Kpojiemɔ Wolo Lɛ—Mɛni Etsɔɔ?
Hetoo ni Biblia lɛ kɛhãa
Hela gbɛ́i ni akɛtsɛɔ Biblia wolo ni ji Kpojiemɔ lɛ ji A·po·kaʹly·psis (apokalips), eshishi ji “Agbele nɔ” aloo “Ajie Kpo.” Gbɛ́i nɛɛ kɛ shishinumɔ ni Kpojiemɔ hiɛ lɛ hãa—egbeleɔ saji ni akɛtee lɛ anɔ ni ejieɔ saji ni aŋmala ni baahe be kpalaŋ dani amɛbaaba mli lɛ akpo. Emli gbalɛi babaoo yɛ ni kpaako amɛbaaba mli.
Nibii ni yɔɔ Kpojiemɔ wolo lɛ mli
Hiɛkpamɔ.—Kpojiemɔ 1:1-9.
Wolo ni Yesu ŋma kɛmaje asafoi kpawo lɛ.—Kpojiemɔ 1:10–3:22.
Ana Nyɔŋmɔ yɛ ninaa mli ni eta maŋtsɛsɛi nɔ yɛ ŋwɛi.—Kpojiemɔ 4:1-11.
Ninai srɔtoi ni eko nyiɛɔ eko sɛɛ:
Naasɔomɔnɔi kpawo.—Kpojiemɔ 5:1–8:6.
Tɛtɛrɛmantɛrɛ kpawo, ni emli naagbee etɛ lɛ wieɔ kpo etɛ lɛ ahe.—Kpojiemɔ 8:7–14:20.
Kãi kpawo, eko fɛɛ eko mli haomɔ damɔ shi kɛhã ŋwɛi kojomɔ ni abaatsɔ ashwie shikpɔŋ lɛ nɔ lɛ.—Kpojiemɔ 15:1–16:21.
Nyɔŋmɔ henyɛlɔi lɛ ahiɛkpatamɔ he ninaai.—Kpojiemɔ 17:1–20:10.
Nyɔŋmɔ jɔɔmɔi ni ekɛbaaba ŋwɛi kɛ shikpɔŋ lɛ ahe ninaai.—Kpojiemɔ 20:11–22:5.
Enaamuu.—Kpojiemɔ 22:6-21.
Nibii ni baahã onu Kpojiemɔ wolo lɛ mli saji lɛ ashishi
Eshishinumɔ lɛ woɔ mɔ hewalɛ, ebɛ gbeyei aloo tsuifãa kɛhã mɛi ni sɔmɔɔ Nyɔŋmɔ lɛ. Mɛi babaoo kɛ wiemɔ “apokalips” lɛ toɔ hiɛkpatamɔ ni naa wa he, kɛ̃lɛ Kpojiemɔ wolo lɛ jeɔ emli saji lɛ shishi akɛ, mɛi ni kaneɔ emli wiemɔi lɛ, ní amɛnuɔ shishi ní amɛyeɔ nibii ni aŋmala yɛ mli lɛ anɔ lɛ yɛ miishɛɛ, ni ekɛ no nɔŋŋ gbeɔ naa.—Kpojiemɔ 1:3; 22:7.
Kpojiemɔ wolo lɛ kɛ “okadii” babaoo tsuɔ nii yɛ mfonirifeemɔŋ.— Kpojiemɔ 1:1.
Atsɔ hiɛ awie mɛi titrii kɛ okadii ni yɔɔ Kpojiemɔ wolo lɛ mli lɛ babaoo ahe yɛ Biblia woji komɛi ni aŋmala kwraa kɛtsɔ hiɛ lɛ amli:
Yehowa—“anɔkwa Nyɔŋmɔ ni yɔɔ ŋwɛi” kɛ nibii fɛɛ Abɔlɔ lɛ.—5 Mose 4:39; Lala 103:19; Kpojiemɔ 4:11; 15:3.
Yesu Kristo—“Nyɔŋmɔ Gwantɛŋbi lɛ.”—Yohane 1:29; Kpojiemɔ 5:6; 14:1.
Satan Abonsam—Nyɔŋmɔ henyɛlɔ.—1 Mose 3:14, 15; Yohane 8:44; Kpojiemɔ 12:9.
Babilon Kpeteŋkpele lɛ—etamɔ blema Babilon (Babel), eji Yehowa Nyɔŋmɔ kɛ etsuji lɛ ahenyɛlɔ kɛ jamɔ mli amale tsɔɔmɔi ashishifã.—1 Mose 11:2- 9; Yesaia 13:1, 11; Kpojiemɔ 17:4- 6; 18:4, 20.
“Ŋshɔ lɛ”—mɛi fɔji ni teɔ shi woɔ Nyɔŋmɔ.—Yesaia 57:20; Kpojiemɔ 13:1; 21:1.
Atsĩ blema kpeebuu lɛ mli nibii komɛi ni akɛtsu nii yɛ Nyɔŋmɔ jamɔ mli lɛ ekomɛi atã yɛ wolo lɛ mli; ekomɛi nyiɛ sɛɛ nɛɛ: kpaŋmɔ adeka lɛ, ashwishwɛ ŋshɔ (okpolu loo lalakã ), la kanei, tsofa-kɛ-ŋma kɛ afɔleshaa latɛ.— 2 Mose 25:10, 17, 18; 40:24- 32; Kpojiemɔ 4:5, 6; 5:8; 8:3; 11:19.
Kooloo awuiyelɔ lɛ—damɔ shi kɛhã adesai amaŋkwramɔŋ gbɛjianɔtoi.—Daniel 7:1-8, 17-26; Kpojiemɔ 13:2, 11; 17:3.
Yibɔi ni akɛtsu nii yɛ mfonirifeemɔŋ.—Kpojiemɔ 1:20; 8:13; 13:18; 21:16.
Ninai lɛ kɔɔ “Nuŋtsɔ lɛ gbi lɛ,” ni je shishi be ni ato Nyɔŋmɔ Maŋtsɛyeli lɛ shishi yɛ afi 1914 lɛ he, nakai be lɛ Yesu bɔi nɔyeli akɛ Maŋtsɛ. (Kpojiemɔ 1:10) No hewɔ lɛ, wɔbaanyɛ wɔkpa gbɛ akɛ gbalɛi ni yɔɔ Kpojiemɔ wolo lɛ mli lɛ titri baaba mli yɛ wɔ bei nɛɛ amli.
Kɛ́ wɔbaanu Kpojiemɔ wolo lɛ shishi lɛ, esa akɛ wɔná nibii ni yeɔ ebuaa wɔ ni wɔnuɔ Biblia mli woji krokomɛi lɛ ashishi lɛ nɔŋŋ eko, ni nɔ ni fata he ji, nilee ni jɛ Nyɔŋmɔ ŋɔɔ lɛ, kɛ mɛi ni enu Kpojiemɔ wolo lɛ shishi momo lɛ ayelikɛbuamɔ.—Bɔfoi 8:26-39; Yakobo 1:5.