Nɔ Hewɔ ni Mɛi Komɛi Tsakeɔ Amɛ Jamɔ

Yɛ mɛi babaoo agbɛfaŋ lɛ, jamɔ ji kadimɔnɔ ko kɛkɛ. Eeenyɛ etsɔɔ he ni mɔ ko yaa Hɔgbaa yɛ bei komɛi amli, he ni eboteɔ gbalashihilɛ mli yɛ, kɛ he ni abaafũ lɛ yɛ. Shi etsɔɔɔ nɔ̃ gbɔmɔ ni eji loo nɔ ni ele kɛ nɔ ni eheɔ eyeɔ. Ákɛ nɔkwɛmɔnɔ lɛ, niiamlitaomɔ ko ni afee lɛ tsɔɔ akɛ mɛi ni tsɛɔ amɛhe Kristofoi lɛ oha mlijaa 50 leee mɔ ni kɛ Gɔŋ nɔ Shiɛmɔ lɛ ha. Shi, India hiɛnyiɛlɔ ni ale lɛ waa, Mohandas Gandhi ni ji Hindunyo lɛ po le!

ANI eyɛ naakpɛɛ akɛ gbɔmɛi tsiɔ amɛhe kɛjɛɔ jamɔ he yɛ be mli ni nɔ ko fioo pɛ amɛteŋ mɛi babaoo le yɛ amɛ jamɔ lɛ he? Dabi, jeee nakai. Shi kɛlɛ, no hu jeee nɔ ni nyɛŋ aba lɛ nakai. Bei pii lɛ, mɛi ni ekpɛlɛ koni aye abua amɛ kɛkase Biblia lɛ anaa kpɛɔ amɛhe beni amɛnaa bɔ ni amɛnáa he sɛɛ babaoo lɛ. Biblia lɛ diɛŋtsɛ kɛɔ akɛ: “Miji Yehowa, o-Nyɔŋmɔ lɛ, mɔ ni tsɔ̃ɔo nii ni hi hao, mɔ ni tsɔ̃ɔo gbɛ ní onyiɛ nɔ lɛ.” (Wɔma efã ko nɔ mi.)—Yesaia 48:17.

Mɛni esa akɛ mɛi ni mumɔŋ hɔmɔ ni baaa naagbee yeɔ amɛ lɛ afee? Esaaa akɛ amɛkpáa Nyɔŋmɔ sɔɔmɔ! Shi moŋ, esa akɛ amɛkwɛ Biblia lɛ mli koni amɛna nɔ ni Nyɔŋmɔ diɛŋtsɛ esaa eto amɛ.

Hetooi Kɛha Sanebimɔi ni Wa

Beni Bernd ye afii kpawo ni enyɛ gboɔ lɛ, no mli lɛ eekwɛ.a Beni eji gbekɛ lolo ni etsɔko onukpa lɛ, ebiɔ ehe akɛ, ‘Nɛgbɛ minyɛ yɔɔ? Mɛni hewɔ esa akɛ mada ni ebɛ shihilɛ mli?’ Ákɛ mɔ ni eye afii nyɔŋma-kɛ-etɛ kɛyaa lɛ, no mli lɛ Bernd ji mɔ ni hiɛ dɔɔ waa kɛ sɔlemɔyaa. Be mli ni esusuɔ adesai apiŋmɔ he lɛ, ekɛfee oti ni ma ehiɛ akɛ ebaatsɔ maŋsɛɛ nitsulɔ ni yeɔ ebuaa. Ni kɛlɛ, sanebimɔi ni esɔlemɔ lɛ nyɛɛɛ aha lɛ hetoo ni baaha etsui anyɔ emli lɛ gbaa enaa.

