Mikɛ Aaafee Afii 70 Esɔmɔ Yehowa Yɛ Cuba

Mikaiɔ bɔ ni akrowa lɛ mli shihilɛ ŋɔɔ ni eyɔɔ shweshweeshwe lɛ waa. No mli lɛ, wɔwekumɛi lɛ ekomɛi, ni wɔnyɛkwɛ̃mɛi, wɔtsɛkwɛ̃mɛi, wɔniimɛi, kɛ wɔnaamɛi fata he lɛ bɛŋkɛ wɔ kpaakpa. Daa nɛɛ lɛ wɔyɛ niyenii kɛ shika ni wɔkɛbaakwɛ wɔhe, ni enɛ hã wɔná miishɛɛ waa.

Be ni miye aaafee afii enumɔ lɛ, nyɛmi nuu ko ni atsɛɔ lɛ Walton Jones lɛ kɛ mifɔlɔi bɔi Biblia lɛ kasemɔ. Eyɛ ekãa waa ni enyiɛɔ ŋmɛlɛtswai aaafee nyɔŋma kɛbaa wɔkrowa lɛ ni ebashiɛɔ. Be fɛɛ be ni ebaaba lɛ, miwekumɛi lɛ ateŋ mɛi babaoo babuaa amɛhe naa yɛ minii kɛ minaa shĩa lɛ ni ekɛ amɛ gbaa Biblia lɛ mli saji ŋmɛlɛtswai pii. Mifɔlɔi, mitsɛkwɛ̃ Pedro kɛ minyɛkwɛ̃ Ela nya nɔ ni amɛkaseɔ lɛ he, ni etsɛɛɛ ni abaptisi amɛ ni amɛbatsɔmɔ Yehowa Odasefoi. Bianɛ lɛ, Ela miihe aná afii 100 ni eeya nɔ eesɔmɔ akɛ gbɛgbalɔ yɛ Cuba.

Yɛ nakai beiaŋ lɛ, nɔyeli lɛ eteee shi ewooo Yehowa Odasefoi, ni no hewɔ lɛ, amɛshiɛɔ ni amɛyaa asafoŋ kpeei ni mɔ ko gbaaa amɛnaa. Mɛi ni yɔɔ Cuba lɛ le Yehowa Odasefoi waa ejaakɛ wɔyaa amɛshĩai amli wɔyashiɛɔ. Be fɛɛ be lɛ, wɔhiɛ asafo lɛ woji ni wɔkɛhãa amɛ. Nakai be lɛ mli lɛ, wɔnyiɛɔ waa! Kɛ́ mikai bɔ ni wɔsɔmɔ Yehowa yɛ nakai “bei ni hi” lɛ amli be ni midako tsɔ lɛ, mináa miishɛɛ waa. Shi etsɛɛɛ ni wɔkɛ “bei ni mli wa” kpe.—2 Tim. 4:2.

NAAGBAI BA YƐ CUBA

Yɛ nakai afi lɛ mli nɔŋŋ be ni miye aaafee afii enumɔ lolo Iɛ, mipapa kɛ mitsɛkwɛ̃ lɛ fã gbɛ kɛtee kpee yɛ he kroko yɛ Cuba. Dɔlɛ sane ji akɛ, nu ni amɛnu yɛ jɛmɛ lɛ hã hela mɔ amɛ waa. Mikaiɔ akɛ, be ni amɛku amɛsɛɛ lɛ, mitsɛkwɛ̃ lɛ yiteŋtsɔi fɛɛ tã, shi sɛɛ mli lɛ, ehe wa lɛ. Mipapa lɛ lɛ egbo, no mli lɛ eye afii 32 pɛ.

Be ni mipapa gbo sɛɛ lɛ, mimami kpɛ eyiŋ akɛ ebaahã wɔweku lɛ kɛ enyɛmi nuu ni yɔɔ akrowa ko ni atsɛɔ lɛ Lombillo lɛ ayahi shi. Enɛ hã wɔshi wɔwekumɛi, ni wɔnii kɛ wɔnaa ni wɔsumɔɔ amɛ waa lɛ fata he lɛ. Shi wɔtee nɔ wɔsɔmɔ Yehowa akɛ weku.

