Kasemɔ Bɔ Ni Yehowa Baa Ehe Shi Lɛ

1. Mɛni hewɔ esa kadimɔ waa akɛ Yehowa baa ehe shi lɛ?

ŊMƐNƐ LƐ, gbɔmɛi wuji kɛ mɛi ni abuɔ waa yɛ je lɛ mli lɛ ateŋ mɛi pii baaa amɛhe shi, aloo jeee nakai? Kɛ̃lɛ, Yehowa, mɔ ni nɔ kwɔ fe fɛɛ lɛ, baa ehe shi. (Lala 113:​5-8) Mɔ ko mɔ ko bɛ ni baa ehe shi fe lɛ; ewóoo ehe nɔ bibioo po. Yɛ nikasemɔ nɛɛ mli lɛ, wɔbaakwɛ sui ejwɛ ni wɔnaa yɛ bɔ ni Yehowa kɛ wɔ yeɔ ehãa lɛ mli, kɛ bɔ ni sui nɛɛ ateŋ eko fɛɛ eko hãa wɔnaa akɛ ebaa ehe shi waa. Kɛfata he lɛ, wɔbaakwɛ bɔ ni Yesu baa ehe shi tamɔ e-Tsɛ lɛ. Nibii nɛɛ ni wɔbaakase lɛ baahã wɔsumɔ Yehowa waa, ni ebaaye ebua wɔ ni wɔkase lɛ ni wɔba wɔhe shi waa fe bɔ ni wɔfeɔ bianɛ lɛ po.

YEHOWA SUMƆƆ NI WƆTSI WƆBƐŊKƐ LƐ

2. Mɛni Lala 62:8 lɛ hãa wɔleɔ yɛ Yehowa he? (Kwɛmɔ mfoniri lɛ hu.)

² Bei pii lɛ, kɛ́ mɛi na akɛ mɔ ko wóɔ ehe nɔ lɛ, amɛbɛŋkɛɛɛ lɛ, ni mɛi komɛi tsiɔ amɛhe kɛjeɔ ehe po. Mɛni hewɔ? Nɔ hewɔ lɛ ji, mɛi ni wóɔ amɛhe nɔ lɛ nuɔ he akɛ amɛhi fe mɛi krokomɛi, ni no hãa amɛkɛ mɛi yeɔ bɔ ni esaaa. Shi Yehowa, wɔ-Tsɛ ni yɔɔ ŋwɛi lɛ, bɛ nakai kwraa! Ebaa ehe shi, ni no hewɔ lɛ, eesumɔ ni wɔba eŋɔɔ ni wɔgba lɛ nibii fɛɛ ni gbaa wɔnaa kɛ nibii fɛɛ ni yeɔ wɔtsui. (Kanemɔ Lala 62:8.) Bɔ ni tsɛ kpakpa sumɔɔ ni ebii akɛɛ lɛ nibii ni gbaa amɛnaa lɛ, nakai nɔŋŋ Yehowa hu miisumɔ ni wɔsɔle wɔhã lɛ ni wɔgba lɛ nɔ fɛɛ nɔ ni gbaa wɔnaa. Kɛ́ okwɛ Biblia lɛ mli lɛ, obaana akɛ ehã aŋmala etsuji anɔkwafoi pii asɔlemɔi yɛ mli. Enɛ hãa wɔnaa lɛɛlɛŋ akɛ, eesumɔ ni wɔsɔle wɔhã lɛ. (Yos. 10:​12-14; 1 Sam. 1:​10-18) Shi kɛ́ wɔnuɔ he akɛ wɔtɔmɔi lɛ fa tsɔ, ni no hewɔ lɛ kɛ́ wɔsɔle lɛ Yehowa boŋ toi hu? Mɛni wɔbaanyɛ wɔfee?

