Ani Be Ko Baaba Ni Mɔ Fɛɛ Mɔ Baaná Ehiamɔ Nii?

Yɛ maji pii anɔ lɛ, maŋbii lɛ ekomɛi tseɔ atua yɛ gbɛjegbɛi lɛ ahe, ejaakɛ amɛnuɔ he akɛ maŋ shika he gbɛjianɔtoo lɛ eŋmɛɛɛ pɛpɛɛpɛ loo ehã aashishiu amɛ. Naagbai nɛɛ amli bawo wu be ni COVID-19 hela lɛ je shishi lɛ, ejaakɛ lockdown lɛ, niyenii ni anáaa, kɛ bɔ ni mɛi náaa helatsamɔ kpakpa ko lɛ hã ana gbɛ agbo ni kã shikatsɛmɛi kɛ ohiafoi ateŋ lɛ faŋŋ.

Ani shika he naagba ni hãa mɛi pii haoɔ yɛ je lɛ mli lɛ baaba naagbee gbi ko? Hɛɛ. Biblia lɛ tsɔɔ nɔ ni Nyɔŋmɔ baafee kɛtsu naagbai ni wɔkɛkpeɔ lɛ ahe nii.

Adesai Ahiamɔ Nii Ni Nyɔŋmɔ Baatsu He Nii

Naagba: Adesai anɔyelii etoko shika saji ahe gbɛjianɔ jogbaŋŋ bɔ ni mɛi fɛɛ baaná he sɛɛ.

Nɔ ni abaatsu yɛ he: Nyɔŋmɔ kɛ lɛ diɛŋtsɛ enɔyeli ni atsɛɔ lɛ Nyɔŋmɔ Maŋtsɛyeli lɛ baaye adesai anɔyelii lɛ anajiaŋ. Ebaajɛ ŋwɛi eye shikpɔŋ muu lɛ fɛɛ nɔ.—Daniel 2:44; Mateo 6:10.

Nɔ ni baajɛ mli aba: Akɛni Nyɔŋmɔ Maŋtsɛyeli lɛ baaye shikpɔŋ muu lɛ fɛɛ nɔ hewɔ lɛ, ebaatsu adesai anaagbai lɛ fɛɛ ahe nii jogbaŋŋ. Mɛi yeŋ ohia dɔŋŋ loo amɛnuŋ he akɛ amɛnáŋ niyenii bɔ ni sa amɛye. (Lala 9:7-9, 18) Moŋ lɛ, amɛbaaye amɛnine naa nitsumɔ mli ŋɔɔmɔ, ni amɛ kɛ amɛwekui baaná shihilɛi ni hãa mɔ tsui nyɔɔ emli. Biblia lɛ ewo shi akɛ: “Amɛbaamamɔ tsũi ni amɛbaahi mli, ni amɛbaafee wain ŋmɔji ni amɛbaaye amɛmli yibii lɛ. Amɛmamɔŋ tsũi ni mɔ kroko ahi mli, ni amɛduŋ nii hu ni mɔ kroko aye.”—Yesaia 65:21, 22.

Naagba: Mɛi nyɛɛɛ ajo shihilɛi ni kɛ piŋmɔi baa kɛ nibii ni hãa amɛhe fĩɔ amɛ yɛ shihilɛ mli lɛ anaa foi.

Nɔ ni abaatsu yɛ he: Nyɔŋmɔ baatsɔ e-Maŋtsɛyeli lɛ nɔ ejie nibii ni hãa mɛi sheɔ gbeyei kɛ nibii ni hãaa mɛi anu he akɛ amɛyɛ shweshweeshwe lɛ kɛje shihilɛ mli.

