Nibii Ni Obaanyɛ Ofee Koni Oná Miishɛɛ Yɛ Jaramɔ Beiaŋ​—⁠Mɛni Biblia Lɛ Kɛɔ Yɛ He?

Yɛ jaramɔ bei nɛɛ amli lɛ, jeee shihilɛi fɛɛ ni baa wɔnɔ lɛ wɔbaanyɛ wɔkudɔ. Kɛ̃lɛ, bei pii lɛ, kɛ́ wɔbaaná miishɛɛ loo wɔnáaa miishɛɛ lɛ, edamɔɔ bɔ ni wɔfeɔ wɔnii wɔhãa lɛ nɔ moŋ fe shihilɛ mli ni wɔyɔɔ lɛ. Biblia lɛ kɛɛ, ekɔɔɔ he eko naagbai ni amɛkɛkpeɔ lɛ, “mɛi ni yɔɔ miishɛɛ lɛ, amɛyeɔ gbi jurɔ daa.” (Abɛi 15:15, Good News Translation) Mɛni wɔbaanyɛ wɔfee koni miishɛɛ ni wɔyɔɔ lɛ aya hiɛ? Hã wɔkwɛ bɔ ni ŋaawoo ni Biblia lɛ kɛhãa lɛ baanyɛ aye abua bo.

Feemɔ nibii ni hãŋ oye otsui fe nine

Biblia lɛ kɛɛ: “Gbɔmɔ tsui mli ŋkɔmɔyeli hãa ehaoɔ, shi wiemɔ kpakpa hãa enáa miishɛɛ.”​—Abɛi 12:25.

• Biblia lɛ baanyɛ eye ebua bo ni okaye otsui fe nine. Kɛ́ ootao ole bɔ ni Biblia baanyɛ eye abua bo lɛ, kanemɔ sane ni ji, “What the Bible Says About Anxiety” lɛ.

Kaahã ohe fee shoo tsɔ

Biblia lɛ kɛɛ: “Naanyo kpakpa sumɔɔ mɔ yɛ bei fɛɛ mli, ni ebatsɔɔ nyɛmi yɛ haomɔ beiaŋ.”​—Abɛi 17:17.

• Ŋaawoi yɛ Biblia lɛ mli ni baanyɛ aye abua bo ni ohe akafee shoo tsɔ. Kanemɔ sane ni ji, “Okɛ Naanyobɔɔ Aye Shoofeemɔ Nɔ—Bɔ Ni Biblia Lɛ Baanyɛ Aye Abua Bo” lɛ.

Ná suɔmɔ ohã Nyɔŋmɔ kɛ onyɛmi gbɔmɔ

Biblia lɛ kɛɛ: “Suɔmɔ Yehowa, o-Nyɔŋmɔ lɛ, kɛ otsui muu fɛɛ kɛ osusuma muu fɛɛ kɛ ojwɛŋmɔ muu fɛɛ. . . . Suɔmɔ onyɛmi gbɔmɔ tamɔ bo diɛŋtsɛ ohe.”a​—Mateo 22:37-39.

• Sɔlemɔ baanyɛ eye ebua bo ni osumɔ Nyɔŋmɔ waa. Kɛ́ ootao ni ole enɛ he saji krokomɛi lɛ, kanemɔ sane ni ji, “Ani Nyɔŋmɔ Boɔ Wɔsɔlemɔi Toi?” lɛ.

• Kɛ́ wɔkɛ mɛi ye bɔ ni Yesu kɛɛ wɔkɛ amɛ aye lɛ, belɛ wɔmiijie suɔmɔ kpo wɔmiitsɔɔ amɛ ji no. Kɛ́ ootao ni ole enɛ he saji krokomɛi lɛ, kanemɔ sane ni ji, “What Is the Golden Rule?” lɛ.

Ekolɛ, obaasumɔ ni ole bɔ ni Biblia lɛ baanyɛ eye ebua bo ni oná miishɛɛ yɛ jaramɔ beiaŋ lɛ he saji krokomɛi. Kɛ́ nakai lɛ, wɔmiibi ni oka Biblia nikasemɔ ni wɔkɛ mɛi feɔ tamɔ sanegbaa ni wɔheee nɔ ko lɛ okwɛ.