Bo Toi ni Okase Nii
1. Mɛni hewɔ ekolɛ ehe baahia ni wɔmia wɔhiɛ waa ni wɔbo toi ni wɔkase nii kɛ́ wɔtee kpokpaa wulu nɔ kpee lɛ?
1 Etsɛŋ ni afi 2013 kpokpaa wulu nɔ kpee lɛ baaje shishi. Atsu nii waa kɛto kpee ni wɔbaaya lɛ he gbɛjianɔ, bɔ ni baatsu amrɔmrɔ nɛɛ hiamɔ nii ahe nii yɛ je lɛŋ fɛɛ. Ani oto gbɛjianɔ koni onyɛ oya kpee lɛ gbii etɛ lɛ fɛɛ? Kɛ́ wɔtee kpeei wuji lɛ nibii babaoo baanyɛ agbala wɔjwɛŋmɔ, no hewɔ lɛ esa akɛ wɔbɔ mɔdɛŋ waa ni wɔnyɛ wɔbo nifeemɔi lɛ atoi jogbaŋŋ. Akɛni nifeemɔi lɛ asɛɛ kɛlɛ fe asafoŋ kpeei ashishi nifeemɔi hewɔ lɛ, esa akɛ amia hiɛ ni aha hiɛ ahi he nɔ be fɛɛ be. Kɛfata he lɛ, tsɔne mlitamɔ kɛ nibii krokomɛi hu baanyɛ aha anu tɔlɛ he. Mɛni baaye abua wɔ ni wɔhiɛ ahi wɔhe nɔ bɔni afee ni wɔbo toi ni wɔkase nii?—5 Mose 31:12.
2. Mɛɛ gbɛ nɔ wɔbaanyɛ wɔsaa wɔtsui kɛha kpokpaa nɔ kpee gbɛjianɔtoo lɛ?
2 Dani Kpokpaa nɔ Kpee lɛ Baaje Shishi: Akɛ kpee lɛ he gbɛjianɔtoo, ní wiemɔi lɛ fɛɛ asaneyitsei kɛ eko fɛɛ eko mli ŋmalɛi titri kome loo enyɔ fata he lɛ woɔ wɔ-Wɛb saiti ni ji www.jw.org lɛ nɔ. Kɛ́ wɔnyɛɔ wɔyaa Intanɛt lɛ nɔ lɛ, saji nɛɛ amli ni wɔɔkwɛ kɛtsɔ hiɛ lɛ baaye abua wɔ ni wɔsaa wɔtsui kɛha nifeemɔi ni baaya nɔ lɛ. (Ezra 7:10) Kɛ́ nyɛmiifee nyɛgbɛkɛ Weku Jamɔ lɛ, ani nyɛbaanyɛ nyɛto gbɛjianɔ koni nyɛsusu kpee ni abaaya lɛ he, ní eha nyɛgbɛkpamɔ kɛha nifeemɔ lɛ mli awa?
3. Mɛni baaye abua wɔ koni wɔbo nii atoi jogbaŋŋ?
3 Beni Kpee lɛ Yaa Nɔ Lɛ: Kɛ́ ebaahi lɛ, esa akɛ aya niiasɛɛyaahe lɛ dani kpee lɛ aje shishi. Kɛ́ gbekɛbii baaya niiasɛɛyaahe lɛ beni nifeemɔ lɛ yaa nɔ lɛ, esa akɛ onukpa ko afata amɛhe. Gbee o-mobail foŋ lɛ bɔni afee ni mɔ ko akatswa bo loo atɛsti bo, ní bo hu ekaka bo ni otswa mɔ ko ni eha ojwɛŋmɔ je nifeemɔ lɛ nɔ. Kɛ́ ehe bahia ni okagbe o-foŋ lɛ, feemɔ lɛ bɔ ni egbaŋ mɛi krokomɛi anaa kɛ́ mɔ ko tswa. Kɛ́ ohiɛ kɔmpiuta bibii (tablet) lɛ eko yɛ kpee lɛ shishi lɛ, kwɛmɔ ni ekagba mɛi krokomɛi anaa. Kaaye nii ni kaanu nii hu beni kpee lɛ yaa nɔ lɛ. (Jaj. 3:1) Kɛ ohiŋmɛi ama wielɔ lɛ nɔ. Kɛ́ aakane ŋmalɛ ko lɛ, nyiɛmɔ sɛɛ yɛ o-Biblia lɛ mli. Ŋmalamɔ otii fioo komɛi.
