Ani Manyɛ Maná Saji Yɛ Biblia Lɛ Mli Ni Baashɛje Mimii?
Hetoo ni Biblia lɛ kɛhãa
Hɛɛ. (Romabii 15:4) Naa Biblia mli saji komɛi ni eshɛje mɛi ni kɛ shihilɛi ni jaraa miikpe loo amɛhao waa lɛ amii.
Nɔ ni wɔbaasusu he yɛ sane nɛɛ mli
Shihilɛ ni jaraa
Lala 23:4: “Kɛ́ minyiɛ jɔɔ voo ni mli ewo duŋ kpii mli po lɛ, misheee sane fɔŋ ko gbeyei, ejaakɛ okɛ mi yɛ.”
Nɔ ni etsɔɔ: Kɛ́ osɔle ohã Nyɔŋmɔ ni okɛ ohiɛ fɔ̃ e-Wiemɔ ni ji Biblia lɛ nɔ kɛhã gbɛtsɔɔmɔ lɛ, kɛ́ okɛ shihilɛ ni jaraa kpe lɛ, obaanyɛ odamɔ naa.
Filipibii 4:13: “Yɛ nɔ fɛɛ nɔ mli lɛ, mitsɔɔ mɔ ni wajeɔ mi lɛ nɔ mináa hewalɛ.”
Nɔ ni etsɔɔ: Nyɔŋmɔ baanyɛ ehã bo nyɛmɔ ni okɛkpee naagba fɛɛ naagba naa.
Kɛ́ mɔ ko ni wɔsumɔɔ lɛ lɛ gbo
Jajelɔ 9:10: “Atsuuu nɔ ko, ni akpɛɛɛ yiŋ ko, ni anáaa nilee ko loo hiɛshikamɔ ko yɛ Gbonyobu lɛ mli.”
Nɔ ni etsɔɔ: Mɛi ni egboi lɛ nuuu piŋmɔ ko he, ni amɛnyɛŋ amɛye wɔ awui hu. Amɛleee nɔ ko nɔ ko.
Bɔfoi 24:15: ‘Abaatee gbohii ashi.’
Nɔ ni etsɔɔ: Nyɔŋmɔ baanyɛ atee wɔsuɔlɔi ni egboi lɛ ashi.
Fɔyeli henumɔ ni naa wa
Lala 86:5: “Ejaakɛ bo Yehowa, ohi ni osumɔɔ waa akɛ okɛ esha ake; osuɔmɔ ni tsakeee lɛ fa babaoo hã mɛi fɛɛ ni boɔ tsɛɔ bo lɛ.”
Nɔ ni etsɔɔ: Nyɔŋmɔ kɛ mɛi ni eshwa amɛhe yɛ amɛtɔ̃mɔi ahe ni amɛkpɛ amɛyiŋ akɛ amɛtɔ̃ŋ nakai tɔ̃mɔ lɛ dɔŋŋ lɛ ahe keɔ amɛ.
Lala 103:12: “Bɔ ni hulushiteehe kɛ hulushinyɔɔhe teŋ jekɛ lɛ, nakai ehãa wɔ kɛ wɔtɔmɔi lɛ ateŋ jekɛɔ.”
Nɔ ni etsɔɔ: Kɛ́ Nyɔŋmɔ kɛ wɔhe eshai ke wɔ lɛ, ehãa wɔkɛ eshai ni wɔfee lɛ ateŋ jekɛɔ waa bɔ ni wɔjwɛŋmɔ nyɛɛɛ ashɛ he po. Ni edamɔɔɔ nakai eshai lɛ anɔ ekɛ wɔ aye loo egbala wɔtoi yɛ he.
Awerɛhoyeli
Lala 31:7: “Ona mimanehulu lɛ; ole nɔ ni haoɔ mi waa lɛ.”
Nɔ ni etsɔɔ: Nyɔŋmɔ le amanehului loo nibii fɛɛ ni hãa wɔyeɔ awerɛho lɛ. Ele bɔ ni wɔnuɔ he wɔhãa lɛ jogbaŋŋ—nɔ ni mɛi krokomɛi po enaaa.
Lala 34:18: “Yehowa yɛ mɛi ni tsui ekumɔ lɛ amasɛi; ehereɔ mɛi ni werɛ eho amɛhe lɛ.”
