Ani Hɛl Ji He Ko Ni Yɔɔ Diɛŋtsɛ? Te Biblia Lɛ Tsɔɔ Hɛl Mli Ehãa Tɛŋŋ?

Hetoo ni Biblia lɛ kɛhãa

Blɔfo Biblia shishitsɔɔmɔi srɔtoi ni etsɛ, tamɔ King James Version lɛ kɛ wiemɔ “hell” ni ji hɛl lɛ tsu nii yɛ kukuji komɛi amli. (Lala 16:10; Bɔfoi 2:27 a) Taakɛ jamɔŋ mfoniri ni yɔɔ sane nɛɛ mli lɛ tsɔɔ lɛ, mɛi babaoo heɔ amɛyeɔ akɛ hɛl ji he ko ni la ko miitso yɛ jɛmɛ kɛmiiya naanɔ, ni agbalaa efɔŋfeelɔi atoi yɛ jɛmɛ. Shi, ani nakai ji nɔ ni Biblia lɛ tsɔɔ?

Nɔ ni abaasusu he yɛ sane nɛɛ mli

Ani Hɛl ji he ko ni apiŋɔ mɛi kɛyaa naanɔ yɛ?

Dabi. Nɔ ni wiemɔ ni atsɔɔ shishi akɛ hɛl (hell) yɛ Biblia shishitsɔɔmɔi komɛi ni etsɛ waa lɛ (Hebri, “Sheol”; Greek, “Hades”) amli lɛ damɔ shi kɛhã nɔŋŋ ji “Gbonyobu,” adesai fɛɛ agbonyobu. Biblia lɛ tsɔɔ akɛ mɛi ni yɔɔ “Gbonyobu” lɛ mli lɛ, bɛ shihilɛ mli, no ji, amɛleee nɔ ko nɔ ko.

Gbohii lɛ bɛ shihilɛ mli, no hewɔ lɛ amɛnyɛɛɛ amɛnu piŋmɔ he. “Nitsumɔ loo yiŋshwiemɔ loo hiɛshikamɔ, loo nilee ko kwraa bɛ hɛl he ni oyaa lɛ.” (Jajelɔ 9:10, Douay-Rheims Version) Mɛi ni yɔɔ hɛl lɛ piŋŋ po ni abaanu amɛbolɔmɔi ahe. Moŋ lɛ, Biblia lɛ kɛɛ: “Hã mɛi fɔji ahiɛ agboi, ni amɛfee dioo yɛ gbonyobu [hell, Douay-Rheims] lɛ mli.”—Lala 31:17; King James Version (30:18, Douay-Rheims); Lala 115:17.
Nyɔŋmɔ etsɔɔ akɛ gbele ji esha he toigbalamɔ, jeee piŋmɔ yɛ hɛl la mli. Nyɔŋmɔ kɛɛ klɛŋklɛŋ gbɔmɔ, ni ji Adam lɛ akɛ, kɛ́ eku Nyɔŋmɔ mla lɛ mli lɛ, ebaagbo. (1 Mose 2:17) Nyɔŋmɔ ewieee nɔ ko nɔ ko yɛ naanɔ piŋmɔ yɛ hɛl he. Sɛɛ mli be ni Adam tɔ̃ lɛ, Nyɔŋmɔ kɛɛ lɛ toigbalamɔ ni baaba enɔ, no ji: “Sũ ji bo, ni sũ mli obaaku osɛɛ kɛya.” (1 Mose 3:19) Ehiŋ shi dɔŋŋ. Eji Nyɔŋmɔ kɛ Adam yaawo hɛl la ko mli kulɛ, bɔ fɛɛ bɔ ni fee lɛ, ebaatsĩ tã. Nyɔŋmɔ tsakeko toigbalamɔ ni ekɛɛ kɛ́ wɔje gbɛ wɔku emlai lɛ amli lɛ, ebaaba wɔnɔ lɛ. Be ni Adam fee esha lɛ sɛɛ bei kplaŋŋ lɛ, Nyɔŋmɔ kɛ emumɔ lɛ tsirɛ Biblia ŋmalɔ ko ni eŋma akɛ: “Esha dɛŋ nyɔmɔwoo ji gbele.” (Romabii 6:23) Enɛ sɛɛ lɛ, toigbalamɔ ko he ehiaa dɔŋŋ, “ejaakɛ kɛ́ mɔ ko gbo lɛ, abuɔ lɛ bem kɛjeɔ ehe esha lɛ mli.”—Romabii 6:7.
Susumɔ ni mɛi hiɛ akɛ apiŋɔ mɛi yɛ hɛl kɛyaa naanɔ lɛ, eji Nyɔŋmɔ nihiinii. (Yeremia 32:35) Susumɔ nɛɛ kɛ nɔ ni Biblia lɛ tsɔɔ akɛ “Nyɔŋmɔ lɛ, suɔmɔ ji lɛ” kpãaa gbee kwraa. (1 Yohane 4:8) Eesumɔ ni wɔjá lɛ akɛni wɔsumɔɔ lɛ lɛ hewɔ, jeee ni wɔjá lɛ akɛni wɔmiishe gbeyei akɛ ebaapiŋ wɔ kɛya naanɔ lɛ hewɔ.—Mateo 22:36-38.
Mɛi kpakpai tee hɛl. Bibliai ni akɛ wiemɔ ni ji “hɛl” lɛ tsu nii yɛ mli lɛ tsɔɔ akɛ, hii anɔkwafoi komɛi tamɔ Yakob kɛ Hiob kpa gbɛ akɛ amɛbaaya hɛl. (1 Mose 37:35; Hiob 14:13) Awie Yesu Kristo po he akɛ, kɛjɛ be ni egbo kɛyashi atee lɛ shi lɛ, no mli fɛɛ lɛ eyɛ hɛl. (Bɔfoi 2:31, 32) Enɛ tsɔɔ akɛ, kɛ́ akɛ “hɛl” tsu nii yɛ Bibliai nɛɛ amli lɛ, nɔ ni nɔŋŋ ni edamɔ shi kɛhã ji Gbonyobu.b