3. Mɛni hãa onaa akɛ, Yehowa miisumɔ ni osɔle ohã lɛ daa?

³ Wɔbaanyɛ wɔsɔle wɔhã Yehowa kɛ́ wɔnuɔ he akɛ wɔhe eshai lɛ fa bɔ ni eboŋ wɔ toi po. Mɛni hewɔ wɔkɛɔ nakai? Ani okaiɔ bi nyenyeŋtswi lɛ he nɔkwɛmɔnɔ lɛ ni Yesu gba lɛ? Be ni bi lɛ tsake etsui ni ekpɛ eyiŋ akɛ ebaaku esɛɛ eya shĩa lɛ, eyashe gbeyei akɛ epapa hereŋ lɛ hiɛmɛɛ. Shi te epapa fee enii ehã tɛŋŋ? Yesu wie akɛ, be ni papa lɛ hiŋmɛi gba ebi lɛ nɔ lɛ, “esha foi ni eyafua lɛ atuu ni ekɛ suɔmɔ shɔ enaa.” (Luka 15:​17-20) Yehowa tamɔ nakai tsɛ ni mli hi lɛ. Kɛ́ eshai komɛi ni wɔfee lɛ hã wɔtsui kumɔ loo wɔhao waa ni wɔsɔle wɔhã lɛ lɛ, eboɔ wɔ toi jogbaŋŋ. (Yaf. 3:​19, 20) Yehowa musuŋ tsɔɔ lɛ tamɔ bɔ ni tsɛ lɛ musuŋ tsɔ lɛ yɛ ebi lɛ he lɛ, ni eshaa foi kɛbaa wɔŋɔɔ koni ebashɛje wɔmii ni ehã wɔna akɛ esumɔɔ wɔ ni ebaana wɔ mɔbɔ. (Yes. 57:15) Namɛi anɔ Yehowa tsɔɔ ‘eshaa foi’ kɛbaa wɔŋɔɔ lɛ? Bei pii lɛ, etsɔɔ asafoŋ onukpai lɛ, wɔwekumɛi ni yɔɔ asafo lɛ mli lɛ, kɛ wɔnyɛmimɛi Kristofoi lɛ anɔ efeɔ nakai. (Yak. 5:​14, 15) No hewɔ lɛ, kɛ́ wɔtsui kumɔ loo wɔhao lɛ, Yehowa baaye ebua wɔ, ejaakɛ eesumɔ ni wɔhi emasɛi.

4. Mɛni hewɔ mɛi sheee gbeyei kwraa akɛ amɛbaaya Yesu ŋɔɔ lɛ?

⁴ Mɛɛ gbɛ nɔ Yesu kase e-Tsɛ lɛ? Yesu baa ehe shi tamɔ e-Tsɛ lɛ. Enɛ hewɔ lɛ, be ni eyɔɔ shikpɔŋ lɛ nɔ lɛ, mɛi sheee gbeyei kwraa akɛ amɛbaaya eŋɔɔ. Amɛnyɛ amɛbi lɛ saji, ni no hewɔ lɛ, kɛ́ lɛ hu ebi amɛ amɛsusumɔ yɛ sane ko he lɛ, amɛjɛɔ amɛtsuiŋ amɛkɛɔ lɛ. (Mat. 16:​13-16; Mar. 4:​10, 11) Agbɛnɛ hu, kɛ́ amɛtɔ̃ lɛ, amɛsheee gbeyei akɛ emli baafu amɛ, ejaakɛ amɛle akɛ emli hi, enaa mɔbɔ, ni etoɔ etsui shi. (Mat. 17:​24-27) Bɔ ni Yesu fee enii ehã lɛ hã esɛɛnyiɛlɔi lɛ na akɛ, Yehowa baa ehe shi ni esusuɔ amɛhe. (Yoh. 14:9) Amɛna akɛ, bɔ ni amɛjamɔŋ hiɛnyiɛlɔi lɛ wóɔ amɛhe nɔ ni amɛfeɔ amɛ hãihãi lɛ, jeee nakai kwraa Yehowa feɔ enii.