Yɛ August 26, 1957 lɛ, abaptisi mi yɛ kpaakpo ko ni bɛŋkɛ Lombillo lɛ mli. No mli lɛ, miye afii nyɔŋma. Eshɛɛɛ afii enyɔ ni nibii fɛɛ tsake kwraa kɛhã Yehowa Odasefoi ni yɔɔ Cuba lɛ. Yɛ 1959 lɛ, akpa nɔyeli ni yeɔ nɔ lɛ ni komunist nɔyeli baye nɔ.

No mli lɛ, nɔyeli hee nɛɛ miitao ni ená asraafoi pii ni enɔyeli lɛ he awa. Enɛ hã nibii amli bawa waa kɛhã wɔ, ejaakɛ ekɔɔɔ he eko maŋ nɔ ni wɔyɔɔ lɛ, wɔkɛ wɔhe wooo asraafoi anitsumɔ loo pɔlitis mli. Enɛ hewɔ lɛ, nyɛmimɛi lɛ náaa lɛ mlɛo kwraa akɛ amɛbaaya shiɛmɔ, ni agbɛnɛ hu, amɛkpe kutuu kɛjá Yehowa tamɔ bɔ ni amɛfeɔ tsutsu lɛ. Sɛɛ mli lɛ, nɔyeli lɛ tsĩ wɔnitsumɔ lɛ naa ni ewo wɔnyɛmimɛi anɔkwafoi ohai abɔ tsuŋ. Tsuŋwoohe nɔkwɛlɔi lɛ yiɔ wɔnyɛmimɛi lɛ ateŋ mɛi komɛi ni amɛhãaa amɛ niyenii. Bei komɛi po lɛ, niyenii ni abahãa amɛ lɛ, lá fata nibii ni akɛhoo lɛ ahe, ni wɔle akɛ Biblia lɛ kɛɛ wɔkaye lá.

Yɛ naagbai nɛɛ fɛɛ asɛɛ lɛ, wɔtee nɔ wɔkpe kutuu kɛjá Yehowa. (Heb. 10:25) Bei komɛi po lɛ, wɔfeɔ kpeei yɛ ŋmɔji amli loo hei krokomɛi yɛ maŋ lɛ mli. Mikaiɔ akɛ, be ko lɛ nyɛmi nuu ko kɛ etoi atsũ agbo ko hã wɔ ni wɔyafee kpee lɛ yɛ jɛmɛ. Wɔyanyɛɛɛ wɔsaa toi atsũ lɛ mli loo wɔjie toi lɛ kɛje mli po. No hewɔ lɛ, wɔkɛ toi lɛ fɛɛ hi kpee lɛ shishi.—Mika 2:12.

Nyɛmimɛi komɛi bɔ mɔdɛŋ waa amɛye amɛbua wɔ koni wɔya nɔ wɔkase nii kɛjɛ Biblia lɛ mli, ni wɔhiɛ sɔ amɛ waa. Akɛ nɔkwɛmɔnɔ lɛ, amɛtsɔɔ hiɛ amɛrikɔdiɔ kpokpaa nɔ kpeei nifeemɔi lɛ amɛwoɔ kasɛtii anɔ, ni amɛjaraa amɛhãa nyɛmimɛi lɛ yɛ Cuba maŋ lɛ mli fɛɛ. Bei komɛi lɛ, ahãa nyɛmimɛi hii enyɔ pɛ kaseɔ kpee lɛ shishi nifeemɔi lɛ fɛɛ ni amɛhãa, ni amɛrikɔdiɔ wiemɔi ni amɛhãa lɛ. Akɛni nyɛmimɛi nɛɛ rikɔdiɔ wiemɔi nɛɛ yɛ teemɔŋ hewɔ lɛ, bei komɛi lɛ, wɔnuɔ wuɔi agbɛɛmɔi kɛ dedei krokomɛi yɛ wiemɔi ni amɛrikɔdi lɛ amli. Kɛ́ ilɛtrisiti bɛ he ni afeɔ kpee lɛ yɛ lɛ, ahãa nyɛmi nuu ko taa baisiko ni ma shi jaŋŋ ni akɛ batri ekpɛtɛ he lɛ nɔ, ni be ni etaa baisiko nɛɛ kɛkɛ lɛ wɔmiiná ilɛtrisiti. No hãa wɔnyɛɔ wɔtswaa kasɛti lɛ ni wɔnuɔ wiemɔi ni arikɔdi lɛ. Eyɛ mli akɛ wɔbɛ heyeli loo asafoŋ woji ni fa bɔ ni sa tamɔ wɔnyɛmimɛi ni yɔɔ maji krokomɛi lɛ anɔ lɛ moŋ, shi wɔnine shɛ nibii ni he baahia wɔ koni naanyobɔɔ ni yɔɔ wɔ kɛ Yehowa teŋ lɛ mli awa lɛ anɔ. Ni wɔfee ekome kɛsɔmɔ Yehowa kɛ miishɛɛ.—Neh. 8:10.

