Mɛni Wɔbaanyɛ Wɔfee Koni Wɔya Nɔ Wɔye Anɔkwa Kɛ́ Wɔkɛ Naagbai Miikpe?

1-2. Gbi ko be ni Yesu miitsɔɔ nii yɛ Kapernaum lɛ, mɛni ba?

GBI KO LƐ, Yesu miitsɔɔ ekaselɔi komɛi nii yɛ Kapernaum. Be ni etsɔɔ amɛ nii lɛ kɛshɛ he ko lɛ, ekɛɛ amɛ akɛ: “Kɛji nyɛyeee gbɔmɔ Bi lɛ heloo lɛ, ni nyɛnuuu elá lɛ, nyɛbɛ wala yɛ nyɛmli. Mɔ fɛɛ mɔ ni yeɔ miheloo ni enuɔ milá lɛ yɛ naanɔ wala, ni matee lɛ shi yɛ naagbee gbi lɛ nɔ.” (Yoh. 6:​53, 54) Ekaselɔi lɛ ateŋ mɛi pii nyaaa nɔ ni ewie nɛɛ he. Amɛwie akɛ: “Wiemɔ ni wa nɛ; namɔ baanyɛ abo toi?”—Yoh. 6:60.

² Kaselɔi lɛ ni eyanyaaa nɔ ni Yesu wie lɛ he lɛ kpa esɛɛnyiɛmɔ. Ani no mli lɛ, amɛbɛ hemɔkɛyeli ko kwraa yɛ emli? Yɛ gbi ni tsɔ gbi nɛɛ hiɛ lɛ mli lɛ, Yesu fee naakpɛɛ nii ko ni ekaselɔi lɛ anaa kpɛ amɛhe aahu akɛ, amɛwie akɛ: “Mɔ nɛ ji Gbalɔ ni baa je lɛ mli lɛ lɛɛlɛŋ.” (Yoh. 6:14) Enɛ tsɔɔ akɛ, amɛhe Yesu nɔ amɛye. Shi be ni Yesu wie nɔ ko ni amɛyanuuu shishi lɛ, amɛkpa esɛɛnyiɛmɔ.

3. Te Yesu bɔfoi lɛ fee amɛnii amɛhã tɛŋŋ yɛ nɔ ni ewie lɛ he? Ni mɛni hewɔ amɛfee nakai? (Kwɛmɔ mfoniri lɛ hu.)

³ Shi esoro bɔ ni Yesu bɔfoi lɛ fee amɛnii amɛhã yɛ nɔ ni ewie lɛ he. Be ni Yesu bi amɛ kɛji amɛ hu amɛmiisumɔ ni amɛkpa esɛɛnyiɛmɔ lɛ, Petro hã lɛ hetoo akɛ: “Nuŋtsɔ, namɔ ŋɔɔ wɔbaaya? Bo oyɔɔ naanɔ wala wiemɔi lɛ. Wɔ lɛ, wɔhe wɔye ni wɔná wɔle hu akɛ bo ji Mɔ Krɔŋkrɔŋ ni jɛ Nyɔŋmɔ ŋɔɔ lɛ.” (Yoh. 6:​68, 69) Eeenyɛ efee akɛ, Petro kɛ bɔfoi krokomɛi lɛ hu nuuu nɔ ni Yesu tsɔɔ be ni ewie akɛ esa akɛ amɛye eheloo lɛ ni amɛnu elá lɛ shishi. Fɛɛ sɛɛ lɛ, amɛkpaaa esɛɛnyiɛmɔ. Mɛni hewɔ? Ejaakɛ amɛhe amɛye waa akɛ, Yesu ji “Kristo lɛ, mɔ ni Nyɔŋmɔ etsu lɛ lɛ.”—Luka 9:​20, 35.

4. Mɛɛ shihilɛi komɛi wɔbaanyɛ wɔkɛkpe ni baabi ni wɔtsɔɔ kɛji wɔyeɔ Yehowa anɔkwa loo wɔyeee lɛ anɔkwa?

⁴ Wɔkɛ shihilɛi komɛi kpeɔ ni biɔ ni wɔtsɔɔ kɛji wɔyeɔ Yehowa anɔkwa loo wɔyeee lɛ anɔkwa. Shihilɛi lɛ ekome ji, be ni Yehowa asafo lɛ etsake bɔ ni wɔnuɔ ŋmalɛ ko shishi wɔhãa loo gbɛ ni wɔtsɔɔ nɔ wɔshiɛɔ sane kpakpa lɛ. Ekroko hu ji, be ni sane fɔŋ ko enina wɔ ni wɔnuuu nɔ hewɔ ni Yehowa ŋmɛ gbɛ ni eba wɔnɔ lɛ shishi. Shihilɛi lɛ eko hu ji, be ni mɔ ko ni wɔsumɔɔ esane waa lɛ efee nɔ ko ni edɔ wɔ, loo be ni wɔmiinu he akɛ mɔ ko ni wɔbuɔ lɛ waa lɛ kɛ wɔ yeee jogbaŋŋ.