Kɛkɛ ni Bernd kɛ skulnyo ko ni no mli lɛ eji Yehowa Odasefoi ateŋ mɔ kome lɛ wie. Nɛkɛ obalanyo fioo nɛɛ tsɔɔ Bernd kɛjɛ Biblia lɛ mli akɛ, enyɛ leee nɔ ko nɔ ko, ni éwɔ yɛ gbele mli. Bernd kase Biblia mli kukuji babaoo ni tsɔɔ enɛ mli, tamɔ Jajelɔ 9:5 ni kɛɔ akɛ: “Gbohii lɛ, amɛleee nɔ ko nɔ ko.” No hewɔ lɛ, esaaa akɛ Bernd haoɔ kwraa akɛ ekolɛ enyɛ miipiŋ yɛ hetsuumɔhe ko—loo nɔ ni mli wa kwraa fe nakai. Eyɛ mli akɛ atsɔɔ susuma ni gbooo tsɔɔmɔ lɛ yɛ jamɔi babaoo mli moŋ, shi Bernd na yɛ Biblia lɛ mli akɛ gbɔmɔ kɛkɛ ji adesa susuma lɛ. Kɛ gbɔmɔ lɛ gbo lɛ, susuma lɛ egbo. “Susuma ni feɔ esha lɛ, lɛ nɔŋŋ eeegbo!”—Ezekiel 18:4.

Bernd kase gbɛkpamɔ ni yɔɔ naakpɛɛ kɛha gbohii lɛ hu he nii. Lɛ diɛŋtsɛ ekane yɛ Biblia wolo ni ji Bɔfoi lɛ Asaji lɛ mli akɛ: “Jalɔi kɛ mɛi ni ejaaa fɛɛ baate shi.” (Bɔfoi lɛ Asaji 24:15) Kwɛ bɔ ni emli fili lɛ eha, beni ena akɛ nɛkɛ gbohiiashitee nɛɛ baaba mli yɛ shikpɔŋ ni Nyɔŋmɔ baasaa efee lɛ paradeiso lɛ nɔ lɛ!—Lala 37:29; Kpojiemɔ 21:3, 4.

Etsɛɛɛ ni Biblia mli anɔkwa nilee tsu Bernd mumɔŋ hiamɔ nii ahe nii. Bernd tsiii ehe kɛjɛɛɛ jamɔ he. Shi moŋ, eshĩ sɔlemɔ ni nyɛɛɛ agbe ehɔmɔ lɛ mli, ni ekpɛlɛ jamɔ ko ni tsɔɔmɔ damɔ Biblia lɛ nɔ shiŋŋ lɛ nɔ. Ekɛɛ akɛ: “No mli lɛ afii 14 ni eho nɛ, ni mishwako mihe kɔkɔɔkɔ yɛ enɛ ni mifee lɛ hewɔ. Amrɔ nɛɛ, mile akɛ Bɔlɔ lɛ kɛ piŋmɔ baaa mɔ nɔ. Satan ji gbɛjianɔtoo nɛɛ nɔ nyɔŋmɔ, ni lɛ ji mɔ ni esa akɛ ashwa yɛ shihilɛi ni ebɔle wɔhe nɛɛ hewɔ. Shi etsɛŋ kwraa ni Nyɔŋmɔ baajie haomɔ fɛɛ ni Satan je lɛ kɛba lɛ kɛya. Minyɛ hu baaku esɛɛ eba yɛ gbohiiashitee lɛ mli. Kwɛ mlifilimɔ ni enɛ kɛbaaba nɛkɛ!”

Heniianaa lɛ, Bernd nine eshɛ oti ni ekɛma ehiɛ akɛ ebaayatsu nii yɛ maŋsɛɛ koni ekɛye ebua mɛi krokomɛi lɛ nɔ. Etsuɔ nii yɛ maŋsɛɛ, ni eeye eebua mɛi krokomɛi koni amɛkase Nyɔŋmɔ Maŋtsɛyeli lɛ he nii, nɔ ni kɛ amɛ piŋmɔ lɛ baaba naagbee diɛŋtsɛ lɛ. Taakɛ Bernd ji lɛ, mɛi akpekpei abɔ ekase akɛ etsɛŋ ni Nyɔŋmɔ kɛ adesai apiŋmɔ baaba naagbee. Amɛmli filiɔ amɛ akɛ amɛaana akɛ jamɔ ko yɛ ni tsuɔ amɛ mumɔŋ hiamɔ nii ahe nii.—Mateo 5:3.