5. Kɛ́ wɔbaa wɔhe shi lɛ, mɛɛ gbɛ nɔ no baahã efee mlɛo kɛhã mɛi akɛ amɛbaaba wɔŋɔɔ?

⁵ Mɛɛ gbɛ nɔ wɔbaanyɛ wɔkase Yehowa? Kɛ́ wɔbaa wɔhe shi lɛ, mɛi sheŋ gbeyei akɛ amɛbaaba wɔŋɔɔ. Mɛi ni baaa amɛhe shi lɛ ahe tsɛ̃ɔ mɛi, amɛnuɔ he akɛ amɛhi fe mɛi krokomɛi, ni ewa kɛhã amɛ akɛ amɛkɛ mɛi atɔmɔi baake amɛ. Sui gbohii nɛɛ shwieɔ mɛi yɛ amɛhe. Shi kɛ́ wɔbaa wɔhe shi lɛ, no baaye abua wɔ ni wɔmli ahi, wɔto wɔtsui shi, ni wɔkɛ mɛi atɔmɔi ake amɛ, ni enɛ baahã mɛi abɛŋkɛ wɔ. (Kol. 3:​12-14) Asafoŋ onukpai, esa akɛ nyɛmia nyɛhiɛ waa ni nyɛfee nibii ni baahã nyɛmimɛi lɛ anyɛ abɛŋkɛ nyɛ. Akɛ nɔkwɛmɔnɔ lɛ, esa akɛ nyɛmimɛi lɛ ana nyɛ. No hewɔ lɛ, ehi akɛ nyɛbaamia nyɛhiɛ ni nyɛba asafoŋ kpeei yɛ Maŋtsɛyeli Asa lɛ nɔ, moŋ fe ni nyɛkɛbaafee nyɛsu akɛ nyɛbaakɔnɛti yɛ videoconference nɔ. Agbɛnɛ hu, esa akɛ nyɛkɛ nyɛmimɛi lɛ afee ekome kɛtsu shĩa fɛɛ shĩa shiɛmɔ nitsumɔ lɛ be fɛɛ be ni hegbɛ lɛ baaba. Enɛ baahã nyɛmimɛi lɛ ale nyɛ jogbaŋŋ, ni ewaŋ kɛhãŋ amɛ akɛ amɛbaaba nyɛŋɔɔ kɛ́ amɛná naagba ko.

YEHOWA NUƆ NII ASHISHI

6-7. Mɛɛ nɔkwɛmɔnii hãa wɔnaa akɛ Yehowa bo etsuji komɛi anibimɔi toi, ni etsake eyiŋkpɛɛ?

⁶ Bei pii lɛ, mɛi ni wóɔ amɛhe nɔ lɛ nuɔ he akɛ amɛle fe mɔ fɛɛ mɔ. Anɔkwa, amɛsane ŋɔɔ amɛnaa. Shi Yehowa bɛ nakai. Lɛ lɛ, enuɔ nii ashishi ni eŋmɛɔ sane he, ejaakɛ ebaa ehe shi, tsɛbelɛ, ele nii fe mɔ fɛɛ mɔ. Wɔnaa enɛ he nɔkwɛmɔnɔ yɛ bɔ ni ekɛ Mose nyɛmi yoo Miriam ye ehã lɛ mli. Be ko lɛ, Miriam kɛ Aaron wie amɛshi Mose. Nɔ ni amɛfee nɛɛ yɛ hiɛdɔɔ waa, ejaakɛ no mli lɛ, Yehowa ehala Mose akɛ enajiaŋdamɔlɔ. No hewɔ lɛ, yɛ gbɛ ko nɔ lɛ, Yehowa amɛwie amɛshi lɛ. Yehowa mli fu Miriam waa yɛ enɛ hewɔ, ni ehã kpiti shwie lɛ. Shi Aaron kpa Mose fai ehã Miriam, ni Mose hu kpa Yehowa fai ni ekɛ Miriam he ake lɛ ni etsa lɛ. Mɛni Yehowa fee? Eji Yehowa wóɔ ehe nɔ kulɛ, efoŋ amɛdaaŋ. Shi efeee nakai; ebo Mose toi ni etsa Miriam.—4 Mo. 12:​1-15.

