Mɛi Akpekpei Abɔ Miiná Wiemɔ Shishitsɔɔmɔ Ɔfisii Ahe Sɛɛ

Wiemɔ shishitsɔɔlɔi ni kɛ́ amɛbe fɛɛ tsuɔ nitsumɔ nɛɛ ateŋ mɛi 100 mlijaa 60 tsuɔ nitsumɔ nɛɛ yɛ wiemɔ shishitsɔɔmɔ ɔfis (RTO), jeee yɛ nitsumɔhe niji amli. Mɛni hewɔ gbɛjianɔtoo nɛɛ he yɔɔ sɛɛnamɔ waa lɛ? Mɛɛ nibii ehe hiaa ni wiemɔ shishitsɔɔlɔi aná koni amɛnyɛ amɛtsu nii jogbaŋŋ yɛ RTO lɛ? Ni mɛɛ gbɛ nɔ he ni wiemɔ shishitsɔɔmɔ ɔfis ko yɔɔ lɛ saa wiemɔ shishitsɔɔmɔ lɛ he?

Amaa RTO lɛ yɛ hei ni mɛi babaoo wieɔ wiemɔ ni wiemɔ shishitsɔɔlɔi lɛ tsɔɔ shishi lɛ yɛ. Nyɛmiyoo ko ni atsɛɔ lɛ Karin, ni ji Low German wiemɔ shishitsɔɔlɔ lɛ tsɔɔ mli akɛ: “Kɛjɛ be ni wɔtee RTO lɛ yɛ Cuauhtémoc, Chihuahua, yɛ Mexico lɛ, wɔwieɔ Low German be fɛɛ be​—kɛ́ wɔkɛ wiemɔ shishitsɔɔlɔi krokomɛi miigba sane, be ni wɔnyiɛ shiɛmɔ nɔ, loo kɛ́ wɔyaaye jara. Bianɛ lɛ, wɔyɛ mɛi ni wieɔ wɔwiemɔ lɛ ateŋ. Wɔnuɔ fɔŋ wiemɔi ni wɔnu eko etsɛ, ni wɔnuɔ bɔ ni amɛwieɔ amɛhãa bianɛ lɛ.”

James, ni fata Frafra wiemɔ shishitsɔɔlɔi ni yɔɔ Ghana lɛ he lɛ wie akɛ, bei komɛi lɛ ehiɛ tseɔ Bethel weku lɛ mli bii ni yɔɔ nitsumɔhe nine lɛ. Shi ekɛfata he akɛ: “Misumɔɔ nitsumɔ ni mitsuɔ yɛ RTO lɛ waa. Ejaakɛ kɛ́ miishiɛ yɛ Frafra wiemɔ lɛ mli, ni mina bɔ ni mɛi feɔ amɛnii amɛhãa yɛ sane kpakpa lɛ he lɛ, mimii shɛɔ mihe waa.”

Te afeɔ tɛŋŋ ni anaa he ni sa ni abaanyɛ afee RTO yɛ? Joseph ni fata Worldwide Design/Construction Department yɛ Warwick, New York, yɛ U.S.A. lɛ wie akɛ: “Naagba kome ni wɔkɛkpeɔ ji, bei pii lɛ, srawa hewalɛ, nu, loo Intanɛt ni baahã wiemɔ shishitsɔɔlɔi lɛ anine ashɛ nibii ni esa akɛ amɛtsɔɔ shishi lɛ anɔ bɛ hei ni wɔbaanyɛ wɔfee ɔfisii lɛ yɛ lɛ. No hewɔ lɛ, kɛ́ wɔmiito gbɛjianɔ ni wɔfee RTO lɛ, wɔtaoɔ hei srɔtoi ni awieɔ wiemɔ lɛ yɛ ni abaanyɛ afee yɛ jɛmɛ.”

