Ani Biblia Lɛ Baanyɛ Awa Mi Ni Maná Weku Ni Miishɛɛ Yɔɔ Mli?

Hetoo ni Biblia lɛ kɛhãa

Hɛɛ. Naa ŋaawoi kpakpai komɛi ni damɔ Biblia lɛ nɔ, ni eye ebua hii kɛ yei akpekpei abɔ ni amɛná wekui ni miishɛɛ yɔɔ mli:

1. Botemɔ gbalashihilɛ mli yɛ gbɛ ni maŋ lɛ mla kpɛlɛɔ nɔ lɛ nɔ. Ja nuu kɛ yoo ebote gbalashihilɛ mli yɛ gbɛ ni maŋ lɛ mla kpɛlɛɔ nɔ lɛ nɔ dani amɛbaanyɛ amɛná miishɛɛ yɛ amɛweku lɛ mli.​—Mateo 19:4-6.

2. Jiemɔ suɔmɔ kɛ bulɛ kpo. Enɛ biɔ ni okɛ ohefatalɔ lɛ aye yɛ gbɛ ni obaasumɔ ni akɛbo aye lɛ nɔ.​—Mateo 7:12; Efesobii 5:25, 33.

3. Kaawie dɔlɛ loo jɛmɔ wiemɔi. Kɛ́ ohefatalɔ lɛ wie nɔ ko loo efee nɔ ko ni edɔ po lɛ, okɛ lɛ awie yɛ mlihilɛ naa. (Efesobii 4:31, 32) Biblia lɛ kɛɔ yɛ Abɛi 15:1 lɛ akɛ: “Naajɔlɛ hetoo lɛ, ekuɔ mlila naa, shi wiemɔ ni dɔɔ mɔ lɛ, eteɔ mlifu shi.”

4. Nyɛyea nyɛhe anɔkwa. Okɛ ohefatalɔ lɛ pɛ ashwɛ suɔmɔ shwɛmɔi, ni yɛ ohefatalɔ lɛ sɛɛ lɛ, kaafee nɔ ko ni baatee mɔ ko bɔlɛnamɔ akɔnɔ shi. (Mateo 5:28) Biblia lɛ kɛɛ: “Awo gbalashihilɛ hiɛ nyam yɛ mɛi fɛɛ ateŋ, ni akabule gbalashihilɛ saa lɛ.”​—Hebribii 13:4.

5. Okɛ suɔmɔ atsɔse obii lɛ. Kaaŋmɛ nɔ fɛɛ nɔ feemɔ gbɛ kɛkɛ, ni oyitsoŋ hu akawa yɛ obii lɛ anɔ.​—Abɛi 29:15; Kolosebii 3:21.