⁷ Bɔ ni Yehowa kɛ Maŋtsɛ Hezekia ye ehã lɛ hu hãa wɔnaa akɛ, ebaa ehe shi waa. Be ko be ni Hezekia he yeɔ lɛ, Yehowa tsu gbalɔ Yesaia ni eyakɛɛ lɛ akɛ ebaagbo. Shi Hezekia kɛ yaafo kpa Yehowa fai koni etsa lɛ. Yehowa bo lɛ toi, ena lɛ mɔbɔ ni ekɛ afii 15 fata ewala afii lɛ ahe ehã lɛ. (2 Maŋ. 20:​1, 5, 6) Anɔkwa, Yehowa nuɔ he ehãa adesai waa, ni akɛni ebaa ehe shi hewɔ lɛ, be fɛɛ be lɛ, efee klalo akɛ ebaabo amɛ toi.

8. Mɛni hãa wɔnaa akɛ Yesu nuɔ nii ashishi? (Marko 3:​1-6)

⁸ Mɛɛ gbɛ nɔ Yesu kase e-Tsɛ lɛ? Be ni Yesu yɔɔ shikpɔŋ lɛ nɔ lɛ, kɛ́ ená hegbɛ akɛ ebaaye ebua mɔ ko lɛ, efeee kpɛŋŋ yɛ mla lɛ he. Akɛ nɔkwɛmɔnɔ lɛ, etsa mɛi yɛ Hejɔɔmɔ Gbi lɛ nɔ eyɛ mli akɛ jamɔŋ hiɛnyiɛlɔi lɛ kɛɛ esaaa akɛ afeɔ nakai. Yesu yitsoŋ waaa, enaa mɔ mɔbɔ, ni enuɔ nii ashishi. (Kanemɔ Marko 3:​1-6.) Ŋmɛnɛ hu lɛ, Yesu kã he enaa mɔ mɔbɔ ni enuɔ nii ashishi, ni wɔnaa enɛ yɛ bɔ ni ekwɛɔ asafo lɛ nɔ ehãa lɛ mli. Akɛ nɔkwɛmɔnɔ lɛ, kɛ́ mɔ ko ni yɔɔ asafo lɛ mli lɛ fee esha ko ni yɔɔ hiɛdɔɔ lɛ, Yesu toɔ etsui shi ehãa lɛ koni enyɛ etsake etsui.—Kpo. 2:​2-5.

