Mɛni Hewɔ Wɔyɔɔ Shihilɛ Mli?

Hetoo ni Biblia lɛ kɛhãa

Abaanyɛ abi nɔ hewɔ ni wɔyɔɔ shihilɛ mli lɛ he sane yɛ gbɛi srɔtoi anɔ, eko ji Mɛni hewɔ wɔyɔɔ biɛ? aloo Ani yiŋtoo ko hewɔ abɔ mi? Biblia lɛ hãa wɔleɔ akɛ, yiŋtoo hewɔ ni abɔ wɔ ji ní wɔkɛ Nyɔŋmɔ abɔ naanyo. Susumɔ enɛ he anɔkwalei komɛi ni he hiaa waa ni Biblia lɛ jieɔ lɛ kpo lɛ ahe okwɛ.

• Nyɔŋmɔ ji wɔ-Bɔlɔ. Biblia lɛ kɛɔ akɛ: “Lɛ [Nyɔŋmɔ] efee wɔ, ni lɛ enii ji wɔ.”—Lala 100:3; Kpojiemɔ 4:11.

• Nyɔŋmɔ yɛ yiŋtoo kɛhã nibii fɛɛ ni ebɔ, ni wɔ hu wɔfata he lɛ.—Yesaia 45:18.

• Nyɔŋmɔ bɔ wɔ koni wɔkɛ lɛ aná wekukpãa, ni nɔ ni fata he ji shwelɛ akɛ wɔbaale yiŋtoo hewɔ ni wɔyɔɔ shihilɛ mli. (Mateo 5:3) Eesumɔ ni wɔnine ashɛ nɔ ni wɔshweɔ nɛɛ nɔ.—Lala 145:16.

• Kɛ́ wɔfee nibii ni hã wɔkɛ lɛ bɔ naanyo lɛ, wekukpãa bakãa wɔkɛ lɛ teŋ. Eyɛ mli akɛ mɛi komɛi nuɔ he akɛ anyɛŋ akɛ Nyɔŋmɔ abɔ naanyo moŋ, shi Biblia lɛ woɔ wɔ hewalɛ akɛ: “Nyɛtsia nyɛbɛŋkɛa Nyɔŋmɔ, ni eeetsi ebɛŋkɛ nyɛ.”—Yakobo 4:8; 2:23.

• Dani wɔbaanyɛ wɔtsɔmɔ Nyɔŋmɔ nanemɛi lɛ, esa akɛ wɔhã wɔshihilɛ kɛ yiŋtoo hewɔ ni ebɔ wɔ lɛ akpã gbee. Biblia lɛ tsɔɔ yiŋtoo hewɔ ni ebɔ wɔ lɛ yɛ Jajelɔ 12:13 lɛ akɛ: “Okɛ bulɛ kpele ahã Nyɔŋmɔ, ni oye ekitãi lɛ anɔ, ejaakɛ enɛ nɔŋŋ abɔ wɔ ni wɔfee.”—Good News Translation.

• Wɔsɛɛ, be ni Nyɔŋmɔ ejie nɔnai fɛɛ kɛjɛ shihilɛ mli, ni ekɛ naanɔ wala duroɔ enanemɛi, ni ji mɛi ni jáa lɛ lɛ, wɔbaaná Nyɔŋmɔ shishijee yiŋtoo hewɔ ni ebɔ wɔ lɛ he sɛɛ kɛmɔ shi.—Lala 37:10, 11.