4. Mɛɛ gbɛ nɔ fɔlɔi baanyɛ aye abua amɛbii lɛ ni amɛbo toi ni amɛkase nii?
4 Wɔmiisumɔ ni wɔbii lɛ hu abo toi ni amɛkase nii. Abɛi 29:15 lɛ kɛɔ akɛ: “Gbekɛ ni akpoo ejeŋ afɔ̃ enɔ lɛ, ewoɔ enyɛ hiɛgbele.” No hewɔ lɛ, ehi akɛ wekui aaatara shi kutuu bɔni afee ni fɔlɔi aná nɔmimaa akɛ amɛbii lɛ miibo sane lɛ toi moŋ fe ni amɛmiiwie, amɛmiitɛsti loo ní amɛmiikpa shi. Ehe miihia ni atsu enɛ he nii be fɛɛ be, ni beni afeɔ drama lɛ hu fata he. Kɛ́ gbekɛbii lɛ darako tsɔ bɔ ni amɛaanyɛ amɛnu nifeemɔi lɛ fɛɛ ashishi po lɛ, abaanyɛ atsɔse amɛ ni amɛhiɛ ahi amɛhe nɔ ni amɛtara shi diŋŋ.
5. Mɛni hewɔ sɛɛnamɔ yɔɔ he akɛ atĩ kpee lɛ mli nifeemɔi lɛ amli lɛ, ni te esa akɛ afee lɛ aha tɛŋŋ?
5 Gbi Fɛɛ Gbi kɛ́ Kpee lɛ Ba Naagbee: Wɔ́ mra. Yaakã shi mra bɔni afee ni onyɛ oná wɔ ni sa. Kɛ́ otĩ nɔ ni onu lɛ mli lɛ, ebaaye ebua bo ni eka oyitsoŋ. No hewɔ lɛ, ehe baaba sɛɛnamɔ akɛ gbɛkɛ fɛɛ gbɛkɛ kɛ́ nyɛjɛ kpee lɛ nyɛba lɛ nyɛkɛ minitii fioo ko baasusu nifeemɔi lɛ ahe akɛ weku. Kɛ́ okɛ onanemɛi tee niyelihe ko lɛ, ebaahi akɛ okɛ wolo ni oŋmala otii yɛ mli lɛ baaya bɔni afee ni nyɛnyɛ nyɛgba sane ko loo saji enyɔ komɛi ni oná he miishɛɛ waa lɛ he sane? Kɛ́ nyɛjɛ kpee lɛ nyɛba shĩa lɛ, nyɛhea be kɛsusua bɔ ni nyɛbaafee nyɛkɛ saji lɛ atsu nii akɛ weku kɛ́ nyɛmiifee nyɛgbɛkɛ Weku Jamɔ lɛ he. Nyɛbaanyɛ nyɛto gbɛjianɔ koni daa otsi lɛ nyɛsusu woji hei ni ajie lɛ fã ko he.
6. Ani kpee lɛ shishi ni wɔɔhi lɛ kɛkɛ ji nɔ ni he hiaa? Tsɔɔmɔ mli.
6 Kɛ́ okpɔlɔŋmɛɛ ko he baaba sɛɛnamɔ lɛ, ja aye niyenii lɛ ní egbɛlɛ. Wɔbaanyɛ wɔwie nakai nɔŋŋ yɛ mumɔŋ okpɔ̃lɔ ni abaaŋmɛ wɔ yɛ kpokpaa wulu nɔ kpee lɛ shishi lɛ he. Eba akɛ kpee lɛ shishi ni wɔbaaya daa lɛ baaye abua wɔ ni wɔbo sane toi jogbaŋŋ, ni wɔkɛ nɔ ni wɔkase lɛ atsu nii.