9. Mɛni kɛ́ wɔfee lɛ ebaatsɔɔ akɛ wɔnuɔ nii ashishi? (Kwɛmɔ mfonirii lɛ hu.)

⁹ Mɛɛ gbɛ nɔ wɔbaanyɛ wɔkase Yehowa? Esa akɛ wɔkase bɔ ni Yehowa susuɔ nii ahe kɛ bɔ ni efeɔ enii ehãa lɛ. (Yak. 3:17) Akɛ nɔkwɛmɔnɔ lɛ, fɔlɔi ni nuɔ nii ashishi lɛ kpaaa babaoo gbɛ kɛjɛɛɛ amɛbii lɛ adɛŋ. Yakob fee enɛ he nɔkwɛmɔnɔ, ni abɔ nakai sane lɛ he amaniɛ yɛ 1 Mose 33:​12-14 lɛ. Agbɛnɛ hu, esa akɛ fɔlɔi ni baa amɛhe shi ni nuɔ nii ashishi lɛ akwɛ jogbaŋŋ ni amɛkɛ amɛbi ko akato amɛbi kroko loo gbekɛbii krokomɛi ahe bɔ ni esaaa. Esa akɛ asafoŋ onukpai hu afee mɛi ni nuɔ nii ashishi. Kɛ́ asafoŋ onukpai lɛ kpe ni akpɛ yiŋ ko ni eteee shi ewooo Biblia mli shishitoo mla ko lɛ, esaaa akɛ asafoŋ onukpa ko maa nɔ mi doo akɛ akɛ lɛ esusumɔ lɛ atsu nii. (1 Tim. 3:​2, 3) Ni wɔ fɛɛ lɛ, kɛ́ esoro bɔ ni wɔnaa sane ko wɔhãa lɛ yɛ bɔ ni mɔ kroko naa nakai sane lɛ nɔŋŋ ehãa lɛ he po lɛ, esa akɛ wɔbɔ mɔdɛŋ akɛ wɔbaanu nɔ hewɔ ni mɔ lɛ naa lɛ nakai lɛ shishi. (Rom. 14:1) Esa akɛ mɔ fɛɛ mɔ ni yɔɔ asafo lɛ mli lɛ abɔ mɔdɛŋ akɛ ebaahã ‘gbɔmɛi fɛɛ ale eniiashishinumɔ lɛ.’—Fip. 4:5.

YEHOWA TOƆ ETSUI SHI

10. Mɛɛ saji wɔbaanyɛ wɔkɛtsɔɔ mli akɛ Yehowa toɔ etsui shi?

¹⁰ Ekolɛ oyɔse akɛ, kɛ́ mɛi ni wóɔ amɛhe nɔ lɛ miitao nɔ ko lɛ, amɛsumɔɔ ni amɛnine ashɛ nɔ oya nɔŋŋ; amɛsumɔɔɔ ni amɛmɛɔ. Shi Yehowa bɛ nakai kwraa. Etoɔ etsui shi fe mɔ fɛɛ mɔ. Akɛ nɔkwɛmɔnɔ lɛ, yɛ Noa beiaŋ lɛ, ewie akɛ ebaamɛ afii 120 sɔŋŋ dani ekpãtã efɔŋfeelɔi lɛ ahiɛ. (1 Mo. 6:3) Enɛ hã Noa ná be ni fa aahu akɛ efɔ bii ni ekwɛ amɛ ni amɛdara, ni amɛ hu amɛbawa lɛ kɛkpɛ adeka lɛ dani Nu Afua lɛ ba. Be ko sɛɛ hu lɛ, Yehowa to etsui shi ni ebo Abraham toi be ni Abraham bibiɔ lɛ saji yɛ Sodom kɛ Gomora hiɛkpatamɔ lɛ he lɛ. Eji Yehowa wóɔ ehe nɔ kulɛ, ebaabi lɛ akɛ ‘Bo obaatsɔɔ mi nɔ ni mifee?’ Shi akɛni Yehowa baa ehe shi hewɔ lɛ, eto etsui shi ebo Abraham toi.—1 Mo. 18:​20-33.

11. Mɛni 2 Petro 3:9 lɛ kɛɛ no hewɔ ni Yehowa eto etsui shi ŋmɛnɛ lɛ?

¹¹ Ŋmɛnɛ hu lɛ, Yehowa miito etsui shi kɛyashi be ni eto ni naagbee lɛ baaba lɛ baashɛ. Mɛni hewɔ eto etsui shi lɛ? Nɔ hewɔ lɛ ji, “esumɔɔɔ akɛ akpãtã mɔ ko mɔ ko hiɛ, shi moŋ eesumɔ ni mɛi fɛɛ atsake amɛtsui.” (Kanemɔ 2 Petro 3:9.) Ani Yehowa tsui shi ni eto lɛ efee efolo? Dabi kwraa! Akɛni eto etsui shi hewɔ lɛ, mɛi akpekpei abɔ ebale lɛ ni amɛbatsɔmɔ enanemɛi. Ni wɔheɔ wɔyeɔ akɛ, wɔsɛɛ lɛ mɛi pii hu baaba amɛbatsɔmɔ enanemɛi. Shi Yehowa etoŋ etsui shi kɛyaŋ naanɔ. Eyɛ mli akɛ Yehowa sumɔɔ gbɔmɛi moŋ, shi ehãŋ amɛye amɛtsui naa sane ni efeee he nɔ ko. No hewɔ lɛ, ebaakpãtã efɔŋfeelɔi ni tsakeee amɛtsui lɛ ahiɛ.—Hab. 2:3.

