Namɔ Baaya Ŋwɛi?

Hetoo ni Biblia lɛ kɛhãa

Nyɔŋmɔ halaa anɔkwa Kristofoi fioo komɛi, ni yɛ amɛgbele sɛɛ lɛ, abaatee amɛ shi kɛya ŋwɛi. (1 Petro 1:​3, 4) Kɛ́ ahala amɛ lɛ, esa akɛ amɛya nɔ amɛhi shi yɛ Kristofoi ataomɔ nii anaa, ni amɛya nɔ amɛba amɛjeŋ jogbaŋŋ koni hegbɛ ni amɛná akɛ amɛbaaya ŋwɛi lɛ akaŋmɛɛ amɛ.​—Efesobii 5:5; Filipibii 3:12-14.

Mɛni mɛi ni baaya ŋwɛi lɛ baayafee yɛ jɛmɛ?

Amɛbaafata Yesu he kɛsɔmɔ akɛ maŋtsɛmɛi kɛ osɔfoi afii 1,000. (Kpojiemɔ 5:​9, 10; 20:6) Amɛ amɛbaafee “ŋwɛi hee” lɛ loo ŋwɛi nɔyeli ni baaye “shikpɔŋ hee” lɛ loo adesai ni baahi shikpɔŋ nɛɛ nɔ lɛ anɔ. Mɛi ni baaye nɔ yɛ ŋwɛi lɛ, baaye abua adesai kɛshɛ emuuyeli mli tamɔ bɔ ni Nyɔŋmɔ to eyiŋ kɛjɛ shishijee lɛ.​—Yesaia 65:17; 2 Petro 3:​13.

Mɛi enyiɛ abaatee amɛ shi kɛya ŋwɛi?

Biblia lɛ tsɔɔ akɛ abaatee mɛi 144,000 shi kɛya ŋwɛi koni amɛyahi jɛmɛ. (Kpojiemɔ 7:4) Yɛ ninaa ni abɔ he amaniɛ yɛ Kpojiemɔ 14:​1-3 lɛ mli lɛ, bɔfo Yohane na “Gwantɛŋbi lɛ damɔ Zion Gɔŋ lɛ nɔ, ni mɛi 144,000” lɛ fata ehe. Yɛ ninaa nɛɛ mli lɛ, “Gwantɛŋbi lɛ” damɔ shi kɛhã Yesu ni atee lɛ shi. (Yohane 1:29; 1 Petro 1:​19) “Zion Gɔŋ lɛ” damɔ shi kɛhã hegbɛ ni nɔ kwɔ ni Yesu kɛ mɛi 144,000 ni kɛ lɛ baafee ekome kɛye nɔ yɛ ŋwɛi lɛ yɔɔ lɛ.​—Lala 2:6; Hebribii 12:22.

Atsɛɔ mɛi ni “atsɛ amɛ ni ahala amɛ” koni amɛkɛ Kristo afee ekome kɛye nɔ yɛ Maŋtsɛyeli lɛ mli lɛ akɛ “tooku bibioo.” (Kpojiemɔ 17:14; Luka 12:32) Enɛ tsɔɔ akɛ, amɛyi faaa kwraa kɛ́ akɛ amɛ to Yesu gwantɛŋi krokomɛi fɛɛ ni eshwɛ lɛ ahe.​—Yohane 10:16.

Susumɔi ni ejaaa ni mɛi hiɛ yɛ mɛi ni baaya ŋwɛi lɛ ahe

Susumɔ ni ejaaa: Yibɔ ni ji 144,000 ni yɔɔ Kpojiemɔ wolo lɛ mli lɛ ji mfonirifeemɔ nɔ kɛkɛ, jeee yibɔ diɛŋtsɛ.

Anɔkwa sane: Eyɛ mli akɛ mfonirifeemɔ yibɔi yɛ Kpojiemɔ wolo lɛ mli moŋ, shi yibɔi lɛ ekomɛi yɛ ni amɛjeee mfonirifeemɔ nɔ. Akɛ nɔkwɛmɔ lɛ, ewieɔ “Gwantɛŋbi lɛ bɔfoi 12 lɛ agbɛ́ii 12 lɛ” lɛ he. (Kpojiemɔ 21:14) Naa odaseyeli ni tsɔɔ akɛ yibɔ ni ji 144,000 lɛ ji yibɔ diɛŋtsɛ, jeee mfonirifeemɔ nɔ.

Kpojiemɔ 7:4 lɛ kɛɛ “mɛi ni akɛ niianaasɔomɔnɔ lɛ ekadi amɛ [loo, ama nɔ mi akɛ amɛbaaya ŋwɛi] lɛ ayibɔ, mɛi 144,000.” Kɛ́ okwɛ sane he ni awieɔ dani abawie enɛ lɛ, akɛ yibɔ nɛɛ to kuu kroko he, ni amɛji: “asafoku babaoo ko, ni gbɔmɔ ko gbɔmɔ ko nyɛŋ akane.” “Asafoku babaoo” lɛ mli bii hu náa yiwalaheremɔ kɛjɛɔ Nyɔŋmɔ ŋɔɔ. (Kpojiemɔ 7:9, 10) Kɛ́ yibɔ ni ji 144,000 lɛ ji mfonirifeemɔ nɔ, ni eetsɔɔ kuu ko ni yibɔ pɔtɛɛ ko bɛ he kulɛ, no lɛ anaŋ srɔto ni yɔɔ kui enyɔ lɛ teŋ.a

Kɛfata he lɛ, awie yɛ mɛi 144,000 lɛ ahe akɛ “ahé mɛi nɛɛ kɛjɛ gbɔmɛi ateŋ akɛ klɛŋklɛŋ yibii.” (Kpojiemɔ 14:4) Wiemɔ ni ji “klɛŋklɛŋ yibii” lɛ tsɔɔ akɛ amɛji najiaŋdamɔlɔi fioo komɛi ni ahala. Ekɔɔ mɛi ni kɛ Kristo baafee ekome kɛye nɔ yɛ ŋwɛi, koni amɛye mɛi babaoo ko ni aleee amɛyibɔ ni baahi shikpɔŋ lɛ nɔ lɛ ahe.​—Kpojiemɔ 5:10.