“Buamɔ Maŋ lɛ Naa”
1. Mɛni je amɛhe yɛ kpokpaa nɔ kpeei kɛ majimaji ateŋ kpeei ni wɔfeɔ lɛ, kɛ henaabuamɔ ni sa kadimɔ waa ni Israelbii lɛ fee be ni amɛshi Mizraim etsɛɛɛ nɔŋŋ lɛ he?
1 Be ni Israelbii lɛ shi Mizraim etsɛɛɛ nɔŋŋ lɛ, Yehowa fã Mose ni ‘ebua maŋ lɛ naa’ yɛ Sinai Gɔŋ lɛ he koni amɛbo Ewiemɔi lɛ atoi bɔ ni afee ni amɛshe Lɛ gbeyei, ni amɛtsɔɔ amɛbii lɛ Ehe nii. (5 Mose 4:10-13) Kpee nɛɛ fee nifeemɔ ko ni hiɛ kpaŋ nɔ kɔkɔɔkɔ ni wo mɛi ahemɔkɛyeli mli hewalɛ waa! Yɛ nyɔji fioo komɛi ni baa lɛ amli lɛ, Yehowa webii baabua amɛhe naa kɛfee kpokpaa wuji anɔ kpeei kɛ majimaji ateŋ kpeei koni Yehowa atsɔɔ amɛ nii. Mɛni esa akɛ wɔfee koni wɔnyɛ wɔná kpeei nɛɛ ahe sɛɛ kɛmɔ shi?
2. Mɛni esa akɛ wɔfee ‘kɛsaa wɔhe wɔto’ kɛhã kpee lɛ?
2 ‘Nyɛsaa Nyɛhe Nyɛtoa’: Yehowa fã Israelbii lɛ ni ‘amɛsaa amɛhe amɛto’ koni amɛbua amɛhe naa yɛ nakai henaabuamɔ ni sa kadimɔ waa yɛ yinɔsane mli lɛ shishi yɛ Sinai Gɔŋ lɛ he. (2 Mose 19:10, 11) Nakai nɔŋŋ akpaa gbɛ akɛ, mɛi fɛɛ ni baaya kpeei lɛ kɛ mɛi fɛɛ ni baaná nifeemɔi lɛ amli gbɛfaŋ nɔ lɛ asaa amɛhe jogbaŋŋ. Akɛ nɔkwɛmɔnɔ lɛ, ehe baahia ni mɛi pii abi gbɛ yɛ amɛnitsumɔi amli. Ekolɛ oshihilɛ tamɔ Nehemia nɔ lɛ. Eesumɔ ni eshi enitsumɔ akɛ Maŋtsɛ Artashasta dãawolɔ lɛ ni eya Yerusalem ni eyaye ebua kɛtswa gbogboi lɛ, eyɛ mli akɛ ele akɛ ekolɛ maŋtsɛ lɛ ekpɛlɛŋ. Nehemia sɔle, no sɛɛ lɛ, ekɛ ekãa tee Maŋtsɛ lɛ ŋɔɔ ni ekɛ enibimɔ lɛ yafɔ̃ ehiɛ yɛ bulɛ mli. Maŋtsɛ lɛ ŋmɛ lɛ gbɛ koni eya, ni ekɛ nibii po hã kɛhã gbogbo lɛ tswaa! (Neh. 2:1-9) Kɛfata gbɛ ni obaabi ni ahã bo yɛ nitsumɔ mli lɛ he lɛ, ani oto bɔ ni obaafee oyashɛ jɛmɛ kɛ he ni obaawɔ lɛ he gbɛjianɔ? Asafoŋ onukpai lɛ yɛ he miishɛɛ akɛ amɛaaye amɛbua mɔ fɛɛ mɔ ni ekolɛ yelikɛbuamɔ he baahia lɛ. Too gbɛjianɔ koni oyashɛ kpee lɛ shishi mra be fɛɛ be, koni ohã ‘ojwɛŋmɔ ahi nii ni’ obaanu lɛ anɔ ‘jogbaŋŋ.’—Heb. 2:1, Ga Biblia hee.