5. Mɛni hewɔ esa akɛ wɔya nɔ wɔfee nibii ni baahã wɔhe Yehowa nɔ wɔye waa? Okɛ nɔkwɛmɔnɔ ko atsɔɔ mli. (Kolosebii 1:23)

⁵ Kɛ́ wɔkɛ shihilɛi ni mli wawai miikpe lɛ, nɔ ni baaye abua wɔ ni wɔya nɔ wɔye Yehowa anɔkwa ji, ni wɔbaahe lɛ wɔye waa. Akɛ nɔkwɛmɔnɔ lɛ, kɛ́ wɔmiima tsũ yɛ he ko ni ewaaa akɛ shikpɔŋhosomɔ baaba yɛ jɛmɛ lɛ, esa akɛ wɔtse wɔhe wɔtswa faneshi lɛ jogbaŋŋ. Yɛ nakai gbɛ nɔŋŋ nɔ lɛ, kɛ́ wɔkɛ shihilɛi ni mli wawai tamɔ nɔ ni wɔtsĩ tã yɛ kuku ejwɛ lɛ mli lɛ miikpe lɛ, ja wɔheɔ Yehowa nɔ wɔyeɔ waa dani wɔbaanyɛ wɔya nɔ wɔye lɛ anɔkwa. No hewɔ lɛ, esa akɛ wɔya nɔ wɔfee nibii ni baahã wɔhe Yehowa nɔ wɔye waa koni wɔya nɔ wɔsɔmɔ lɛ, ekɔɔɔ he eko nɔ ni baaba.—1 Kor. 15:58; kanemɔ Kolosebii 1:23.

6. Mɛni ye ebua Yesu bɔfoi lɛ ni amɛtee nɔ amɛnyiɛ esɛɛ?

⁶ Mɛni ye ebua Yesu bɔfoi lɛ ni amɛtee nɔ amɛnyiɛ esɛɛ be ni ekaselɔi lɛ pii kpa esɛɛnyiɛmɔ lɛ? Amɛhe anɔkwa saji etɛ komɛi amɛye waa. Nomɛi ji, Yehowa ji mɔ ni esa akɛ ajá, ejaakɛ lɛ ebɔ nibii fɛɛ. Nɔ ni ji enyɔ lɛ, Yesu ji Nyɔŋmɔ Bi, ni akɛ, lɛ eyɔɔ “naanɔ wala wiemɔi lɛ.” Kɛ naagbee lɛ, Yehowa miifi Yesu sɛɛ waa. Wɔkase nibii komɛi yɛ Yehowa he ni baanyɛ aye abua wɔ ni wɔya nɔ wɔye Yehowa anɔkwa kɛ́ wɔkɛ shihilɛi ni mli wawai miikpe. Nomɛi ji: (1) Yehowa ji mɔ ni bɔ nibii fɛɛ. (2) Yehowa wiemɔi ni yɔɔ Biblia lɛ mli. (3) Yehowa Odasefoi ji mɛi ni Yehowa kɛmiitsu nii ŋmɛnɛ. Kɛ́ wɔheɔ anɔkwa saji nɛɛ wɔyeɔ kɛ wɔtsui fɛɛ lɛ, no lɛ, ekɔɔɔ he eko shihilɛ ni wɔkɛbaakpe lɛ, wɔbaaya nɔ wɔye Yehowa anɔkwa.

