Ani Nɔyeli Ko Yɛ Ni Be Hoŋ Kɔkɔɔkɔ Ni Baanyɛ Aye Wɔshikpɔŋ Lɛ Nɔ Jogbaŋŋ?​—Mɛni Biblia Lɛ Kɛɔ Yɛ He?

Maŋ nɔyelii ni yɔɔ je lɛŋ hei srɔtoi lɛ kɛ naagbai babaoo miikpe. Yɛ maji ni etamɔ nɔ ni nibii miiya nɔ jogbaŋŋ lɛ po amli lɛ, maŋkwralɔi ahe amaniɛbɔi ni yɔɔ hiɛgbele, oshikifɔ̃i ni mɔ ni ye kunim lɛ kɛ yibɔ fioo kɛkɛ ye, loo anaaa mɔ tuuntu ni ye kunim, maŋkwramɔŋ kui ni kɛ amɛhe kpãaa gbee, kɛ maŋbii ni kɛ basabasafeemɔ teɔ shi amɛwoɔ nɔyeli lɛ hãaa toiŋjɔlɛ ahi maŋ lɛ mli.

Biblia lɛ hãa wɔleɔ akɛ, nɔyeli kome ko yɛ ni be hoŋ kɔkɔɔkɔ. Ekolɛ, onu nɛkɛ nɔyeli nɛɛ he sane. No ji nɔ ni Yesu Kristo tsĩ tã yɛ sɔlemɔ he nɔkwɛmɔnɔ lɛ mli lɛ.

• “No hewɔ lɛ, nyɛsɔlea yɛ nɛkɛ gbɛ nɔ: ‘Wɔ-Tsɛ ni yɔɔ ŋwɛi, ogbɛ́i lɛ he atse. O-Maŋtsɛyeli lɛ aba. Afee nɔ ni osumɔɔ yɛ shikpɔŋ lɛ nɔ, tamɔ bɔ ni afeɔ yɛ ŋwɛi lɛ.’”​—Mateo 6:9, 10.

Mɛni Biblia lɛ kɛɔ yɛ nakai Maŋtsɛyeli lɛ he?

Maŋtsɛyeli Lɛ​—⁠nɔyeli ko ni be hoŋ kɔkɔɔkɔ

Maŋtsɛyeli lɛ yeɔ nɔ kɛjɛɔ ŋwɛi.

• Yesu tsɛ nakai nɔyeli lɛ akɛ “ŋwɛi maŋtsɛyeli lɛ.” (Mateo 4:17; 5:3, 10, 19, 20) No hewɔ ni ewie akɛ: “Mi-Maŋtsɛyeli lɛ jɛɛɛ je nɛɛ mli” lɛ.​—Yohane 18:36.

Maŋtsɛyeli lɛ baaye adesai anɔyelii anajiaŋ.

• Biblia lɛ kɛɛ: ‘Maŋtsɛyeli nɛɛ baajwara [adesai] amaŋtsɛyelii nɛɛ fɛɛ ni ebaakpãtã amɛhiɛ, ni lɛ pɛ ebaadamɔ shi kɛya naanɔ.’​—Daniel 2:44.

Anyɛŋ akpãtã Maŋtsɛyeli lɛ, ni Yesu Kristo ji enɔ maŋtsɛ lɛ, hiɛ kɔkɔɔkɔ.

• Biblia lɛ kɛɛ: “Enɔyeli lɛ, naanɔ nɔyeli ni hoŋ eyaŋ ni, ni akpãtãŋ emaŋtsɛyeli lɛ hiɛ.”​—Daniel 7:13, 14.

Maŋtsɛyeli lɛ baahã toiŋjɔlɛ kɛ shweshweeshwe shihilɛ aba shikpɔŋ lɛ nɔ.

• Biblia lɛ kɛɛ: “Mɔ fɛɛ mɔ baahi shi yɛ toiŋjɔlɛ mli yɛ lɛ diɛŋtsɛ eweintso kɛ egbamitso shishi, ni mɔ ko mɔ ko woŋ amɛhe gbeyei.”​—Mika 4:4, Good News Translation.

Kasemɔ Maŋtsɛyeli lɛ he nii saji krokomɛi

Be ni Yesu yɔɔ shikpɔŋ lɛ nɔ lɛ, ekɛ ebe fɛɛ ‘shiɛ Maŋtsɛyeli lɛ he sane kpakpa lɛ.’ (Mateo 9:35) Etsɔ hiɛ egba hu akɛ:

• “Abaashiɛ Maŋtsɛyeli lɛ he sane kpakpa nɛɛ yɛ shikpɔŋ lɛ nɔ fɛɛ koni akɛye jeŋmaji lɛ fɛɛ odase, ni no sɛɛ lɛ naagbee lɛ baaba.”​—Mateo 24:14.

Ŋmɛnɛ lɛ, aashiɛ Maŋtsɛyeli lɛ he sane kpakpa nɛɛ yɛ shikpɔji ni fa fe 240 anɔ. Ofainɛ, kasemɔ nɔyeli nɛɛ he saji krokomɛi kɛ nibii ni esa akɛ ofee koni oná enɔyeli lɛ he sɛɛ.

Ofainɛ kwɛmɔ vidio ni ji Mɛni Ji Nyɔŋmɔ Maŋtsɛyeli Lɛ?