Nɔ ni etsɔɔ: Nyɔŋmɔ ewo shi akɛ kɛ́ wɔwerɛ ho wɔhe lɛ, ebaashɛje wɔmii. Ebaanyɛ ehã bo nyɛmɔ lɛ koni okɛkpee piŋmɔ naa.
Hela
Lala 41:3: “Yehowa baakwɛ lɛ yɛ ehela saa nɔ.”
Nɔ ni etsɔɔ: Nyɔŋmɔ baanyɛ ehã bo toiŋjɔlɛ kɛ nyɛmɔ koni onyɛ ofi shi kɛ́ hela ni naa wa ko miigba onaa, ni ebaanyɛ ehã bo hiɛshikamɔ ni okɛkpɛ yiŋ ni nilee yɔɔ mli.
Yesaia 33:24: “Mɛi ni yɔɔ mli lɛ ateŋ mɔ ko ekɛŋ akɛ: “Mibɛ hewalɛ.’”
Nɔ ni etsɔɔ: Nyɔŋmɔ ewo shi akɛ be baashɛ ni gbɔmɛi fɛɛ baaná gbɔmɔtsoŋ hewalɛ kpakpa.
Tsuiyeli
Lala 94:19: “Kɛ́ tsuiyelii hã mifee gbedee lɛ, oshɛjeɔ mimii ni ohãa mimii shɛɔ mihe.”
Nɔ ni etsɔɔ: Kɛ́ wɔhao loo wɔtsui miiye yɛ nɔ ko he, ni wɔsɔle wɔbi Nyɔŋmɔ kɛhã yelikɛbuamɔ lɛ, ebaashɛje wɔmii.
1 Petro 5:7: ‘Shɛrɛmɔ nibii ni hãa oyeɔ otsui lɛ fɛɛ oshwie enɔ, ejaakɛ ejwɛŋɔ ohe.’
Nɔ ni etsɔɔ: Nyɔŋmɔ le wɔnɔnai lɛ fɛɛ. Efɔ̃ɔ wɔ nine koni wɔkɛ lɛ awie wɔnaagbai lɛ ahe.
Tawuu
Lala 46:9: “Ebaafo tai asɛɛ yɛ shikpɔŋ lɛ nɔ fɛɛ.”
Nɔ ni etsɔɔ: Etsɛŋ, Nyɔŋmɔ Maŋtsɛyeli lɛ baafo tai fɛɛ asɛɛ.
Lala 37:11, 29: “Mɛi ni he jɔ lɛ, shikpɔŋ lɛ baatsɔ amɛnɔ, ni amɛmii baashɛ amɛhe waa yɛ toiŋjɔlɛ babaoo mli. . . . Jalɔi lɛ, shikpɔŋ lɛ baatsɔ amɛnɔ, ni amɛbaahi nɔ kɛya naanɔ.”
Nɔ ni etsɔɔ: Gbɔmɛi kpakpai lɛ baaná toiŋjɔlɛ yɛ shikpɔŋ lɛ nɔ kɛya naanɔ.
Kɛ́ wɔhao yɛ wɔsɛɛ he
Yeremia 29:11: “‘Ejaakɛ mi lɛ, mile jwɛŋmɔi ni mijwɛŋɔ yɛ nyɛhe lɛ jogbaŋŋ,’ Yehowa kɛɛ, ‘toiŋjɔlɛ jwɛŋmɔi ni, shi jeee sane fɔŋ, koni ahi ahã nyɛ wɔsɛɛ ni nyɛná hiɛnɔkamɔ.’”
Nɔ ni etsɔɔ: Nyɔŋmɔ ewo ewebii lɛ shi akɛ amɛbaanyɛ amɛná shihilɛ ni yɔɔ miishɛɛ wɔsɛɛ.
Kpojiemɔ 21:4: “Ebaatsumɔ amɛhiŋmɛiiaŋ yaafonui fɛɛ, ni gbele bɛ dɔŋŋ, ni awerɛhoyeli loo yaafo loo piŋmɔ ko hu bɛ dɔŋŋ. Tsutsu nibii lɛ eho etee.”
Nɔ ni etsɔɔ: Nyɔŋmɔ ewo shi akɛ, ebajie nibii gbohii fɛɛ ni onaa ŋmɛnɛ kɛ shihilɛi gbohii fɛɛ ni otsɔɔ mli lɛ kɛje shihilɛ mli.
Yehowa ji Nyɔŋmɔ gbɛ́i diɛŋtsɛ. (Lala 83:18) Kanemɔ sane ni ji “Namɔ Ji Yehowa?”