Maŋsɛɛ Sɔɔlɔi “Kɛyashi Shikpɔŋ Lɛ Nɔ Hei Ni Jekɛ Waa Lɛ”

Yesu kɛɛ ekaselɔi lɛ akɛ: “Nyɛbaatsɔmɔ midasefoi . . . kɛyashi shikpɔŋ lɛ nɔ hei ni jekɛ waa lɛ.” (Bɔfoi 1:8) Ŋmɛnɛ lɛ, Yehowa Odasefoi kɛ ekãa miitsu nii waa kɛmiiwo nakai gbalɛ lɛ obɔ. Kɛ̃lɛ, shikpɔŋ lɛ nɔ hei komɛi yɛ ni ayeko odase fitsofitso yɛ jɛmɛ, hei nɛɛ ekomɛi ji maji ni mɛi babaoo yɔɔ jɛmɛ. Ni maji komɛi yɛ ni Odasefoi fioo komɛi pɛ ni yɔɔ jɛmɛ. (Mateo 9:37, 38) Mɛni wɔfeɔ koni wɔnine ashɛ mɛi babaoo anɔ?

Bɔ ni afee ni wɔye Yesu famɔ nɛɛ nɔ lɛ, Yehowa Odasefoi lɛ A-Gbɛtsɔɔmɔ Kuu lɛ Sɔɔmɔ Ajinafoi Akuu lɛ tsuɔ maŋsɛɛ sɔɔlɔi kɛyaa je lɛŋ hei ni hiamɔ yɔɔ lɛ. Amrɔ nɛɛ, ayɛ maŋsɛɛ sɔɔlɔi 3,090 yɛ je lɛŋ fɛɛ.a Amɛteŋ mɛi babaoo etee Biblia tsɔsemɔ skul srɔtoi lɛ eko, tamɔ Skul Kɛhã Maŋtsɛyeli Sanekpakpa Jajelɔi lɛ nɛkɛ. Maŋsɛɛ sɔɔlɔi lɛ miisumɔ ni amɛfã kɛshi amɛshĩai kɛyahi maŋ kroko nɔ. Akɛni maŋsɛɛ sɔɔlɔi anɔkwafoi nɛɛ edara yɛ mumɔŋ, atsɔse amɛ, ni amɛyɛ niiashikpamɔ hu hewɔ lɛ, amɛyeɔ amɛbuaa kɛgbɛɔ sane kpakpa lɛ amɛshwaa, ni amɛfeɔ nɔkwɛmɔnɔ kpakpa amɛhãa mɛi ni yɔɔ asafoi ni amɛtee mli lɛ amli lɛ.

Bɔ Ni Ayeɔ Abuaa Maŋsɛɛ Sɔɔlɔi Koni Amɛ Hu Amɛye Amɛbua Mɛi Krokomɛi

Yɛ nitsumɔhe nine fɛɛ nitsumɔhe nine lɛ, Field Ministers Desk ni yɔɔ Service Department lɛ kɛ Nitsumɔhe Nine Ajinafoi Akuu lɛ feɔ ekome kɛtsuɔ maŋsɛɛ sɔɔlɔi ahiamɔ nii tamɔ, amɛwɔɔhe, amɛgbɔmɔtsoŋ hewalɛnamɔ, kɛ shika fioo ni amɛkɛkwɛɔ amɛhe lɛ ahe nii. Yɛ afi 2020 sɔɔmɔ afi lɛ mli lɛ, Yehowa Odasefoi kɛ shika aaafee Amerika dɔlai akpekpei 27 tsu nii kɛkwɛ maŋsɛɛ sɔɔlɔi atsiabo. Yelikɛbuamɔi nɛɛ ahewɔ lɛ, amɛbaanyɛ amɛkɛ amɛjwɛŋmɔ fɛɛ ama amɛsɔɔmɔ lɛ nɔ, ní amɛkɛ amɛnyɛmɔ fɛɛ atsu koni nakai beiaŋ nɔŋŋ lɛ, amɛnyɛ amɛwaje asafoi ni amɛyɔɔ mli lɛ.

Mɛɛ gbɛ nɔ maŋsɛɛ sɔɔlɔi eye ebua shiɛmɔ nitsumɔ lɛ ni eshwere? Frank Madsen, ni sɔmɔɔ akɛ Malawi Nitsumɔhe Nine Ajinafoi Akuu lɛ mli nyo lɛ wie akɛ: “Akɛni maŋsɛɛ sɔɔlɔi lɛ yɛ ekãa ni amɛyɛ hesai hewɔ lɛ, amɛye amɛbua asafoi lɛ ni abɔi shiɛmɔ yɛ shikpɔŋ kukuji ni mli nitsumɔ wala lɛ amli, tamɔ hei ni shĩai ni atara naa agboi yɔɔ, kɛ hei ni awieɔ wiemɔ kroko yɛ lɛ nɛkɛ. Agbɛnɛ hu, akɛni amɛbɔɔ mɔdɛŋ amɛhiɔ shi tamɔ bɔ ni maŋ lɛ nɔ bii lɛ hiɔ shi, ni amɛkase amɛwiemɔ lɛ hu hewɔ lɛ, efeɔ nɔkwɛmɔnɔ kpakpa kɛhãa mɛi krokomɛi. Amɛná oblahii kɛ oblayei lɛ anɔ hewalɛ, ni ehã amɛmiisusu be fɛɛ sɔɔmɔ nitsumɔ lɛ he. Wɔmiida Yehowa shi akɛ ehã wɔ maŋsɛɛ sɔɔlɔi.”