MIKƐ MIŊA SƆMƆ AKƐ DAA GBƐGBALƆI NI WƆNÁ WEKU HU

Be ni miná afii 18 lɛ, mibɔi sɔɔmɔ akɛ daa gbɛgbalɔ yɛ Florida maŋ lɛ mli. No sɛɛ aaafee afi lɛ, ahã miyasɔmɔ akɛ gbɛgbalɔ krɛdɛɛ yɛ Camagüey kpokpaa lɛ maŋtiase ni atsɛɔ lɛ Camagüey lɛ mli. Jɛmɛ mikɛ Emilia, ni ji nyɛmi yoo Odasefonyo ko ni he yɔɔ fɛo ni jɛ Santiago de Cuba lɛ kpe yɛ. Wɔbɔi nyiɛmɔ, ni yɛ aaafee afi mli lɛ, wɔbote gbãla mli.

Nɔyeli lɛ yɛ nitsumɔhei pii ni afeɔ sikli yɛ jɛmɛ. Miná nitsumɔ yɛ nitsumɔhei nɛɛ eko mli, ni ehe bahia ni mikɛ mibe fɛɛ atsu. Enɛ hewɔ lɛ, mikɛ Emilia fɛɛ nyɛɛɛ asɔmɔ akɛ gbɛgbalɔi dɔŋŋ; shi loloolo lɛ, wɔmiisumɔ ni wɔtsu babaoo bɔ ni wɔɔnyɛ yɛ Yehowa sɔɔmɔ lɛ mli. No hewɔ lɛ, mibi ni ahã matsu nii kɛjɛ maŋkɛ ŋmɛji etɛ kɛyashi leebi ŋmɛlɛ 11 yɛ nitsumɔhe lɛ. Minyaaa maŋkɛshitee he kwraa, shi nakai ni mifee lɛ hã minyɛ mishiɛ daa ni minyɛ mikɛ Emilia tee asafoŋ kpeei daa.

Yɛ 1969 lɛ, wɔfɔ wɔkromɔ binuu ni wɔwo lɛ Gustavo. No sɛɛ etsɛɛɛ lɛ, asafo lɛ kɛɛ miyasɔmɔ akɛ kpokpaa nɔkwɛlɔ. Yɛ nakai beiaŋ yɛ Cuba lɛ, anyɛɔ ahãa mɔ sɔmɔɔ akɛ kpokpaa nɔkwɛlɔ be ni eekwɛ ebii. Yɛ afii ni mikɛsɔmɔ akɛ kpokpaa nɔkwɛlɔ lɛ amli lɛ, wɔbɛ dekã kwraa, shi wɔná miishɛɛ waa hu. Mikɛ Emilia fɛɛ nu he akɛ, eji hegbɛ kpele akɛ ahã wɔmiisɔmɔ wɔnyɛmimɛi lɛ yɛ nakai gbɛ nɔ. Be ni misɔmɔɔ akɛ kpokpaa nɔkwɛlɔ lɛ, wɔfɔ wɔbinuu Obed, lɛ esɛɛ lɛ Abner, ni yɛ afii komɛi asɛɛ lɛ, wɔfɔ wɔbiyoo Mahely hu.

Kɛ́ misusu be ni wɔtsuɔ kpokpaa nɔkwɛmɔ nitsumɔ lɛ he lɛ, minaa bɔ ni Yehowa ye ebua nyɛmimɛi ni yɔɔ Cuba lɛ, ni enɛ hãa mináa miishɛɛ. Yehowa ye ebua wɔ hu ni wɔtsɔɔ wɔbii lɛ ni amɛsumɔ lɛ. Hã magba nyɛ bɔ ni shihilɛ lɛ ji ehã be ni mi kɛ Emilia sɔmɔɔ akɛ kpokpaa nɔkwɛlɔ kɛ eŋa lɛ.

