɛɛ hewalɛ ni amɛkɛ nibii ni abaasusu he yɛ otsi lɛ mli lɛ atsu nii jogbaŋŋ.

³ Nibii ni yɔɔ akrabatsa ni akɛtĩɔ nikasemɔ lɛ mli ni abaasusu he yɛ nikasemɔ lɛ naagbee lɛ baafee nikasemɔ lɛ fã titri ni he hiaa waa. No hewɔ lɛ, esa ákɛ akɛ be ni fa bɔ ni sa asusu sanebimɔi lɛ kɛ ŋmalɛi ni atsɛ yisɛɛ shi aŋmalako amɛmli wiemɔi ni yɔɔ akrabatsa lɛ mli lɛ ahe.

⁴ Aawo Asafo Woloŋ Nikasemɔ nɔkwɛlɔi hewalɛ ni amɛsaa amɛhe jogbaŋŋ kɛha nikasemɔ lɛ, ni amɛwo mɛi fɛɛ ni yɔɔ amɛkuu lɛ mli, ni mɛi heei fata he lɛ hewalɛ koni amɛ hu amɛsaa amɛhe jogbaŋŋ, amɛba daa, ni amɛkɛ amɛhe awo nikasemɔ lɛ mli.—od-GA 69-71.