Mɛni Ji Yiŋtoo ni Yɔɔ Shihilɛ Sɛɛ?

Yɛ be mli ni Anaigbɛ je lɛ yaa nɔ etsɔɔ he ni atsiɔ kɛjɛɔ jamɔ he lɛ, mɛi babaoo biɔ akɛ, ‘Mɛni ji yiŋtoo ni yɔɔ shihilɛ sɛɛ?’ Taakɛ Michael kpá shi ena lɛ, abaana hetoo lɛ yɛ Biblia lɛ mli. Yɛ afi 1970 afii lɛ amli lɛ, Michael basumɔ akɛ ekɛ ehe baawo hegbeyeiwoo kɛ yiwalɛ kuu ko mli. No mli lɛ oti kome pɛ ekɛma ehiɛ—koni egba mɛi ni ebuɔ amɛ akɛ mɛi ni kɛ jalɛ sane ni ayeee yɛ jarayeli gbɛjianɔtoo ni jeee maŋ lɛ tsuɔ he nii lɛ mli lɛ ba lɛ. Ekɛɛ: “Mishĩii shia kɔkɔɔkɔ ni mihiɛɛɛ tu. Miyiŋtoo ji koni magbe maŋkwralɔi wuji kɛ mɛi ni tsuɔ jarayeli nitsumɔ ni jeee maŋ lɛ tsuɔ he nii lɛ babaoo bɔ ni manyɛ. Kulɛ mikɛ miwala baafɔ shi maha yiŋtoo ni tamɔ nɛkɛ.”

No mli lɛ Michael ji sɔlemɔyalɔ, shi mɔ ko kwraa bɛ esɔlemɔ lɛ mli ni baanyɛ atsɔɔ yiŋtoo diɛŋtsɛ ni yɔɔ shihilɛ sɛɛ. No hewɔ lɛ, beni Yehowa Odasefoi ba eshia ni amɛtsɔɔ lɛ hetooi ni Biblia lɛ yɔɔ kɛha saji ni ebi lɛ, Michael bo toi jogbaŋŋ. Ebɔi kpeei ni ato kɛha jamɔ lɛ yaa yɛ Yehowa Odasefoi a-Maŋtsɛyeli Asa ni yɔɔ jɛmɛ lɛ nɔ.

Michael nanemɛi lɛ miishwe koni amɛle miishɛɛ hee ni ena yɛ Biblia lɛ mli lɛ he nɔ ko. Michael wo amɛ hewalɛ akɛ: “Nyɛbaa kpee Hɔgbaa nɛɛ. Nyɛmɛa fioo. Kɛ nyɛsumɔɔɔ nɔ ni nyɛnuɔ lɛ, no lɛ nyɛyaa shia.” No hewɔ lɛ eba mli nakai, beni akɛ minitii 45 ha wiemɔ ni damɔ Biblia nɔ lɛ agbe naa lɛ, enanemɛi lɛ ateŋ mɛi babaoo shĩ asa lɛ nɔ. Shi mɔ kome—Susan—hi shĩ. Obalayoo nɛɛ ná nɔ ni enu lɛ he miishɛɛ waa. Sɛɛ mli lɛ, Michael kɛ Susan bote gbalashihilɛ mli ni abaptisi amɛ akɛ Yehowa Odasefoi. Michael kɛɛ: “Agbɛnɛ mina nɔ hewɔ ni wɔyɔɔ biɛ yɛ shikpɔŋ nɔ. Yehowa ji mɔ ni bɔ wɔ. Yiŋtoo diɛŋtsɛ ni wɔyɔɔ yɛ shihilɛ mli ji, koni wɔná wɔle lɛ ni wɔfee esuɔmɔnaa nii. No ji nɔ ni kɛ anɔkwa miishɛɛ baa!”

