Ta Ehiii Kwraa
Mɛi ni ena ta pɛŋ lɛ baakɛɛ bo akɛ eji shihilɛi ni ehiii kwraa ni amɛkɛkpe lɛ ateŋ ekome. Asraafoi kɛ maŋbii ni ena ta pɛŋ lɛ baakɛɛ bo akɛ ehiii kwraa.
ASRAAFOI
“Be fɛɛ be nɛɛ obaana ni aagbe mɛi loo mɛi epila waa. Be ko bɛ ni onuɔ he akɛ oyɛ shweshweeshwe.”—Gary, Britain.
“Atswa misɛɛ kɛ mihiɛ tu, ni mina ni aagbe mɛi babaoo, ni gbekɛbii kɛ mɛi ni egbɔlɔ hu fata he. Ta hãa otsui waa.”—Wilmar, Colombia.
“Kɛ́ atswa mɔ ko tu yɛ ohiɛ lɛ, ohiɛ kpaaa nɔ kɔkɔɔkɔ. Bɔ ni mɔ lɛ piŋ lɛ tɛŋɔ yɛ ojwɛŋmɔ mli shii abɔ. Ohiɛ kpaaa nɔ ni ona lɛ nɔ kɔkɔɔkɔ.”—Zafirah, United States.
MAŊBII
“Minu he akɛ minyɛŋ maná miishɛɛ dɔŋŋ. Mishe gbeyei waa akɛ abaagbe mi loo miwekumɛi loo minanemɛi.”—Oleksandra, Ukraine.
“Wɔdamɔ lain mli kɛjɛ leebi 2:00 kɛyashi gbɛkɛ 11:00 koni ahã wɔ niyenii, ni no hã wɔshe gbeyei waa ejaakɛ wɔleee be ni mɛi ni nɔɔ lɛ baatswa tu ko ni ebasa wɔhe.”—Daler, Tajikistan.
“Agbe mifɔlɔi be ni aawu ta. No hewɔ lɛ, mibatsɔ awusa, ni mibɛ mɔ ko ni baashɛje mimii loo ebaakwɛ mi.”—Marie, Rwanda.
Eyɛ mli akɛ mɛi nɛɛ na nɔ yɛ ta hewɔ moŋ, shi amrɔ nɛɛ amɛtoiŋ ejɔ amɛ. Agbɛnɛ hu, amɛheɔ amɛyeɔ waa akɛ etsɛŋ tai fɛɛ asɛɛ baafo. Yɛ Buu-Mɔɔ nɛɛ mli lɛ, abaajɛ Biblia lɛ mli atsɔɔ bɔ ni baafee ni enɛ baaba mli.