Kaimɔi ni Kɔɔ Lá He Saji Ahe Nitsumɔi Ahe
1 Shii abɔ ni wɔkã he wɔyɔɔ jeŋ momo nɛɛ mli lɛ, wɔnyɛŋ wɔjo hela kɛ hiamɔ ni yɔɔ he akɛ wɔɔtao tsofafeemɔ he yelikɛbuamɔ lɛ naa foi. Shi kɛlɛ, ákɛ Yehowa sɔɔlɔi ni feɔ toiboo lɛ, wɔmiisumɔ ni wɔfee toiboo wɔha Yehowa yɛ nɔ fɛɛ nɔ ni wɔfeɔ lɛ mli, ni helatsamɔi asɛɛ ni wɔtiuɔ hu fata he. (1 Kor. 10:31) Wɔboɔ Biblia mli fãmɔ akɛ ‘atsi he kɛjɛ lá’ he lɛ toi. (Bɔf. 15:20) Yɛ bei komɛi amli lɛ, enɛ kɛ lá ni agbalaa awoɔ mɔ mli lɛ he naagbai baa. Mɛni esa akɛ shiɛlɔ fɛɛ shiɛlɔ afee bɔni afee ni eye ehe kɛjɛ lá ni agbalaa awoɔ mɔ mli lɛ he naagba lɛ he?
2 Klɛŋklɛŋ hebuunɔ lɛ ji ni akwɛ koni akatsɔmɔ mɛi ni bɛ lá, nɔ ni haa ehe bahiaa koni agbala lá awo mɔ mli lɛ. Enɛ he miihia, titri lɛ yɛ gbekɛbii agbɛfaŋ. Mɛni esa akɛ afee? Esa akɛ wɔhoo ni wɔye niyenii ni haa mɔ náa hewalɛ. Enɛ etsɔɔɔ niyenii ni jara wa, shi moŋ nɔ ni hewalɛ yɔɔ mli ni haa lá falɛ yaa hiɛ. Kɛfata he lɛ, gbekɛbii ji mɛi titri ni esa ákɛ akɛ amɛ aya helatsamɔhe amrɔ nɔŋŋ kɛ́ amɛbɛ hewalɛ. Enɛ ni wɔkɛaatsu nii lɛ baaye abua ni wɔkwɛ koni wɔkabote shihilɛ ko ni baatee lá he saji ashi lɛ mli.
3 Kɛ́ esa akɛ oya helatsamɔhe lɛ, mɛɛ nibii esa akɛ okwɛ ohe nɔ jogbaŋŋ yɛ mli? Dani obaaya helatsamɔhe lɛ, bɔɔ onukpai ni yɔɔ asafo lɛ mli lɛ amaniɛ, titri lɛ kɛji akɛ oná ole kɛtsɔ hiɛ akɛ abaafee bo opireshɛn. Enɛ he miihia be mli ni mɔ lɛ weku mli bii lɛ ji mɛi ni heee yeee. Bei komɛi lɛ ehe bahiaa ni aya helatsamɔhe ko ni yɔɔ maŋ kroko loo maŋtiase kroko mli. Kɛji akɛ onukpai lɛ ná amɛle shihilɛ ni eba lɛ, ekolɛ amɛbaanyɛ amɛye amɛbua bo ni oná datrɛfoi ni baakpɛlɛ onibimɔi lɛ anɔ kɛtsɔ Hospital Liaison Committee (HLC) srɔtoi anɔ kɛ́ ehe bahia.
4 Kɛji akɛ hela mɔ́ Odasefonyo ko ni etee helatsamɔhe ko lɛ, kɛ́ eeehi lɛ, esa akɛ ekwɛ koni aŋma “Jehovah’s Witness” yɛ ewolo ni akɛ ehelatsamɔ he saji toɔ mli lɛ nɔ yɛ gbɛ ni yɔɔ faŋŋ nɔ. Beni okɛɛ datrɛfonyo lɛ onaagba lɛ sɛɛ lɛ, okɛ sanemlitsɔɔmɔ ni yɔɔ faŋŋ ni bulɛ yɔɔ mli aha ele akɛ ekɛ lá akafata helatsamɔ fɛɛ helatsamɔ ni ebaasumɔ ni ekɛtsu nii lɛ he yɛ shihilɛ ko kwraa mli. Esaaa akɛ amɛɔ koni atsu sane nɛɛ he nii yɛ sɛɛ mli.
5 Kɛji akɛ datrɛfonyo lɛ ma lá ni agbalaa awoɔ mɔ mli lɛ nɔ mi doo yɛ be mli ni oha ele oshidaamɔ kɛtsɔ hiɛ yɛ enɛ he lɛ fɛɛ sɛɛ lɛ, no lɛ kɛɛmɔ lɛ amrɔ nɔŋŋ yɛ bulɛ mli akɛ obaasumɔ ni okɛ datrɛfonyo kroko hu asusu he, no hewɔ lɛ ejie bo koni oya.
