Kaafɔ̃ɔ Shiɛmɔ
1 Bei komɛi lɛ, wɔbaanu he akɛ atsu nii jogbaŋŋ yɛ wɔshikpɔŋkuku lɛ mli aahu, shi mɛi fioo ko pɛ boɔ wɔ toi. Shi kɛlɛ, wɔyɛ yiŋtoi kpakpai babaoo hewɔ ni esa akɛ wɔya nɔ wɔshiɛ lɛ.—Mat. 28:19, 20.
2 Ní Akɛye Odase: Yesu gba efɔ̃ shi akɛ Maŋtsɛyeli lɛ shiɛmɔ fata nibii ni he hiaa waa ni baakadi “je nɛŋ naagbee lɛ” he, ni ákɛ abaatsu enɛ “ní akɛye jeŋmaji lɛ fɛɛ odase.” (Mat. 24:3, 14) Kɛ́ mɛi na wɔ ní wɔmiishiɛ Maŋtsɛyeli lɛ he sanekpakpa lɛ, ebafeɔ odaseyeli kpele kɛhaa amɛ. Kɛ́ wɔshi nakai akutso lɛ mli lɛ, ekolɛ mɛi komɛi ni booo sane lɛ toi lɛ po kɛ ŋmɛlɛtswai abɔ loo gbii pii baawie wɔsaramɔ lɛ he. Kɛ́ wɔhiɛ sɔ yiŋtoo hewɔ ni wɔshiɛɔ lɛ, ebaaye abua wɔ koni wɔmia wɔhiɛ kɛtsu. Kɛtsɔ odase ni wɔyeɔ mɛi kɛ kɔkɔbɔɔ wiemɔ ni wɔkɛyahaa amɛ lɛ nɔ lɛ, wɔ hu wɔhaa Biblia gbalɛ baa mli, ni wɔkɛsaa Yehowa hiɛ.—2 Tes. 1:6-9.
3 Esa akɛ Wɔmia Wɔhiɛ: Akɛni nibii babaoo gbalaa mɛi ajwɛŋmɔ, ni nibii babaoo hu heɔ amɛbe hewɔ lɛ, ehe miihia ni wɔmia wɔhiɛ beni wɔbɔɔ mɔdɛŋ akɛ wɔɔye wɔbua mɛi ni yɔɔ wiemɔ lɛ he miishɛɛ lɛ. Atee yoo ko ŋɔɔ otsi fɛɛ otsi yɛ afi muu fɛɛ mli dani ekpɛ eyiŋ ákɛ ebaabo Biblia mli sane lɛ toi. Enya nɔ ni enu lɛ he aahu akɛ ekpɛlɛ ni akɛ lɛ bɔi Biblia lɛ kasemɔ, ebɔi kpeeiyaa, etsɛɛɛ kɛkɛ ni ekɛɛ eesumɔ ni abaptisi lɛ.
4 Je lɛŋ shihilɛ lɛ miitsake oyayaayai, ni nakai nɔŋŋ hu mɛi asubaŋ miitsake. Ekolɛ, mɛi komɛi ni kpoo wɔ be ko ni wɔyasara amɛ lɛ baabo hiɛnɔkamɔ wiemɔ ni haa mɔ tsui nyɔɔ emli ni wɔshiɛɔ lɛ toi amrɔ nɛɛ. Kɛ́ mɔ kome pɛ bo Maŋtsɛyeli shɛɛ sane lɛ toi po lɛ, wɔmɔdɛŋbɔɔ lɛ he baaba sɛɛnamɔ.
5 Yɛ je lɛŋ fɛɛ lɛ, ‘mɛi babaoo miidɔmɔ ŋtsɔi ni amɛmiiye ŋkɔmɔ yɛ nihiinii fɛɛ ni afeɔ’ lɛ hewɔ. (Ezek. 9:4) Yibiiwoo ní jɛɔ Maŋtsɛyeli shiɛmɔ nitsumɔ lɛ mli kɛbaa lɛ tsɔɔ akɛ, mɛi ni yɔɔ jalɛ tsui lɛ miikpɛlɛ Maŋtsɛyeli shɛɛ sane lɛ nɔ. (Yes. 2:2, 3) No hewɔ lɛ, nyɛhaa wɔyaa nɔ wɔshiɛa ní wɔkafɔ̃a, kɛtsɔ suɔmɔ mli ni wɔɔjɛ wɔbɔ mɔdɛŋ ni wɔkɛ ‘nɔ kpakpa ko he sanekpakpa’ ayaha mɛi lɛ nɔ.—Yes. 52:7; Bɔf. 5:42.