Maŋ kroko nɔ Nitsumɔhe Nine Ajinafoi Akuu mli nyo ko wie akɛ: “Maŋsɛɛ sɔɔlɔi etsɔɔ akɛ, Yehowa webii efee ekome yɛ jeŋ fɛɛ lɛɛlɛŋ. Mɛi ni jeee Odasefoi po naa faŋŋ akɛ, maŋ nɔ ni wɔjɛ loo bɔ ni wɔhiɔ shi wɔhãa lɛ gbalako wɔteŋ, moŋ lɛ, Biblia tsɔɔmɔi lɛ eye ebua wɔ ni wɔfee ekome akɛ nyɛmimɛi.”

Mɛɛ yelikɛbuamɔ maŋsɛɛ sɔɔlɔi kɛhãa shiɛlɔi ni yɔɔ he ni amɛtee lɛ? Paulo, ni jɛ Timor-Leste lɛ, hiɛ sɔɔ nitsumɔ ni maŋsɛɛ sɔɔlɔi ni akɛ amɛ eba esafo lɛ mli lɛ tsuɔ lɛ waa. Ewie akɛ: “Wɔmaŋ lɛ mli dɔɔ waa diɛŋtsɛ. Ni eyɛ mli akɛ maŋsɛɛ sɔɔlɔi lɛ jɛ he ko ni jɔɔ waa moŋ, shi amɛhãaa bɔ ni wɔbiɛ dɔɔ lɛ atsĩ amɛnaa ni amɛkashiɛ. Amɛbaa kpee ni afeɔ leebi kɛhã shiɛmɔ lɛ be fɛɛ be. Mifɔɔ amɛ naa ni amɛmiifee sɛɛkuukɛsaramɔ shwane, be ni jeŋ edɔ kɛ gbɛkɛ hu. Amɛye amɛbua mɛi babaoo ni amɛbale anɔkwale lɛ, ni mi hu mifata he. Amɛkɛ amɛwala fɛɛ miisɔmɔ Yehowa kɛ miishɛɛ kɛ ekãa, ni enɛ tsirɛɔ asafo lɛ mli bii lɛ koni amɛkɛ amɛtsui muu fɛɛ asɔmɔ Yehowa.”

Nyɛmi yoo ko ni eji daa gbɛgbalɔ, ni atsɛɔ lɛ Ketti ni jɛ Malawi lɛ, tsɔɔ bɔ ni maŋsɛɛ sɔɔlɔi lɛ ye amɛbua eweku lɛ. Ekɛɛ akɛ: “Be ni nyɛmi nuu ko kɛ eŋa ni amɛji maŋsɛɛ sɔɔlɔi lɛ ba wɔsafo lɛ mli lɛ, no mli lɛ mi pɛ ji Odasefonyo yɛ miweku lɛ mli. Amɛye amɛbua mi waa, ni amɛkɛ miweku lɛ bɔ gbagbalii. Amɛnɔkwɛmɔnɔ kpakpa lɛ ye ebua mibii lɛ ni amɛna akɛ, kɛ́ osɔmɔ Yehowa lɛ onáa miishɛɛ ni otsui nyɔɔ omli. Maŋsɛɛ sɔɔlɔi lɛ anɔkwɛmɔnɔ kpakpa lɛ ená mibii lɛ anɔ hewalɛ, ni yei etɛ lɛ miisɔmɔ akɛ daa gbɛgbalɔi, ni miwu hu ebɔi asafoŋ kpee baa.”

Te afeɔ tɛŋŋ anáa shika kɛkwɛɔ maŋsɛɛ sɔɔlɔi lɛ? Kɛtsɔ oniai ni atsuɔ kɛfiɔ jeŋ muu fɛɛ nitsumɔ lɛ sɛɛ lɛ nɔ, ni anáa oniai nɛɛ babaoo kɛtsɔ gbɛi srɔtoi ni atsɔɔ yɛ donate.jw.org lɛ nɔ lɛ. Wɔhiɛ sɔɔ oniai ni ojɛɔ osuɔmɔ mli otsuɔ lɛ waa diɛŋtsɛ.