YEHOWA JI MƆ NI BƆ NIBII FƐƐ

7. Mɛni Kpojiemɔ 4:11 lɛ hãa wɔleɔ? Shi mɛni baanyɛ aba kɛ́ wɔkɛ shihilɛ ko ni mli wa miikpe?

⁷ Kanemɔ Kpojiemɔ 4:11. Ŋmalɛ nɛɛ hãa wɔnaa akɛ, Yehowa ji mɔ ni bɔ nibii fɛɛ. Enɛ ji yiŋtoo kome ni he hiaa waa hewɔ ni esa akɛ wɔjá lɛ. Kɛ́ wɔjwɛŋ bɔ ni eyɔɔ hewalɛ waa ehã lɛ nɔ lɛ, ehãa hemɔkɛyeli ni wɔyɔɔ akɛ ebaanyɛ eye ebua wɔ kɛ́ wɔyaje shihilɛ ko ni mli wa waa po mli lɛ mli waa. Shi, Satan egbɛ amalei ni baahã mɛi ajwɛŋmɔ afee amɛ enyɔnyɔɔnyɔ akɛ Nyɔŋmɔ yɛ lɛ eshwa je lɛŋ fɛɛ. Jeŋ shikpalɔi komɛi po ewie akɛ jeee mɔ ko ni bɔ je lɛ. Kɛ́ wɔheee wɔyeee kɛ wɔtsui fɛɛ akɛ Yehowa ni bɔ nibii fɛɛ ni esumɔɔ wɔ lɛ, no lɛ, kɛ́ wɔkɛ shihilɛ ko ni mli wa miikpe lɛ, ewaaa akɛ wɔjwɛŋmɔ baafee wɔ enyɔnyɔɔnyɔ akɛ Nyɔŋmɔ yɛ, ni akɛ, ebaaye ebua wɔ.—Heb. 11:6.

8-9. Kɛ́ ojwɛŋmɔ bɔi bo enyɔnyɔɔnyɔ feemɔ akɛ Yehowa ni bɔ nibii fɛɛ lɛ, mɛni esa akɛ ofee? (Kwɛmɔ mfoniri lɛ hu.)

⁸ Kɛ́ ojwɛŋmɔ bɔi bo enyɔnyɔɔnyɔ feemɔ akɛ Yehowa ni bɔ nibii fɛɛ lɛ, esa akɛ ofee nɔ ko yɛ he oya nɔŋŋ. Taomɔ nii amli jogbaŋŋ yɛ asafo lɛ woji lɛ amli koni ona nɔ hewɔ ni obaanyɛ ohe oye akɛ Yehowa ni bɔ nibii fɛɛ lɛ. Saji ni yɔɔ Was Life Created? kɛ The Origin of Life—Five Questions Worth Asking broshuɔi lɛ amli lɛ baanyɛ ahã ohe oye waa akɛ Yehowa ni bɔ nibii fɛɛ. Saji krokomɛi ni baahã ohe oye waa akɛ Yehowa ni bɔ nibii fɛɛ lɛ yɛ saji kɛ vidioi ni yitso ji “Ani Mɔ Ko Ni Fee?” ni yɔɔ jw.org lɛ nɔ lɛ mli. Nyɛmi oblayoo ko ni atsɛɔ lɛ Jessica ni yɔɔ United States lɛ, wie akɛ: “Be ni mikane The Origin of Life broshuɔ lɛ, ebafee faŋŋ waa kɛhã mi akɛ mɔ ko ni bɔ nibii fɛɛ. No mli lɛ, mile enɛ momo, shi be ni mijwɛŋ sane ni yɔɔ nakai broshuɔ lɛ mli lɛ nɔ lɛ, miyiŋ tsɔ kwraa akɛ mɔ ko ni bɔ nibii.” Wolo kroko ni mɛi babaoo ná he sɛɛ be ni amɛkane lɛ ji, Is There a Creator Who Cares About You? Ekolɛ okane saji kɛ woji nɛɛ pɛŋ, shi kɛ́ ebaahi lɛ, kanemɔ ekoŋŋ.

⁹ Otsi nɛɛ kɛ́ oofee aŋkro nikasemɔ lɛ, obaanyɛ okase saji ni baahã ohe oye akɛ Nyɔŋmɔ yɛ. Kɛ́ ofee nakai lɛ, ebaahã ohe oye waa akɛ eyɛ, ni agbɛnɛ hu, ebaaye ebua bo ni ole lɛ jogbaŋŋ. (Rom. 1:20) Agbɛnɛ hu, obaanyɛ okɛ nibii ni okase lɛ aye abua mɛi krokomɛi ni jwɛŋmɔ miifee amɛ enyɔnyɔɔnyɔ akɛ Nyɔŋmɔ yɛ lɛ. Oti ni yɔɔ saji ni wɔwie he nɛɛ fɛɛ mli ji: Yehowa etsɔ nibii ni ebɔ lɛ anɔ ehã ana faŋŋ akɛ eyɛ.

