NYƐYAA NƆ NYƐBUA!
Ani Awui Ni Ayeɔ Mɛi Yɛ Hetsɛ̃ Hewɔ Lɛ Sɛɛ Baafo?—Mɛni Biblia Kɛɔ Yɛ He?
Dɔlɛ sane ji akɛ, ŋmɛnɛ lɛ, efɔɔ kaa akɛ mɛi feɔ mɛi yiwalɛ nii yɛ hetsɛ̃ hewɔ. Bei pii lɛ, atutuaa mɛi yɛ maŋ nɔ ni amɛjɛ, jamɔ mli ni amɛyɔɔ, weku mli ni amɛjɛ, nuu loo yoo ni amɛji hewɔ, loo yɛ yiŋtoi krokomɛi ahewɔ. Yiwalɛ nifeemɔi nɛɛ ehã mɛi miishe gbeyei waa yɛ hei ni amɛyɔɔ lɛ, ni ehã mɛi babaoo epila bɔ ni anyɛɛɛ atsa, ni amɛhao waa hu—ni mɛi komɛi po egboi.
Biblia lɛ gba yɛ wɔbei nɛɛ ahe akɛ, gbɔmɛi baatsɔmɔ “mɛi ni hiɛ yɔɔ la, mɛi ni sumɔɔɔ ekpakpa,” kɛ “mɛi ni bɛ suɔmɔ kɛhã amɛweku mli bii.” (2 Timoteo 3:1-5) No hewɔ lɛ, ani awui ni ayeɔ mɛi yɛ hetsɛ̃ hewɔ lɛ sɛɛ baafo kɛ̃? Mɛni Biblia lɛ kɛɔ yɛ he?
Bɔ ni abaafee afo awui ni ayeɔ mɛi yɛ hetsɛ̃ hewɔ lɛ sɛɛ
Biblia lɛ ema nɔ mi ehã wɔ akɛ, Nyɔŋmɔ baanyɛ afo yiwalɛ nifeemɔi asɛɛ, ni ebaafee hu.
“Abaajie efɔŋfeelɔi lɛ kɛje jɛmɛ . . . Shi mɛi ni he jɔ lɛ, shikpɔŋ lɛ baatsɔ amɛnɔ, ni amɛmii baashɛ amɛhe waa yɛ toiŋjɔlɛ babaoo mli.” (Lala 37:9-11) Nyɔŋmɔ hãŋ yiwalɔi loo efɔŋfeelɔi aya nɔ aye mɛi awui.
“[Nyɔŋmɔ baatsumɔ] amɛhiŋmɛiiaŋ yaafonui fɛɛ, ni gbele ehiŋ shi dɔŋŋ, ni awerɛhoyeli loo yaafo loo piŋmɔ ko hu ehiŋ shi dɔŋŋ.” (Kpojiemɔ 21:4) Nyɔŋmɔ baakwɛ ni etsa mɛi fɛɛ ni apila amɛ, amɛná jwɛŋmɔ naagba, loo amɛhao waa yɛ awui ni aye amɛ lɛ hewɔ lɛ.
‘Abaatee gbohii ashi.’ (Bɔfoi 24:15) Nyɔŋmɔ baatee mɛi akpekpei abɔ ni egboi lɛ ashi kɛba wala mli ekoŋŋ, ni mɛi ni akɛ hetsɛ̃ gbe amɛ lɛ hu fata he.
Mɛi ni he tsɛ̃ɔ mɛi kɛ mɛi ni akɛ hetsɛ̃ yeɔ amɛ awui—Mɛni abaanyɛ afee yɛ he ŋmɛnɛ?
Biblia lɛ hãa wɔ hiɛnɔkamɔ kɛhã wɔsɛɛ, ni eyeɔ ebuaa wɔ hu koni wɔna nibii ni wɔbaanyɛ wɔfee kɛye hetsɛ̃ nɔ. Sanebimɔi ni nyiɛ sɛɛ nɛɛ ahe hiaa waa, ni Biblia ehã hetoo. Ofainɛ, bɔɔ mɔdɛŋ ni okane saji nɛɛ:
Mɛni wɔbaanyɛ wɔfee kɛjie hetsɛ̃ ni hãa wɔfeɔ yiwalɛ nii lɛ kɛje wɔmli? Kanemɔ Buu-Mɔɔ ni hiɛ saneyitso lɛ akɛ “Obaanyɛ Oye Hetsɛ̃ Nɔ” lɛ koni ona nɔ ni Biblia lɛ tsɔɔ yɛ enɛ he.
Mɛni hewɔ Nyɔŋmɔ eŋmɛ gbɛ ni efɔŋfeemɔ babaoo yaa nɔ lɛ? Kwɛmɔ vidio ni ji, Mɛni Hewɔ Nyɔŋmɔ Ŋmɛɔ Piŋmɔ Gbɛ? lɛ koni oná sanebimɔ nɛɛ hetoo ni mli kã shi faŋŋ ni Biblia lɛ kɛhãa.