Mɛni Ji Harmagedon Ta Lɛ?

Hetoo ni Biblia lɛ kɛhãa

Harmagedon ta lɛ ji naagbee ta ni adesai anɔyelii kɛ Nyɔŋmɔ baawu lɛ. Amrɔ nɛɛ po lɛ, nɔyelii nɛɛ kɛ amɛsɛɛfilɔi lɛ teɔ shi amɛwoɔ Nyɔŋmɔ, no ji, amɛbaaa amɛhe shi amɛhãaa enɔyeli lɛ. (Lala 2:2) Harmagedon ta lɛ baakpãta adesai anɔyelii fɛɛ ahiɛ.—Daniel 2:44.

Wiemɔ “Harmagedon” lɛ jieɔ kpo shi kome pɛ yɛ Biblia lɛ mli yɛ Kpojiemɔ 16:16. Yɛ gbalɛ naa lɛ, Kpojiemɔ Wolo lɛ tsɔɔ akɛ “shikpɔŋ muu lɛ fɛɛ nɔ maŋtsɛmɛi lɛ” baabua amɛhe naa yɛ “he ko ni atsɛɔ jɛmɛ yɛ Hebri mli akɛ Harmagedon” lɛ kɛhã “Nyɔŋmɔ Ofe lɛ gbi wulu lɛ nɔ ta lɛ.”—Kpojiemɔ 16:14.

Namɛi baanɔ yɛ Harmagedon? Yesu baanyiɛ ŋwɛi tai lɛ ahiɛ kɛye Nyɔŋmɔ henyɛlɔi lɛ anɔ kunim. (Kpojiemɔ 19:11-16, 19-21) Mɛi ni teɔ shi woɔ Nyɔŋmɔ nɔyeli, ni amɛbɛ bulɛ ko kwraa kɛhã lɛ lɛ fata Nyɔŋmɔ henyɛlɔi nɛɛ ahe.—Ezekiel 39:7.

Ani Abaawu Harmagedon ta lɛ yɛ Middle East Diɛŋtsɛ? Dabi. Abaawuu Harmagedon ta lɛ yɛ shikpɔŋ muu lɛ fɛɛ nɔ, jeee he kome pɔtɛɛ ko.—Yeremia 25:32-34; Ezekiel 39:17-20.

Yɛ Hibri mli lɛ, Harmagedon ji Megido Gɔŋ. Be ko ni eho lɛ, Megido ji maŋ ko ni yɔɔ blema Israel. Yinɔsane tsɔɔ akɛ, awu tai srɔtoi yɛ jɛmɛ niiaŋ, ni aŋmala tai nɛɛ ekomɛi ahe saji yɛ Biblia lɛ mli. (Kojolɔi 5:19, 20; 2 Maŋtsɛmɛi 9:27; 23:29) Kɛ̃lɛ, anyɛŋ akɛɛ akɛ Harmagedon ji he ko pɔtɛɛ ni bɛŋkɛ blema Megido. Ejaakɛ gɔŋ wulu ko bɛ jɛmɛ, ni Yezreel Jɔɔ Ŋa lɛ niiaŋ edaaa bɔ ni mɛi fɛɛ ni kɛ Nyɔŋmɔ baawu lɛ baaho jɛmɛ. Moŋ lɛ, Harmagedon feɔ shihilɛ ko ni majimaji lɛ fɛɛ baabua amɛhe naa kɛte shi naagbee nɔ kwraa amɛwo Nyɔŋmɔ nɔyeli lɛ.

Te shihilɛ baafee tɛŋŋ be ni Harmagedon ta lɛ yaa nɔ lɛ? Eyɛ mli akɛ wɔleee bɔ ni Nyɔŋmɔ kɛ ehewalɛ lɛ baatsu nii ehã lɛ moŋ, kɛ̃lɛ, eyɛ nibii tamɔ nyɔŋmɔŋtɛi, shikpɔŋhosomɔ, nugbɔnɛmɔ ni na wa, la kɛ swɔɔ, srawa, kɛ helai ni ebaanyɛ ekɛwu ta lɛ—ni ekɛ nibii nɛɛ etsu nii be ko ni eho. (Hiob 38:22, 23; Ezekiel. 38:19, 22; Habakuk 3:10, 11; Zakaria 14:12) Nyɔŋmɔ henyɛlɔi lɛ ayiŋ baafutu amɛ, ni kɛhooo kwraa lɛ, amɛbaagbegbee amɛhe, kɛ̃lɛ, amɛbaayɔse akɛ Nyɔŋmɔ ji mɔ ni kɛ amɛwuɔ lɛ.—Ezekiel 38:21, 23; Zakaria 14:13.

Ani Harmagedon kɛ je lɛ baaba naagbee? Ekpataŋ je lɛ hiɛ, ejaakɛ shikpɔŋ lɛ ji adesa ashihilɛhe kɛmiiya naanɔ. (Lala 37:29; 96:10; Jajelɔ 1:4) Harmagedon kpataŋ adesai ahiɛ, moŋ lɛ, ebaabaa mɛi ayi ejaakɛ Nyɔŋmɔ tsuji ni ji “asafoku kpele ko” ayi baaná wala.—Kpojiemɔ 7:9, 14; Lala 37:34.

Eyɛ mli akɛ atsĩ shikpɔŋ lɛ tã moŋ, shi bei komɛi lɛ Biblia lɛ kɛ wiemɔ ni ji “je lɛ” damɔɔ shi kɛhãa efɔŋfeelɔi ni teɔ shi woɔ Nyɔŋmɔ lɛ. (1 Yohane 2:15-17) Yɛ shishinumɔ nɛɛ naa lɛ, Harmagedon kɛ ‘je lɛ baaba naagbee.’—Mateo 24:3, Ga Biblia.

Mɛɛ be Harmagedon baaba? Be ni Yesu wieɔ “amanehulu kpeteŋkpele” ni kɛ Harmagedon ta lɛ baaba lɛ he lɛ, ekɛɛ akɛ: “Nakai gbi lɛ kɛ nakai ŋmɛlɛtswaa lɛ, mɔ ko mɔ ko leee, bɔfoi ni yɔɔ ŋwɛi lɛ tete loo Bi lɛ tete leee, ja Tsɛ lɛ kɛkɛ.” (Mateo 24:21, 36) Fɛɛ sɛɛ lɛ, Biblia lɛ tsɔɔ akɛ Harmagedon baaba yɛ be ni Yesu miiye nɔ ni anaaa lɛ lɛ, ni nɛkɛ be nɛɛ je shishi afi 1914.—Mateo 24:37-39.