12. Mɛni hãa wɔnaa akɛ Yesu toɔ etsui shi tamɔ Yehowa?

¹² Mɛɛ gbɛ nɔ Yesu kase e-Tsɛ lɛ? Yesu eto etsui shi afii akpei abɔ tamɔ Yehowa. Mɛni hewɔ wɔkɛɔ nakai? Kɛjɛ Eden abɔɔ lɛ mli tɔ̃ɔ kɛbashi ŋmɛnɛ lɛ, Yesu ena ni Satan miigbe Yehowa kɛ etsuji anɔkwafoi lɛ ahe guɔ. (1 Mo. 3:​4, 5; Hiob 1:11; Kpo. 12:10) Agbɛnɛ hu, ena bɔ ni adesai etsɔmɔ shihilɛi ni mli wawai srɔtoisrɔtoi amli kɛbashi bianɛ lɛ. Ŋwanejee ko bɛ he akɛ, eeshwe waa “koni efite Abonsam nitsumɔi lɛ”! (1 Yoh. 3:8) Mɛni hewɔ Yesu enyɛ eto etsui shi eemɛ kɛyashi Yehowa baakɛɛ lɛ akɛ be eshɛ ni esa akɛ efo Abonsam nitsumɔi lɛ fɛɛ sɛɛ lɛ? Yiŋtoo kome ji akɛ, Yesu baa ehe shi. Ele akɛ Yehowa ji mɔ ni esa akɛ ekpɛ yiŋ yɛ be ni esa akɛ naagbee lɛ aba lɛ he.—Bɔf. 1:7.

13. Mɛni Yesu fee ni tsɔɔ akɛ eto etsui shi ehã ebɔfoi lɛ? Ni mɛni hewɔ efee nakai?

¹³ Be ni Yesu yɔɔ shikpɔŋ lɛ nɔ lɛ, eto etsui shi ehã ebɔfoi lɛ. Akɛ nɔkwɛmɔnɔ lɛ, ebɔfoi lɛ je ŋwane shii abɔ yɛ mɔ ni ji agbo fe fɛɛ yɛ amɛteŋ lɛ he, shi Yesu hãaa amɛnifeemɔ nɛɛ afee lɛ ahuntoo, moŋ lɛ, etee nɔ eto etsui shi ehã amɛ. (Luka 9:46; 22:​24-27) Ehe eye akɛ amɛbaatsake ni amɛba amɛhe shi. Ani otɔ̃ tɔmɔ kome too lɛ nɔŋŋ shii abɔ? Kɛ́ nakai lɛ, ani eŋɔɔɔ onaa waa akɛ Yesu, ni ji o-Maŋtsɛ lɛ, baa ehe shi ni etoɔ etsui shi?