Gbɔmɛi akpei abɔ hu yɛ hemɔkɛyeli ni Michael yɔɔ lɛ eko. Amɛkɛ Biblia mli wiemɔ nɛɛ toɔ amɛtsui mli akɛ: “Nyɛhaa wɔboa saji lɛ fɛɛ naagbee toi: She Nyɔŋmɔ gbeyei ni oye ekitai lɛ anɔ! shi enɛ ji gbɔmɛi fɛɛ agbɛnaa.”—Jajelɔ 12:13.

Shihilɛ Mli Naagbai ni Aaadamɔ Naa

Wɔ fɛɛ wɔnaa gbalɛ ni yɔɔ 2 Timoteo 3:1 lɛ mlibaa akɛ: “Naagbee gbii lɛ anɔ lɛ jaramɔ bei baaba.” Mɔ ko kwraa bɛ ni baanyɛ ajo “jaramɔ bei” nɛɛ anaa foi. Shi Biblia lɛ yeɔ ebuaa wɔ koni wɔdamɔ naa.

Susumɔ Steven kɛ Olive, gbalashihilɛ mli hefatalɔi lɛ ahe okwɛ. Beni Yehowa Odasefoi kɛ amɛ bɔi Biblia lɛ kasemɔ lɛ, taakɛ mɛi krokomɛi babaoo ji lɛ, amɛyɛ gbalashihilɛ mli naagbai. Steven tsɔɔ mli akɛ: “No mli lɛ wɔmli miigbála. Esoro otii ni wɔteŋ mɔ fɛɛ mɔ kɛma ehiɛ kɛ nɔ ni wɔsumɔɔ.” Mɛni ye ebua amɛ ni amɛfee ekome kɛhi shi? Steven tee nɔ ekɛɛ: “Yehowa Odasefoi tsɔɔ wɔ bɔ ni wɔɔfee ni wɔnyɛ wɔkɛ Biblia mli shishitoo mlai atsu nii yɛ wɔshihilɛi amli. Enɛ ji klɛŋklɛŋ kwraa ni wɔkase nɔ ni pɛsɛmkunya ni esaaa akɛ afeɔ koni afee mɛi ni susuɔ mɔ he lɛ tsɔɔ. Biblia mli shishitoo mlai ni wɔkɛtsu nii lɛ fee wɔ ekome waa. Agbɛnɛ, wɔnáa gbalashihilɛ ni yɔɔ miishɛɛ, ni yaa nɔ jogbaŋŋ mli ŋɔɔmɔ.”

Mɔ kɛ Nyɔŋmɔ Teŋ Wekukpaa Kpakpa

Taakɛ Gallup niiamlitaomɔ ko ni afee nyɛsɛɛ nɛɛ tsɔɔ lɛ, Amerikabii oha mlijaa 96 heɔ Nyɔŋmɔ nɔ amɛyeɔ ni nɛkɛ mɛi nɛɛ ateŋ mɛi babaoo sɔleɔ kɛhaa lɛ. Ni kɛlɛ, niiamlitaomɔ kroko ni afee lɛ tsɔɔ akɛ, agbɛnɛ mɛi abɔ ni yaa sɔlemɔ kɛ jamɔhe lɛ ayi faaa kwraa dɔŋŋ yɛ afii oha lɛ teŋgbɛ. Amerikabii oha mlijaa 58 kɛɔ akɛ amɛyaa sɔlemɔ shikome daa nyɔŋ loo nɔ ni shɛɛɛ nakai. Eyɛ faŋŋ akɛ, jamɔ hako amɛbɛŋkɛ Nyɔŋmɔ. Ni jeee United States pɛ naagba ni tamɔ nɛkɛ yɔɔ.