Nɔ ni baajɛ mli aba: Akɛni Nyɔŋmɔ baakwɛ adesai anɔ hewɔ lɛ, ebaajie shihilɛi ni hãaa mɛi loo amɛwekui aná amɛhiamɔ nii kɛje shihilɛ mli. Akɛ nɔkwɛmɔnɔ lɛ, tai, niyenii ni anáaa, kɛ tsɛŋemɔ helai baafee tsutsu nibii ni eho etee. (Lala 46:9; 72:16; Yesaia 33:24) Nyɔŋmɔ kɛɛ akɛ: “Mimaŋ lɛ baahi he ko ni toiŋjɔlɛ babaoo yɔɔ, shihilɛhei ni oshãra ko bɛ jɛmɛ kɛ hei ni ajɔɔ he yɛ ni hãa mɛi atsui nyɔɔ amɛmli.”—Yesaia 32:18.

Naagba: Adesai ni foɔ amɛ pɛ amɛnɔ mli ni hiɛ kɔ̃ɔ nii anɔ lɛ shishiuɔ mɛi.

Nɔ ni abaatsu yɛ he: Mɛi ni baahi Nyɔŋmɔ Maŋtsɛyeli lɛ shishi lɛ baakase bɔ ni amɛkɛ amɛnifeemɔi baatsɔɔ akɛ, amɛsumɔɔ mɛi krokomɛi fe bɔ ni amɛsumɔɔ amɛ diɛŋtsɛ amɛhe.—Mateo 22:37-39.

Nɔ ni baajɛ mli aba: Yɛ Nyɔŋmɔ Maŋtsɛyeli lɛ shishi lɛ, mɔ fɛɛ mɔ baajie suɔmɔ ni “epeleee ehãaa lɛ pɛ ehe” lɛ kpo. (1 Korintobii 13:4, 5) Biblia lɛ kɛɛ: “Amɛyeŋ awui ko ni amɛfiteŋ nɔ ko yɛ migɔŋ krɔŋkrɔŋ lɛ nɔ fɛɛ, ejaakɛ bɔ fɛɛ bɔ ni fee lɛ, Yehowaa he nilee baayi shikpɔŋ lɛ nɔ obɔ tamɔ bɔ ni nui eha ŋshɔ lɛ nɔ lɛ.”—Yesaia 11:9.

Biblia lɛ tsɔɔ akɛ, wɔyɛ shihilɛ gbɛjianɔtoo nɛɛ naagbee gbii lɛ amli, ni etsɛŋ Nyɔŋmɔ baaye shi ni ewo akɛ ebaafo ohia loo shika he naagbai fɛɛ ni adesai kɛkpeɔ lɛ asɛɛ lɛ nɔ.b (Lala 12:5) Shi dani nakai be lɛ baaba lɛ, amrɔ nɛɛ po lɛ, Biblia mli shishitoo mlai baanyɛ aye abua bo ni okpee shika he naagbai ni okɛkpeɔ bianɛ lɛ anaa. Akɛ nɔkwɛmɔnɔ lɛ, kwɛmɔ saji ni ji “How to Live on Less” kɛ “A Balanced View of Money” lɛ.

Susumɔ ni ejaaa ni ahiɛ yɛ Biblia lɛ kɛ shika he gbɛjianɔtoo he

Susumɔ ni ejaaa: Ohia sɛɛ efoŋ, ejaakɛ Yesu wie akɛ: “Ohiafoi lɛ nyɛkɛ amɛ yɛ daa.”—Mateo 26:11.

Anɔkwa sane: Yesu wie anɔkwa sane ni ji akɛ: Bei abɔ ni wɔyɔɔ jeŋ fɔŋ nɛɛ mli lɛ, mɛi komɛi baaye ohia kɛ̃. Kɛ̃lɛ, sane ni Yesu shiɛ lɛ bafee ‘sane kpakpa kɛhã ohiafoi lɛ,’ ejaakɛ ohia ni Nyɔŋmɔ Maŋtsɛyeli lɛ baafo sɛɛ kɛya naanɔ fata sane ni eshiɛ lɛ he.—Luka 4:18, 43.

Susumɔ ni ejaaa: Kɛ́ mɔ ko miitao esa Nyɔŋmɔ hiɛ lɛ esa akɛ etsɔ ohiafo, ejaakɛ Yesu kɛɛ nuu ko akɛ: “Yaahɔ̃ɔ onibii ni okɛhã ohiafoi.”—Mateo 19:21.

