Atsi Watsi Ni Tsɔɔ Be Ni Je Lɛ Hiɛ Baakpãtã Lɛ Kɛbɛŋkɛ Nyɔɔŋteŋ

Yɛ January 27, 2026 lɛ, jeŋ shikpálɔi tsi mfonirifeemɔŋ watsi ni tsɔɔ be ni je lɛ hiɛ baakpãtã, ni Blɔfo tsɛɔ lɛ Doomsday Clock lɛ kɛbɛŋkɛ nyɔɔŋteŋ. Nyɔɔŋteŋ damɔ shi kɛhã be ni adesai baakpãtã amɛ kɛ shikpɔŋ lɛ fɛɛ hiɛ lɛ.

• “Jeŋ shikpálɔi kɛ mɛi ni kwɛɔ shweshweeshwefeemɔ nɔ, ni ji Science and Security Board yɛ Bulletin of the Atomic Scientists lɛ tsi Doomsday Clock lɛ kɛtee hiɛ sɛkɛnsii 85 dani nyɔɔŋteŋ baashɛ, ni enɛ ji be ni adesai ebɛŋkɛ je lɛ hiɛkpatamɔ fe fɛɛ yɛ yinɔsane mli.”​—Bulletin of the Atomic Scientists.

• “Jeŋ shikpálɔi lɛ kɛ Doomsday Clock nɛɛ miitsɔɔ wɔ nɔ ko. Oshãrai efa babaoo yɛ je lɛ mli, mɛi nyɛɛɛ afee ekome kɛtsu naagbai ahe nii, ni shihilɛ lɛ miiya nɔ emli miiwo wu. Ehe miihia ni adesai afee tsakemɔi, ni amɛbaanyɛ amɛfee hu. Shi esa akɛ mɛi ni yɔɔ jeŋ fɛɛ lɛ kɛ amɛnane ama shi koni amɛnɔyelɔi lɛ afee nɔ ko yɛ shihilɛ lɛ he amrɔ nɔŋŋ.”​—Alexandra Bell, sɛinɔtalɔ kɛ CEO yɛ Bulletin of the Atomic Scientists.

Ani adesai ahiɛkpãtãmɔ kɛ wɔshikpɔŋ nɛɛ hiɛkpãtãmɔ ebɛŋkɛ kpaakpa? Ani esa akɛ wɔshe nɔ ni baaba wɔsɛɛ lɛ gbeyei? Mɛni Biblia lɛ kɛɔ yɛ he?

Nɔ ni baaba wɔsɛɛ

Biblia lɛ kɛɛ, “shikpɔŋ lɛ yɛ kɛmiiya naanɔ” ni “[gbɔmɛi baahi] nɔ kɛya naanɔ.” (Jajelɔ 1:4; Lala 37:29) No hewɔ lɛ, gbɔmɛi fiteŋ shikpɔŋ lɛ fɛɛ bɔ ni anyɛŋ nɔ ahi.

Kɛ̃lɛ, Biblia lɛ etsĩii tã akɛ ebaaba naagbee. Akɛ nɔkwɛmɔnɔ lɛ, Biblia lɛ kɛɛ “je lɛ . . . miiho kɛmiiya.”​—1 Yohane 2:17.

• Kɛ́ ootao ole nɔ ni Biblia lɛ tsɔɔ kɛ́ eewie je lɛ naagbee lɛ he lɛ, kanemɔ sane ni ji “Is the World Coming to an End? What Is the Apocalypse?” lɛ.

• Kɛ́ ootao ole nɔ ni Biblia lɛ kɛɔ yɛ nɔ ni nibii ni yaa nɔ yɛ je lɛ mli lɛ tsɔɔ he lɛ, kanemɔ sane ni ji “Mɛɛ Be Je Lɛ Baaba Naagbee?” lɛ.

Bɔ ni obaafee oná jwɛŋmɔ ni ja

Ekɔɔɔ he eko naagbai ni yaa nɔ yɛ je lɛ mli bianɛ lɛ, Biblia lɛ baanyɛ aye abua wɔ ni wɔná jwɛŋmɔ ni ja. Mɛɛ gbɔ nɔ?

• Biblia lɛ hãa wɔ ŋaawoi kpakpai ni baanyɛ aye abua wɔ yɛ shihilɛ mli. (2 Timoteo 3:16, 17) Akɛ nɔkwɛmɔnɔ lɛ, kanemɔ sane ni ji “Bɔ Ni Obaafee Ni Okaye Otsui Fe Nine” lɛ koni ona bɔ ni Biblia lɛ baanyɛ aye abua bo ni oná jwɛŋmɔ ni ja, ekɔɔɔ he eko naagba ni okɛkpeɔ yɛ shihilɛ mli ŋmɛnɛ lɛ.

• Biblia lɛ hãa wɔnáa hiɛnɔkamɔ ni mashi shiŋŋ kɛhã wɔsɛɛ. (Romabii 15:4) Etsɔɔ wɔ nibii ni esa akɛ wɔkpa gbɛ akɛ ebaaba amrɔ nɛɛ kɛ nibii ni baaba wɔsɛɛ hu, ni no hãa wɔnáa ekãa ekɔɔɔ he eko nibii ni wɔkɛkpeɔ bianɛ.

Bɔ ni afee ni oná Biblia lɛ he sɛɛ jogbaŋŋ kɛmɔ shi lɛ, ofainɛ, kaa Biblia mli nikasemɔ ni wɔkɛ mɛi feɔ ni wɔheee shika lɛ okwɛ ŋmɛnɛ.