Mɛɛ Be Je Lɛ Baaba Naagbee?

Hetoo Ni Biblia Lɛ Kɛhãa

Bɔ ni afee ni wɔle be ni je lɛ baaba naagbee lɛ, ehe miihia ni wɔle bɔ ni Biblia lɛ kɛ wiemɔ ni ji “je lɛ” tsuɔ nii ehãa. Bei pii lɛ, akɛ Greek wiemɔ koʹsmos, ni afɔɔ shishitsɔɔmɔ akɛ “je lɛ,” damɔɔ shi kɛhãa adesai aje lɛ, titri lɛ, efã ni ehiii shi yɛ Nyɔŋmɔ suɔmɔnaa nii anaa lɛ. (Yohane 15:18, 19; 2 Petro 2:5) Bei komɛi lɛ, koʹsmos kɔɔ adesai anifeemɔi kɛ amɛshihilɛi ahe.​—1 Korintobii 7:31; 1 Yohane 2:15, 16.a

Mɛni ji “je lɛ naagbee lɛ”?

Abaanyɛ atsɔɔ wiemɔ ni ji “je lɛ naagbee” ni jeɔ kpo yɛ Biblia shishitsɔɔmɔi pii amli lɛ shishi hu akɛ, “shihilɛ gbɛjianɔtoo lɛ naagbee,” loo “yinɔ lɛ naagbee.” (Mateo 24:3; English Standard Version) Enɛ kɔɔɔ shikpɔŋ lɛ loo adesai fɛɛ ahiɛkpãtãmɔ he, moŋ lɛ, ekɔɔ adesai anifeemɔi kɛ amɛshihilɛ, ni ji je lɛ mli nibii lɛ ahiɛkpãtãmɔ he.​—1 Yohane 2:17.

Biblia lɛ tsɔɔ akɛ, ‘abaajie efɔŋfeelɔi lɛ kɛje shihilɛ mli’ koni gbɔmɛi kpakpai lɛ ahi shikpɔŋ lɛ nɔ yɛ miishɛɛ mli. (Lala 37:9-11) Hiɛkpãtãmɔ nɛɛ baaba yɛ “amanehulu kpeteŋkpele” lɛ mli, ni Harmagedon ta lɛ ji nɔ ni kɛ amanehulu kpeteŋkpele nɛɛ baaba naagbee.​—Mateo 24:21, 22; Kpojiemɔ 16:14, 16.

Mɛɛ be je lɛ baaba naagbee?

Yesu kɛɛ akɛ: “Nakai gbi lɛ kɛ nakai ŋmɛlɛtswaa lɛ, mɔ ko mɔ ko leee, bɔfoi ni yɔɔ ŋwɛi lɛ po loo Bi lɛ po leee, ja Tsɛ lɛ kɛkɛ.” (Mateo 24:36, 42) Ewie kɛfata he akɛ, je lɛ naagbee lɛ baaba trukaa, no ji, ebaaba “nɔ ŋmɛlɛtswaa ni nyɛsusuuu akɛ no ni lɛ.”​—Mateo 24:44.

Eyɛ mli akɛ wɔnyɛŋ wɔle gbi lɛ tuuntu kɛ ŋmɛlɛtswaa lɛ moŋ, shi Yesu kɛ “okadi” ko ni hiɛ fãi srɔtoi loo nibii srɔtoi ni baatsɔɔ akɛ wɔyɛ je lɛ naagbee gbii lɛ amli lɛ hã. (Mateo 24:​3, 7-​14) Biblia lɛ tsɛɔ nɛkɛ be nɛɛ akɛ “naagbee be lɛ” kɛ “naagbee gbii lɛ.”​—Daniel 12:4; 2 Timoteo 3:​1-5.

Kɛ́ je lɛ ba naagbee lɛ, ani nɔ ko baashwɛ?

Hɛɛ. Shikpɔŋ lɛ baakã he ahi shi, ejaakɛ Biblia lɛ kɛɛ akɛ, “nɔ ko nɔ ko hosoŋ lɛ kɛjeŋ egbɛhe lɛ gbi ko gbi ko.” (Lala 104:5) Gbɔmɛi baayi shikpɔŋ lɛ nɔ obɔ, tamɔ bɔ Biblia lɛ ewo shi lɛ, ewie akɛ: “Jalɔi lɛ, shikpɔŋ lɛ baatsɔ amɛnɔ, ni amɛbaahi nɔ kɛya naanɔ.” (Lala 37:29) Nyɔŋmɔ baahã yiŋ ni ekpɛ yɛ shikpɔŋ lɛ he be ni ebɔ je lɛ aba mli:

• Paradeiso.​—Yesaia 35:1; Luka 23:43.

• Mɔ fɛɛ mɔ baahi shi shweshweeshwe ni ebaaná nibii kpakpai ni etsui shweɔ.​—Mika 4:4.

• Mɔ fɛɛ mɔ baaná nitsumɔ kpakpa ni hãa mɔ tsui nyɔɔ emli etsu.​—Yesaia 65:21-​23.

• Hela mɔŋ mɔ ko, ni mɔ ko mɔ ko egbɔŋ dɔŋŋ.​—Hiob 33:25; Yesaia 33:24.