6 Namɔ sɔ̃ kã enɔ akɛ ekɛ datrɛfonyo asusu kpoomɔ ni ekpooɔ lá ni agbalaa awoɔ mɔ mli lɛ he? Ákɛ helatsɛ lɛ, eji bo diɛŋtsɛ osɔ̃, JEEE onukpai akuu lɛ loo HLC lɛ asɔ̃ ni. Be mli ni HLC lɛ he baa sane lɛ mli pɛ ji beni yelikɛbuamɔ he miihia mɔ ko koni etsɔɔ nibii ni akɛyeɔ lá ni agbalaa awoɔ mɔ mli lɛ najiaŋ lɛ he saji amli fitsofitso etsɔɔ datrɛfonyo lɛ, loo yɛ be mli ni etaoɔ datrɛfonyo ni baakpɛlɛ enibimɔi lɛ anɔ lɛ. No hewɔ lɛ, eyɛ mli akɛ ekolɛ HLC lɛ baaye abua kɛgbála saji amli atsɔɔ tsofafeemɔ mli nitsulɔi lɛ moŋ, shi helatsɛ lɛ ji mɔ ni baakpɛ eyiŋ.
7 Mɛɛ gbɛ nɔ obaatsɔ oná yelikɛbuamɔ kɛjɛ HLC lɛ dɛŋ? Kɛji akɛ tsofafeemɔ mli yelikɛbuamɔ he miihia bo yɛ saji ni kɔɔ lá he lɛ, okɛ onukpai ni yɔɔ osafo lɛ mli lɛ agba he sane klɛŋklɛŋ. Amɛbaana HLC lɛ yɛ onajiaŋ, kɛji yɛ maŋ ni nyɛyɔɔ mli lɛ mli loo maŋ kroko mli. Mɛni hewɔ enɛ he hiaa lɛ? Ejaakɛ anɔkwa saji komɛi yɛ ni ehe baahia ni HLC lɛ ale dani amɛtsu sane lɛ he nii. Kɛfata he lɛ, onukpai lɛ le HLC lɛ kɛ gbɛ nɔ ni amɛaatsɔ ni nine ashɛ amɛnɔ. Bei komɛi lɛ enɛ baabi ni ole onukpai ni yɔɔ osafo lɛ mli lɛ ateŋ mɛi komɛi atɛlifoŋ nɔmba, loo gbɛ̀i krokomɛi anɔ ni obaatsɔ ni onine ashɛ amɛnɔ oya yɛ be mli ni nɔ ko eba trukaa lɛ.
8 Namɔ baawo nyɔji ni abɔɔ yɛ helatsamɔhe lɛ? Eyɛ mli akɛ ekolɛ onukpai lɛ kɛ HLC lɛ mli bii lɛ kɛ amɛhe baawo tsofafeemɔ nifeemɔi amli, ni ekolɛ nɔ ni fata he ji jiemɔ ni abaajie helatsɛ lɛ kɛya helatsamɔhe kroko ni datrɛfonyo ni baakpɛlɛ enibimɔi anɔ yɔɔ jɛmɛ lɛ moŋ, shi shikafitemɔi fɛɛ ni kɔɔ helatsamɔ lɛ he lɛ ji helatsɛ lɛ loo eweku lɛ sɔ̃.
9 Bɔni afee ni shiɛlɔi fɛɛ aná gbɛjianɔtoo muu nɛɛ fɛɛ he sɛɛ lɛ, esa akɛ mɔ fɛɛ mɔ ahiɛ Medical Directive ni agbe enɔ niŋmalamɔi fɛɛ anaa ni yɔɔ ebe naa lɛ yɛ ehe be fɛɛ be. Nɔ ni HLC lɛ kɛ ehe wooo mli ji helatsamɔi srɔtoi fɛɛ kɛ aŋkroaŋkroi loo amɛwekui lɛ asaji krokomɛi ni kɔɔ helai ahe lɛ loo ni eeefee sɔ̃ ni tere lɛ akɛ etsu he nii. Ato HLC lɛ he gbɛjianɔ titri koni eye ebua yɛ saji ni kɔɔ lá he lɛ pɛ mli.
10 Mɛɛ gbɛjianɔ ni suɔmɔ yɔɔ mli ato kɛha wɔhilɛ-kɛhamɔ po nɛ! Kɛtsɔ gbɛ̀i srɔtoi ni atsĩ tã kɛtsɔ hiɛ lɛ asɛɛ ni wɔɔnyiɛ kpaakpa lɛ nɔ lɛ, wɔnáŋ naagbai babaoo ni kɔɔ lá ni agbalaa awoɔ mɔ mli lɛ he. (Abɛi 27:12) Eba akɛ wɔ fɛɛ wɔɔha kaimɔi nɛɛ ahi wɔjwɛŋmɔi amli bɔni afee ni wɔya nɔ wɔye Yehowa mla ni hi kɛwula shi ni kɔɔ lá he lɛ nɔ.—Lala 19:8.