Ani Gbele Eshai Kpawo Yɔɔ?

Hetoo ni Biblia lɛ kɛhãa

Biblia lɛ ejeko gbɛ etsĩko tã akɛ ayɛ eshai kpawo pɔtɛɛ komɛi ni gbeɔ mɔ, loo nɔ ni mɛi tsɛɔ lɛ gbele eshai kpawo lɛ. Kɛ̃lɛ etsɔɔ akɛ, kɛ́ mɔ ko kɛ eshai ni yɔɔ hiɛdɔɔ lɛ fee esu lɛ, no hãŋ ahere eyiwala. Akɛ nɔkwɛmɔnɔ lɛ, Biblia lɛ tsɛ eshai ni yɔɔ hiɛdɔɔ tamɔ ajwamaŋbɔɔ, amagajamɔ, mumɔi kɛsharamɔ, mlifu, kɛ dãatɔɔ akɛ “heloo lɛ nitsumɔi lɛ.” Kɛkɛ ni ekɛɛ: “Mɛi ni yaa nɔ amɛfeɔ nɛkɛ nibii nɛɛ anine shɛŋ Nyɔŋmɔ Maŋtsɛyeli lɛ nɔ.”​—Galatiabii 5:19-21.a

Bɛ Biblia lɛ tsĩ ‘nibii kpawo ni Yehowa miihi’ lɛ atã?

Hɛɛ, etsĩ tã. Atsɔɔ Abɛi 6:16 lɛ shishi yɛ Ga Biblia momo lɛ mli akɛ: “Nibii ekpaa Yehowa nyɛɔ, ni nɔ ni ji kpawo lɛ ji enihiinii.” Shi jeee nibii fɛɛ ni Yehowa hiɔ lɛ ni atsĩ tã yɛ Abɛi 6:17-19 lɛ. Moŋ lɛ, etsĩ gbɛi srɔtoi fɛɛ ni wɔtsɔɔ nɔ wɔfeɔ esha lɛ atã, nomɛi ji, yɛ wɔsusumɔ mli, wɔwiemɔ mli, kɛ wɔnifeemɔ mli.b

 Hebri agwaseiaŋ wiemɔ ko yɛ Abɛi 6:​16 lɛ mli ni maa yibɔ ni ji enyɔ lɛ nɔ mi kɛtsɔɔ akɛ, akɛ yibɔ ni ji enyɔ lɛ to klɛŋklɛŋ nɔ lɛ he. Akɛ agwaseiaŋ wiemɔ ni tamɔ nɛkɛ fɔɔ nitsumɔ yɛ Ŋmalɛi lɛ amli.​—Hiob 5:19; Abɛi 30:15, 18, 21.

Kɛ́ akɛɛ “gbele esha” lɛ, te atsɔɔ tɛŋŋ?

Bibliai komɛi kɛ wiemɔ nɛɛ tsu nii yɛ 1 Yohane 5:16. Akɛ nɔkwɛmɔnɔ lɛ, The New American Bible lɛ tsɔɔ shishi akɛ: “Esha ko yɛ ni eji gbele esha.” Abaanyɛ atsɔɔ wiemɔ ni ji “gbele esha” lɛ shishi hu akɛ “esha ni kɛ mɔ yaa gbele mli.” Mɛɛ srɔto yɔɔ “esha ni kɛ mɔ yaa gbele mli” kɛ “esha ni kɛ mɔ eyaaa gbele mli” lɛ teŋ?​—1 Yohane 5:16.