Mɛni Yesu abɛbua ni kɔɔ nuu niiatsɛ lɛ kɛ Lazaro he lɛ tsɔɔ?

Yesu kɛ abɛbua nɛɛ tsu nii, ni abɔ enɛ he amaniɛ yɛ Luka 16:19-31. Abɛbuai ji nɔkwɛmɔnii ni tsɔɔ wɔ jeŋba he anɔkwalei komɛi kɛ bɔ ni Nyɔŋmɔ naa saji komɛi ehãa. Abɛbua ni kɔɔ nuu niiatsɛ lɛ kɛ Lazaro he lɛ jeee shihilɛ ko ni ba diɛŋtsɛ. (Mateo 13:34) Kɛ́ ootao ole abɛbua nɛɛ he saji krokomɛi lɛ, kanemɔ sane ji, “Who Were the Rich Man and Lazarus?”

Kɛ́ mɔ ko tee hɛl lɛ, ani no tsɔɔ akɛ mɔ lɛ etsi ehe kɛje Nyɔŋmɔ he?

Dabi. Nɔ ni mɛi tsɔɔ akɛ gbohii lɛ baanyɛ ale akɛ amɛtsi amɛhe kɛje Nyɔŋmɔ he lɛ kɛ Biblia lɛ kpãaa gbee, ejaakɛ Biblia lɛ tsɔɔ akɛ gbohii lɛ leee nɔ ko nɔ ko.—Lala 146:3, 4; Jajelɔ 9:5.

Ani mɔ ko etee hɛl ni ajie lɛ kɛje kpo pɛŋ?

Hɛɛ. Biblia lɛ bɔ mɛi nɛɛhu ni tee Gbonyobu (ni atsɔɔ shishi akɛ “hɛl” yɛ Bibliai komɛi amli) mli, ni atee amɛ shi kɛba wala mli ekoŋŋ lɛ ahe amaniɛ fitsofitso.c Eji be ni amɛyɔɔ hɛl lɛ, amɛle nibii ni yaa nɔ yɛ jɛmɛ kulɛ, be ni amɛje kpo lɛ, amɛbaagba shihilɛi ni amɛtsɔ mli lɛ. Shi nɔ ni sa kadimɔ waa ji akɛ, mɛi nɛɛhu nɛɛ ateŋ mɔ kome folo po ekɛɛɛ akɛ apiŋ lɛ yɛ jɛmɛ loo etsɔ shihilɛ ko mli. Mɛni hewɔ? Taakɛ Biblia lɛ etee nɔ etsɔɔ lɛ, no mli lɛ amɛleee nɔ ko nɔ ko, amɛyaje shihilɛ ko ni tamɔ “wɔ” vii mli.—Yohane 11:11-14; 1 Korintobii 15:3-6.

