Mɛni Biblia Lɛ Kɛɔ Yɛ Easter He?

Hetoo ni Biblia lɛ kɛhãa

Easter gbijurɔyeli lɛ damɔɔɔ Biblia lɛ nɔ. Kɛ́ opɛi yinɔsane mli jogbaŋŋ lɛ, obaana nɔ tuuntu ni Easter ji—eji gbi jurɔ ni damɔ blema wɔŋjamɔ kusumii anɔ. Susumɔ saji ni nyiɛ sɛɛ nɛɛ ahe okwɛ.

Gbɛ́i: Encyclopædia Britannica lɛ kɛɛ akɛ: “Aleee he ni aná gbɛ́i Easter lɛ kɛjɛ; Anglo-Saxon osɔfo, ni atsɛɔ lɛ Venerable Bede, ni hi shi yɛ afi 700 Ŋ.B. afii lɛ amli lɛ, ná gbɛ́i lɛ kɛjɛ Anglo-Saxon nyɔŋmɔyoo Eostre gbɛ́i lɛ mli.” Woji krokomɛi hu tsɔɔ akɛ aná gbɛ́i Easter lɛ kɛjɛ Astarte, ni eji Foenike nyɔŋmɔyoo kɛ ehefatalɔ Ishtar, ni eji Babilonia nyɔŋmɔ lɛ gbɛ́i mli.
Kpɛŋkpɛlɛ, adanko: Amɛ damɔ shi kɛhã fɔmɔ he okadii ní “aná kɛjɛ blema Yuropabii kɛ Middle East wɔŋjamɔ nifeemɔi amli.”—Encyclopædia Britannica.
Wuɔwɔji: Taakɛ wolo ko (Funk & Wagnalls Standard Dictionary of Folklore, Mythology and Legend) tsɔɔ lɛ, Easter wuɔwɔji ni asusuɔ akɛ Easter adanko lɛ yataoɔ kɛbaa lɛ “jeee shwɛmɔ nii ko kɛkɛ, moŋ lɛ eji kusum ni afeɔ ahãa fɔmɔ nyɔŋmɔyoo ko.” Yɛ maji komɛi anɔ lɛ, asusuɔ akɛ Easter wuɔwɔji ni apɛnte he lɛ “baanyɛ ekɛ miishɛɛ, shweremɔ, hewalɛ, kɛ hebuu ahã yɛ naakpɛɛ gbɛ nɔ.”—Traditional Festivals.
Easter atade hee: “Esa akɛ awo atade hee kɛyaŋa Scandinavian nyɔŋmɔyoo, loo Eastre lɛ, kɛ́ afeee nakai lɛ abuɔ lɛ akɛ etsɔɔɔ bulɛ, ni ekɛ shade fɔŋ baa.”—The Giant Book of Superstitions.
Hulushitee jamɔ: Eji kusum ni blemabii ni já hulu lɛ “feɔ kɛkpeɔ hulu lɛ yɛ nyɛmɔ kpele ni eyɔɔ ni ehãa kwɛ̃ɛnii fɛɛ wala lɛ hewɔ.”—Celebrations—The Complete Book of American Holidays.

Wolo ko (The American Book of Days) tsɔɔ he ni Easter jɛ kɛba lɛ mli jogbaŋŋ akɛ: “Ŋwanejee ko bɛ he akɛ mra be mli ni Sɔlemɔ lɛ ŋɔ blema wɔŋjamɔ kusumii lɛ kɛbawo Kristojamɔ mli.”

Biblia lɛ bɔɔ kɔkɔ yɛ kusumii ni Nyɔŋmɔ ekpɛlɛɛɛ nɔ ni akɛtsuɔ nii ejamɔ mli lɛ he. (Marko 7:6-8) Korintobii Awolo ni Ji Enyɔ 6:17 kɛɛ akɛ: “‘Nyɛjea amɛteŋ, ni nyɛtsea nyɛhe,’ Yehowa kɛɛ, ‘ni nyɛkpaa nɔ ni he tseee lɛ hetaa.’” Easter ji wɔŋjamɔ gbi jurɔ, ni esa akɛ mɛi ni sumɔɔ akɛ amɛsa Nyɔŋmɔ hiɛ lɛ akpoo.