Kɛ́ wɔbaawie lɛ, gbɛ ni yɔɔ mlɛo, ni jara waaa tsɔ ni abaanyɛ afee RTO yɛ ji, Kpee Asa, Maŋtsɛyeli Asa, loo maŋsɛɛ sɔɔlɔi ashĩa, koni wiemɔ shishitsɔɔlɔi lɛ ajɛ shĩa ni amɛbatsu nii. Kɛ́ anáaa hei nɛɛ ateŋ eko lɛ, ekolɛ, abaahã nyɛmimɛi lɛ ahe shĩai ní abaanyɛ akɛ tsũi lɛ eko afee hei ni wiemɔ shishitsɔɔlɔi lɛ baawɔ, ní akɛ eko hu afee ɔfisii ni amɛbaatsu nii yɛ. Kɛ́ shĩai nɛɛ ahe ehiaaa wiemɔ shishitsɔɔlɔi lɛ dɔŋŋ lɛ, abaanyɛ ahɔɔ ni akɛ shika lɛ atsu hiamɔ kroko he nii.

Ahãa Amɛ Nibii Ni Baahã Amɛya Nɔ Amɛtsu Nitsumɔ Lɛ

Yɛ afi 2020 sɔɔmɔ afi lɛ mli lɛ, akɛ Amerika dɔlai akpekpei 13 tsu RTO srɔtoi ahe nii. Nibii ni he hiaa wiemɔ shishitsɔɔlɔi yɛ RTO lɛ ekomɛi ji, kɔmpiutai, sɔftwɛɛ pɔtɛɛ komɛi, nibii ni akɛfeɔ rikɔdiŋ, nu, kɛ srawa hewalɛ. Akɛ nɔkwɛmɔnɔ lɛ, akɛ Amerika dɔlai aaafee 750 toɔ wiemɔ shishitsɔɔlɔ kome kɔmpiuta he gbɛjianɔ. Akɛ sɔftwɛɛ ni awoɔ he nyɔmɔ kɛ Watchtower Translation System, ni ji program ko ni yeɔ ebua wiemɔ shishitsɔɔlɔi koni amɛnyɛ amɛtsɔɔ nibii ashishi jogbaŋŋ lɛ woɔ kɔmpiutai lɛ anɔ.

Aheɔ nibii ni akɛfeɔ rikɔdiŋ hu ahãa amɛ koni amɛnyɛ amɛfee rikɔdiŋ yɛ ɔfis lɛ. Nibii ni akɛfeɔ rikɔdiŋ nɛɛ ahe ba sɛɛnamɔ waa be ni COVID-19 tsɛŋemɔ hela lɛ je shishi lɛ, ejaakɛ, ahã wiemɔ shishitsɔɔlɔi lɛ ekomɛi kɛtee amɛshĩai koni amɛnyɛ amɛtsa nibii ni amɛtsɔɔ shishi lɛ arikɔdimɔ nɔ yɛ shĩa.

Bei pii lɛ, nyɛmimɛi ni yɔɔ hei ni RTO lɛ yɔɔ lɛ yeɔ amɛbua kɛkaneɔ woji kɛ nibii ni atsɔɔ shishi lɛ amli, ni mɛi komɛi hu bayeɔ amɛbua kɛkuraa jɛmɛ. Nyɛminuu ko ni atsɛɔ lɛ Cirstin ni sɔmɔɔ yɛ Afrikaans RTO yɛ Cape Town, yɛ South Africa lɛ wie akɛ, “Shiɛlɔi kɛ daa gbɛgbalɔi babaoo náa hegbɛ amɛbatsuɔ nii yɛ biɛ.”