a Blɔfo Bibliai ni akɛtsuɔ nii ŋmɛnɛ lɛ babaoo kɛ wiemɔ ni ji “hell” ni ji hɛl lɛ, tsuuu nii yɛ Bɔfoi 2:27 lɛ. No najiaŋ lɛ, Bibliai nɛɛ ekomɛi kɛ wiemɔi tamɔ “the grave,” ni ji gbonyobu, (New Century Version); “the realm of the dead,” ni ji gbohii ajeŋ, (New International Version); “the dead” ni ji gbohii lɛ (The Passion Translation) tsu nii. Ekomɛi hu kɛ Blɔfo niŋmai tsɔɔ shishi akɛ “Hades” tamɔ bɔ ni atsɛɔ lɛ yɛ Greek mli lɛ nɔŋŋ.—Holman Christian Standard Bible, NET Bible, New American Standard Bible, English Standard Version.

b Kwɛmɔ akrabatsa ni ji “Wiemɔi Ni Akɛtsu Nii Be Ni Aŋma Biblia Lɛ.”

c Kwɛmɔ 1 Maŋtsɛmɛi 17:17-24; 2 Maŋtsɛmɛi 4:32-37; 13:20, 21; Mateo 28:5, 6; Luka 7:11-17; 8:40-56; Yohane 11:38-44; Bɔfoi 9:36-42; 20:7-12.

Biblia ŋmalɛi ni wieɔ hɛl loo Gbonyobu lɛ he

Hiob 14:13: “Ao, miná kulɛ oŋɔ mi ohɔ shi yɛ Gbonyobu [ni ji “hell”, Douay-Rheims Version] lɛ mli, ní oŋɔ mi otee, . . . ní oto be ohã mi, ní okai mi!”

Nɔ ni etsɔɔ: Nuu anɔkwafo Hiob le akɛ kɛ́ etee hɛl (Gbonyobu lɛ) lɛ, epiŋmɔi lɛ sɛɛ baafo, ni Nyɔŋmɔ baanyɛ ahã eje jɛmɛ kɛba wala mli ekoŋŋ.

Lala 145:20: “Yehowa buɔ mɛi fɛɛ ni sumɔɔ lɛ lɛ ahe, shi mɛi fɔji lɛ, ebaakpãtã amɛ fɛɛ amɛhiɛ.”

Nɔ ni etsɔɔ: Nyɔŋmɔ baajie mɛi fɔji lɛ kɛje shihilɛ mli kwraa, loo ebaakpãtã amɛhiɛ kɛya naanɔ. Ehãŋ amɛhi wala mli yɛ hɛl koni epiŋ amɛ.

Jajelɔ 9:10: “Atsuuu nɔ ko, ni akpɛɛɛ yiŋ ko, ni anáaa nilee ko loo hiɛshikamɔ ko yɛ Gbonyobu [“hell” ni ji hɛl, Douay-Rheims Version] lɛ mli, he ni oyaa lɛ.”

Nɔ ni etsɔɔ: Mɛi ni yɔɔ Gbonyobu lɛ mli, loo hɛl lɛ, leee nɔ ko nɔ ko, no hewɔ lɛ amɛnuŋ piŋmɔ ko he. Kɛfata he lɛ, ekã shi faŋŋ akɛ, mɛi ni Biblia ŋmalɔ nɛɛ ŋmala ehiɛshikamɔ wiemɔi nɛɛ ehã amɛ lɛ, gbɔmɛi kpakpai fata he.

Bɔfoi 2:31: “Akɛni etsɔ hiɛ ena Kristo lɛ shitee kɛmiijɛ gbele mli hewɔ lɛ, ni ewie Kristo he akɛ ashiŋ esusuma yɛ hɛl.”—King James Version.

Nɔ ni etsɔɔ: Yesu tee hɛl (Gbonyobu lɛ) mli be ni egbo lɛ.

Romabii 6:23: “Esha dɛŋ nyɔmɔwoo ji gbele.”

