Fɔlɔi—Nyɛtsua Nyɛ Diɛŋtsɛ Nyɛbii lɛ Ahe Sɔ̃i ni Jwere Nyɛnɔ lɛ Ahe Nii
1 “Naa, Yehowa gboshinii ni ehaa ji bii, ni nikeenii ji musuŋbii.” (Lala 127:3) Kwɛ bɔ ni wiemɔi nɛɛ ji anɔkwale ha! Kristofoi fɔlɔi sumɔɔ amɛbii bibii, ni amɛmiisumɔ ni amɛná miishɛɛ, gbɔmɔtsoŋ hewalɛ kɛ shihilɛ mli hiamɔ nibii. Shi nɔ ni fe fɛɛ lɛ, amɛmiisumɔ ni amɛbii lɛ adara ni amɛtsɔmɔ hii kɛ yei ni edara yɛ mumɔŋ, ni yɔɔ hiɛsɔɔ kɛ suɔmɔ kɛha amɛ-Bɔlɔ ni ji Yehowa Nyɔŋmɔ lɛ.
2 Efɔɔ kaa yɛ hei babaoo akɛ fɔlɔi haa amɛbii kɛ amɛwekumɛi loo nanemɛi yahiɔ shi nyɔji loo afii po. Bei pii lɛ saji ni kɔɔ shika he ji yiŋtoo titri hewɔ ni amɛfeɔ nakai. Ákɛ nɔkwɛmɔnɔ lɛ, kɛ́ weku ko miiye ohia ni gbekɛbii lɛ fá lɛ, ekolɛ fɔlɔi lɛ baanu he akɛ kɛ́ gbekɛ kome loo nɔ ni fa fe nakai kɛ wekumɛi ni yɔɔ nii yahi shi lɛ, ehe baaba sɛɛnamɔ eha amɛ. Amɛsusuɔ akɛ ebaafee mlɛo kwraa kɛha nakai wekunyo lɛ akɛ eeewo skul he nyɔji, ehe atade, tsofa, kɛ niyenii. Bei pii lɛ enɛ etsɔɔɔ akɛ fɔlɔi lɛ bɛ suɔmɔ, shi moŋ shwe ni fɔlɔi lɛ shweɔ akɛ amɛkɛ nɔ ni hi fe fɛɛ aaaha amɛbii lɛ ji nɔ ni haa amɛfeɔ enɛ.
3 Eyɛ mli akɛ yɛ anɔkwale mli lɛ wolokasemɔ kɛ heloonaa sɛɛnamɔi komɛi yɛ gbekɛbii ni ahaa amɛkɛ mɛi krokomɛi yahiɔ shi lɛ he moŋ, shi oti kroko hu ni he hiaa waa yɛ ni esa akɛ asusu he jogbaŋŋ. Kristofoi fɔlɔi sumɔɔ waa ni yɛ naagbee lɛ amɛbii lɛ atsɔmɔ Nyɔŋmɔ tsuji anɔkwafoi. No hewɔ lɛ, sane oti titri ni esa akɛ Kristofoi fɔlɔi fɛɛ asusu he ji bɔ ni amɛbi lɛ ni amɛhaa ekɛ mɛi krokomɛi yahiɔ shi lɛ baanyɛ aná gbekɛ lɛ mumɔŋ shidaamɔ nɔ hewalɛ eha.—Fil. 1:10.
4 Yehowa jɛ eŋaalee kpele lɛ mli etsɔɔ akɛ esa akɛ fɔlɔi diɛŋtsɛ atsu amɛ diɛŋtsɛ amɛbii lɛ amumɔŋ hiamɔ nii lɛ ahe nii. Nyɔŋmɔ kɛ fɔlɔi, ni ji Israelbii lɛ wie akɛ: “Nɛkɛ wiemɔi nɛɛ ni miwoɔo he kita ŋmɛnɛ gbi nɛɛ akã otsui nɔ, ni ojwɛŋ nɔ otsɔɔ obii loo otɛo owo obi lɛ mli, ni owie he, beni ota shi yɛ oshia lɛ kɛ beni onyiɛ gbɛ teŋ kɛ beni okã shi kɛ beni ote shi.” (5 Mose 6:6, 7) Ani Kristofoi fɔlɔi baanyɛ atsu sɔ̃ ni he hiaa nɛɛ he nii kɛ́ gbekɛ lɛ bɛ amɛŋɔɔ yɛ shia?
5 Bɔfo Paulo bɔ tsɛmɛi ni ji Kristofoi lɛ kɔkɔ nakai nɔŋŋ akɛ: “Nyɛkawoa nyɛbii amlifu, shi moŋ nyɛlɛa amɛ yɛ Nuŋtsɔ [Yehowa, NW] lɛ tsɔsemɔ kɛ ŋaawoo lɛ mli.” (Efe. 6:4) Ákɛ aaatɛo Biblia mli anɔkwalei awo gbekɛbii atsui kɛ jwɛŋmɔ mli lɛ biɔ Biblia mli nitsɔɔmɔ ni mɔɔ shi ni afeɔ daa, kɛ fɔlɔi ni sheɔ Nyɔŋmɔ gbeyei anɔkwɛmɔnɔ kpakpa. Shi te aaafee tɛŋŋ atsɔse gbekɛ ko “yɛ Nuŋtsɔ [Yehowa, NW] lɛ tsɔsemɔ kɛ ŋaawoo lɛ mli” kɛ́ aha eyahi wekumɛi ni jeee Odasefoi lɛ aŋɔɔ? Kwɛ bɔ ni eeefee nii ni akwɛɛɛ kɛyaaa shɔŋŋ ákɛ akɛ gbekɛ ko mumɔŋ hiamɔ nii aaashã afɔle aha heloonaa nibii loo wolokasemɔ mli sɛɛnamɔi!