Anɔkwa sane: Yesu kɛ nɔ ni ewie nɛɛ etsɔɔɔ akɛ eewo mla akɛ esɛɛnyiɛlɔi ahi shi nakai. No mli lɛ, ekɛ gbɛtsɔɔmɔ pɔtɛɛ ko miihã oblanyo ko ni heloonaa nibii ehe ejwɛŋmɔ fɛɛ. Yesu wo oblanyo lɛ hewalɛ ni ehã eshihilɛ afee mlɛo ni enyɛ ebatsɔ Yesu sɛɛnyiɛlɔ.

Susumɔ ni ejaaa: Kɛ́ mɔ ko yɛ heloonaa nibii pii lɛ, etsɔɔ akɛ Yehowa ejɔɔ lɛ, ejaakɛ Biblia lɛ kɛɛ: “Yehowa jɔɔmɔ lɛ, no feɔ mɔ niiatsɛ.”—Abɛi 10:22.

Anɔkwa sane: Kɛ́ Biblia lɛ miiwie “Yehowa jɔɔmɔ” he lɛ, bei pii lɛ ekɔɔ mumɔŋ nibii ahe titri, tamɔ shihilɛ ni hãa mɔ tsui nyɔɔ emli yɛ Nyɔŋmɔ sɔɔmɔ mli, Nyɔŋmɔ ni akɛbɔɔ naanyo kpaakpa, kɛ hiɛnɔkamɔ kpakpa kɛhã wɔsɛɛ nɛkɛ. (Lala 25:14; Yohane 17:3) Eyɛ mli akɛ Nyɔŋmɔ jɔɔ etsuji komɛi ni amɛná heloonaa nibii moŋ, kɛ̃lɛ, mɛi ni batsɔmɔ Kristofoi lɛ ateŋ mɛi babaoo jeee niiatsɛmɛi. (1 Mose 24:34, 35; Yakobo 2:5) Yesu Kristo po náaa heloonaa nibii babaoo.—Mateo 8:20.

Susumɔ ni ejaaa: Biblia lɛ tsɔɔ akɛ esa akɛ adesai kɛ amɛheloonaa nibii ahãhãa koni amɛ fɛɛ amɛye hegbɔ, ejaakɛ ewie yɛ klɛŋklɛŋ afii oha lɛ mli Kristofoi lɛ ahe akɛ: “Amɛfee amɛnibii ni amɛyɔɔ lɛ fɛɛ ekome, ni amɛhɔ̃ɔhɔ̃ɔ amɛshikpɔji kɛ amɛhe nibii.”—Bɔfoi 2:44, 45.

Anɔkwa sane: Ŋmalɛi nɛɛ miitsɔɔ gbɛjianɔ ko ni ato be kukuoo ko koni akɛye abua mɛi ni kpaako amɛbatsɔmɔ Kristofoi lɛ. No mli lɛ mɛi nɛɛ efa gbɛ kɛba Yerusalem koni amɛbaye Yudafoi lɛ a-Pentekoste gbi jurɔ lɛ. (Bɔfoi 2:5) Shi be ni amɛbatsɔmɔ Kristofoi lɛ, ehe bahia ni amɛtsɛ fioo yɛ Yerusalem bɔ ni afee ni amɛkase amɛhemɔkɛyeli hee lɛ he nibii babaoo. Enɛ hewɔ lɛ, Kristofoi krokomɛi lɛ jɛ amɛsuɔmɔ mli ni amɛye amɛbua amɛ koni amɛná niyenii kɛ wɔɔhe.—Bɔfoi 2:41, 42, 46, 47.

a Yehowa ji Nyɔŋmɔ gbɛ́i tamɔ Biblia lɛ etsɔɔ lɛ.—Lala 83:18.

b Kɛ́ ootao ole nɔ hewɔ ni obaanyɛ ohe Biblia lɛ oye lɛ, kwɛmɔ sane ni ji “Nibii Fɛɛ Ni Yɔɔ Biblia Lɛ Mli Lɛ Anɔkwale Ni” lɛ.