MISƆMƆ YƐ CUBA AKƐ KPOKPAA NƆKWƐLƆ BE NI ATSĨ WƆNITSUMƆ LƐ NAA LƐ

Be ni atsĩ wɔnitsumɔ lɛ naa lɛ, ebawa waa kɛhã nyɛmimɛi lɛ akɛ amɛbaaya asafoŋ kpeei ni amɛshiɛ hu. Aŋamɔ Maŋtsɛyeli Asai lɛ, ashwie maŋsɛɛ sɔɔlɔi lɛ kɛshi maŋ lɛ mli, amɔmɔ nyɛmimɛi oblahii babaoo ni awo amɛtsuŋ, ni aŋa nitsumɔhe nine ni yɔɔ Havana lɛ.

Akɛni atsĩ wɔnitsumɔ lɛ naa hewɔ lɛ, Hɔɔ kɛ Hɔgbaa pɛ wɔnyɛɔ wɔyasaraa asafoi lɛ. Nɛkɛ ji bɔ ni wɔtee lɛ; kɛ́ wɔyasara asafo ko Hɔɔ kɛ Hɔgbaa lɛ, wɔsaa wɔyaa jɛmɛ ekoŋŋ enɔ otsi. Kɛ́ wɔmiifã gbɛ lɛ, wɔkɛ nibii pii eyaaa, ni bei pii lɛ, wɔtaa baisiko kɛyaa, ejaakɛ no hãŋ mɛi ajwɛŋmɔ aba wɔnɔ. Agbɛnɛ hu, kɛ́ wɔyaasara asafo ko lɛ, atswaaa wɔbaa lɛ he adafi. Ehe bahia ni wɔfee wɔnii tamɔ nɔ ni wɔbasara wɔwekumɛi. Enɛ feemɔ waaa kɛhãaa wɔ kwraa. Bɔ ni wɔkɛ amɛ hi shi akɛ weku lɛ sɔŋŋ hã bei komɛi lɛ wɔhiɛ kpa nɔ po akɛ, wɔba wɔbasɔmɔ amɛ. (Mar. 10:​29, 30) Fɛɛ sɛɛ lɛ, wɔhã wɔhiɛ hi wɔhe nɔ jogbaŋŋ. Bei pii lɛ, polisifoi nyiɛɔ wɔsɛɛ ni amɛbibiɔ wɔ saji. Eji ana nɔ ni wɔfeɔ lɛ sɛɛ kulɛ, abaanyɛ amɔ nyɛmimɛi ni wɔyahiɔ amɛŋɔɔ lɛ.—Rom. 16:4.

Yɛ nɛkɛ be nɛɛ mli lɛ, wɔkɛ nyɛmimɛi srɔtoisrɔtoi kpe ni amɛfee wɔ ejurɔ waa, tsɛbelɛ amɛbɛ nɔ ko tsɔ. Akɛ nɔkwɛmɔnɔ lɛ, hei komɛi ni wɔtee lɛ, tɔŋtɔŋi sɔŋŋ, shi nyɛmimɛi lɛ kɛ tɔŋtɔŋ buu pɛ ni amɛyɔɔ lɛ hã wɔ koni wɔnyɛ wɔwɔ jogbaŋŋ. Nyɛmimɛi komɛi hu ná he miishɛɛ akɛ amɛbaahã wɔbahi amɛshĩa lɛ, eyɛ mli akɛ niyenii fioo ko pɛ amɛyɔɔ ni amɛkɛ wɔ baaye. Akɛni wɔle enɛ hewɔ lɛ, bei komɛi lɛ, wɔ diɛŋtsɛ wɔkɛ wɔniyenii yaa ni wɔkɛ amɛ yayeɔ.

Kɛ́ wɔyaasara asafo ko lɛ, wɔnyɛɛɛ wɔkɛ wɔbii lɛ fɛɛ aya. Enɛ hewɔ lɛ, wɔkɛ fiootsɛ lɛ yaa ni wɔshiɔ mɛi ni eshwɛ lɛ wɔhãa mimami kɛ minyɛmimɛi yei lɛ ateŋ mɔ kome. Anɔkwa, akɛni wɔhiɛ gbekɛ hewɔ lɛ, ebu wɔhe yɛ nibii komɛi amli. Akɛ nɔkwɛmɔnɔ lɛ, bei komɛi lɛ, polisifoi lɛ gbɛlɛɔ wɔnibii amli, shi wɔkɛ asafo lɛ woji lɛ toɔ baagi ni gbekɛ lɛ nibii ni ewo muji yɔɔ mli lɛ amli ejaakɛ wɔle akɛ polisifoi lɛ kwɛŋ mli.