Nɔ ni etsɔɔ: Gbele ji esha he nyɔmɔwoo, shi jeee piŋmɔ yɛ hɛl.

Kpojiemɔ 20:13: “Gbele kɛ hɛl lɛ jie gbohii ni yɔɔ amɛmli lɛ amɛhã.”—King James Version.

Nɔ ni etsɔɔ: Mɛi ni yɔɔ hɛl lɛ egboi. Abaatsɔ gbohiiashitee lɛ nɔ ahã amɛba wala mli ekoŋŋ.

Kpojiemɔ 20:14: “Ashɛrɛ gbele kɛ hɛl ashwie la kpaakpo lɛ mli.”—King James Version.

Nɔ ni etsɔɔ: Kɛ́ atsɔ gbohiiashitee lɛ nɔ ajie gbohii lɛ fɛɛ kɛje hɛl (Gbonyobu lɛ) mli agbe naa lɛ, abaakpãtã hɛl hiɛ kɛya naanɔ, oookɛɛ akɛ la ekpãtã hiɛ. No sɛɛ lɛ, gbele ni ba kɛtsɔ Adam esha lɛ nɔ lɛ ehiŋ shi dɔŋŋ.—Romabii 5:12.

Wiemɔi ni akɛtsu nii be ni aŋma Biblia lɛ

Wiemɔi ni nyiɛ sɛɛ nɛɛ hãa wɔnaa bɔ ni Biblia shishitsɔɔlɔi komɛi etsɔɔ Hebri kɛ Greek wiemɔi srɔtoi ni hiɛ shishinumɔi srɔtoi lɛ ashishi akɛ hɛl (hell), ni ehã mɛi ayiŋ efutu amɛ. Yɛ shihilɛi komɛi amli lɛ, etamɔ nɔ ni Biblia shishitsɔɔlɔi lɛ fee nakai koni mɛi ahe aye akɛ abaapiŋ efɔŋfeelɔi lɛ kɛya naanɔ, shi jeee ni abaakpãtã amɛhiɛ.

Sheol (Hebrew שְׁאוֹל), Hades (Greek ᾅδης)

Nɔ ni etsɔɔ: Gbonyobu.—Lala 16:10; Bɔfoi 2:31

Bɔ ni atsɔɔ shishi ahã: Gbonyobu, hɛl, bu (King James Version); gbohii ajeŋ (New International Version)
Gehena (Greek γέεννα)

Nɔ ni etsɔɔ: Naanɔ hiɛkpãtãmɔ.—Mateo 5:30

Bɔ ni atsɔɔ shishi ahã: Gehena; hɛl (King James Version, New International Version)
Tartaro (Greek ταρταρόω)

Nɔ ni etsɔɔ: Etsɔɔ bɔ ni aba mumɔi fɔji lɛ ni ji daimonioi lɛ ashi kwraa ahã.—2 Petro 2:4

Bɔ ni atsɔɔ shishi ahã: Tartaro; hɛl (King James Version, New International Version); hɛl shishigbɛ (Douay-Rheims Version)
Apoleia (Greek ἀπώλεια)

Nɔ ni etsɔɔ: Hiɛkpãtãmɔ.—Mateo 7:13

Bɔ ni atsɔɔ shishi ahã: Hiɛkpãtãmɔ; hɛl (Good News Bible)
Pyr (Greek πῦρ)

Nɔ ni etsɔɔ: La, shishitsɔɔmɔ ŋmiiŋmi loo mfonirifeemɔŋ gbɛ nɔ.—Luka 17:29; Yuda 23

Bɔ ni atsɔɔ shishi ahã: La; hɛl la (God’s Word Translation)

Bɔ ni fee ni aná hɛl la lɛ

Ejɛ wɔŋjamɔ mli: Blema Ejiptbii lɛ heɔ hɛl la amɛyeɔ. Wolo ni ji Book Ȧm-Ṭuat (Amduat), ni kɔɔ yarafeemɔ he, ni yinɔsane tsɔɔ akɛ aŋma aaafee afii 1500 afiiaŋ Ŋ.Ŋ.B. lɛ wie mɛi komɛi ahe akɛ, “abaashɛ amɛ afɔ̃ bui ni la tsoɔ yɛ mli lɛ amli; ni . . . amɛnyɛŋ amɛjo foi kɛjɛ la ni tsoɔ grigri lɛ mli.”—The Egyptian Heaven and Hell.

