**Ani Awuiyeli Loo Terrorism Sɛɛ Baafo Be Ko?**

Kɛ́ aye awui yɛ he ko agbe naa lɛ, ekolɛ nɔ ni obaabi ohe ji: ‘Ani Nyɔŋmɔ susuɔ wɔhe? Mɛni hewɔ nibii nɛɛ baa? Ani awuiyeli loo terrorisma sɛɛ baafo be ko? Te mafee tɛŋŋ makpee gbeyei ni misheɔ nɛɛ naa?’ Biblia lɛ kɛ sanebimɔi nɛɛ ahetoi ni hãa mɔ tsui nyɔɔ emli hãa.

**Te Nyɔŋmɔ naa awuiyeli loo terrorism ehãa tɛŋŋ?**

Nyɔŋmɔ nyɛɔ efɔŋfeemɔ kɛ awuiyeli henɔi fɛɛ. (Lala 11:5; Abɛi 6:16, 17) Be ni Yesu yɔɔ shikpɔŋ lɛ nɔ, ni ekaselɔi lɛ ateŋ mɔ kome bã mɔ ko klante lɛ, ekã ekaselɔ lɛ hiɛ. (Mateo 26:50-52) Eyɛ mli akɛ mɛi komɛi feɔ awuiyeli nibii yɛ Nyɔŋmɔ gbɛ́i lɛ mli moŋ, shi Nyɔŋmɔ hako amɛ hegbɛ ni amɛfee nakai. Anɔkwa, ebooo amɛsɔlemɔi lɛ atoi po.—Yesaia 1:15.

Nyɔŋmɔ susuɔ mɛi fɛɛ ni naa nɔ lɛ ahe, ni mɛi ni afeɔ amɛ yiwalɛ nii lɛ hu fata he. (Lala 31:7; 1 Petro 5:7) Biblia lɛ tsɔɔ akɛ, Nyɔŋmɔ baatsu saji ahe nii kɛjie yiwalɛ nifeemɔi fɛɛ kɛje shihilɛ mli.—Yesaia 60:18.

Nɔ tuuntu ni kɛ yiwalɛ nifeemɔi baa

Biblia lɛ hãa wɔnaa nɔ tuuntu ni kɛ yiwalɛ nifeemɔ baa, ekɛɛ: “Gbɔmɔ yeɔ enyɛmi gbɔmɔ nɔ kɛyeɔ lɛ awui.” (Jajelɔ 8:9) Yɛ yinɔsane mli fɛɛ lɛ, mɛi ni yɔɔ nɔyeli hegbɛi lɛ tsɔɔ yiwalɛ gbɛi anɔ amɛyeɔ mɛi awui. Ni mɛi ni awaa amɛ yi lɛ hu feɔ yiwalɛ nibii kɛtoɔ najiaŋ.—Jajelɔ 7:7.

**Yiwalɛ nifeemɔi loo terrorism sɛɛ baafo**

Nyɔŋmɔ ewo shi akɛ, ebaajie yiwalɛ nifeemɔ kɛ gbeyeishemɔ kɛje shihilɛ mli, ni ebaahã toiŋjɔlɛ aba shikpɔŋ lɛ nɔ. (Yesaia 32:18; Mika 4:3, 4):

Ebaajie nɔ fɛɛ nɔ ni kɛ yiwalɛ baa lɛ kɛje shihilɛ mli. Nyɔŋmɔ baajie nɔyelii kɛje shihilɛ mli, ni ekɛ nɔyeli ni baaye jeŋ muu lɛ fɛɛ nɔ lɛ baaye najiaŋ. Yesu Kristo ji nɔyeli nɛɛ nɔ Maŋtsɛ. Ekɛ mɔ fɛɛ mɔ baaye jogbaŋŋ, ni ebaajie awuiyeli kɛ yiwalɛ nifeemɔi fɛɛ kɛje shihilɛ mli. (Lala 72:2, 14) Nakai beiaŋ lɛ, mɔ ko efeŋ yiwalɛ nii dɔŋŋ. Mɛi “amii baashɛ amɛhe waa yɛ toiŋjɔlɛ babaoo mli.”—Lala 37:10, 11.
Ebaajie nibii fɛɛ ni yiwalɛ nifeemɔi kɛba lɛ kɛje shihilɛ mli. Nyɔŋmɔ baatsa mɛi fɛɛ ni yiwalɛ nifeemɔi epila amɛ yɛ gbɔmɔtsoŋ loo henumɔŋ gbɛfaŋ lɛ. (Yesaia 65:17; Kpojiemɔ 21:3, 4) Ewo shi akɛ, ebaatee mɛi ni egboi lɛ shi kɛba wala mli koni amɛbahi shikpɔŋ ni toiŋjɔlɛ yɔɔ mli lɛ nɔ.—Yohane 5:28, 29.