Mihiɛ sɔɔ Emilia waa yɛ bɔ ni eye ebua mi kɛkwɛ gbekɛbii lɛ kɛ bɔ ni eye ebua mi yɛ be fɛɛ sɔɔmɔ nitsumɔ lɛ mli lɛ. Mi hu mitee nɔ mitsu nii yɛ he ni afeɔ sikli yɛ lɛ ni yɛ nakai beiaŋ nɔŋŋ lɛ, minyɛ mitsu kpokpaa nɔkwɛmɔ nitsumɔ lɛ. Bɔ ni mifee lɛ nɛ; bei komɛi lɛ, miyaa nɔ mitsuɔ nii kɛ́ akpa nitsumɔ po koni yɛ otsi lɛ naagbee lɛ, mikaya nitsumɔ, ni mifeɔ nakai shii enyɔ yɛ otsi lɛ mli lɛ. Shi sɛɛ mli lɛ, atsake minitsumɔ lɛ. Ahã mibɔi nitsumɔ lɛ nɔkwɛmɔ, ni no hewɔ lɛ, ehe bahia ni maya nitsumɔ yɛ gbii lɛ fɛɛ mli yɛ otsi lɛ mli, ni nɔ ko bɛ ni manyɛ mafee yɛ he. Shi mibana akɛ, kɛ́ mihã mɛi ni mikɛtsuɔ nii lɛ nitsumɔ amɛtsu yɛ otsi lɛ naagbee lɛ, amɛbaatsu minitsumɔ lɛ amɛhã mi be ni misaraa asafoi lɛ. Enɛ hã minyɛ miyasara asafoi lɛ, ni efeee mi akɛ minitsumɔtsɛ lɛ yɔse akɛ mibaaa nitsumɔ yɛ otsi lɛ naagbee.

BE NI ATSAKE MINITSUMƆ LƐ, MIHÃAA MIMIISHƐƐ ATÃ

Gbi ko yɛ 1994 lɛ, nyɛmimɛi ni nyiɛ hiɛ yɛ Cuba lɛ tsɛ wɔ, gbɛfalɔi nɔkwɛlɔi ni naa shɛɔ 80 lɛ, kpee krɛdɛɛ ko yɛ Havana. Be ni wɔ fɛɛ wɔnaa bakpe shi lɛ, wɔmii shɛ wɔhe waa ejaakɛ yɛ afii ni eho lɛ fɛɛ amli lɛ, kpaako wɔ fɛɛ wɔnaa ebakpe shi yɛ he kome! Yɛ kpee nɛɛ shishi lɛ, awie tsakemɔi komɛi ni asafo lɛ efee lɛ ahe. Kɛkɛ ni awie nɔ ko ni hã wɔnaa kpɛ wɔhe waa. Nyɛmimɛi ni nyiɛ hiɛ lɛ kɛɛ wɔ akɛ, amɛbaasumɔ ni amɛkɛ wɔgbɛ́i ahã amralofoi lɛ. Mɛni hewɔ?

Nyɛmimɛi lɛ hã wɔle akɛ, amɛkɛ amralofoi lɛ miiwie koni amɛkwɛ akɛ amralofoi lɛ kɛ Yehowa Odasefoi lɛ baaye jogbaŋŋ lo. Enɛ hewɔ lɛ, amralofoi lɛ kɛɛ amɛmiitao kpokpaa nɔkwɛlɔi lɛ fɛɛ agbɛ́i. Wɔ fɛɛ wɔkpɛlɛ koni akɛ wɔgbɛ́i ahã. Sɛɛ mli lɛ, amralofoi lɛ kɛ wɔ ye jogbaŋŋ.