Nyɛmimɛi ni yeɔ amɛbuaa nɛɛ náa hegbɛ ni nɔ bɛ. Nyɛmiyoo ko ni yeɔ ebuaa yɛ RTO ko lɛ wie akɛ, “Kɛ́ ootsu nii yɛ RTO lɛ, ewoɔ bo hewalɛ ni ehãa otsui hu nyɔɔ omli waa.” Ahãa nyɛmimɛi ni yɔɔ hei ni RTO lɛ yɔɔ lɛ hu rikɔdiŋ ni amɛbafeɔ. Nyɛmiyoo Juana ni fata Totonac wiemɔ shishitsɔɔlɔi lɛ ahe yɛ Veracruz, ni yɔɔ Mexico lɛ wie akɛ: “Amrɔ nɛɛ ni wɔbɛŋkɛ maji ni awieɔ wɔwiemɔ lɛ yɛ mli lɛ, wɔnáa nyɛmimɛi babaoo bayeɔ amɛbuaa kɛrikɔdiɔ nibii ni atswaa aboɔ toi kɛ vidioi ni wɔtsɔɔ shishi lɛ.”

Shi ani RTO srɔtoi lɛ eye ebua ni wiemɔ shishitsɔɔmɔ lɛ etee hiɛ loo ehi fe tsutsu lɛ? Mɛi babaoo ni kaneɔ saji ni wɔtsɔɔ shishi lɛ kɛɛ hɛɛ, eye ebua waa. Nyɛminuu Cédric ni fata Kongo wiemɔ shishitsɔɔlɔi ni yɔɔ Democratic Republic of Congo lɛ ahe lɛ wie akɛ: “Kulɛ, wɔnyɛmimɛi lɛ tsɛɔ bɔ ni wɔtsɔɔ wiemɔi ashishi kɛyaa Kongo mli lɛ akɛ, Kongo wiemɔ ni Watch Tower kɛ asafo lɛ nibii amli pɛ anaa yɛ, ejaakɛ no mli lɛ, Kongo ni maŋbii lɛ wieɔ lɛ, jeee no wɔkɛtsuɔ nii lɛ. Shi amrɔ nɛɛ amɛkɛɔ akɛ, wiemɔi ni wɔkɛtsuɔ nii yɛ woji kɛ nibii amli lɛ, ji ŋmɛnɛ beiaŋ Kongo, ejaakɛ bɔ ni amɛwieɔ lɛ nakai amɛnaa yɛ wɔwoji lɛ amli, ni nakai amɛnuɔ yɛ wɔvidioi lɛ hu amli.”

Nyɛminuu Andile, ni fata Xhosa wiemɔ shishitsɔɔlɔi lɛ ahe lɛ hu enu ni aawie nɔ ko tamɔ nakai yɛ South Africa. Ekɛɛ akɛ, “Mɛi pii kɛɔ wɔ akɛ, amɛna tsakemɔ yɛ bɔ ni wɔtsɔɔ nibii ashishi wɔhãa lɛ mli. Amrɔ nɛɛ gbekɛbii po ni kũlɛ amɛkaneɔ Buu-Mɔɔ lɛ yɛ Blɔfo mli lɛ miikane yɛ Xhosa mli. Ni titrii lɛ, amɛnyaa wiemɔi ni akɛtsu nii kɛtsɔɔ Jeŋ Hee Shishitsɔɔmɔ lɛ shishi kɛtee amɛwiemɔ lɛ mli lɛ he, ejaakɛ bɔ ni atsɔɔ shishi lɛ ji bɔ ni amɛwieɔ bianɛ, ni emli kã shi ni anuɔ shishi.”

Anáa shika ni akɛmamɔɔ RTO srɔtoi lɛ loo akɛkuraa lɛ, kɛ nɔ ni akɛkwɛɔ mɛi ni tsɔɔ wiemɔ shishi yɛ jɛmɛ lɛ fɛɛ kɛjɛɔ oniai ni ojɛɔ osuɔmɔ mli otsuɔ kɛfĩɔ jeŋ muu fɛɛ nitsumɔ lɛ sɛɛ, kɛ nɔ ni otsɔɔ gbɛi srɔtoi ni atsɔɔ yɛ donate.jw.org lɛ nɔ otsuɔ lɛ amli.