14. Mɛni baahã wɔnyɛ wɔto wɔtsui shi?

¹⁴ Mɛɛ gbɛ nɔ wɔbaanyɛ wɔkase Yehowa? Kɛ́ wɔná “Kristo jwɛŋmɔ lɛ” eko lɛ, wɔbaanyɛ wɔsusu nii ahe tamɔ Yehowa ni wɔfee wɔnii tamɔ lɛ. (1 Kor. 2:16) Mɛni baahã wɔná Kristo jwɛŋmɔ lɛ eko? Nɔ kome ni he hiaa waa ni esa akɛ wɔfee koni wɔnyɛ wɔná Kristo jwɛŋmɔ lɛ eko ji, ni wɔbaafɔ Biblia mli woji ni ji, Mateo, Marko, Luka, kɛ Yohane lɛ kanemɔ. Kɛ́ wɔkane saji ni yɔɔ woji nɛɛ amli lɛ, esa akɛ wɔhe be kɛjwɛŋ nɔ koni wɔna nɔ hewɔ ni Yesu fee nibii ni efee lɛ. Agbɛnɛ hu, esa akɛ wɔsɔle wɔbi Yehowa ni eye ebua wɔ ni wɔnyɛ wɔto wɔtsui shi ni wɔba wɔhe shi tamɔ Yesu. Kɛ́ wɔná Kristo jwɛŋmɔ lɛ eko lɛ, no baahã wɔfee wɔnii tamɔ Yehowa, ni wɔto wɔtsui shi wɔhã mɛi, ni agbɛnɛ hu, wɔkpɛlɛ nɔ akɛ, ebaahe be dani fiofio lɛ, wɔbaasusu nii ahe ni wɔfee wɔnii tamɔ Yehowa.—Mat. 18:​26-30, 35.

YEHOWA WOƆ MƐI NI ABUUU AMƐ LƐ AHIƐNYAM

15. Mɛni tsɔɔ akɛ Yehowa woɔ mɛi ni abuuu amɛ lɛ ahiɛnyam? (1 Samuel 2:8)

¹⁵ Kanemɔ 1 Samuel 2:8. Yehowa nɔ kwɔ fe mɔ fɛɛ mɔ, shi fɛɛ sɛɛ lɛ, mɛi ni abuuu amɛ lɛ asane kã etsui nɔ waa. Kɛjɛ blema tɔ̃ɔ kɛbashi ŋmɛnɛ lɛ, Yehowa ewo mɛi pii ni abuuu amɛ lɛ ahiɛnyam. Mɛi nɛɛ ateŋ mɛi komɛi po ahe sane yɛ Biblia lɛ mli, shi ekolɛ wɔfɔɔɔ amɛhe wiemɔ. Atsɛɔ mɔ kome akɛ Debora. Esɔmɔ Isak kɛ Yakob wekui lɛ aaafee afii 125 sɔŋŋ. Awieee yoo anɔkwafo nɛɛ he saji pii yɛ Biblia lɛ mli, shi Yehowa hã Mose ŋma nɔ ko ni hãa wɔnaa akɛ, lɛ Yehowa lɛ, kɛ Yakob weku lɛ sumɔɔ esane waa. (1 Mo. 24:59; 35:​8, shn.) Afii pii asɛɛ lɛ, Yehowa hala oblanyo tookwɛlɔ ko ni atsɛɔ lɛ David koni eye nɔ akɛ Israel maŋtsɛ. (2 Sam. 22:​1, 36) Agbɛnɛ hu, be ni afɔ Yesu lɛ sɛɛ nɔŋŋ lɛ, Nyɔŋmɔ tsu ŋwɛibɔfo ko ni eya tookwɛlɔi komɛi aŋɔɔ ni eyakɛɛ amɛ akɛ afɔ Mesia lɛ yɛ Betlehem, ni tookwɛlɔi nɛɛ ji klɛŋklɛŋ mɛi ni nu sane nɛɛ. (Luka 2:​8-11) Ni be ni Yosef kɛ Maria kɛ Yesu tee sɔlemɔ shĩa lɛ, Yehowa hã Simeon kɛ Hana, ni no mli lɛ amɛgbɔlɔ lɛ le akɛ Yesu ji Mesia lɛ, ni ekɛ no wo amɛhiɛnyam. (Luka 2:​25-30, 36-38) Lɛɛlɛŋ, eyɛ mli akɛ Yehowa yɛ ŋwɛi shɔŋŋ moŋ, shi enaa mɛi ni abuuu amɛ lɛ!

