Ani Oweku lɛ Miisaa Ehe Eto Kɛha Yibaamɔ?
1 Biblia mli gbalɛi ní eba mli lɛ haa anaa faŋŋ akɛ jeŋ fɔŋ nɛɛ naagbee miibɛŋkɛ oyayaayai. Amrɔ nɛɛ wɔyɛ jaramɔ bei ni tamɔ nɔ ni tsɔ Nu Afua lɛ hiɛ lɛ mli pɛpɛɛpɛ. (Mat. 24:37-39) Abáa Noa yi yɛ nakai blema je lɛ hiɛkpatamɔ lɛ mli, ejaakɛ ekɛ ‘anɔkwa Nyɔŋmɔ lɛ nyiɛ.’ (1 Mose 6:9) Eeenyɛ efee akɛ Noa tsɔɔ eweku lɛ Yehowa taomɔ nii, ejaakɛ abáa amɛ hu amɛyi. Mɛɛ gbɛ nɔ wɔbaanyɛ wɔtsɔ wɔsaa wɔhe akɛ weku, taakɛ Noa fee lɛ, koni abaa wɔyi kɛjɛ nibii agbɛjianɔtoo fɔŋ nɛɛ hiɛkpatamɔ lɛ mli?
2 Jalɛ Shiɛlɔ: Noa mia ehiɛ ekɛ aaafee afii 40 kɛmiimɔ afii 50 sɔŋŋ shiɛ akɛ “jalɛ shiɛlɔ.” (2 Pet. 2:5) Kɛ́ ŋwɛibɔfoi atuatselɔi ni batsɔmɔ amɛhe gbɔmɛi lɛ ná Noa akutsoŋbii lɛ anɔ hewalɛ jio, amɛnáaa amɛnɔ hewalɛ jio lɛ, ekã shi faŋŋ akɛ akutsoŋbii nɛɛ ye eshiɛmɔ lɛ he fɛo. Bei pii lɛ abooo wɔshiɛmɔ lɛ toi, ni ayeɔ wɔhe fɛo, ni enɛ tsɔɔ akɛ je nɛɛ ebɛŋkɛ enaagbee. (2 Pet. 3:3, 4) Shi mɛi babaoo efeee amɛnii tamɔ mɛi ni hi shi yɛ Noa gbii lɛ amli lɛ, ejaakɛ amɛmiibo wɔshɛɛ sane lɛ toi, ni ‘amɛmiiho’ kɛmiiba Yehowa jamɔ he. (Yes. 2:2) Ja wɔmia wɔhiɛ dani wɔbaanyɛ wɔhere ‘wɔ diɛŋtsɛ kɛ mɛi ni boɔ wɔ toi lɛ fɛɛ ayiwala.’ (1 Tim. 4:16) Kwɛ bɔ ni ehe hiaa akɛ fɔlɔi aaatsɔ amɛwiemɔ kɛ nɔkwɛmɔnii ni amɛaafee lɛ nɔ amɛtsɔɔ amɛbii lɛ bɔ ni hiɛdɔɔ yɔɔ shiɛmɔ nitsumɔ lɛ he!—2 Tim. 4:2.
3 “Nakai Pɛpɛɛpɛ” Efee: Abáa Noa kɛ eweku lɛ yi akɛni amɛkɛ gbɛtsɔɔmɔi ni Yehowa kɛha amɛ lɛ tsu nii jogbaŋŋ lɛ hewɔ. (1 Mose 6:22) Ŋmɛnɛ lɛ, ehe miihia ní wɔ hu wɔfee klalo akɛ ‘wɔbaabo’ gbɛtsɔɔmɔi ni jɛɔ Biblia lɛ mli kɛ tsulɔ anɔkwafo lɛ ŋɔɔ lɛ ‘atoi.’ (Yak. 3:17) Bii komɛi ni hiɛ efã yɛ weku ko mli lɛ kaiɔ bɔ ni amɛtsɛ kɛ gbɛtsɔɔmɔi ní Yehowa asafo lɛ kɛhaa lɛ tsu nii. Ákɛ nɔkwɛmɔnɔ lɛ, ekɛ eweku lɛ feɔ weku nikasemɔ daa otsi, ni ekɛ amɛ yaa shiɛmɔ yɛ otsi lɛ naagbee taakɛ awoɔ ŋaa akɛ afee lɛ. Ebɔ mɔdɛŋ akɛ daa otsi lɛ ekɛ ebii lɛ ateŋ mɔ kome baaya shiɛmɔ. Mɔdɛŋ ni ebɔ akɛ ebaafee “nakai pɛpɛɛpɛ” lɛ ná gbekɛbii lɛ anɔ hewalɛ waa, ni bii ekpaa lɛ fɛɛ dara akɛ anɔkwafoi ni sɔmɔɔ Yehowa.
4 Jeŋ nɛɛ naagbee lɛ baaba trukaa. (Luka 12:40) Kɛ́ wɔkase Noa, ni wɔná hemɔkɛyeli akɛ abaabaa wɔyi lɛ, no baatsɔɔ akɛ wɔkɛ wɔweku lɛ fɛɛ esaa wɔhe wɔto lɛɛlɛŋ!—Heb. 11:7.