Ani Okaiɔ?
Ani okane Buu-Mɔɔ srɔtoi ni ba afi nɛɛ jogbaŋŋ? Kwɛmɔ akɛ obaanyɛ ohã sanebimɔi ni nyiɛ sɛɛ nɛɛ ahetoo lo:
Mɛni tsirɛɔ wɔ ni wɔkɛ anunyam ahã Yehowa?
Wɔkɛ anunyam hãa Yehowa ejaakɛ wɔbuɔ lɛ ni wɔsumɔɔ lɛ waa. Agbɛnɛ hu, wɔkɛ anunyam hãa Yehowa ejaakɛ wɔmiisumɔ ni mɛi ale lɛ.—w25.01, bf. 3.
Kɛ́ mɔ ko fee wɔ nɔ ko ni edɔ wɔ lɛ, mɛni kɛ́ wɔfee lɛ ebaahã wɔkɛke lɛ tswaa?
Esaaa akɛ wɔkuɔ wɔhiɛ wɔshwieɔ bɔ ni wɔnuɔ he wɔhãa lɛ nɔ; kɛ̃lɛ, kɛ́ wɔjieee dɔlɛ lɛ kɛ mlifu lɛ yɛ wɔmli lɛ, ebaaye wɔ awui.—w25.02, bf. 15-16.
Mɛɛ gbɛ nɔ oblahii ni yɔɔ asafo lɛ mli lɛ baanyɛ akase Marko?
Marko jɛ esuɔmɔ mli esɔmɔ mɛi krokomɛi. Be ni Paulo yaa emaŋsɛɛ sɔɔmɔ gbɛfãa ni ji enyɔ lɛ, ekpɛ eyiŋ akɛ ekɛ Marko eyaŋ. Sane lɛ dɔ Marko waa ni egba enaa, shi no hãa enijiaŋ aje wui. Marko kɛ Kristofoi ni he wa yɛ hemɔkɛyeli lɛ mli tamɔ Paulo kɛ mɛi krokomɛi bɔ.—w25.04, bf. 27.
Be ni Yesu sɔle akɛ: “Mihã amɛle ogbɛ́i lɛ,” no mli lɛ, te etsɔɔ tɛŋŋ? (Yoh. 17:26)
No mli lɛ, ekaselɔi lɛ le Nyɔŋmɔ gbɛ́i momo. No hewɔ lɛ, etsɔɔ amɛ mɔ ni Yehowa ji, koni amɛle lɛ jogbaŋŋ. Etsɔɔ amɛ Yehowa yiŋtoo kɛhã shikpɔŋ lɛ kɛ adesai, nɔ ni efee, nɔ ni ebaafee, kɛ sui ni eyɔɔ.—w25.05, bf. 20-21.
Kɛ́ wɔbaa wɔhe shi lɛ, mɛni esa akɛ wɔyɔse yɛ wɔ diɛŋtsɛ wɔhe?
Esa akɛ wɔyɔse akɛ jeee nɔ fɛɛ nɔ wɔle. Akɛ nɔkwɛmɔnɔ lɛ, wɔleee be ni naagbee lɛ baaba, ni wɔleee nɔ tuuntu ni Yehowa baafee. Esa akɛ wɔkpɛlɛ nɔ hu akɛ wɔleee nɔ ni baaba wɔ́, ni wɔjwɛŋmɔ nyɛŋ ashɛ bɔ ni Yehowa le wɔ jogbaŋŋ ehã lɛ he.—w25.06, bf. 15-18.
Te wɔbaafee tɛŋŋ wɔná asafo lɛ wolo ko ni wɔkane loo maŋshiɛmɔ ko ni ahã lɛ he sɛɛ?
Wɔbaanyɛ wɔbi wɔhe akɛ: ‘Mɛni akɛtsɔɔ sane lɛ naa? Ani nɔkwɛmɔnɔ ko yɛ mli ni mi hu manyɛ mikɛtsu nii kɛ́ miigbala sane nɛɛ mli miihã mɔ ko? Namɔ baanya sane nɛɛ he?’—w25.07, bf. 19.
Be ni David fee esha lɛ, Yehowa kɛke lɛ kwraa. Mɛni wɔbaanyɛ wɔkase yɛ mli?
