Ani Nyɔŋmɔ Tsakeɔ Ejwɛŋmɔ?
Hetoo ni Biblia lɛ kɛhãa
Hɛɛ, etsakeɔ ejwɛŋmɔ, kɛ shishinumɔ akɛ kɛ́ mɛi tsake amɛsubaŋ lɛ, lɛ hu etsakeɔ eyiŋtoo yɛ amɛhe. Ákɛ nɔkwɛmɔnɔ lɛ, be ni Nyɔŋmɔ tsu koni ayajaje kojomɔi ashwie blema Israelbii lɛ anɔ lɛ, ekɛɛ akɛ: “Ekolɛ aleee nɔ amɛaabo toi, ni amɛteŋ mɔ fɛɛ mɔ baakpa ejeŋba fɔŋ lɛ koni efɔŋ ni mito akɛ mafee amɛ yɛ amɛnifɔ̃ɔjianii lɛ ahewɔ lɛ mafo mli.”—Yeremia 26:3, Ga Biblia hee.
Biblia shishitsɔɔmɔi babaoo tsɔɔ ŋmalɛ nɛɛ shishi akɛ, Nyɔŋmɔ “baashwa ehe” yɛ efɔŋ ni eto eyiŋ akɛ ebaafee amɛ lɛ he, ni abaanyɛ anu enɛ shishi akɛ etɔ̃. Kɛ̃lɛ, abaanyɛ atsɔɔ shishijee Hebri wiemɔ ni atsɔɔ shishi akɛ “baashwa ehe” lɛ shishi akɛ “tsake jwɛŋmɔ loo yiŋtoo.” Biblia he nilelɔ ko ŋma akɛ: “Kɛ́ gbɔmɔ tsake enifeemɔ lɛ, ehãa Nyɔŋmɔ hu tsakeɔ kojomɔ ni eto eyiŋ akɛ ekɛbaaba lɛ.
Anɔkwa sane ji akɛ, kɛ́ Nyɔŋmɔ baanyɛ atsake ejwɛŋmɔ lɛ, no etsɔɔɔ akɛ doo lɛ esa akɛ etsake ejwɛŋmɔ. Susumɔ shihilɛi komɛi ni Biblia lɛ kɛɔ akɛ Nyɔŋmɔ tsakeko ejwɛŋmɔ yɛ he lɛ ahe okwɛ:
Nyɔŋmɔ eŋmɛɛɛ gbɛ ni Balak ahã etsake ejwɛŋmɔ ni elomɔ Israel maŋ lɛ.—4 Mose 23:18-20.
Be ko ni Maŋtsɛ Saulo kɛ ehe wo nɔfɔŋ feemɔ mli waa lɛ, Nyɔŋmɔ tsakeee ejwɛŋmɔ koni ekakpa lɛ maŋtsɛ lɛ yeli.—1 Samuel 15:28, 29.
Nyɔŋmɔ baaye shi ni ewo akɛ ebaahã e-Bi lɛ aye osɔfo kɛya naanɔ lɛ nɔ. Nyɔŋmɔ tsakeŋ ejwɛŋmɔ.—Lala 110:4.
Ani Biblia lɛ ekɛɛɛ akɛ Nyɔŋmɔ tsakeee?
Hɛɛ, Biblia lɛ kɛɔ yɛ Nyɔŋmɔ he akɛ: “Mi Yehowa lɛ, mitsakeee.” (Maleaki 3:6) Nakai nɔŋŋ Biblia lɛ kɛɔ akɛ, Nyɔŋmɔ “tsakeee tamɔ hɔɔŋ ni tsiɔ ehe lɛ.” (Yakobo 1:17) Kɛ̃lɛ, enɛ eteee shi ewooo wiemɔ ni Biblia lɛ wie akɛ Nyɔŋmɔ tsakeɔ ejwɛŋmɔ lɛ. Kɛ́ akɛɛ Nyɔŋmɔ tsakeee lɛ, nɔ ni etsɔɔ ji akɛ etsakeee bɔ ni eyɔɔ, etsakeee tɛi ni efolɔ eshwie shi ni kɔɔ suɔmɔ kɛ jalɛsaneyeli he lɛ kɔkɔɔkɔ. (3 Mose 19:35; 1 Yohane 4:8) Fɛɛ sɛɛ lɛ, ebaanyɛ ekɛ gbɛtsɔɔmɔi srɔtoi ahã mɛi yɛ bei srɔtoi amli. Ákɛ nɔkwɛmɔnɔ lɛ, yɛ tai srɔtoi enyɔ ni Maŋtsɛ David yawu lɛ mli lɛ, Nyɔŋmɔ kɛ gbɛtsɔɔmɔi enyɔ ni kɛ amɛhe kpãaa gbee kwraa lɛ hã lɛ, shi gbɛtsɔɔmɔi enyɔ lɛ fɛɛ ye omanye.—2 Samuel 5:18-25.
Ani Nyɔŋmɔ eshwa ehe akɛ ebɔ gbɔmɛi?
Dabi, eyɛ mli akɛ eshwa ehe akɛ adesai babaoo booo lɛ toi loo amɛkpoo lɛ. Be ni Biblia lɛ wieɔ shihilɛ ni tsɔ Noa beaŋ Nu Afua lɛ hiɛ lɛ he lɛ, ekɛɛ akɛ: “Yehowa shwa ehe akɛ efee gbɔmɔ yɛ shikpɔŋ lɛ nɔ, ni edɔ lɛ yɛ etsui mli.” (1 Mose 6:6) Wiemɔ ni ji, “shwa ehe” ni akɛtsu nii yɛ ŋmalɛ nɛɛ mli lɛ, jɛ Hebri wiemɔ ni abaanyɛ atsɔɔ shishi akɛ “etsake ejwɛŋmɔ” lɛ mli. Nyɔŋmɔ tsake ejwɛŋmɔ yɛ mɛi babaoo ni hi shi dani Nu Afua lɛ ba lɛ ahe ejaakɛ amɛtsɔmɔ mɛi fɔji. (1 Mose 11. 6:5, 11) Eyɛ mli akɛ edɔ lɛ akɛ amɛhala akɛ amɛbaafee nibii fɔji moŋ, shi etsakeee bɔ ni ekɛ adesai aweku muu lɛ fɛɛ yeɔ ehãa lɛ. Anɔkwa, ekɛ Noa kɛ eweku lɛ tsu nii kɛbaa adesai aweku lɛ yi yɛ Nu Afua lɛ mli.—1 Mose 8:21; 2 Petro 2:5, 9.