Nebula: IAC/RGO/David Malin Images; fish and car: Mercedes-Benz USA; plane: Kristen Bartlett/University of Florida

YEHOWA WIEMƆI NI YƆƆ BIBLIA LƐ MLI

10. Mɛni hewɔ Biblia lɛ ji wolo ni he hiaa fe fɛɛ yɛ wɔshihilɛ mli lɛ? (2 Timoteo 3:​16, 17)

¹⁰ Kanemɔ 2 Timoteo 3:​16, 17. Yehowa hã aŋmala saji ni yɔɔ Biblia lɛ mli lɛ ahã adesai. Biblia lɛ yeɔ ebuaa wɔ ni wɔnáa sanebimɔi komɛi ni he hiaa waa lɛ ahetoo. Sanebimɔi lɛ ekomɛi ji: Te fee tɛŋŋ ni tsei, kooloi, kɛ gbɔmɛi ba shihilɛ mli? Mɛni hewɔ wɔyɔɔ shihilɛ mli? Kɛ mɛni Nyɔŋmɔ miisumɔ ni wɔfee? Wɔheɔ wɔyeɔ akɛ Biblia lɛ jɛ Yehowa ŋɔɔ. Enɛ hewɔ lɛ, eji wolo ni he hiaa fe fɛɛ yɛ wɔshihilɛ mli. Kɛ́ wɔkane sane ko yɛ Biblia lɛ mli lɛ, esa akɛ wɔnu nɔ ni wɔkane lɛ shishi ni wɔkɛtsu nii.

11. Mɛni hãa oyiŋ tsɔɔ akɛ Nyɔŋmɔ wiemɔi ni yɔɔ Biblia lɛ mli lɛ?

¹¹ Mɛni hãa wɔyiŋ tsɔɔ akɛ Yehowa wiemɔi ni yɔɔ Biblia lɛ mli lɛ? Yiŋtoi babaoo ahewɔ. Naa ekomɛi. Blema saji ni yɔɔ mli lɛ ji anɔkwale. (Luka 3:​1, 2) Agbɛnɛ hu, nɔ ni ewieɔ yɛ nibii ni abɔ lɛ ahe lɛ ji anɔkwale. (Hiob 26:7) Ekɔɔɔ he eko bɔ ni Satan bɔɔ mɔdɛŋ ni ehã akpãtã Biblia lɛ hiɛ lɛ, loloolo lɛ eji wolo ni atsɔɔ shishi kɛtee wiemɔi pii amli fe woji krokomɛi fɛɛ, ni aprinti pii hu fe woji krokomɛi fɛɛ. Hii srɔtoi aaafee 40 ni ŋmala woji ni yɔɔ Biblia lɛ mli lɛ, ni ehe aaafee afii 1,600 dani agbe naa. Fɛɛ sɛɛ lɛ, emli woji lɛ eko eteee shi ewooo eko. Eyɛ mli akɛ Biblia lɛ etsɛ waa moŋ, shi ŋaawoi ni yɔɔ mli lɛ abe hoko, ni eeye eebua mɛi akpekpei abɔ ŋmɛnɛ. (Abɛi 13:20; 15:21; Mat. 7:12) Biblia lɛ mli gbalɛi pii eba mli, ni no ji yiŋtoo kroko hewɔ ni wɔbaanyɛ wɔhe saji ni yɔɔ mli lɛ wɔye. (Yos. 23:14) Yiŋtoi nɛɛ kɛ ekrokomɛi ahewɔ lɛ, wɔheɔ wɔyeɔ kɛ wɔtsui fɛɛ akɛ, Nyɔŋmɔ wiemɔi ni yɔɔ Biblia lɛ mli lɛ!

