Miinu Fɔyeli He​—Ani Biblia Lɛ Baanyɛ Eye Ebua Mi Ni Mitsui Anyɔ Mimli?

Hetoo Ni Biblia Lɛ Kɛhãa

Hɛɛ. Biblia lɛ baanyɛ eye ebua wɔ ni wɔfee nibii ni sa koni wɔkanu fɔyeli he. (Lala 32:1-5) Kɛ́ wɔfee nɔ ko ni ehiii, shi wɔshwa wɔhe diɛŋtsɛ lɛ, Nyɔŋmɔ kɛbaake wɔ ni ebaaye ebua wɔ koni wɔtsui anyɔ wɔmli. (Lala 86:5) Biblia lɛ hãa wɔnaa akɛ kɛ́ wɔnu fɔyeli he lɛ, bei komɛi, sɛɛnamɔ ye he, ejaakɛ nakai nɔ lɛ hãa wɔkpaa gbɛ fɔŋ ko ni wɔkɔ, ni wɔbɔɔ mɔdɛŋ fɛɛ ni wɔbaanyɛ koni wɔsɛɛ lɛ, wɔkɛ wɔhe akawo nakai shihilɛ lɛ mli dɔŋŋ. (Lala 51:17; Abɛi 14:9) Fɛɛ sɛɛ lɛ, Biblia lɛ woɔ wɔ ŋaa ni wɔkahã fɔyeli babaoo ye wɔtsui, ni ekolɛ, wɔmu sane naa akɛ wɔhiɛnɔkamɔ fɛɛ etã loo wɔhe bɛ sɛɛnamɔ dɔŋŋ kɛhã Nyɔmɔ. Kɛ́ wɔnu he nakai lɛ, ebaanyɛ ehã ‘awerɛhoyeli babaoo aye wɔnɔ kwraa’ loo wɔnijiaŋ aje wui.​—2 Korintobii 2:7.

• Mɛni baanyɛ ahã mɔ ko anu fɔyeli he?

• Te mafee tɛŋŋ matsu bɔ ni minuɔ fɔyeli he lɛ he nii lɛ?

• Biblia mli ŋmalɛi ni kɔɔ fɔyeli kɛ eshaifaa he

Mɛni baanyɛ ahã mɔ ko anu fɔyeli he?

Wɔbaanyɛ wɔnu fɔyeli he yɛ yiŋtoi srɔtoi ahewɔ. Ekolɛ wɔbaanu he akɛ nɔ ko ni wɔfee lɛ edɔ mɔ ko ni wɔsumɔɔ esane waa, loo wɔshɛɛɛ taomɔ nii ko ni wɔheɔ wɔyeɔ akɛ kulɛ esa akɛ wɔshɛ he lɛ he. Bei komɛi lɛ, wɔbaanyɛ wɔnu fɔyeli he, ni jeee ni wɔfee nɔ ko gbonyo loo wɔye fɔ. Akɛ nɔkwɛmɔnɔ lɛ, kɛ́ wɔkɛ otii ni nɔ kwɔlɔ waa mamɔ wɔhiɛ lɛ, be fɛɛ be ni wɔshɛɛɛ nakai otii lɛ eko he lɛ, ebaahã wɔnu fɔyeli he be mli ni kulɛ esaaa akɛ ebaa lɛ nakai. No hewɔ ni Biblia lɛ woɔ wɔ hewalɛ koni wɔkafee nii kɛteke nɔ, loo wɔŋmɛ pɛpɛɛpɛ lɛ.​—Jajelɔ 7:16.

Te mafee tɛŋŋ matsu bɔ ni minuɔ fɔyeli he lɛ he nii lɛ?

Nɔ najiaŋ ni obaahã fɔyeli aje onijiaŋ wui lɛ, feemɔ nɔ ni obaanyɛ kɛjaje nibii. Te obaafee tɛŋŋ?

• Kpɛlɛmɔ otɔmɔi anɔ. Kɛ́ oosɔle lɛ, kpa Yehowaa Nyɔŋmɔ fai akɛ ekɛ ohe eshai ake bo. (Lala 38:18; Luka 11:4) Kɛ́ osɔle nakai ni oshwa ohe lɛɛlɛŋ yɛ nɔ ni ofee lɛ he, ni edɔ bo akɛ ofee nakai nii lɛ, ni no hewɔ lɛ ofee bɔ fɛɛ bɔ ni obaanyɛ ni okafee nakai dɔŋŋ lɛ, obaanyɛ oná nɔmimaa akɛ Nyɔŋmɔ baabo bo toi. (2 Kronika 33:13; Lala 34:18) Enaa omli gbɛ gbɔmɔ lɛ, nɔ ko ni adesa ko kwraa enaaa lɛ. Kɛ́ Nyɔŋmɔ yɔse akɛ wɔmiibɔ mɔdɛŋ ni wɔje gbɛ fɔŋ ko ni wɔkɔ nɔ lɛ, “anɔkwafo kɛ jalɔ ji lɛ, ni no hewɔ lɛ, ekɛ wɔhe eshai lɛ baake wɔ.”​—1 Yohane 1:9; Abɛi 28:13.