Mra beiaŋ Kristofoi lɛ etsɔɔɔ enɛ: “Nɔ ko ni sa kadimɔ ji akɛ, wɔnaaa nɔ ko yɛ Kpaŋmɔ Hee lɛ mli ni tsɔɔ akɛ, hɛl la fata nibii ni mra beiaŋ Kristofoi lɛ shiɛ lɛ ahe.”—A Dictionary of Christian Theology.

Greekbii ajeŋ nilee baná jamɔŋ hemɔkɛyelii anɔ hewalɛ: “Kɛjɛ klɛŋklɛŋ afii 100 afiiaŋ [Ŋ.B.] kɛbaa lɛ, Kristofoi komɛi ni ná tsɔsemɔ yɛ Greek jeŋ nilee mli lɛ kɛ nibii ni amɛkase lɛ bɔi amɛjamɔŋ hemɔkɛyeli lɛ futumɔ . . . Jeŋ nilee tsɔɔmɔi ni amɛnya he waa ji Plato tsɔɔmɔi lɛ.” (Encyclopædia Britannica) Nakai tsɔɔmɔi lɛ eko ji akɛ, kɛ́ mɔ ko gbo lɛ, sɛɛ mli lɛ apiŋɔ lɛ yɛ la mli. “Yɛ Greek jeŋ nilelɔi ni aheɔ amɛ ayeɔ waa lɛ ateŋ lɛ, mɔ ni tsɔɔmɔi ni kɔɔ Hɛl he ená mɛi anɔ hewalɛ waa fe fɛɛ ji Plato.”—Histoire des enfers (The History of Hell).

Akɛ hɛl la tsu nii akɛ naajiemɔ kɛfĩ mɛi ayiwaa sɛɛ: Yɛ bei ni atsɛ lɛ yɛ Blɔfo mli akɛ Spanish Inquisition lɛ amli lɛ, awie mɛi ni abu amɛ fɔ akɛ amɛtɔ̃ mla, hewɔ akɛ amɛ kpɛtɛ tsei ahe ni ashã amɛ lɛ ahe akɛ, “ahã amɛsa bɔ ni naanɔ piŋmɔi yɛ hɛl la mli lɛ baaji lɛ naa amɛkwɛ,” ekolɛ afee enɛ kɛ yiŋtoo lɛ akɛ, amɛbaatsake amɛtsui dani amɛgboi. (wolo ni ji The Spanish Inquisition, ni Jean Plaidy ŋma) Nakai nɔŋŋ ni Queen Mary I ni jɛ England lɛ hã akɛ Protɛstantbii aaafee 300 kpɛtɛ tsei ahe ni ashã amɛ, ni abɔ amaniɛ akɛ ehã afee nakai kɛsusumɔ lɛ akɛ “akɛni wɔsɛɛ lɛ abaashã jamɔŋ atuatselɔi yɛ hɛl la ni tsoɔ mli hewɔ lɛ, nɔ ni sa jogbaŋŋ ni esa akɛ afee jamɔŋ atuatselɔi bianɛ ji, ni ashã amɛ yɛ shikpɔŋ nɛɛ nɔ kɛkase bɔ ni Nyɔŋmɔ baafee amɛ wɔsɛɛ lɛ.”—Wolo ni ji Universal History, ni Alexander Tytler ŋma lɛ.

Tsakemɔi ni afee ŋmɛnɛ: Jamɔi komɛi egbɔjɔ amɛ-hɛl tsɔɔmɔi lɛ amli fioo, ekolɛ koni amɛkɛsa amɛjamɔŋbii lɛ ahiɛ moŋ fe ni amɛkɛkpoo apasa tsɔɔmɔ. (2 Timothy 4:3) “Mɛi miisumɔ Nyɔŋmɔ ni bɛ keketee, ni mli jɔ hu . . . Jeee tamɔ bɔ ni ŋmɛnɛ lɛ, mɛi wieɔ esha kɛ efɔŋfeemɔ he nyanyaanya, ni ehãa mɛi nuɔ fɔyeli he lɛ.”—Professor Jackson W. Carroll.