12. Kɛ́ wɔjwɛŋmɔ bɔi wɔ enyɔnyɔɔnyɔ feemɔ akɛ Nyɔŋmɔ wiemɔi ni yɔɔ Biblia lɛ mli lɛ, mɛni esa akɛ wɔfee?

¹² Kɛ́ wɔjwɛŋmɔ bɔi wɔ enyɔnyɔɔnyɔ feemɔ akɛ Nyɔŋmɔ wiemɔi ni yɔɔ Biblia lɛ mli lɛ, mɛni esa akɛ wɔfee? Esa akɛ wɔsɔle ni wɔkɛɛ Yehowa bɔ ni wɔnuɔ he wɔhãa, ni wɔbi lɛ ni ewa wɔ. No sɛɛ lɛ, esa akɛ wɔtao nii amli. Naa nɔ ni oblanyo ko ni atsɛɔ lɛ Jordan ni atsɔse lɛ yɛ asafo lɛ mli lɛ wie: “Mi lɛ, kɛ́ mɔ ko kɛɛ mi nɔ ko lɛ, jeee nɔŋŋ kɛkɛ lɛ mihe miye, ekɔɔɔ he eko mɔ ni mɔ lɛ ji. Dani mahe nɔ ko maye lɛ, misumɔɔ ni makwɛ akɛ eji anɔkwale lo. Yɛ anɔkwale mli lɛ, bei komɛi lɛ, kɛ́ mikane nɔ ko loo minu nɔ ko ni kɔɔ Biblia lɛ he lɛ, miyiŋ feɔ mi enyɔnyɔɔnyɔ yɛ he. Kɛ́ eba lɛ nakai lɛ, mitaoɔ nii amli yɛ asafo lɛ woji lɛ amli koni mijwɛŋmɔ akã mi shi.” Kɛ́ wɔyaa nɔ wɔsusuɔ nɔ hewɔ ni wɔheɔ wɔyeɔ akɛ Nyɔŋmɔ wiemɔi ni yɔɔ Biblia lɛ mli lɛ ahe lɛ, no baahã wɔhemɔkɛyeli lɛ mli awa.—1 Kor. 3:​12, 13.

YEHOWA ODASEFOI JI MƐI NI YEHOWA KƐMIITSU NII ŊMƐNƐ

13. Kɛ́ wɔjwɛŋmɔ bɔi wɔ enyɔnyɔɔnyɔ feemɔ akɛ Yehowa Odasefoi ji mɛi ni Yehowa kɛmiitsu nii ŋmɛnɛ lɛ, mɛni esa akɛ wɔfee?

¹³ Kɛ́ wɔjwɛŋmɔ bɔi wɔ enyɔnyɔɔnyɔ feemɔ akɛ Yehowa Odasefoi ji mɛi ni Yehowa kɛmiitsu nii ŋmɛnɛ lɛ, esa akɛ wɔfee nɔ ko yɛ he oya nɔŋŋ. Akɛ nɔkwɛmɔnɔ lɛ, wɔbaanyɛ wɔbi wɔhe saji tamɔ: ‘Namɛi bɔɔ mɔdɛŋ akɛ amɛkɛ nɔ ni Biblia lɛ wieɔ lɛ baatsu nii? Namɛi ni hãa nibii fɛɛ ni amɛheɔ amɛyeɔ lɛ damɔɔ Biblia lɛ nɔ?’ (2 Tim. 4:​3, 4) ‘Namɛi feɔ Yehowa suɔmɔnaa nii ŋmɛnɛ?’—Mat. 7:​20, 21.

14. Mɛɛ gbɛ nɔ Yehowa miitsɔ Yehowa Odasefoi anɔ koni ehã gbalɛ ni yɔɔ Mateo 24:14 lɛ aba mli?

¹⁴ Nyɔŋmɔ miisumɔ ni mɔ fɛɛ mɔ anu sane kpakpa lɛ dani ekpãtã jeŋ fɔŋ nɛɛ hiɛ. No hewɔ lɛ, wɔbaanyɛ wɔbi wɔhe akɛ, ‘Namɛi shiɛɔ sane kpakpa lɛ ŋmɛnɛ?’ (Mat. 24:14) Eyɛ faŋŋ akɛ, Yehowa miitsɔ Yehowa Odasefoi anɔ eetsu enɛ he nii. Yehowa Odasefoi pɛ ni shiɛɔ Nyɔŋmɔ Maŋtsɛyeli lɛ he sane kpakpa lɛ yɛ maji ni fa fe 240 anɔ. Wɔtsu nitsumɔ nɛɛ nɔ ni fa fe afii 100. Anɔkwa, shiɛmɔ kɛ kaselɔfeemɔ nitsumɔ lɛ ji nitsumɔ ni he hiaa wɔ fe fɛɛ.—Mat. 28:​19, 20.

