TE YESU KƐƐ WƆKƐ MƐI AYE AHÃ TƐŊŊ?
Hetoo ni Biblia lɛ kɛhãa
Yɛ Yesu Gɔŋ Nɔ Shiɛmɔ ni ale waa lɛ mli lɛ, ekɛɛ akɛ: “Nɔ fɛɛ nɔ ni nyɛtaoɔ akɛ mɛi afee ahã nyɛ lɛ, nyɛ hu nyɛfea nakai nɔŋŋ nyɛhãa amɛ.” (Mateo 7:12; Luka 6:31) Biblia shishitsɔɔmɔ ko tsɔɔ nɔ ni Yesu wie lɛ shishi akɛ: “Bɔ ni nyɛtaoɔ akɛ mɛi afee aha nyɛ lɛ, nyɛ hu nyɛfea nakai nɔŋŋ nyɛhaa amɛ.”—Ga Biblia.
Be ni Yesu kɛɛ, “Nɔ fɛɛ nɔ ni nyɛtaoɔ akɛ mɛi afee ahã nyɛ lɛ, nyɛ hu nyɛfea nakai nɔŋŋ nyɛhãa amɛ” lɛ, te etsɔɔ tɛŋŋ?
Nɔ ni Yesu wie lɛ woɔ wɔ hewalɛ koni wɔ kɛ mɛi aye jogbaŋŋ bɔ ni wɔbaasumɔ ni akɛ wɔ aye. Akɛ nɔkwɛmɔnɔ lɛ, mɛi pii yɛ ni kɛ́ akɛ amɛye yɛ bulɛ, mlihilɛ, kɛ suɔmɔ mli lɛ, amɛsumɔɔ waa. No hewɔ lɛ, nilee yɛ mli akɛ, ‘wɔbaafee nakai nɔŋŋ’ wɔhã mɛi.—Luka 6:31.
Mɛni hewɔ nɔ ni Yesu kɛɛ lɛ he hiaa lɛ?
Wɔbaanyɛ wɔkɛ nɔ ni Yesu kɛɛ lɛ atsu nii yɛ shihilɛi srɔtoi amli. Akɛ nɔkwɛmɔnɔ lɛ,
Ebaanyɛ ewaje gbalashihilɛi.—Efesobii 5:28, 33.
Ebaanyɛ eye ebua fɔlɔi koni amɛtsɔse amɛbii.—Efesobii 6:4.
Ebaanyɛ ehã naanyobɔɔ kpakpa ahi nanemɛi, akutsoŋbii kɛ mɛi ni wɔkɛ amɛ tsuɔ nii ateŋ.—Abɛi 3:27, 28; Kolosebii 3:13.
Nɔ ni Yesu kɛɛ lɛ, etamɔ shishitoo mla ni jeɔ kpo yɛ nɔ ni mɛi fɔɔ lɛ tsɛmɔ akɛ Kpaŋmɔ Momo lɛ mli lɛ hei babaoo. Nɔ ni Yesu kɛɛ lɛ ji nɔ ni “Mla lɛ [Biblia mli klɛŋklɛŋ woji enumɔ lɛ] kɛ Gbalɔi lɛ [Biblia mli woji ni kɔɔ gbalɛi ahe lɛ] tsɔɔ.” (Mateo 7:12) Yɛ gbɛ ko nɔ lɛ, nɔ ni Yesu wie lɛ hãa anɔkwa sane ko ni yɔɔ Kpaŋmɔ Momo lɛ mli lɛ feɔ faŋŋ: no ji suɔmɔ onyɛmi gbɔmɔ.—Romabii 13:8-10.
Ani nɔ ni no mli lɛ Yesu tsɔɔ kɛkɛ ji, hã mi ni mi hu mahã bo?
Dabi. Nɔ ni Yesu wie lɛ kɔɔ nɔhãmɔ he titri. Be ni Yesu wie sane nɛɛ lɛ, no mli lɛ eetsɔɔ bɔ ni esa akɛ wɔkɛ mɛi fɛɛ aye jogbaŋŋ ahã, ni wɔhenyɛlɔi po fata he. (Luka 6:27-31, 35) No tsɔɔ akɛ, nɔ ni Yesu wie lɛ miiwo mɛi hewalɛ ni amɛfee mɛi fɛɛ ekpakpa.
Te wɔbaafee tɛŋŋ wɔkɛ nɔ ni Yesu kɛɛ lɛ atsu nii lɛ?
1. Okɛ ohiɛ afɔ̃ shi. Okɛ ojwɛŋmɔ aya mɛi ni bɔle bo lɛ anɔ. Akɛ nɔkwɛmɔnɔ lɛ, ekolɛ ona akɛ mɔ ko eyaye jara yɛ shwapo ko mli shi enyɛɛɛ etere, onu akɛ atsĩ okutsoŋnyo ko naa yɛ helatsamɔhe, loo oyɔse akɛ mɔ ko ni okɛ lɛ tsuɔ nii lɛ bɛ miishɛɛ. Kɛ́ okɛ ojwɛŋmɔ tee ‘nibii ni hi hã mɛi krokomɛi’ anɔ lɛ, ekolɛ obaana nibii ni obaanyɛ okɛɛ kɛye obua mɛi loo ofee ohã amɛ.—Filipibii 2:4.
2. Nu he ohã mɛi. Ŋɔɔ lɛ akɛ bo ji mɔ lɛ. Eji oyɛ nakai shihilɛ lɛ mli kulɛ, mɛni obaafee? (Romabii 12:15) Kɛ́ obɔ mɔdɛŋ onu shihilɛ ni mɛi yɔɔ mli lɛ shishi lɛ, ekolɛ no baatsirɛ bo ni oye obua amɛ.
3. Tsakemɔ ohe owo amɛshihilɛ mli. Hã ehi ojwɛŋmɔ mli akɛ esoro mɔ fɛɛ mɔ. Nɔ ni mɛi baasumɔ ni kulɛ afee ahã amɛ lɛ, ekolɛ jeee no nɔŋŋ obaasumɔ ni afee ahã bo. No hewɔ lɛ, ekolɛ nibii srɔtoi yɛ onyɛmɔ mli ni obaanyɛ ofee ohã mɛi; shi feemɔ amɛteŋ nɔ ni amɛbaanya he waa lɛ ohã amɛ.—1 Korintobii 10:24.