Ani Abaakpãtã Shikpɔŋ Lɛ Hiɛ?
Hetoo ni Biblia lɛ kɛhãa
Dabi, akpataŋ shikpɔŋ lɛ hiɛ kɔkɔɔkɔ, ashãŋ yɛ la mli, ni akɛ eko yeŋ najiaŋ hu. Biblia lɛ tsɔɔ akɛ Nyɔŋmɔ bɔ shikpɔŋ lɛ koni ahi nɔ kɛya naanɔ.
“Jalɔi lɛ, shikpɔŋ lɛ baatsɔ amɛnɔ, ni amɛbaahi nɔ kɛya naanɔ.”—Lala 37:29.
“[Nyɔŋmɔ] kɛ shikpɔŋ lɛ ema efaneshii lɛ anɔ; nɔ ko nɔ ko hosoŋ lɛ kɛjeŋ egbɛhe lɛ gbi ko gbi ko.”—Lala 104:5.
“Shikpɔŋ lɛ yɛ kɛmiiya naanɔ.”—Jajelɔ 1:4.
“Ejaakɛ nɔ ni Yehowa, Mɔ ni bɔ ŋwɛi lɛ, anɔkwa Nyɔŋmɔ lɛ, Mɔ ni shɔ̃ shikpɔŋ lɛ, . . . ni ebɔɔɔ lɛ efolo, shi moŋ eshɔ̃ ni ahi nɔ lɛ kɛɛ nɛ.”—Yesaia 45:18.
Ani gbɔmɛi baafite shikpɔŋ lɛ?
Nyɔŋmɔ hãŋ gbɔmɛi kɛ muji, tai, loo nibii krokomɛi afite shikpɔŋ lɛ kwraa. Moŋ lɛ, ebaafite ‘mɛi ni fiteɔ shikpɔŋ lɛ.’(Kpojiemɔ 11:18) Te ebaafee tɛŋŋ efee nakai lɛ?
Nyɔŋmɔ kɛ ŋwɛi maŋtsɛyeli ko ni kpa ko kwraa bɛ he baaye adesai anɔyelii ni nyɛko akwɛ koni akafite shikpɔŋ lɛ najiaŋ. (Daniel 2:44; Mateo 6:9, 10) Nyɔŋmɔ bi, ni ji Yesu Kristo, ji mɔ ni baaye nakai maŋtsɛyeli lɛ nɔ. (Yesaia 9:6, 7) Be ni Yesu yɔɔ shikpɔŋ lɛ nɔ lɛ, efee nibii kɛtsɔɔ akɛ eyɛ hewalɛ yɛ adebɔɔ nibii anɔ. (Marko 4:35-41) Akɛ Nyɔŋmɔ maŋtsɛyeli lɛ nɔ Maŋtsɛ lɛ, Yesu kɛ ehewalɛ lɛ baatsu nii kɛkudɔ shikpɔŋ lɛ kɛ emli nɔ fɛɛ nɔ. Ebaafee nibii ni yɔɔ shikpɔŋ lɛ nɔ lɛ ehee loo ebaasaa amɛ tamɔ bɔ ni no mli lɛ eyɔɔ Eden abɔɔ lɛ mli lɛ pɛpɛɛpɛ.—Mateo 19:28; Luka 23:43.
Ani Biblia lɛ kɛɛ abaashã shikpɔŋ lɛ yɛ la mli?
Dabi, ekɛɛɛ nakai. Bei pii lɛ, mɛi ni susuɔ nakai lɛ nuuu sane ni yɔɔ 2 Petro 3:7 lɛ shishi jogbaŋŋ, jɛmɛ kɛɔ akɛ: “Ŋwɛi kɛ shikpɔŋ ni yɔɔ amrɔ nɛɛ, nakai wiemɔ lɛ nɔŋŋ nɔ atsɔ akɛ amɛ to hã la.” Susumɔ otii enyɔ komɛi ni he hiaa waa ni baahã wɔnu wiemɔi nɛɛ ashishi lɛ he:
Yɛ Biblia lɛ mli lɛ, wiemɔi ni ji “ŋwɛi,” “shikpɔŋ,” kɛ “la” lɛ hiɛ shishinumɔi srɔtoi. Akɛ nɔkwɛmɔnɔ lɛ, 1 Mose 11:1 lɛ kɛɔ akɛ: “Shikpɔŋ muu lɛ fɛɛ wieɔ wiemɔ kome.” “Shikpɔŋ” ni akɛtsu nii yɛ biɛ lɛ damɔ shi kɛhã adesai aweku lɛ.
Sane ni awie he dani awie sane ni yɔɔ 2 Petro 3:7 lɛ kɛ no sɛɛ lɛ, hãa wɔnaa nɔ ni ŋwɛi, shikpɔŋ, kɛ la ni akɛtsu nii lɛ damɔ shi kɛhã. Kuku 5 kɛ 6 lɛ kɛ sane lɛ to Nu Afua ni ba yɛ Noa gbii lɛ amli lɛ he. Yɛ nakai Nu Afua lɛ mli lɛ, akpãtã blema jeŋ ko hiɛ, shi shikpɔŋ lɛ kã he ehi shi. No hewɔ lɛ, gbɔmɛi yiwalɔi, ni ji, “shikpɔŋ” lɛ moŋ ni Nu Afua lɛ kpãtã lɛ amɛhiɛ lɛ. (1 Mose 6:11) Ekpãtã “ŋwɛi” ko, ni ji, mɛi ni ye gbɔmɛi ni yɔɔ shikpɔŋ lɛ nɔ lɛ anɔ lɛ hu ahiɛ. No hewɔ lɛ, gbɔmɛi fɔji ahiɛ akpãtã lɛ, shi jeee shikpɔŋ lɛ. Abaa Noa kɛ eweku lɛ yi ni amɛhi shikpɔŋ lɛ nɔ yɛ Nu Afua lɛ sɛɛ.—1 Mose 8:15-18.
Bɔ ni Nu Afua lɛ kpãtã mɛi fɔji ahiɛ, shi jeee shikpɔŋ lɛ, nakai nɔŋŋ “la” ni atsĩ ta yɛ 2 Petro 3:7 lɛ baakpãtã mɛi fɔji ni yɔɔ je lɛ mli lɛ hu ahiɛ shi jeee shikpɔŋ lɛ. Nyɔŋmɔ ewo shi akɛ ekɛ ‘ŋwɛi hee kɛ shikpɔŋ hee, ni jalɛ baahi’ mli baaba. (2 Petro 3:13) “Ŋwɛi hee,” loo nɔyeli hee, ni ji Nyɔŋmɔ Maŋtsɛyeli lɛ baaye “shikpɔŋ hee” lɛ, ni ji adesai ni baahi shi kɛya naanɔ lɛ anɔ. Nyɔŋmɔ Maŋtsɛyeli lɛ baahã shikpɔŋ lɛ atsɔ paradeiso ni toiŋjɔlɛ yɔɔ mli.—Kpojiemɔ 21:1-4.