Linda da yɛ Bavaria. No mli lɛ Katoliknyo ni sumɔɔ jamɔ waa ji lɛ ni esɔleɔ daa. Yɛ nakai beaŋ nɔŋŋ lɛ, eeshe wɔsɛɛ be shihilɛ he gbeyei. No mli lɛ eleee yiŋtoo ni Nyɔŋmɔ yɔɔ kɛha gbɔmɔ lɛ he nɔ ko kwraa. Beni Linda eye afii 14 pɛ lɛ, ekɛ Yehowa Odasefoi kpe, ni ebɔ amaniɛ akɛ: “Nɔ ni amɛkɛɛ lɛ yɛ miishɛɛ, no hewɔ lɛ mihe woji enyɔ ni akɛkaseɔ Biblia lɛ ni mikane amrɔ nɔŋŋ.” Afii enyɔ sɛɛ lɛ, Linda ha Yehowa Odasefoi kɛ lɛ bɔi Biblia lɛ kasemɔ. Ekɛɛ: “Nilee yɛ nɔ fɛɛ nɔ ni mikase kɛjɛ Biblia lɛ mli yɛ Nyɔŋmɔ he lɛ mli.” Linda shĩ esɔlemɔ lɛ, ni abaptisi lɛ akɛ Yehowa Odasefonyo beni eye afii 18.

Mɛni tsirɛ Linda koni etsake ejamɔ lɛ? Etsɔɔ mli akɛ: “Misɔlemɔ lɛ ye ebua mi koni mana akɛ Nyɔŋmɔ ko yɛ, ni mikase bɔ ni mahe lɛ maye. Shi no mli lɛ minaaa lɛ akɛ mɔ pɔtɛɛ ko, ni eyɛ shɔŋŋ. Jeee akɛ mi-Biblia kasemɔ lɛ ma hemɔkɛyeli ni miyɔɔ yɛ Nyɔŋmɔ mli lɛ nɔ mi kɛkɛ, shi eye ebua mi hu koni maná male lɛ ni masumɔ lɛ. Agbɛnɛ miná mi kɛ Nyɔŋmɔ teŋ wekukpaa ni jara wa, nɔ ko ni jara wa kwraa fe nɔ kroko.”

Anɔkwa Jamɔ He yɛ Sɛɛnamɔ!

Ani ojamɔ lɛ haa onáa mumɔŋ gbɛtsɔɔmɔ, ni etsɔɔ bo bɔ ni Biblia lɛ baanyɛ aye abua bo koni odamɔ shihilɛ mli naagbai anaa? Ani etsɔɔ hiɛnɔkamɔ ni Biblia lɛ yɔɔ kɛha wɔsɛɛ be? Ani ehaa onáa okɛ Bɔlɔ lɛ teŋ wekukpaa ni yɔɔ gbagbalii, ni damɔ Biblia mli anɔkwa nilee nɔ? Kɛ jeee nakai lɛ, onijiaŋ akaje wui. Yɛ nɔ najiaŋ ni oootsi ohe kɛaajɛ jamɔ he lɛ, taomɔ jamɔ ni damɔ Biblia lɛ nɔ shiŋŋ lɛ. Kɛkɛ lɛ obaatamɔ mɛi ni atsɔ gbalɛ nɔ agba amɛhe sane yɛ Biblia wolo ni ji Yesaia lɛ mli akɛ: “Bɔ ni Nuntsɔ Yehowa kɛɛ nɛ: Naa, mitsuji lɛ aaaye nii . . . , mitsuji lɛ aaanu nii . . . , mitsuji lɛ aaanya . . . , mitsuji lɛ aaala kɛ tsuijurɔ.”—Yesaia 65:13, 14.

[Shishigbɛ niŋmai]

[Mfoniri ni yɔɔ baafa 4-5]

Biblia lɛ yeɔ ebuaa wɔ koni wɔbaná wɔle Nyɔŋmɔ ni wɔsumɔ lɛ