15. Mɛɛ gbɛ nɔ Yehowa Odasefoi hãa awoɔ Nyɔŋmɔ gbɛ́i lɛ hiɛnyam? (Yesaia 43:10; Mateo 6:9)

¹⁵ Kanemɔ Yesaia 43:10 kɛ Mateo 6:9. Atsɛɔ wɔ Yehowa Odasefoi, ni eji hegbɛ kpele akɛ Nyɔŋmɔ gbɛ́i lɛ kã wɔnɔ. Ŋmɛnɛ lɛ, mɛi pii leee akɛ Nyɔŋmɔ gbɛ́i ji Yehowa. Shi wɔbɔ mɔdɛŋ waa wɔtsɔɔ Biblia lɛ shishi kɛtee wiemɔi pii amli, ni wɔkɛ Nyɔŋmɔ gbɛ́i lɛ ewo he fɛɛ he ni esa akɛ eje kpo yɛ. Nyɔŋmɔ gbɛ́i lɛ jeɔ kpo nɔ ni fa fe shii 7,000 sɔŋŋ yɛ Ŋmalɛ Krɔŋkrɔŋ Lɛ—Jeŋ Hee Shishitsɔɔmɔ lɛ mli.

16. Mɛni tsɔɔ akɛ Yehowa Odasefoi miiye famɔ ni yɔɔ Yohane 13:​34, 35 lɛ nɔ? (Kwɛmɔ mfoniri lɛ hu.)

¹⁶ Kanemɔ Yohane 13:​34, 35. Ŋmɛnɛ lɛ, mɛi pii kɛ amɛhe kpãaa gbee, ni amɛnyɛɔ amɛhe. Shi esoro wɔ, Yehowa webii lɛ kwraa. Wɔsumɔɔ wɔhe ni ekomefeemɔ yɛ wɔteŋ. Wɔyɛ maji srɔtoi anɔ ni wɔmiitsɔmɔ shihilɛi srɔtoi amli, shi loloolo lɛ, wɔbɔɔ mɔdɛŋ wɔbaa toiŋjɔlɛ ni yɔɔ wɔteŋ lɛ yi, ni wɔsumɔɔ wɔhe. Akɛ nɔkwɛmɔnɔ lɛ, ani ofã gbɛ, ni no hewɔ lɛ ebabi ni oya asafoŋ kpee yɛ he kroko pɛŋ? Kɛ́ nakai lɛ, ekã shi faŋŋ akɛ oyɔse akɛ ekomefeemɔ yɛ nyɛmimɛi lɛ ateŋ ni amɛsumɔɔ amɛhe ekɔɔɔ he eko he ni amɛyɔɔ. Enɛ hãa wɔnaa faŋŋ akɛ, Yehowa kɛ e-Dasefoi lɛ miitsu nii ŋmɛnɛ koni eyiŋtoo aba mli. Kɛ́ wɔhã ehi wɔjwɛŋmɔ mli akɛ Yehowa kɛ wɔ yɛ lɛ, no baahã wɔye lɛ anɔkwa ekɔɔɔ he eko shihilɛ ni wɔkɛbaakpe.

KAASHI YEHOWA MASƐI

17-18. Mɛɛ shihilɛi ni mli wawai wɔbaanyɛ wɔkɛkpe? Shi mɛni wɔbaanyɛ wɔwie kɛ nɔmimaa?

¹⁷ Akɛni wɔyɛ naagbee gbii lɛ amli hewɔ lɛ, wɔkɛ shihilɛi ni mli wawai baakpe. (2 Tim. 3:​1, 13) Ni ekolɛ, nibii krokomɛi baaba ni baahã wɔhao. Akɛ nɔkwɛmɔnɔ lɛ, asafo lɛ kɛ gbɛtsɔɔmɔi komɛi baanyɛ ahã ni ekolɛ wɔnuuu shishi jogbaŋŋ. Aloo nyɛmi ko baanyɛ afee nɔ ko ni baagba wɔnaa. Ekolɛ wɔleee bɔ ni wɔbaafee wɔtsu wɔnaagbai nɛɛ ahe nii, loo ekolɛ loloolo lɛ, wɔnuuu nɔ hewɔ ni asafo lɛ kɛ gbɛtsɔɔmɔi komɛi hã lɛ shishi.

¹⁸ Eyɛ mli akɛ saji nɛɛ baanyɛ ahã wɔhao moŋ, shi wɔbaanyɛ wɔya nɔ wɔye Yehowa anɔkwa. Mɛni hewɔ? Ejaakɛ wɔle akɛ lɛ ji mɔ ni bɔ nibii fɛɛ, ewiemɔi ni yɔɔ Biblia lɛ mli, ni akɛ, Yehowa Odasefoi ji ewebii. No hewɔ lɛ, bɔ ni Petro kɛɛ Yesu lɛ, wɔ hu wɔbaanyɛ wɔkɛɛ Yehowa akɛ: “Namɔ ŋɔɔ wɔbaaya? Bo oyɔɔ naanɔ wala wiemɔi lɛ.”