Biblia lɛ hãa wɔ yiŋtoi kpakpai ahewɔ ni esa akɛ wɔhe wɔye akɛ, etsɛŋ Nyɔŋmɔ baatsu saji ahe nii. Shi ekolɛ, obaabi akɛ, ‘Mɛni hewɔ Nyɔŋmɔ ejieko yiwalɛ nifeemɔi yɛ shihilɛ mli lɛ?’ Kɛhã sanebimɔ nɛɛ hetoo lɛ, kwɛmɔ vidio ni ji Mɛni Hewɔ Nyɔŋmɔ Ŋmɛɔ Piŋmɔ Gbɛ? lɛ.

a Bei pii lɛ, kɛ́ aawie nɔ ni Blɔfo tsɛɔ lɛ Terrorism lɛ he lɛ, ekɔɔ yiwalɛ nifeemɔ loo yiwalɛ nifeemɔi ni akɛwoɔ mɛi ahe gbeyei lɛ he, ni titri lɛ, afeɔ enɛ ashiɔ mɛi ni jeee asraafoi, koni akɛte shi awo nɔyeli, jamɔ, loo nɔ kroko ni tamɔ nakai. Kɛ̃lɛ, nifeemɔi komɛi yɛ ni mɛi pii kɛ amɛhe kpãaa gbee yɛ he akɛ eji terrorism.

Biblia lɛ yeɔ ebuaa mɛi koni amɛkpee naa

Naa nibii enyɔ komɛi ni Biblia lɛ jieɔ yi akɛ ebaanyɛ eye ebua bo.

Sɔlemɔ ohã Nyɔŋmɔ.—Filipibii 4:6, 7.
Okɛ ojwɛŋmɔ ama hiɛnɔkamɔ ni Biblia lɛ kɛhãa lɛ nɔ.—Hebribii 6:19.

Kɛhã enɛ he saji krokomɛi ni damɔ Biblia lɛ nɔ lɛ, kanemɔ sane ni ji “Bɔ Ni Obaafee Ni Okaye Otsui Fe Nine” lɛ.

Yehowa Odasefoi ni amɛnyɛ amɛkpee terrorism naa lɛ ená yelikɛbuamɔ kɛjɛ amɛnyɛmimɛi Odasefoi krokomɛi aŋɔɔ. Naa shihilɛi ni amɛteŋ mɛi enyɔ kɛkpe kɛ nɔ ni jɛ mli kɛba:

Gbi ko lɛ, Natalya kɛ ebi nuu ni eye afii nɛɛhu, ni atsɛɔ lɛ Aslan lɛ, yɛ skul ko yɛ Beslan, yɛ Russia, kɛkɛ ni awuiyelɔi kɛ tu batutua amɛ kɛsa mɛi 1,000 naa. Dɔlɛ sane ji akɛ, mɛi ohai abɔ gboi, ni mɛi ni gboi lɛ ateŋ babaoo lɛ gbekɛbii ji amɛ. Eyɛ mli akɛ Natalya kɛ Aslan gbooo moŋ, shi amɛtsui fã, ni gbeyei mɔmɔ amɛ waa diɛŋtsɛ. Kwɛmɔ nɔ ni eye ebua amɛ ni amɛnyɛ amɛkpee naa.
Pablo kɛ Sophie bi nuu gbo be ni akɛ tu yatutua Twin Towers ni yɔɔ New York lɛ. Kwɛmɔ vidio nɛɛ koni ona nɔ ni ye ebua amɛ kɛ mɛi krokomɛi ni kɛ shihilɛi ni tamɔ nakai kpe lɛ.