‘Nyɛbaanu Tai Ahe’

“Kɛjɛ afi 1960 afiiaŋ be ni mibɔi saji ahe amaniɛbɔɔ nɛɛ, mibɔ tai ni fa fe 40 ni etee nɔ yɛ je lɛŋ hei srɔtoi lɛ ahe amaniɛ. Mina bɔ ni United States fi maji komɛi asɛɛ kɛ bɔ ni Soviet Union lɛ hu fi maji krokomɛi asɛɛ yɛ afã, ni amɛkɛ amɛhe tswa, kɛ bɔ ni shihilɛ nɛɛ tee nɔ emli wo wu kɛyashi sɛɛ mli lɛ esɛɛ fo. Shi yɛ afi 2025 nɛɛ, miye mitsui ni mihao waa hu fe bei fɛɛ ni eho. Yiŋtoo kome ji akɛ tai babaoo ni sa kadimɔ waa miiya nɔ yɛ je lɛŋ hei srɔtoi. Yiŋtoo kroko hu ji akɛ, tai nɛɛ ateŋ ekome baanyɛ aye je lɛ fã kpotoo awui.”​—John Simpson, BBC amaniɛbɔlɔ ní wieɔ saji ni yaa nɔ yɛ je lɛ mli lɛ ahe.

Tai ni yɔɔ gbeyei ni miiya nɔ yɛ je lɛŋ hei srɔtoi lɛ ehã mɛi ehao waa diɛŋtsɛ. Mɛi babaoo biɔ amɛhe akɛ, ‘Ani tai asɛɛ baafo kɛ̃?’ Mɛni Yesu tsɔɔ yɛ enɛ he?

Nibii ni Yesu tsɔɔ

Yesu gba shihilɛi ni yaa nɔ yɛ wɔbei nɛɛ amli lɛ efɔ̃ shi. Ebɔ esɛɛnyiɛlɔi lɛ kɔkɔ akɛ: “Nyɛbaanu tai kɛ tai amaniɛbɔi ahe.”​—Mateo 24:6.

Eyɛ mli akɛ tai kɛ béi ni naa wala ni yaa nɔ ŋmɛnɛ lɛ miisu wɔtsui waa moŋ, shi wɔyɛ yiŋtoo kpakpa ko hewɔ ni esa akɛ wɔná hiɛnɔkamɔ. Mɛni hewɔ wɔkɛɔ nakai? Nɔ hewɔ ji akɛ, Yesu tsɔɔ akɛ tai wuji ni yeɔ mɛi babaoo awui​—kɛ nibii krokomɛi ni wɔbaana, shihilɛi komɛi ni baaya nɔ, kɛ sui gbohii​—ji nɔ ni baafee “okadi” ni baatsɔɔ akɛ wɔyɛ “je lɛ naagbee gbii lɛ” amli. (Mateo 24:3; Luka 21:7) Enɛ tsɔɔ akɛ gbi ko baashɛ kɛ̃ ni Yesu baafo tai fɛɛ asɛɛ. Mɛɛ gbɛ nɔ ebaatsɔ efee nakai?

Nibii ni Yesu baafee

Etsɛŋ kwraa, Yesu, ni ji Nyɔŋmɔ Maŋtsɛyeli Lɛ Nɔ Maŋtsɛ lɛ, ‘baafo tai asɛɛ yɛ shikpɔŋ lɛ nɔ fɛɛ.’​—Lala 46:9.

Kɛ́ ootao ole bɔ ni baafee ni wɔbaaná toiŋjɔlɛ yɛ shikpɔŋ nɛɛ nɔ, kɛ bɔ ni shihilɛ baafee yɛ nakai beiaŋ lɛ he saji krokomɛi lɛ, kanemɔ sane ni ji “Bɔ Ni Baafee Ni Tai Asɛɛ Afo.”