3. Mɛni baaye abua wɔ ni wɔsaa wɔtsui kɛhã kpee lɛ?
3 Nɔ kroko ni kɛ́ wɔfee ni ehe hiaa waa ni baahã wɔsaa wɔhe wɔto ji ni wɔsaa wɔtsui koni wɔbo toi ni wɔkase nii. (Ezra 7:10) Akɛ kpee lɛ he gbɛjianɔtoo, ní wiemɔi lɛ fɛɛ asaneyitsei kɛ eko fɛɛ eko mli ŋmalɛi titri kome loo enyɔ fata he lɛ baawo jw.org Wɛb saiti lɛ nɔ kɛtsɔ hiɛ kwraa dani kpee be lɛ ashɛ. Saji nɛɛ baafee saji ni sa jogbaŋŋ ni wɔbaanyɛ wɔsusu he yɛ wɔgbɛkɛ Weku Jamɔ lɛ shishi yɛ otsi ni wɔbaaya wɔkpee lɛ mli. Shiɛlɔi komɛi printiɔ kpee lɛ he gbɛjianɔtoo lɛ, ni no nɔ amɛŋmalaa kpee lɛ shishi otii lɛ yɛ.
4. Mɛɛ gbɛ nɔ fɔlɔi baanyɛ amɛkɛ kpokpaa nɔ kpee ni wɔbaaya lɛ atsu nii kɛtsɔɔ amɛbii lɛ anii?
4 ‘Tsɔɔmɔ Obii lɛ Anii’: Kpeei ni afee yɛ Sinai Gɔŋ lɛ he lɛ yiŋtoo kome ni atsi tã ji, ni fɔlɔi ni ji Israelbii lɛ ‘atsɔɔ amɛbii lɛ anii.’ (5 Mose 4:10) Kpeei lɛ baahã fɔlɔi aná hegbɛ ni nɔ bɛ ni amɛ hu amɛtsɔɔ amɛbii lɛ anii. Esa akɛ fɔlɔi kɛ amɛbii lɛ atara shi yɛ he kome be ni kpee lɛ yaa nɔ lɛ, ni amɛye amɛbua amɛ ni amɛbo saji lɛ atoi jogbaŋŋ. Kɛ́ agbe kpee lɛ naa lɛ, sɛɛ mli lɛ, amɛbaanyɛ amɛfee ekome kɛsusu kpee lɛ he yɛ amɛweku jamɔ lɛ shishi.
5. Kɛ́ wɔtee kpeei ni kã wɔhiɛ lɛ, mɛɛ sɛɛ wɔbaaná?
5 Kpee ni he hiaa waa ni Israelbii lɛ fee yɛ Sinai Gɔŋ lɛ he lɛ, ye ebua amɛ ni amɛhiɛ sɔ hegbɛ ni nɔ bɛ ni amɛyɔɔ akɛ Nyɔŋmɔ webii lɛ. (5 Mose 4:7, 8) Ato kpeei ni kã wɔhiɛ ni wɔbaaya nɛɛ he gbɛjianɔ ni eye ebua wɔ nakai nɔŋŋ. Gbii etɛ ni wɔkɛbaafee kpee lɛ baahã wɔtsi wɔhe kɛjɛ Satan jeŋ ni mli shihilɛ wa lɛ he, ní wɔkɛ wɔnyɛmɛi ni wɔkɛyɔɔ wɔmumɔŋ paradeiso lɛ mli lɛ baabɔ ni wɔbaafee ekome kɛkase Yehowa he nii. (Yes. 35:7-9) Akɛni Yehowa gbi lɛ miibɛŋkɛ hewɔ lɛ, nyɛkahãa wɔkwaa hegbɛ ni wɔnáa kɛbuaa wɔhe naa ni wɔkɛwowoɔ wɔhe hewalɛ nɛɛ!—Heb. 10:24, 25.