Mɛni Biblia Lɛ Kɛɔ Yɛ Blonya He?
Hetoo ni Biblia lɛ kɛhãa
Biblia lɛ etsɔɔɔ gbi nɔ ni afɔ Yesu, asaŋ ekɛɛɛ akɛ aye Yesu fɔmɔgbi. Wolo ni ji McClintock and Strong’s Cyclopedia lɛ kɛɛ akɛ: “Jeee Nyɔŋmɔ ji mɔ ni to Blonyayeli shishi, asaŋ ebɛ Kpaŋmɔ Hee lɛ mli.”
Moŋ lɛ, niiamlitaomɔi ni afee yɛ Blonya he lɛ maa nɔ mi akɛ eshishifã jɛ wɔŋjamɔ kusumii amli. Biblia lɛ tsɔɔ akɛ kɛ́ wɔka akɛ wɔbaatsɔ gbɛ ni Nyɔŋmɔ ekpɛlɛɛɛ nɔ lɛ nɔ wɔjá lɛ lɛ, wɔwoɔ emli la moŋ.—2 Mose 32:5-7.
He ni Blonya kusumii lɛ jɛ
Yesu fɔmɔgbiyeli: “Mra beiaŋ Kristofoi lɛ yeee Yesu fɔmɔ gbi, ejaakɛ amɛbuɔ mɔ ko fɔmɔgbi ni ayeɔ lɛ akɛ eji wɔŋjamɔ nifeemɔ.”—The World Book Encyclopedia.
December 25: Odaseyeli ko bɛ ni tsɔɔ akɛ afɔ Yesu yɛ gbi nɛɛ nɔ. Eeenyɛ efee akɛ Sɔlemɔ hiɛnyiɛlɔi hala gbi nɛɛ koni ekɛ wɔŋjamɔ gbii juji ni ayeɔ yɛ fɛ̃i be mli lɛ akpã gbee.
Nikee, yeli kɛ numɔ: Wolo ni ji The Encyclopedia Americana kɛɛ akɛ: “Nibii ni afeɔ kɛjieɔ hiɛtserɛ yɛ Blonya mli lɛ ateŋ pii ná amɛshishifã kɛjɛ Romabii agbi jurɔ ko ni amɛyeɔ yɛ December teŋgbɛ, ni atsɛɔ lɛ Saturnalia lɛ mli. Akɛ nɔkwɛmɔnɔ lɛ, gbijurɔyeli nɛɛ mli ajɛ aná Blonya okpɔlɔŋmɛɛ wuji, nikee, kɛ kɛnɛrɛi ni asuɔ lɛ yɛ.” Wolo ni ji The Encyclopædia Britannica lɛ tsɔɔ akɛ, “kɛ́ aaye Saturnalia lɛ, mɔ ko mɔ ko eyaaa nitsumɔ.”
Blonya kanei: Wolo ni ji The Encyclopedia of Religion lɛ tsɔɔ akɛ, Yuropabii kɛ “kanei, kɛ tsei loo nibii ni hiɛ baaŋmɔ su srɔtoi” saa amɛshĩai kɛyeɔ gbi jurɔ ko yɛ fɛ̃i be mli, loo ni amɛkɛshwie mumɔi fɔji.
Mistletoe, holly: Mɛi kɛ tsei nɛɛ saa amɛshĩai yɛ Blonya bei amli. “Jamɔŋ osɔfoi komɛi heɔ amɛyeɔ akɛ tso ni ji Mistletoe lɛ yɛ hewalɛ srɔto ko. Mɛi jáa tso ni ji holly lɛ kɛtsɔɔ akɛ amɛyɛ hiɛnɔkamɔ akɛ ebaahã hulu lɛ aku sɛɛ aba ekoŋŋ.”—The Encyclopedia Americana.
Blonya tso (Christmas tree): “Yuropabii wɔŋjalɔi babaoo jáa tsei, ni be ni amɛba Kristojamɔ mli lɛ, amɛkpaaa tsei ajamɔ.” Gbɛ kome ni atee nɔ ajá tsei ji akɛ, “akɛ tso ko ni atsɛɔ lɛ Yule lɛ maa shinaa naa loo akɛmaa shĩa mli yɛ fɛ̃i be gbii juji amli.”—Encyclopædia Britannica.