16. Tsɔɔmɔ nibii komɛi ni Yesu fee ni hãa wɔnaa akɛ ekase bɔ ni e-Tsɛ lɛ kɛ mɛi yeɔ ehãa lɛ?

¹⁶ Mɛɛ gbɛ nɔ Yesu kase e-Tsɛ lɛ? Yesu hu wo mɛi ni abuuu amɛ lɛ ahiɛnyam, ni ekɛ amɛ yeee tamɔ nɔ ni amɛbɛ nɔ ko mli. Akɛ nɔkwɛmɔnɔ lɛ, etsɔɔ mɛi ni abuɔ amɛ akɛ ‘amɛleee woloŋ ni amɛji mɛi foji kɛkɛ lɛ’ Nyɔŋmɔ Maŋtsɛyeli lɛ he nii. (Bɔf. 4:13; Mat. 11:25) Agbɛnɛ hu, etsa mɛi ni bɛ hewalɛ lɛ, ni bɔ ni efee lɛ ehã lɛ hã mɛi lɛ na akɛ esumɔɔ amɛsane ni ebuɔ amɛ. (Luka 5:13) Gbi gbɛkɛ ni enɔ jetsɛremɔ lɛ abaagbe lɛ lɛ, etsu nitsumɔ ko ni kulɛ esa akɛ tsulɔ atsu; efɔ ebɔfoi lɛ anaji ahe. (Yoh. 13:5) Naagbee kwraa lɛ, dani ebaaya ŋwɛi lɛ, etu nitsumɔ ko ni he hiaa waa ewo esɛɛnyiɛlɔi fɛɛ, ni wɔ hu wɔfata he lɛ adɛŋ, ni no ji, ni wɔye wɔbua mɛi koni amɛná naanɔ wala.—Mat. 28:​19, 20.

17. Mɛɛ nibii nɛkɛ wɔbaanyɛ wɔfee kɛtsɔɔ akɛ wɔsumɔɔ mɛi fɛɛ ni wɔbuɔ amɛ? (Kwɛmɔ mfoniri lɛ hu.)

¹⁷ Mɛɛ gbɛ nɔ wɔbaanyɛ wɔkase Yehowa? Kɛ́ wɔshiɛ sane kpakpa lɛ wɔhã mɛi fɛɛ ekɔɔɔ he eko he ni amɛjɛ, skul abɔ ni amɛtee, loo mɛidiji loo blɔfomɛi ni amɛji lɛ, no tsɔɔ akɛ wɔbuɔ amɛ ni wɔsumɔɔ amɛ. Agbɛnɛ hu, wɔbuɔ wɔnyɛmimɛi lɛ ni wɔsumɔɔ amɛ ekɔɔɔ he eko sɔɔmɔ hegbɛi loo hesai ni wɔyɔɔ. (Fip. 2:3) Kɛ́ Yehowa na akɛ wɔbaa wɔhe shi ni wɔmiifee nibii nɛɛ kɛ nibii krokomɛi ni hãa anaa akɛ wɔsumɔɔ mɛi fɛɛ ni wɔbuɔ amɛ lɛ, enáa miishɛɛ.—Rom. 12:10; Zef. 3:12.

18. Mɛni hewɔ oosumɔ ni okase bɔ ni Yehowa baa ehe shi lɛ?

¹⁸ Kɛ́ wɔmia wɔhiɛ wɔba wɔhe shi tamɔ bɔ ni Yehowa, wɔ-Tsɛ ni sumɔɔ wɔ waa lɛ, baa ehe shi lɛ, no baahã wɔfee mɛi ni nuɔ nii ashishi, mɛi ni toɔ amɛtsui shi, kɛ mɛi ni anyɛɔ abɛŋkɛɔ. Agbɛnɛ hu, wɔbaabu mɛi ni wɔbaasumɔ amɛ tamɔ bɔ ni Yehowa feɔ lɛ. Nyɛhãa wɔtswaa wɔfai shi akɛ, wɔbaakase bɔ ni Yehowa baa ehe shi lɛ, ni kɛ́ wɔfee nakai lɛ, ebaaná wɔhe miishɛɛ waa!—Yes. 43:4.