Yɛ naagbee mli aahu lɛ, eyɛ mli akɛ no mli lɛ, akɛ Yehowa Odasefoi agbɛ́i woko woji ashishi yɛ mla naa moŋ, shi aŋmɛ wɔ gbɛ koni wɔkpe ni wɔfee asafoŋ kpeei, ni agbɛnɛ hu, wɔnyɛ wɔya shiɛmɔ. Sɛɛ mli lɛ wɔná wɔle akɛ, asomoaŋ, amralofoi lɛ le nɔkwɛlɔi gbɛfalɔi lɛ ekomɛi agbɛ́i shi amɛmiitao wɔma nɔ mi wɔhã amɛ.

Yɛ September 1994 lɛ, amralo lɛ ŋmɛ wɔ gbɛ ni wɔgbele nitsumɔhe nine ekoŋŋ. Naagbee mli aahu lɛ, wɔnyɛ wɔkɛ nitsumɔhe nine ni ahe yɛ wɔdɛŋ afii 20 ni eho lɛ nɔŋŋ fee wɔnitsumɔhe nine ekoŋŋ.

Kɛkɛ ni yɛ 1996 lɛ, atswa mi kɛ Emilia ni akɛɛ wɔ akɛ wɔbasɔmɔ yɛ Betel. Minaa kpɛ mihe waa ni mikɛɛ nyɛmimɛi lɛ akɛ, miyɛ bii enyɔ ni miikwɛ amɛ. Nyɛmimɛi lɛ susu sane lɛ he ni sɛɛ mli lɛ, amɛkɛɛ mi akɛ loloolo lɛ, amɛmiisumɔ ni wɔyasɔmɔ yɛ Betel. Wɔkpɛlɛ nɔ ni wɔbɔi gbɛjianɔtoo koni wɔ fɛɛ wɔyasɔmɔ yɛ Betel yɛ Havana.

Anɔkwa, shishijee lɛ minyaaa Betel sɔɔmɔ he kwraa, ejaakɛ no mli lɛ, mitsu gbɛfaa nitsumɔ lɛ afii pii ni no hewɔ lɛ mitsui yɛ mli waa. Miye mitsui waa yɛ nyɛmimɛi lɛ ahe ejaakɛ mile nɔ ni mli ni amɛtsɔɔ ni kɛ́ mita ɔfis lɛ, minyɛŋ ni mikɛ yelikɛbuamɔ ni sa lɛ ahã amɛ. Shi Betelbii kɛ titri lɛ, miŋa Emilia ye amɛbua mi ni mitsake jwɛŋmɔ ni mihiɛ lɛ. Fiofio lɛ, mibaná miishɛɛ, ni amrɔ nɛɛ, miisɔmɔ yɛ Betel kɛ miishɛɛ.

Amrɔ nɛɛ mi kɛ Emilia fɛɛ edara. Eŋɔɔ wɔnaa waa akɛ wɔbale nyɛmimɛi babaoo ni wɔkɛ amɛ efee ekome kɛsɔmɔ Yehowa yɛ afii nɛɛ fɛɛ amli. Eŋɔɔ wɔnaa waa hu akɛ wɔbii kɛ wɔnabii lɛ fɛɛ miisɔmɔ Yehowa. Wɔnuɔ he tamɔ bɔ ni Bɔfo Yohane nu he be ni egbɔ lɛ. Ewie akɛ: “Mibɛ miishɛɛ ni da fe enɛ: akɛ manu akɛ mibii lɛ miiya nɔ amɛmiinyiɛ yɛ anɔkwale lɛ mli.”—3 Yoh. 4.

Mikɛ Emilia esɔmɔ yɛ Betel aaafee afii 30. Bianɛ lɛ, eyɛ mli akɛ wɔgbɔlɔ ni helai miigba wɔnaa waa moŋ, shi wɔbɔɔ mɔdɛŋ akɛ wɔbaatsu nitsumɔ ni akɛwo wɔdɛŋ lɛ bɔ ni wɔshihilɛ baaŋmɛ wɔ gbɛ. Wɔkɛ naagbai kpe yɛ afii ni wɔkɛsɔmɔ Yehowa lɛ amli, shi eŋɔɔ wɔnaa waa akɛ wɔnyɛ wɔkɛ aaafee afii 70 esɔmɔ “miishɛɛ Nyɔŋmɔ lɛ” yɛ ŋshɔkpɔ ni ji Cuba nɛɛ nɔ!—1 Tim. 1:11; Lala 97:1.