David fee eshai ni yɔɔ hiɛdɔɔ waa. Shi be ni etsake etsui lɛ, Yehowa kɛke lɛ. (1 Maŋ. 9:4, 5) Kɛ́ Yehowa kɛ wɔhe eshai ke wɔ lɛ, ejieɔ ejwɛŋmɔ kɛjeɔ nɔ ni ekaiii po dɔŋŋ.—w25.08, bf. 17.
Kɛ́ ewa kɛhã o-Biblia mli nikaselɔ ko akɛ ebaanu oti ko shishi lɛ, mɛni obaanyɛ ofee?
Kɛ́ obɔ mɔdɛŋ ojɛ Biblia lɛ mli ogbala oti ko mli ohã o-Biblia mli nikaselɔ ko, shi loloolo lɛ, enuuu shishi lɛ, obaanyɛ okɛ nakai oti lɛ akpasa shi dã, koni sɛɛ mli lɛ oto gbɛjianɔ ni okɛ lɛ ayasusu he ekoŋŋ.—w25.09, bf. 24.
Biblia lɛ hãa wɔleɔ akɛ esha baanyɛ ‘alaka’ wɔ. (Heb. 3:13) Mɛɛ gbɛ nɔ ebaanyɛ eba lɛ nakai?
Esha baanyɛ alaka wɔ ni wɔfee nibii gbohii. Ebaanyɛ ehã wɔyiŋ afee wɔ enyɔnyɔɔnyɔ, ni wɔnu he akɛ Yehowa sumɔɔɔ wɔ.—w25.10, bf. 16.
Kɛ́ wɔmiitao wɔtsɔ wɔsɔlemɔi anɔ wɔhã wɔ kɛ Yehowa teŋ naanyobɔɔ lɛ mli awa lɛ, mɛɛ nibii etɛ komɛi wɔbaanyɛ wɔfee?
(1) Wɔbaanyɛ wɔsusu Yehowa sui lɛ ahe. (2) Wɔbaanyɛ wɔsusu naagbai pɔtɛi ni wɔkɛkpeɔ lɛ ahe, ni wɔkɛɛ Yehowa. Ekolɛ wɔbaanyɛ wɔkɛɛ lɛ mɔ ko ni etɔ̃ wɔnɔ ni esa akɛ wɔkɛ ehe ake lɛ lɛ nɛkɛ. (3) Kɛ́ wɔmiisɔle lɛ, esaaa akɛ wɔyeɔ wɔhe oyai, ejaakɛ kɛ́ wɔyeee wɔhe oyai lɛ, wɔbaanyɛ wɔgba Yehowa saji pii.—w25.10, bf. 19-20.
Mɛni wɔbaanyɛ wɔfee kɛye wɔbua mɛi ni edara yɛ afii amli lɛ?
Wɔbaanyɛ wɔyasara amɛ loo wɔtswa amɛ. Wɔbaanyɛ wɔkɛ amɛ aya helatsamɔhe. Agbɛnɛ hu, wɔbaanyɛ wɔkɛ amɛ atsu shiɛmɔ nitsumɔ lɛ fãi srɔtoi lɛ.—w25.11, bf. 6-7.
Kɛ́ Kristofoi miitao amɛyookpeemɔ lɛ awo Yehowa hiɛnyam lɛ, mɛni esa akɛ amɛfee?
Esa akɛ amɛye maŋ lɛ mlai ni kɔɔ gbalamlibotemɔ he lɛ anɔ, amɛkwɛ ni bulɛ ahi nifeemɔ lɛ he, ni amɛhã ana faŋŋ akɛ Nyɔŋmɔ mumɔ lɛ ni kudɔɔ amɛ. Agbɛnɛ hu, esa akɛ amɛhesaamɔ afee nɔ ni yɔɔ hiŋmɛi nɔ, amɛkwɛ ni amɛkafee nɔ ko ni teɔ shi ewoɔ Ŋmalɛ lɛ, ni amɛjɛ bulɛ kɛ naajɔlɛ mli amɛwie kɛ́ amɛmiisusu bɔ ni nifeemɔ lɛ baaya lɛ ahã lɛ he.—w25.12, bf. 21-24.