6 Ni gbekɛ ni ahaa eyahiɔ nanemɛi heyelilɔi aŋɔɔ lɛ hu? Eyɛ mli akɛ ekolɛ enɛ baafee nɔ ni hi fe nɔ ni aaaha ekɛ mɛi ni jeee Odasefoi aaayahi shi moŋ, shi gbɛjianɔtoo nɛɛ hu baafee nɔ ni ejaaa gbɛ. Ehe baahia lolo ni gbekɛ lɛ adamɔ tsakemɔi kpelei ni baa yɛ kwasafoŋ shihilɛ, henumɔŋ, kɛ jwɛŋmɔ mli lɛ anaa. Gbekɛbii komɛi anijiaŋ eje wui loo amɛkɛ amɛhe eyawo mlakwamɔ nifeemɔi kɛ naanyobɔɔ fɔŋ mli. Enɛ baanyɛ afite gbekɛ lɛ mumɔŋ hiɛyaa.
7 Taakɛ fɔlɔi le jogbaŋŋ lɛ, ákɛ aaatɛo suɔmɔ kɛha Yehowa awo gbekɛ ko mli lɛ biɔ hesaa, tsuishitoo, kɛ be babaoo. Kɛ́ nitsumɔ ni tamɔ nɛkɛ wa kɛha gbekɛ lɛ diɛŋtsɛ fɔlɔi ni amɛle lɛ jogbaŋŋ kɛjɛ efɔmɔ mli tɔŋŋ lɛ, no lɛ kwɛ bɔ ni ebaafee nɔ ni wa kɛha wu kɛ ŋa ko akɛ amɛaakwɛ bi ni jeee amɛ diɛŋtsɛ amɛbi! Yɛ anɔkwale mli lɛ, mɔ ko mɔ ko bɛ ni baanyɛ atsu gbekɛbii amumɔŋ hiamɔ nii ahe nii jogbaŋŋ fe gbekɛbii lɛ diɛŋtsɛ fɔlɔi. Nɔ ni fe fɛɛ lɛ, eji Ŋmalɛ naa sɔ̃ ni esaaa akɛ Kristofonyo fɔlɔ ko joɔ naa foi.—Abɛi 22:6.
8 Esa akɛ Kristofoi fɔlɔi fɛɛ diɛŋtsɛ akpɛ amɛyiŋ yɛ bɔ ni amɛbaatsu ŋaawoo ni yɔɔ 1 Timoteo 5:8, akɛ: “Shi kɛ́ mɔ ko kwɛɛɛ lɛ diɛŋtsɛ emɛi, titri lɛ lɛ diɛŋtsɛ eshiabii lɛ, ekpa yɛ hemɔkɛyeli lɛ sɛɛ, ni efaŋ mɔ ni heee yeee fe lɛ” lɛ he nii amɛha lɛ he. Kɛ́ ewa kɛha fɔlɔi akɛ amɛkɛ heloonaa hiamɔ nii aaaha gbekɛ lɛ po lɛ, sɔ̃ kã amɛnɔ lolo akɛ amɛkwɛ koni amɛtsu amɛbi lɛ mumɔŋ hiamɔ nii lɛ ahe nii yɛ gbɛ ni hi fe fɛɛ nɔ.—Okɛto Habakuk 3:17, 18 lɛ he.
9 Gbekɛbii ni atsɔseɔ koni amɛsumɔ Yehowa ni amɛsɔmɔ lɛ yɛ be ni shika helɛtemɔ he naagbai yɔɔ mli nɛɛ mli lɛ jeee nitsumɔ bibioo. Shi kɛlɛ, wɔ-Bɔlɔ ni yɔɔ suɔmɔ lɛ maa nɔ mi akɛ ekɛ sɛɛfimɔ ni he hiaa lɛ baaha fɔlɔi fɛɛ ni baatsu sɔ̃ ni he hiaa nɛɛ he nii lɛ. (Abɛi 3:5, 6) Kɛtsɔ Yehowa dɛŋ yelikɛbuamɔ kɛ sɛɛfimɔ ni jɛɔ asafo lɛ mli lɛ nɔ lɛ, Kristofoi fɔlɔi babaoo etsɔse amɛbii yɛ omanyeyeli mli ni amɛtsɔmɔ Nyɔŋmɔ jálɔi anɔkwafoi yɛ shika helɛtemɔ he naagbai ni mli wawai ni yɔɔ lɛ fɛɛ sɛɛ. No hewɔ lɛ nyɛnáa nyɛbii lɛ ahe miishɛɛ, ni nyɛha amɛhi nyɛmasɛi. Nyɛyea nyɛbuaa amɛ ni amɛtsɔmɔ hii kɛ yei ni edara yɛ mumɔŋ, ejaakɛ no feemɔ baaha amɛná naanɔ jɔɔmɔ. Kɛkɛ lɛ nyɛbaanyɛ nyɛkɛɛ taakɛ bɔ ni Yohane wie yɛ emumɔŋ bii lɛ ahe lɛ akɛ: “Mibɛ miishɛɛ ni fa fe enɛ akɛ manu akɛ mibii lɛ nyiɛɔ anɔkwale mli.”—3 Yoh. 4.