  Anɔkwa, kɛ́ otɔ̃ mɔ ko nɔ lɛ, esa akɛ okpɛlɛ otɔmɔ lɛ nɔ ni ojɛ anɔkwayeli mli okpa mɔ lɛ fai. Ekolɛ, onáŋ enɛ feemɔ mlɛo! Ebaabi ni ofee ekãa ni oba ohe shi. Shi kɛ́ ajɛ tsuiŋ akpa fai lɛ, etsuɔ nibii enyɔ ni he hiaa waa ahe nii: Ehãa jatsu ni tsii ko jeɔ onɔ loo ohe jɔɔ bo, ni ehãa toiŋjɔlɛ baa okɛ mɔ lɛ teŋ ekoŋŋ.​—Mateo 3:8; 5:23, 24.

• Jwɛŋmɔ ŋmalɛi ni kɔɔ Nyɔŋmɔ mɔbɔnalɛ lɛ he lɛ anɔ. Akɛ nɔkwɛmɔnɔ lɛ, susumɔ 1 Yohane 3:19, 20 lɛ he. Biblia lɛ wie yɛ jɛmɛ akɛ, “wɔtsuii baabu wɔ fɔ”​—no ji akɛ, ekolɛ, wɔbaakojo wɔhe waa fe nine ni wɔbaanu he po akɛ wɔsaaa Nyɔŋmɔ suɔmɔ lɛ. Kɛ̃lɛ, nakai ŋmalɛ lɛ wie hu akɛ “Nyɔŋmɔ da fe wɔtsuii.” Mɛɛ gbɛ nɔ? Enaa wɔgbɔmɔtso muu lɛ fɛɛ, ni enuɔ wɔhenumɔi kɛ wɔgbɔjɔmɔi lɛ ashishi jogbaŋŋ kɛmɔ shi. Ele hu akɛ afɔ wɔ akɛ mɛi ni yeee emuu, ni tsɔɔ akɛ ewaaa akɛ wɔbaatɔ̃.b (Lala 51:5) No hewɔ lɛ, ekpooo mɛi ni shwaa amɛhe lɛɛlɛŋ yɛ amɛtɔmɔi lɛ ahewɔ lɛ.​—Lala 32:5.

• Kaaya nɔ ojwɛŋ otsutsu tɔmɔi lɛ ahe. Hii kɛ yei babaoo ni fee nibii gbohii, shi sɛɛ mli lɛ amɛtsake amɛgbɛ fɔŋ lɛ ahe saji yɛ Biblia lɛ mli. Amɛteŋ mɔ kome ji Saulo ni jɛ Tarso, ni abale lɛ akɛ bɔfo Paulo lɛ. Be ni eji Farisifonyo lɛ, ewa Yesu kaselɔi lɛ ayi waa. (Bɔfoi 8:3; 9:1, 2, 11) Shi be ni ebaná ele akɛ asomoaŋ eete shi eewo Nyɔŋmɔ kɛ Mesia loo Kristo lɛ, etsake etsui, eje egbɛ fɔŋ lɛ nɔ, ni ebatsɔ Kristofonyo ni abaanyɛ akase lɛ. Anɔkwa, Paulo shwa ehe waa yɛ bɔ ni eba ejeŋ ehã be ko ni eho lɛ he, shi ehãaa etsutsu shihilɛ lɛ ahe ejwɛŋmɔ. Akɛni Paulo yɔse bɔ ni Nyɔŋmɔ na lɛ mɔbɔ waa hewɔ lɛ, ebatsɔ shiɛlɔ ni yɔɔ ekãa, ni ehãaa ehiɛ aje naanɔ wala hiɛnɔkamɔ lɛ nɔ.​—Filipibii 3:13, 14.

Biblia mli ŋmalɛi ni kɔɔ fɔyeli kɛ eshaifaa he

Yeremia 31:34: “Mikɛ amɛtɔmɔ lɛ baake amɛ, ni mikaiŋ amɛhe esha lɛ dɔŋŋ.”

Nɔ ni etsɔɔ: Kɛ́ Nyɔŋmɔ kɛ wɔtɔmɔi ke wɔ lɛ, ekɛ ke wɔ kwraa, edamɔŋ wɔtɔmɔi lɛ anɔ ni ekɛ wɔ aye. Emɔbɔnalɛ lɛ yɛ krɔŋŋ.